James E. Talmage (1862–1933)

E 13 tausaga o James Edward Talmage i le taimi na siitia atu ai lo latou aiga i Provo, Iuta mai lo latou atunuu moni o Egelani.

O le atamai ma le galala mo le poto, na avea ai James o se tasi o faiaoga lē tumau i le Brigham Young Academy i Provo, Iuta, i le taimi na 17 ai ona tausaga. Sa faaauau ana aoaoga i le suesueina o le kemisi ma le suesueina o maa ma minerale i le Iunivesite o Lehigh i Penisilevania ma le Iunivesite o Johns Hopkins i Baltimore, Maryland. O lona avea ma sui auai i le tele o sosaiete lauiloa faasaienitisi na mafai ai ona fesootai atu James Talmage i le toatele o tagata taua ma lomiga lea na fesoasoani ia te ia i le taulimaina o le tele o le faailoga tagata na feagai ma le Au Paia o Aso e Gata Ai i lena vaitau.

Sa faaipoipo atu o ia ia Mary May Booth i le 1888. Sa avea i laua ma ni matua o se fanau e toavalu. Mai le 1894 i le 1897 sa avea ai o ia ma peresitene o le Iunivesite o Tesareta i le Aai o Sate Leki (lea ua ta’ua nei o le Iunivesite o Iuta). I lena vaitaimi sa ia faatauina ai se tasi o uila vilivae fou alumia ma sa masani ona tietie ai. I se tasi afiafi e itula na tuai atu ai i le fale mo le taumafataga o le afiafi, ma sa maosiosia ona foliga, tafetotoi, ma palapala. O tafatafa o lona fale sa i ai se alalaupapa e na o le tasi le laupapa e sopoia ai se alavai. E masani lava ona oso ese mai le uila ae savali e sopoia ai le alalaupapa. Ae o le taimi lenei, sa ia manatu e mafai ona kolosi i le uila. Sa faafia ona taumafai e sopoia, na pau faafia, seia oo lava ina mafai ona ia kolosia.

O Elder Talmage o se polofesa mataalia, ma o nisi o ana saunoaga ma lesona na avea ma faavae o nisi o tusi ua lauiloa ai o ia, e aofia ai le The Articles of Faith. A o le’i oo i lona valaauga i le Korama a Aposetolo e Toasefululua i le 1911, na talosagaina o ia e le Au Peresitene Sili e tusi se tusi e uiga i le soifuaga ma le galuega a le Faaola. Mulimuli ane, na faamatuu atu ai se potu o le Malumalu o Sate Leki ina ia mafai ai e Elder Talmage ona taulai atu i lana tusiga. O lana tusi e 700-itulau o le, Jesus the Christ, na lolomi i le 1915 ma na toe lolomi i nisi taimi talu mai lena aso.

Lalo: O Le Korama a Aposetolo e Toasefululua i le 1921. O Elder Talmage o loo i le laina i tua, lona lua mai le tauagavale.