Ang mga Panalangin sa Pagpangalagad
Ang mga miyembro sa Simbahan mopanalangin sa mga kinabuhi ug molig-on sa mga pagpamatuod samtang sila mosunod sa ehemplo sa Manluluwas sa pagpangalagad ngadto sa uban.
Ang angayang sundon nga pagpangalagad ni Presidente Thomas S Monson nahibaloan kaayo sa mga miyembro sa Ang Simbahan ni Jesukristo sa mga Santos sa Ulahing mga Adlaw. Sobra sa unom ka mga dekada siya mitabang niadtong mga nanginahanglan, naghatag og kahupayan ug kalinaw ngadto sa dili maihap nga mga indibidwal ug sa personal nga paagi nangalagad ngadto sa mga masakiton ug nagkalisud.1
“Karon adunay mga kasingkasing nga angayang lipayon, adunay mga buhat nga kinahanglang buhaton—gani talagsaong mga kalag nga kinahanglang luwason,” mideklarar si Presidente Monson “Ang masakiton, ang gipangkapoy, ang gipanggutom, ang gipangtugnaw, ang samaran, ang nag-inusara, ang tigulang, ang walay kapuy-an, silang tanan nanginahanglan og tabang.”2
Sa iyang personal nga pagpangalagad, si Presidente Monson mipakita sa kalainan tali sa pagdumala ug pagpangalagad. Ang mga miyembro sa Simbahan modumala og mga programa ug mga ordinansa, apan sila mangalagad ngadto sa mga indibidwal, maghigugma kanila ug motabang alang sa ilang kahupayan. Sa pagtabang sa uban, si Presidente Monson misunod sa Manluluwas, kinsa “mianhi dili aron pagaalagaron kon dili sa pag-alagad” (Marcos 10:45).
Ang mosunod nga upat ka mga asoy mohulagway, sa mga Santos sa Ulahing mga Adlaw kinsa “molakaw, ug mobuhat … sa ingon” (Lucas 10:37) sa pagpanalangin sa uban, sa Simbahan, ug sa ilang kaugalingon.
Ang Samarianhon nga may Pancake Batter
Ang akong pagkaayo human sa akong minor nga operasyon dili sayon sama sa akong gituohan. Apan isip presidente sa Relief Society sa ward, ako mibati nga ako kinahanglan mohatag og tabang sa uban, dili sa pagpangayo niini. Pagka Lunes sa buntag, tulo ka adlaw human sa akong operasyon, kinahanglan nakong pukawon ang lima ka bata ug andamon alang sa eskwela. Ako naghunahuna kon akong ipabilin ang among kinamagulangan nga babaye sa balay aron makatabang sa bata.
Samtang kini nga panghunahuna anaa sa akong ulo, ang doorbell mibagting. Si Vickie Woodard, ang akong first counselor ug buotan nga higala, miabut aron ako tabangan. Siya mipahibalo nga siya mianhi sa balay aron sa paghimo og mga pancake. Siya dunay usa ka panaksan nga batter sa iyang bukton ug nangutana asa niya makita ang kaha. Ang mga bata nangalipay.
Human sa pamahaw, si Vickie mitabang sa mga bata alang sa eskwelahan, nanglimpyo, ug nagbantay sa bata sa balay hangtud sa pagpahulay sa bata inig kaudto. Sa kaulahian, sa dihang ako nangutana kinsa ang nag-atiman sa iyang kaugalingong mga anak, siya miingon kanako nga ang iyang bana migahin og pipila ka oras nga dili magtrabaho aron siya makatabang kanako.
Ang pagserbisyo nila ni Vickie ug sa iyang bana nianang adlawa nakadugang sa akong kusog ug nakatabang sa akong pagkaayo.
Beverly Ashcroft, Arizona, USA
Ngadto sa Labing Ubos Kanila
Usa ka adlaw sa dihang ako anaa sa panimalay nag-inusara uban sa akong kinamanghurang anak nga lalaki, ako nadakin-as sa usa ka ang-ang sa hagdanan ug nahulog. Miresulta og sakit sa tiyan nga nagpadayon sa daghang mga adlaw, busa ako mikonsulta sa doktor.
