Bati og Nawong nga Piso nga Itik o Halangdong Gansa? Kini Nag-agad ra Kanimo!
Isip usa ka bata, ako nakahinumdom sa akong inahan nga mobasa ngari kanako sa istorya nga “The Ugly Duckling” ni Hans Christian Andersen. Siguro kini iyang gihimo tungod kay ako maulawon ug mibati nga ako dili maapil sa akong mga kaedad, apan ang panumduman ug ang leksyon niana nga istorya nagpabilin ngari kanako kanunay.
Sa bersyon nga akong nahinumduman, usa ka inahan nga itik mapailubon nga nagpaabut nga ang iyang mga itlog mapusa. Sa wala madugay, ang bag-ong natawo, yellow og kolor nga mga piso nanggawas sa itlog nga nakapalipay sa inahang itik. Apan, adunay usa pa ka itlog nga mas dako og gamay nga wala pa mapusa. Ang inahan ug ang iyang mga piso nga itik nagpaabut ug nagtan-aw. Sa katapusan sa dihang ang itlog napusa na, ang yellow og kolor nga mga piso nga itik nakabantay nga kining bag-ong miyembro sa pamilya lahi og dagway. Sila nagpundok kaniya ug mipahayag ngadto sa ilang inahan ug amahan, “Dili siya sama kanato. Bati siya og nawong.” Ila kining gibiyaan sa iyang puy-anan nga nag-inusara ug nanglangoy palayo. Ang bati og nawong nga piso milayas sa pugaran ug naningkamot nga motago. Ang matag butang nga iyang nasinati negatibo ug makapawala sa kadasig. Kanunay maghunahuna siya sa iyang kaugalingon, “Ang tanan dili ganahan nako tungod kay ako bati og nawong.”
Dayon usa ka milagro ang nahitabo sa iyang kinabuhi. Siya nakakita og uban kinsa sama niya og dagway ug molihok nga sama gayud sa iyang linihokan! Siya nahimong higala ngadto kanila, ug sila midala kaniya ngadto sa ilang inahan ug mihangyo, “Mama, mama, kami nakakita og gamay nga igsoon! Mahimo ba siyang mopuyo uban kanato hangtud sa hangtud?” Ang maanyag, madanihon nga inahang gansa milikos sa iyang puti nga pako ngadto sa bati og nawong nga piso nga itik ug miingon ngadto kaniya sa mahinay nga tingog, “Ikaw dili usa ka piso nga itik! Ikaw usa ka gamay nga gansa, ug moabut ang adlaw nga ikaw mahimong hari sa lim-aw.”
Ako ganahan kaayo nga makadungog niini nga istorya isip usa ka bata. Ako wala nakahunahuna nga ang mga leksyon nga akong nakat-onan gikan niini makatabang kanako sa paglampus sa akong lisud nga mga tuig isip batan-on. Ako nabunyagan nga usa ka miyembro sa Simbahan sa dihang walo ang akong edad, apan sa hinay-hinay ang akong pamilya nahimong dili na kaayo aktibo.
Sa gamay nga lungsod sa Idaho diin ako nagtubo, adunay usa ka sinihan nga mopasalida og pasundayag sa hapon matag Sabado. Ako kanunay nga mouban sa duha o tulo nako ka mga higala. Ang sinihan kanunay mopasalida og mubo nga salida sa sport ug lain usab kabahin sa mga panghitabo karon. Ang labing nindot nga salida sa kanunay mao ang usa ka salida sa cowboy nga adunay daghang aksyon.
Usa ka Sabado panahon sa intermission, ang kawani mipadagan og usa ka 10-speed nga bisikleta. Kini pula, kini nindot kaayo, ug ila kining ihatag ngadto sa tawo nga nanan-aw kinsang ticket mao ang mabunutan. O, ganahan kaayo ko sa bisikleta!
