O Se Lesona i le Migao
Mai le “Primary Days,” Ensign, Ape. 1994, 65–68.
Sa ou laitiiti i le vaitaimi o le Pau Tele o le Tamaoaiga. Ou te manatua tamaiti na seeina ni seevae mamafa ona sa leai ni o latou seevae ma fiaaai foi ona sa leai ni a latou meaai. O vaitaimi faigata na.
O le Peraimeri o se la susulu lea o le faamoemoe e ui i taimi faigata. Sa 10 o’u tausaga. Na i ai so’u faiaoga ofoofogia. Ou te toe tepa i lena tausaga o lo’u tausaga sili lea ona manaia i le Peraimeri, ma ou te faapea atu, na mafua ona o lo’u faiaoga maoae. Sa le’i faapea ona o tamaiti o la’u vasega sa faapitoa ona fiafia pe sa ese foi le amiopulea lelei, e lē o lena.
O le talie o tamaiti ma le talanoa o teineiti i na taimi, atonu na avea lea ma mea aupito luitauina i o matou taitai Peraimeri.
I se tasi aso a o matou tuua le falesa mo o matou potuaoga, sa ou matauina ai sa saofai ai lava le peresitene o la matou Peraimeri. Sa ou tu ma tilotilo atu ia te ia. Sa nofo lava na o ia i le laina pito i luma o nofoa uumi, ma sei mai i fafo lona solosolo, ma amata ona tagi. Sa ou savali atu ia te ia ma faapea atu, “Sister Georgell, aua e te tagi.”
Sa fai mai o ia, “Ua ou faanoanoa.”
Sa ou tali atu, “O le a le mea ua tupu?”
Sa fai mai o ia, “E le mafai ona ou taulimaina le vasega Fau Auala. E mafai ona e fesoasoani mai ia te a’u?”
Sa ou tali atu, “Ioe.”
Sa ia faapea mai, “Oka, o le a manaia tele lena, Toma, pe afai o le a e fesoasoani mai.”
Ae o le mea ou te le’i iloa i lena taimi, o a’u le isi tagata na ala ai ona maligi ona loimata. Sa faamanuiaina o ia i lona lisiina o a’u e fesoasoani atu i le ausia o le migao i la matou Peraimeri. Ma sa matou ausiaina.
Amata
Ata na tusia e Dilleen Marsh; Faatusa o Keriso, na saunia e Heinrich Hofmann, mai faaaloaloga a le C. Harrison Conroy Co.