Manatuaina o mea silisili a le Atua
Tauvaga o Faatufugaga Lona Valu Faavaomalo
Manatunatu i le tele o meaalofa ma faamanuiaga ua tuuina mai e lo tatou Tama Faalelagi ma Iesu Keriso ia i tatou. O le iloaina o nei meaalofa ma faamanuiaga i o tatou olaga, tatou te faaali atu ai lo tatou faaaloalo mo le Atua ma faamalosia ai a tatou lava molimau patino. E mafai ona faaalia lo tatou faatuatua i nota o se viiga, o le mamanuina o se kelei, po o le olo a se pulumu valiata.
O le savali atu i le faaaliga o le Tauvaga Faatufugaga Lona Valu Faavaomalo i le Maota Autu mo Konafesi i le Aai o Sate Leki, Iuta, e pei lava o le savali atu i totonu o se sauniga molimau a tagata o le ekalesia mai atunuu e 44. I le Mataupu Faavae ma Feagaiga 115:5 tatou te faitau ai, “Ina tutulai ia ma susulu atu, ina ia faia lo outou malamalama ma tagavai mo atunuu,” ma o galuega a nei tusiata o le Au Paia o Aso e Gata Ai ua faia ai le mea tonu lena.
O lenei tauvaga e tai tolu tausaga ma fai, na faaulu mai ai e tagata tauva ni faatufugaga e aofia ai atavali ma mamanu o mea taulima e atagia ai le autu “Manatuaina o Mea Silisili a le Atua.” O lo tatou aiga i le lalolagi, o le talalelei toefuataiina, ma le Togiola faapelepele a lo tatou Faaola o nisi ia o mataupu ua faalauteleina e tagata tusiata. Mai le 1,089 o faatufugaga na faaulu mai, toeitiiti lava 200 na filifilia mo le faaaliga, e aofia ai ata mamanu e 20 na maua Taui Tatau ae 18 na maua Taui o Faatauga. E ui ina ua maea le faaaliga na faia i le Maota Autu mo Konafesi, ae e mafai ona maimoaina i luga o le initoneti i le ArtExhibit.lds.org. O le vaaia o faatufugaga e ofoina mai ai se avanoa e faamalosia ai faaleagaga e nei molimau faitino.
Luga: O Le Ava Amio Lelei, o Ai Ea Se ua Maua? II, na saunia e Louise Parker, Aferika i Saute, Purchase Award
“Sa ou manao ia atagia ai le mau [Faataoto 31] ma faamanatu ai foi uiga na soifua mai ma tamaitai i Aferika. E matua sogasoga tele i latou ma lima foai ma onosai … faatasi ai ma lo latou lava mamalu.”
Lalo: Alofa, na saunia e Nnamdi Okonkwo, Nigeria, Merit Award
“O lenei faatagata apamemea o se saafiafiga i le tulaga faaletina.”
Agavale: Ou te Alu i Mea E te Tofia, na saunia e Ramon Ely Garcia Rivas, Ecuador, Purchase Award
“E mafai ona iloa atu e se tagata ia faifeautalai talavou o loo aoao atu le talalelei i se aiga sailiili e nonofo i se fale faaopeopea, o le faiga masani lea a tagata o le Vaitafe o Babahoyo i Ekuatoa.”
Taumatau: O Se Malologa i le Ala, na saunia e Carmelo Juan Cuyutupa Caares, Peru
“Sa lagona e paionia ni tulaga laiti e olioli ai i le taimi o la latou sopo lea na mafua ai ona latou malolo mo sina taimi, e ui lava ina latou lagonaina le vaivai, ae sa latou malolo lava i le ala.”
Agavale: Latou te Le’i Masalosalo, na saunia e Joseph Brickey, ISA
“Ioe, ua aoaoina [fitafita talavou] e o latou tina, pe afai latou te le masalosalo, e laveaiina i latou e le Atua” (Alema 56:47).
Luga: Tatou te Tuuina Atu le Faafetai (Faataoto 22:6), na saunia e Elisabete Lina Miota, Pasila
“O le tatalo na aoaoina e matua, o le fesootaiga muamua lea ma le Tama Faalelagi e mafai e se pepe e 16-masina le matua ona aoaoina ma faataitai i ai.”
Taumatau: Tulagaaao o le Faatuatua, na saunia e Alfred Igbinigie, Nigeria
“O le ata vane i le laupapa ua faaalia ai faigata o le Au Paia i Misuri, 1838.”
Luga: Agape, na saunia e Valeriano Ugolini, Italia
“O lenei atavali o se faatusa vaaia ma faailoga o le alofa o le Atua i tagata, ma le alofa o le tagata i le Atua, e pei ona faamatalaina i le Ioane 3:16.”
Lalo: Pupuni o le Lagi, na saunia e Emily McPhie, ISA, Purchase Award
“[O le vaavaai atu i la’u tama teine laitiiti] ou te maofa ai ma maligi o’u loimata. Na pei lava e matala pupuni o le lagi i ona mata ma liligi mai i ai le alofa ma le malamalama. O fanau o ni meaalofa faapelepele.”
Agavale: Kamupani Taavale Tosolima a Matini, Aiga o Mellor, na saunia e Douglas McGarren Flack, ISA
“Na ola ma manuia uma lenei aiga e toaiva i le savaliga i Siona.”
Taumatau: Mauaa, na saunia e Heidi Renee Somsen, Kanata
“E pei ona fusia e aa se laau i le palapala, e fusia faatasi foi aiga i le talalelei i le alofa ma i se auala moni e ala i sauniga o le malumalu.”
Taumatau: Saunia mo le Sapati, na saunia e Mthulisi Ncube, Zimbabwe
“O le teine talavou o loo faitau ana mau faatonuina o tusitusiga paia, ae o fafine o loo tata o latou lavalava e sauniuni ai mo le Sapati i nuu maotua o Aferika i Saute.”
Luga: Togalaau i Ketesemane, na saunia e Derek J. Hegsted, ISA
“I le taimi o se malaga i Isaraelu, sa ou tau atu ai i se togalaau olive lea na ou mafaufau loloto ai pe aisea na ‘maliu soo atu i ai’ Keriso i Ketesemane (tagai Ioane 18:2). … O ituaiga meaola uma e [i ai] se sootaga ma le Mataisau Sili. … E ala atu i le atavali, e foliga mai o se mea tatau le saafi i mea uma ua molimau mai i Lona paia.”
Luga: Faasaga Atu i le Faavavau, na saunia e Del Parson, ISA
“A o faasolo ina uma le aso, e mafaufau le Faaola i le fuafuaga a Lona Tama. O la o vaa fagota e tolu ua faatusaina i satauro na faatalitali mai mo Ia i le vaaiga faaiu o Lona soifuaga i le lalolagi.”
Agavale: Aoao Mai ia Ou Ui i le Malamalama, na saunia e Ai Meng Tsai, Taiwan, Purchase Award
“Ua ou faaali atu le manatu o loo tuuina mai i lenei pese lauiloa a tamaiti.”
Luga: Ua Faamagaloina Ana Agasala, Aua ua Alofa Tele Mai o Ia, na saunia e Roger Cushing, ISA
“O le faatuatua ma le salamo o le fafine na oo atu ai i lona sailia o le faamagaloga a le Alii. … E ala atu i le alofa faaola o le Alii, na mapuna a’e ai ia te ia le faamoemoe.”