Ako mabdos niadtong higayuna, ug ang mga eksamin mipakita nga ang akong placenta natangtang. Kini nga kondisyon nagkinahanglan og kompletong pahulay, o mawala nako ang bata.
Ako nabalaka tungod kay kami adunay tulo ka gagmay nga mga bata ug dili na makahimo sa pagbayad og katabang. Ang mga sister sa akong branch, hinoon, nasayud kabahin sa akong kondisyon ug, bisan wala hangyoa, mitabang kanako. Sila miorganisar sa ilang mga kaugalingon ngadto sa tulo ka mga grupo og mitabang kanako sa buntag, sa hapon ug sa gabii.
Sila miadto aron sa pagpanglamba, pagplantsa, pagluto, paglimpyo, ug mitabang sa akong mga anak sa ilang homework. Usa ka sister nga ginganlan og Rute, kinsa nabunyagan sa Simbahan samtang ako anaa ra sa higdaanan, nahimong ilado sa among balay. Si Rute, nga usa ka nurse, mitabang inig ka gabii ug mihatag sa gikinahanglang mga injection.
Ako wala mangayo og bisan unsa nga butang; kining mga sister nakahibalo nang daan sa akong mga kinahanglanon ug miatiman sa tanang butang. Kon sila daghan na kaysa ilang gikinahanglan, usa ka sister ang molingkod ug makigsulti kanako. Ila kining gibuhat sulod sa tulo ka buwan.
Kini nga mga sister naghatag kanako og kalig-on, gugma, ug dedikasyon. Sila mihatag sa ilang panahon ug mga talento. Sila nagsakripisyo nga moadto didto. Sila wala gayud nangayo og bisan unsang butang isip sukli niini. Sila mihigugma ug mialagad, nagsunod sa ehemplo sa Ginoo, kinsa mitudlo kanato, “Sa pagkatinuod, magaingon ako kaninyo, nga maingon nga gibuhat ninyo kini ngadto sa usa sa mga labing gagmay niining akong mga igsoon, gibuhat usab ninyo kini kanako” (Mateo 25:40).
Enilze do Rocio Ferreira da Silva, Paraná, Brazil
Dad-a Lang ang Ilang mga Sinina
Samtang ang akong bana, nga si Brandon, didto sa Orlando, Florida, alang sa negosyo, siya mibangon sa usa ka gabii nga may taas kaayong hilanat ug naglisud sa pagginhawa. Siya mitawag og ambulansya aron modala kaniya ngadto sa ospital, diin iyang nahibaloan nga siya adunay seryoso kaayong kaso sa pneumonia.
Tungod kay si Brandon ug ako adunay gagmay pa nga mga anak, ako dili makabiyahe diha-diha dayon gikan sa among balay sa Pennsylvania ngadto sa Florida. Ako mitawag kang Brandon kada adlaw, nanghinaut sa iyang pagkaayo aron siya makabalik ngari kanamo.
Apan, ang kondisyon ni Brandon mas migrabe. Sa dihang usa ka nurse sa ospital namugos kanako sa pag-adto sa ospital sa labing madali nga panahon, ako naghunahuna kon si kinsa kaha ang makaatiman sa among mga anak nga lalaki.
Ang akong mama misugot nga mohunong una sa pagtrabaho ug miingon nga siya moadto sa balay sayo kutob sa iyang mahimo, apan ang eroplano nga akong kinahanglan sakyan molupad sa dili pa si mama moabut. Ako nanawag og pipila ka mga higala kon mahimo ba nilang atimanon ang mga bata sa dili pa moabut ang akong mama. Usa ka higala gikan sa Relief Society, nga si Jackie Olds, miingon nga siya malipay nga moatiman kanila.
“Dad-a lang ang ilang mga sinina ug mga diaper,” siya miingon, “ug ako silang bantayan sulod sa pipila ka adlaw nga ikaw wala dinhi.”
