Mau Taia i se Cumbuca
Aua nei utia oe e pei o se manuki. E mafai ona e faamamulu ese.
E faaaoga e tagata moni o Pasila se mailei manuki e ta’u o le cumbuca. Latou te vaneina se pu i se uaea faaofuofu, ia lava lona tele ina ia mafai ona faaofiofi ai i totonu le lima o le manuki. Ona latou tu’imau lea o le uaea faaofuofu i le eleele, ma o totonu o le uaea faaofuofu latou te tuuina ai se mea e faatosina ai le manuki, e masani lava o se fualaau aina e pei o se fa’i pula. E tago atu le manuki faavalevalea i le fa’i, ona uumau lea o lana moto, ma le mafai ai ona aumai i fafo lona lima. Ma na te le faamamuluina foi le fa’i, o lea e utia ai o ia.
O le a faia foi e Satani ni mailei faapena mo i tatou. Ae e le tatau ona tatou valea e pei o se manuki. E mafai ona tatou faamamulu ese le mailei. O le a taumafai o ia e faamanaia ma faamatagofie ana mailei. Ae o le iuga, e le manaia ma aulelei; e mataga, ma o le taunuuga faaiu foi e matautia. Ua i ai lo tatou ola faavavau i se tulaga lamatia, o lea e ao ai ina tatou atamamai atu nai lo le manuki. E tatau ona tatou aloese mai mailei pe afai e mafai, ma e tatau ona faamamulu se mea sa le tatau ona tatou fetagofi i ai.
Aua le Tuu Avanoa i Siva
I se tasi po i le 16 o o’u tausaga, ou te manatua lo matou foi mai ma a’u uo e toatolu mai se gaoioiga a le Ekalesia. Sa matou i ai uma i le korama a ositaulaga ma sa matou fiafia e mafuta faatasi. Sa faatu le matou taavale i luma o lo’u fale, ma sa matou talanoa i le manaia o le taimi sa matou i ai i le falesa ae fai mai loa se fautuaga a se tasi o a’u uo.
Sa i ai se fale kapalu na latalata mai sa lauiloa i le tupulaga. Sa fai a latou siva i Aso Faraile ma Aso Toonai. Na fai mai o ia, “E tatau ona tatou o i se tasi o na siva.” Sa ia fautua mai foi e mafai ona matou faaaogaina le avanoa e talai atu ai le talalelei i le autalavou iina. Sa taumafai le isi toatolu, e aofia ai ma a’u e ta’u atu ia te ia e le o se manatu manaia lea. O le a le tutusa ia tulaga faatonuina e pei ona i ai i gaoioiga a le Ekalesia. O le a i ai tagata ulaula ma inu ava. O le a le talafeagai le faiga o lavalava o tagata. O le tele lava o musika e le talafeagai, e malomaloa, ma soona pao, e masani ona tumu i upu faatosina.
O le uo lenei o se tagata lelei, o se alii talavou malosi foi i le ekalesia. Ae sa finau mai lava e tatau ona matou o. “Pau lava le mea ia aua tatou te faia ni mea leaga,” o lana tala lea, “o le a leai lava se afaina.” Sa taumafai le toatolu o i matou e aveese mai lona mafaufau i lea manatu, ae na le mafai. Na iu lava ina fai mai o ia, “Ia o le a ou alu la a’u ia. O le a ou faaali atu ia te outou e leai lava se mea e sese ai. Ma o le a outou misia se taimi malie ma le fiafia.” Sa naunau lava o ia e tuu atu lona lima i totonu o le cumbuca.
Sa alu o ia i le siva i le Aso Faraile. O le aso na sosoo ai, o le Aso Toonai, na sau ai i gaoioiga sa lagolagoina e le Ekalesia, ma gugutu mai i le malie ma le manaia na i ai [le siva i le fale kalapu]. Sa ia valaauliaina i matou ia matou o i le vaiaso na sosoo ai. Matou te le’i o lava, ae na iu lava ina alu soo i ai o ia seia oo ina amata foi ona alu i siva i po o Aso Toonai. Ma tuai atu ai i le lotu i le Aso Sa ona o lona vaivai tele mai le umi o ana tafaoga. Na iu lava ina amata ona lē lotu.
Sa Le Mafai Ona Faamamulu e La’u Uo
Na mavae ni taimi ma ua le toe toaga o ia i le lotu. Sa iu ina le alu i se misiona. I ni nai tausaga ua mavae, sa ou faafesootaia ai o ia i le telefoni. Sa nofo o ia i se nuu e mamao ese ma a’u. Ina ua amata ona ma talanoa e uiga i le Ekalesia, sa matuai inoino lava o ia, sa le o le tagata lea na ou masani i ai.
I lo’u toe tepa i tua, sa ou mafaufau ai ia i matou e toafa i totonu o lena taavale. O le isi toatolu o loo tumau lava le malolosi i le Ekalesia, ua faaipoipo i le malumalu, ma auauna atu i tulaga faaletaitai o le perisitua. Ae o lena uo lelei lava e toatasi na aluese, ua faaipoipo i fafo atu o le Ekalesia, ma e oo mai i le aso ua matuai le toaga lava i le Lotu. E le o iloa e lana fanau ia faamanuiaga o le talalelei. E ui ina mafai lava ona salamo, ma ou te faamoemoe o le a ia salamo, ae ua maumau ona taimi ma avanoa taua.
