Auaunaga i le Ekalesia
Auaunaga Faamalieina
Sa savali atu o ia i totonu o se potu laitiiti i Filipaina ina ia faatalanoaina e sauniuni ai mo le mauaina o le Perisitua Mekisateko. Ou te le’i iloa pe o le a lona matua, ae e oo foi i tagata matutua atu o le paranesi na latou valaauina o ia o Tatay (tamā).
Ina ua ou fesili atu pe mata o le a malamalama o ia i la’u faaPeretania, sa ataata o ia ma le alofa ma tali mai ma le faaeteete, “Ioe, o le a ou malamalama i ai.”
Ina ua maea le ma faatalanoaga sa ou fesili atu ia te ia pe i ai lava se mafuaaga e le tatau ai ona faauuina o ia i le perisitua. Sa ia faapea mai ina ua mavae sina taimi, “Atonu e le tatau ona ou maua le perisitua.”
Sa ou fesili atu ma le le malamalama, “O le a le uiga o lau saunoaga?”
“E na o le tasi lo’u nifo,” na ia tali mai ai. “Ou te iloa e le manaia tele o’u foliga ou te maua ai le perisitua. E leai se afaina pe a e saunoa mai e le mafai ona ou maua le perisitua.”
Sa ma saofafai mo se taimi a o ou mafaufau loloto i lana faamatalaga, ma sa ou tagi. Ona tuu atu lea o lo’u lima i luga o lona lima ma ou fai atu ia te ia, ua ou vaai i le toatele o tagata lelei o loo umia le perisitua e leai ni o latou lauulu, ae o loo ia te ia se lauulu manaia ma mafiafia uliuli. Sa ou ta’u atu foi ia te ia e uiga i tagata o loo umia le perisitua e na o le taitasi o latou taliga po o mata, ae o ia o loo i ai uma ona mata ma ona taliga.
Ona ou faamatala atu lea i ai o sa’u uo ua leai le isi ona lima ona o le kanesa. Ina ua tatalo lena uso i lo matou fale ma ole atu i le Tama Faalelagi e faamanuia lo’u toalua ma la’u fanau, na ou iloaina o ia o se auauna maoae a le Alii. Sa ou faamatala ia Tatay le tuuina e lenei uo o lona lima e tasi i luga o le ulu o se teineitiiti e faamanuia ona sa lata ina oti, ma sa ou lagonaina le mana o le perisitua i lena aso.
Na ataata lenei toeaina Filipino ma fai mai, “Ou te faamoemoe foi o le a taliaina la’u auaunaga i le Atua.”
E tofu uma i tatou ma lē atoatoa i se itu taua, ma ua tatou iloa uma lava lagona o le le agavaa lea e o mai faatasi ma se valaauga fou. Ae e talia e le Atua le taulaga aupito faatauvaa o se tagata Paia aupito lotomaulalo, ma e mafai e i tatou taitoatasi ona faia se eseesega. E le tatau ona tatou matamumuli pe mamā; tau lava o le tuuina atu o a tatou taumafaiga aupito sili i le Alii. Ona Ia faamanuiaina lea o i tatou ma faalauteleina o tatou valaauga, ma i se auala ofoofogia, e faaatoatoaina ai i tatou.