Ang tig-anunsyo miduol ngadto sa sudlanan ug mibunot og usa ka ticket. Samtang iyang gibasa ang numero diha sa ticket, akong nadiskobrehan nga naa kanako ang nakadaog nga ticket. Apan ako wala molihok o misulti og bisan usa ka butang. Ako hilabihan ka manggiulawon ug burong. Ako walay igong pagsalig sa akong kaugalingon sa pagbarug ug sa pagpahibalo sa tanan nga anaa kanako nga nakadaug nga ticket. Siya mianunsyo sa nakadaug nga ticket duha ka beses o mas daghan pa, ug sa matag higayon akong ipaubos ang ticket aron walay makakita niini. Sa kaulahian, ang tig-anunsyo mibasa og laing numero. Usa sa akong mga higala kinsa akong kauban sa sinihan ang nagkupot sa bag-o nga numero. Siya miambak, misiyagit, ug midagan paingon sa entablado aron sa pagkuha sa iyang bisikleta. Kadto nga bisikleta unta akoa!
Samtang ako nag-inusarang naglakaw gikan sa sinihan nianang Sabado, ako nakahunahuna sa istorya sa bati og nawong nga itik. Ako mibati nga susama gayud niadtong gamay nga gansa. Ako mibati nga mora og nagtuyok-tuyok sa mga kakahoyan naningkamot sa pagtago ug walay bisan usa ang ganahan kanako. Ako wala nasayud kon si kinsa ako o unsa ako sa umaabut. Sa dihang ako miabut na sa balay, ako nasayud nga adunay usa ka butang nga kinahanglang mausab. Ako nakahinumdom nga naghunahuna, “Panahon na para mahimong hamtong. Kadto dili na mahitabo ngari kanako pag-usab.”
Ako misugod sa pagdiskobre nga adunay pipila ka mga tawo nga naglibot kanako kinsa nahigugma kanako ug naghunahuna kanako. Ang bishopric sa ward mihatag og interes ngari kanako, ingon man usab ang akong stake president, kinsa nagpuyo unahan lang og gamay sa amoa. Sila mitudlo kanako sa ebanghelyo. Sila mipamatuod sa ilang pagpamatuod ngari kanako sa katinuod sa Manluluwas ug sa Iyang talagsaong Pag-ula ug unsa ang mahimo niini ngari kanako. Sila mibasa kanako og makadaghan sa istorya ni Joseph Smith ug sa iyang panan-awon sa Sagradong Kakahoyan. Gikan niadto nga kasinatian ako nakapalambo og talagsaong batasan sa pagbasa sa Joseph Smith—Kasaysayan kada semana. Sa pagbuhat sa ingon, ako nasayud nga ako adunay kalig-on sa pagbuntog sa bisan unsang butang nga mobabag kanako niana nga semana.
Niadtong higayona sa akong kinabuhi, sa dihang ako nagkinahanglan gayud og usa ka tawo, ang akong Langitnong Amahan mipanalangin kanako. Siya nasayud kon si kinsa Ako, ug Iyang gipadala ang Iyang mga sulugoon aron sa pagtabang sa pagdiskobre niana kon si kinsa ako. Ila akong gigakos ug gipakita pinaagi sa ilang mga aksyon nga ako dili gayud usa ka bati og nawong nga piso nga itik ug kon ako takus ug mosunod sa mga sugo sa Dios, ako mahimong “hari sa lim-aw.” Ang panalangin ug ang pagsabut sa Pag-ula misugod sa paghatag kanako og dugang kalig-on ug pagsalig.
Sa dihang ako nag-edad na og 16, kining buotang mga lalaki miawhag kanako sa pagkuha og patriyarkal nga panalangin. Human nako madawat ang akong rekomend, ako misakay sa akong karaan nga bisikleta ug midrayb og pipila ka mga milya aron sa pag-adto sa balay sa patriyarka. Siya mipasabut nako pag-usab unsa ang patriyarkal nga panalangin ug sa unsang paagi kini mopanalangin sa akong kinabuhi. Siya mipandong sa iyang mga kamot ibabaw sa akong ulo. Human niadto nga kasinatian, ang akong kinabuhi nausab gayud.
Ako midawat sa mission call ngadto sa Scotland ug nakaangkon og talagsaong kasinatian. Mga pipila ka semana human sa akong pag-uli, akong nahimamat ang akong asawa sa umaabut diha sa usa ka miting sa Simbahan. Kami nag-date, ug ako mipahayag og kaminyoon. Kami naminyo sa Templo sa Salt Lake.