O lena afiafi i totonu o le taavale, sa i ai le toafa o i matou i se fetaulaiga ala. Ou te le’i iloa i lena taimi le taua o le faaiuga. Ae sa matou iloaina lava sa lē talafeagai ona matou o i le mea na manao matou te o i ai. Ou te manatua sa ia faapea mai, “Tatou o i ai iina, ma o a tatou faataitaiga lelei o le a liliu mai ai nisi o na talavou.” Ae na faaseseina o ia, ma iu ai ina avea o ia ma tagata ua liliu atu i se ala ese. A ou toe tepa i tua, ua mafai ona ou iloa o se mea e foliga mai e laitiiti e mafai ona i ai se aafiaga tele i le aluga o tausaga. Ua ou fiafia ona sa mafai ona ou filifilia le mea tonu.
O Le Mea e Tatau Ona Tatou Tutu Ai
I le Mataupu Faavae ma Feagaiga 87:8 ua fautuaina ai i tatou ia, “Tumau ai i mea paia.” E tatau ona tatou tutu i nofoaga ua faamoemoe le Alii tatou te tutu ai. E ao ona tatou filifili i le asō o le a tatou le tuuina lava o tatou tulaga faatonuina ia lamatia ona o se isi lava mea. O le a tatou le faatagaina Satani e faaseseina i tatou. O le a le utia lava i tatou.
I le Tusi Paia tatou te faitau ai ia Tavita, o lē a’o avea ma se taulealea leoleo mamoe, sa faamatalaina o se alii sa i ai se loto e pei o le finagalo o le Alii lava ia (tagai 1 Samuelu 13:14; 16:7). O le uii o atalii e toavalu, o le na faauuina e Samuelu e avea ma tupu o Isaraelu, “ona osofia lea o Tavita e le Agaga o Ieova, na afua mai i lea lava aso” (1 Samuelu 16:13). Sa tau o ia ma faatoilaloina Koliata i le suafa o Ieova (tagai 1 Samuelu 17:45–51). E ui lava o se tagata na sola ese, ae sa faamanuiaina o ia, taialaina, ma iloa o le tagata na filifilia e le Alii, ma iu ai ina avea ma tupu malosi o Isaraelu (tagai 1 Samuelu 19–26; 2 Samuelu 5:3, 8, 10).
Ae na i ai le taimi na le tu ai Tavita i se nofoaga paia. Nai lo lena, sa tu o ia i le taualuga o le fale ma vaavaai atu i se tamaitai lalelei sa faamālū. E ui o ia o le ava a se isi tagata, ae sa faananau atu i ai [Tavita] ma na te le’i lafoaia ona mafaufauga leaga. Sa la mulilulua, ma ina ua maitaga o ia, sa taupule loa e [Tavita] le fasiotiga o lana tane. (Tagai 2 Samuelu 11:2–17.) Nai lo le aloese mai le faaosoosoga ina ua oo atu ia te ia, sa gauai atu i ai Tavita. Sa faaaluina aso na totoe o lona olaga e faavauvau ai i le mea na ia faia.
Filifiliga Laiti, Taunuuga Tetele
E faapefea la ona e iloa le nofoaga e te tu ai ma le mea e tatau ona fai? O se tasi o punavai o le Mo Le Malosi o le Autalavou. E tatau ona e malamalama lelei i le tamaitusi lena. O loo manino lava aoaoga i laei ma musika e le talafeagai, o ituaiga gagana e tatau ona e faaaogaina, o au ituaiga uo e tatau ona i ai, ma le tele o isi mea. E tatau ona e malamalama lelei i nei tulaga faatonuina, ma e tatau ona e faia nei se faaiuga o le a e usitaia ia tulaga faatonuina ae aua lava nei e fetuunaia. E le mafai ona tuua le faaiuga seia oo i le taimi o le faaosoosoga.
Na saunoa mai Peresitene Spencer W. Kimball (1895–1985): “O mea lelei o le a e manao e ausia e na o le tasi lava le taimi e tatau ona faia i ai lau faaiuga—e pei o le alu i se misiona ma le ola agavaa ina ia mafai ona e faaipoipo i le malumalu—ona faigofie ai lea ona faia isi faaiuga uma e faatatau i nei sini. A leai, o manatunatuga taitasi e oo atu e lamatiaina, ma o mafaufauga e le manino lelei e ono iu ai i le sese. E i ai nisi o mea e fai e le Au Paia o Aso e Gata Ai, ae o nisi foi mea tatou te le faia. O le vave ona fai lau faaiuga e fai le mea sa’o, o le lelei foi lena mo oe!”1
Au uo talavou pele e, ia outou atamamai atu nai lo o se manuki! Aua nei e tago i se mea e foliga mai e faatosina ona e musu lea e faamamulu. Ia e tu i le mea e finagalo le Alii e te tu ai, fai le mea e finagalo o Ia e te faia, ma o le a le mafai ai ona e mau taia i totonu o se cumbuca.
Ata na tusia e Brian Call
Taumatau: ata na saunia e Matthew Reier