Ako misugod sa pagbalibad tungod kay kini nga sister, nga adunay tulo ka kaugalingong mga anak, busy kaayo sa iyang kinabuhi, apan siya mapugsanon. Sa dihang ako nang gihatud ang mga bata pagkataud-taod, siya mihupay kanako pinaagi sa pag-ingon, “Ayaw og kabalaka bahin kanila. Kabalak-i kon unsaon sa pagkaayo ni Brandon ug sa pagdala kaniya sa inyong balay. Nakaatiman na ako og mga gagmayng bata sa una.”
Diha dayon ako nasayud nga ang mga bata luwas ra, malipayon, ug maatiman og tarong, sama sa pag-atiman kanila. Ako nakaabut sa akong bana, kinsa grabe kaayo og sakit sa dihang ako miabut sa ospital. Apan human sa pipila ka adlaw, siya naayo-ayo na aron makapauli.
Ako mapasalamaton alang sa usa ka buotan nga higala kinsa mitubag—sobra pa kaysa akong gihangyo kaniya—ug nangalagad kanamo sa panahon nga kami nagkinahanglan.
Kelly Parks, Pennsylvania, USA
Serbisyo diha sa Kilid sa Higdaanan
Si Brother Anderson, ang madasigon nga 35 sa pangidaron nga ward Young Men president, mao ang klase sa lider sa mga batan-on nga gidayeg sa tanan: usa ka returned missionary, amahan sa lima ka mga anak, tag-iya og negosyo, adunay batan-on nga kasingkasing. Apan karon siya adunay leukemia. Human makadawat niining balita gikan sa bishop, si Ryan Hill, ang priest quorum first assistant, milihok dayon, nanawag sa matag aktibo ug dili kaayo aktibo nga mga priest sa iyang korum.
“Kita mangadto sa ospital aron mobisita kang Brother Anderson. Ang tanan gikinahanglan. Makaadto ka ba?” iya kining gibalik-balik kada tawag.
“Ako dili sigurado nga ako makaadto,” usa ka priest ang miingon. “Ako kinahanglan nga motrabaho.”
“Nan kami magpaabut hangtud nga ikaw mahuman sa trabaho,” mitubag si Ryan. “Kini ang usa ka butang nga kinahanglan natong dunganon og buhat.”
“OK,” miingon ang miyembro sa korum. “Akong tan-awon kon ako mahimong makig-ilis og iskedyul ngadto sa lain.
Ang tanang 11 ka mga priest miadto sa ospital. Kadtong kinsa dili kaayo aktibo ug kadtong dili gayud mopalta og miting sa Dominggo anaa didto. Dungan, sila nangatawa ug nanghilak ug nag-ampo ug naghimo og mga plano sa umaabut. Sa sunod nga mga bulan, sila nag-iskedyul og mga oras sa pagnus-nos sa tiil ni Brother Anderson kon lisud ang sirkulasyon sa iyang dugo, nagpuli-puli sa paghatag og blood platelets panahon sa duha ka oras nga mga sesyon aron ilaha rang dugo ang maabuno, ug gani modrayb og 20 ka milya (32 km) sa gabii sa kalihokan nga prom uban sa ilang mga ka-date (apil ang duha ka mga batan-ong babaye kinsa dili mga miyembro sa Simbahan) ngadto sa kilid sa iyang kama sa ospital aron sila makigbahin sa ilang mga kasinatian sa high school.
Sa hapit na siya mamatay, si Brother Anderson mihangyo kanila sa pag-alagad og misyon, magminyo sa templo, ug magbantay sa usag usa. Kapin sa dose ka tuig ang milabay, sila namauli na gikan sa ilang mga misyon, nagminyo sa templo, ug nagsugod og pamilya sa ilang kaugalingon, sila gihapon makahinumdom sa ilang dili makalimtan nga espirituhanong mga kasinatian nga nagdungan og serbisyo ngadto sa ilang hinigugmang lider.
Norman Hill, Texas, USA
Paghulagway pinaagi ni Gregg Thorkelson