O Le Faamanuiaga Faaleperisitua o Lindsay

Saunia e Myrna Hoyt

“O i latou uma o e maua lenei perisitua ua talia a’u, ua fetalai mai ai le Alii” (MFF 84:35).

E faavae i se tala moni

Na lagona e Lindsay le popole a o tilotilo solo i le potu o le falemai. Na ia iloaina o le a i ai se tagata e sau e ave o ia i le potu tipitipi mo lona taotoga. Sa tutu latalata atu Tina ma Tama i autafa o lona moega.

O ni nai aso na muamua atu, na faia ai e le aiga o Lindsay se afiafi faaleaiga faapitoa. Sa saunia e Tina se lesona e uiga i faamanuiaga faaleperisitua. Ona faamatala atu lea e tagata taitoatasi o le aiga se taimi na faamanuiaina ai o ia e le mana o le perisitua. Sa lagona e Lindsay le toafilemu ma le fiafia a o faalogologo atu ia latou molimau. Sa faamalamalama mai e Tina o le lagona toafilemu o le Agaga Paia lea o loo ta’uina atu ia Lindsay o mea na ia faalogoina e moni ia.

I le faaiuga o le lesona, sa tuu ai e le tuagane matua o Lindsay, o le o loo i ai le Perisitua Mekisateko, se mataua o le suauu paia i luga o lona ulu ma faia se tatalo. Ona tuuina atu lea e Tama sona faamanuiaga matagofie lava. Sa fai mai o ia o loo silafia ma alofaina o ia e le Tama Faalelagi. Fai mai o ia, o le a faamanuiaina fomai i la latou galuega ma o le a manuia lona taotoga. Sa ia folafola atu foi o le a maua e Lindsay se faalogoga faapitoa o le mafanafana ma le toafilemu lea o le a suia ai lona fefe.

A o faatalitali ai i le falemai, sa taumafai lava Lindsay ina ia lototele, ae na tafetafe malie ifo lava ona loimata. Na o mai i totonu o lona potu ni alii se toalua na laei i ofu o le falemai ma fai mai ua oo i le taimi o le taotoga. Sa agalelei i la’ua a o la taumafai e faafiafia o ia, ae sa le’i aluese ai le fefe o Lindsay.

Sa fusi atu e Lindsay ia Tina ma Tama mai lona moega. Ona toso ae lea e se tasi o alii le pa o lona moega ina ia saogalemu o ia a o la tosoina atu lona moega i le auala savali. A o faliu atu Lindsay e tilotilo atu pe o le a le mea o loo ia faia, sa ia vaaia se mama siliva masani i lona tamailima. Sa faatumulia lona loto i se lagona mafanafana ma le toafilemu ina ua ia vaaia mataitusi FMT i luga o le mama. Sa ataata Lindsay a o faasolosolo malie ese atu lona fefe. Sa ia iloaina o le a manuia mea uma.

Elder Dallin H. Oaks

“O faamanuiaga o faamalologa e oo mai i auala e tele, e fetaui lelei ma o tatou manaoga taitoatasi.”

Elder Dallin H. Oaks o le Korama a Aposetolo e Toasefululua, “Na te Faamaloloina i Latou e Mafatia i Avega,” Liahona, Nov. 2006, 7.

Su’e Mea Nei

E toaele tagata ma mea na tuuina atu ia Lindsay le mafanafana ma le lagolago. Su’e mea nei o loo natia i le potu o Lindsay i le falemai: o se malumalu, o se faiaoga Peraimeri, tusitusiga paia, o se mama FMT, o lona tina, o lona tama, o lona tuagane, o lona uso, o se tusipese, ma se piano uila.

Ata na tusia e Adam Koford