Na Puipuia Moni i Matou e le Alii
I le aso 7 o Iuni, 1994, na matou toe foi ai i le vaa i lo matou fale ma isi faifeautalai e toalima, ina ua uma se konafesi faalesone i Samar i Sasae, i Filipaina. Na susū ma mamafa le ea o le po. Ina ua uma ona faaputu a matou ato malaga i fata i le fogafale lona lua, e toafa i matou na matou toe o atu i le fogavaa pito i luma ona o le vevela. Ae sa nonofo ai pea Elder Dunford ma Bermudez, ma sa momoe.
Sa ma talanoa lava ma Elder Kern ae ma faalogoina loa le pa o se mea e pei o se fanai’a mai i le itu taumatau pito i luma o le vaa. E le’i umi lava, ae lofia le pito i tua o le vaa i le afi lea na atili sasao ona o le suauu mai le potu o le afi o le vaa. Sa lilofia le auala savali i le asu, sosoo ai ma le pe o le paoa lea na tuua ai pasese atuatuvale i le pogisa.
Sa faapotopoto faatasi i matou e toafa lea sa i luga i le fogavaa, ma tatalo mo ni mafaufauga toafimalie ma le manino ma mo le Agaga e taialaina i matou. O le taimi lava lena ina ua uma la matou tatalo, na savali atu ai Elder Valentine i totonu o le vaa e sue mai ni ofu faaola. I totonu o le potu sa fetaui ai ma Elder Dunford, o le na tuuina atu ia te ia ni ofu faaola se lua ma alu atu e sue Elder Bermudez. Sa maua foi i le pogisa e Elder Valentine nisi ofu faaola se lua. E ui lava i le vevesi, ae i se tulaga faavavega, sa toe tau mai ai o ia i le auala savali e aunoa ma se tagata na faalavelave ia te ia, ma e 20 sekone ae toe oo mai i le pito i luga o le vaa. O le taimi lea ua tumu atoa le taumua o le vaa i le pasese, ma ua lata mai lava le mumu o le afi. Sa leai lava se isi filifiliga e fai na o le feosofi ese loa. Sa faamaulu o matou ofu faaola ma fai se tatalo puupuu ae matou te le’i feosofi i le sami. Na tulei atu i tua e se vaega o tagata atuatuvale ia Elder Valentine, ae na oo atu foi i le sami e 10 futu (3 m) le maualalo e aunoa ma se afaina.
Sa malama atoa le vaega sa i ai le vaa ona o le afi, ma sa matou faalogoina le feei o tagata na siomia i matou. Sa faatasitasi le toafa o i matou i se vaega e le mamao mai le vaa, i le totonugalemu o le motu o tagata na tau fai feosofi i le sami, ma fe’ausi ese ina ia o ese mai le mu o le vaa fogafale tolu. Sa matou toe tatalo foi, e faafetai ai i lo matou Tama oi le Lagi mo le puipuiga na matou maua ma talosagaina e fesoasoani i le sueina o a matou soa, o Elder Dunford ma Elder Bermudez. Sa vaai Elder Valentine ia i la’ua o ofu o la ofu faaola, ae ma te le’i vaai ia i la’ua i le fogavaa.
Ina ua faasolo ina pe le afi, sa matuai pogisa atoa le po, ma na fafati mai foi galu, lea na faigata ai ona matou faaopeopea e tusa lava pe na fai o matou ofu faaola. Sa matou toe tatalo foi, ae o le taimi lenei sa matou ole atu ai ia taitai i matou i se tagata e mafai ona matou fesoasoani i ai. E le’i umi ae matou tau atu i ni tina se toalua ma ni tamaiti ma se toeaina, ma sa matou auaua’i e taofiofi tagata uma ina ia faaopeopea. Sa mafai lava ona matou faaopeopea seia oo ina matou maua se vaa faaola laitiiti ma tuu i ai le pasese, ae sa matou manatu e mafai ona faaaoga e isi, ma o lea na matou faatalitali ai pea i le sami.
Ina ua mavae le 30 minute na amata ona malosi mai le matagi, ma amata ona sau le timu, ma ua faatuputupulaia foi le maualuluga o galu. Sa matou le mautinoa le mea na tupu i isi alii faifeautalai ma sa matou iloa o le a taofia e le matagi soo se taumafaiga laveai. Sa tatalo Elder Kern, o le sa fai ma fofoga o la matou vaega, ina ia to’a le matagi ma ia puipuia isi alii faifeautalai. E le’i umi se taimi, ae uma le matagi.
Sa matou faatalitali, ma sa maofa i mea na matou molimauina, ona matou faalogo atu lea o taufono atu Elder Dunford ia Elder Kern. Sa matou fe’ei ma feausi atu ia i latou. Sa mafai ona feosofi ese mai Elder Dunford ma Bermudez mai le vaa e ala i le feaei mai i se faamalama, ma e toalua ni fafine, e leai ni ofu faaola, sa pipii mai i o la’ua papatua.
Sa matou faatasitasi mo sina taimi, ona matou vaaia lea o moli o ni vaa fagota na o ese mai le matafaga o Kuiana. E le’i umi ae tau mai se tasi o vaa ia te a’u, ae ua toeitiiti lava tumu, o lea sa matou tuu atu i ai ia fafine e toalua ae matou faatalitali.
E lua itula na matou i ai i le sami ae maua loa matou e se isi vaa ma ave ai i matou i le matafaga. Sa matou taunuu atu i le falemautotogi o faifeautalai i Kuiana i le taeao po o le aso 8 o Iuni, o lo’u aso fanau lea na atoa ai lo’u 21 tausaga. Sa matou tatalo mo le laveaiina saogalemu o isi na i ai lava i le sami ma toe tuuina atu ai le faafetai i lo tatou Tama Faalelagi mo le puipuiga na matou maua.
O le a le galo lava ia te a’u lenei aafiaga, ma ou te faamoemoe o le a le galo lava ia te au le lagona o le saogalemu na matou maua i le taimi atoa o lenei faalavelave. Na puipuia moni i matou e le Alii. Mai lenei aafiaga, na ou maua ai se molimau malosi atu o loo faatasi le Alii i Ana fanau e le aunoa ma tuuina mai ia i tatou le filemu ma le fesoasoani tatou te manaomia i le taimi o o tatou tofotofoga.
Ata na tusia e Michael T. Malm