Usa ka han-ay sa mga pulong sa akong patriyarkal nga panalangin nagpakita nga ako gitugutan nga makapuyo dinhi sa kalibutan kauban ang usa ka anghel. Nianang higayona ang patriyarka mihatag kanako sa panalangin, ako wala masayud kon unsa ang anghel, gipasagdaan lang nako ang kahulugan sa maong mga pulong. Sa dihang ako mibiya sa templo sa adlaw nga ako ug ang akong asawa gibugkos, ako nasayud unsa ang kahulugan niadto. Siya mao ang nahimong kahayag sa akong kinabuhi. Salamat kaniya, ako gitugutan nga mopuyo og usa ka palibut sa kahayag. Siya midala og hingpit nga kalipay ngadto sa among 8 ka mga anak, 25 ka mga apo, ug 2 ka apo sa tuhod. Ang akong mga anak motawag kaniya og bulahan [blessed]. Ako nagpasalamat sa Dios sa tanang mga panalangin sa ebanghelyo ug sa mahangturong mga panalangin sa pakigsaad ug ordinansa sa balaang templo.
Si Satanas mohimo kanato sa pagtuo nga kita mga bati og nawong nga piso nga itik nga walay kahigayunan nga mahimong sama sa atong Langitnong Amahan ug sa Iyang balaang Anak. Ako mosaksi nga ang Dios nahigugma sa matag usa kanato sa espesyal nga paagi. Sama sa kanunay nga giingon ni Elder Neal A. Maxwell (1926–2004) sa Korum sa Napulog Duha ka mga Apostoles, “Ang personal nga impluwensya sa paghulma sa Ginoo mabati sa mga detalye sa atong mga kinabuhi.”1 Kita Iyang mga anak. Ako nasayud nga kita mahimong mas molabaw pa kaysa sa atong palibut karon ug mahimong “mga hari ug mga reyna sa lim-aw” pinaagi sa pagsunod sa mga sugo sa ebanghelyo.
Ug ako nasayud og usa pa ka butang. Ako nasayud kon si kinsa ka ug asa ka gikan. Ang mga pagpadayag nagpahinumdom kanato sa atong pagkamatinud-anon sa kinabuhi sa wala pa dinhi sa yuta (tan-awa sa Pinadayag 12:7–11; D&P 138:56; Abraham 3:22–23). Samtang atong gihiusa ang atong mga pagpamatuod nianang dakong kamatuoran, ang matag adlaw mahimong usa ka talagsaon nga panalangin alang sa matag usa kanato.
Magpabilin nga kanunayng dapig sa Ginoo. Kon Siya nakaatiman og usa ka matahaon, maulawon nga batang lalaki nga sama nako, Siya moatiman kaninyo karon ug sa umaabut. Kamo usa ka pinili nga anak nga lalaki o anak nga babaye sa Dios. Pilia nga mopalambo sa balaang potensyal nga anaa dinha kaninyo.
Kamo usa ka pinili nga anak nga lalaki o anak nga babaye sa Dios. Pilia nga mopalambo sa balaang potensyal nga anaa dinha kaninyo.
Ubos ang Pagtan-aw sa Imong Kaugalingon?
Pamalandonga kini: Ikaw usa ka anak sa Dios. Uban sa Iyang panabang mahimo nimong makab-ot ang imong dako nga potensyal. (Tan-awa sa Mga Taga-Roma 8:16–17.)
Ang kawani sa sinihan mipadagan og usa ka 10-speed nga bisikleta. Kini pula, kini nindot kaayo, ug ila kining ipanghatag. O, ganahan kaayo ko sa bisikleta!
Akong nadiskobrehan nga naa kanako ang nakadaog nga ticket. Apan ako wala molihok o misulti og bisan usa ka butang. Ako hilabihan ka manggiulawon ug burong.
Ang panalangin ug pagsabut sa Pag-ula misugod sa paghatag kanako og dugang kalig-on ug pagsalig.
Mga paghulagway pinaagi ni Jerry Harston, gawas kon gipahibalo; litrato sa mga pako © Getty Images; litrato sa mga langgam pinaagi ni Graham Ford, © Getty Images
Detalye gikan sa Si Kristo sa Gethsemane, ni Heinrich Hofmann, sa maayong kabubut-on sa C. Harrison Conroy Co.