Pagpamatuod

Maria Kaneva, Blagoevgrad, Bulgaria

“Mouna ko,” miingon si Irinka matag unang Dominggo sa bulan. Uban sa mga kamot nga hugot nga naggunit sa lingkuranan ug ang mga mata nga puno sa kadasig, naningkamot siya nga makabaton og kaisug. Si Irinka nuebe anyos lamang, pero ingon og siya ang labing isog sa tanang walo ka mga miyembro nga mosimba kanunay sa iyang branch sa Bulgaria.

Sa dili pa siya mobarug, si Irinka sa kasagaran maghulat kon aduna bay lain nga gustong mouna sa pagpamatuod. Ang tanan sa tago mopasiplat kaniya ug maghulat kaniya nga moadto sa atubangan. Sa katapusan, uban sa dako nga pahiyom, mopaingon siya ngadto sa pulpito. Ang presidente sa branch mokuha og iyang katungtungan aron siya makakita sa mga miyembro. Si Irinka, ang bugtong bata sa Primary, motan-aw sa gamay nga kongregasyon ug magsugod sa pagsulti.

Ingon og dili siya kuyawan nga ang tanan nagtan-aw kaniya. Ang mga miyembro maminaw sa iyang nindot nga tingog. Samtang siya mamulong mahitungod ni Kristo, sa mga kasulatan, ug sa katinuod sa Simbahan, iyang giimpluwensya ang pagpamatuod sa tanan.

Sa dihang molingkod na siya, ang tanan hilom ug ingon nga ang Espiritu mitandog sa ilang mga kasingkasing. Dayon usa sa mga miyembro mobarug aron sa pagpamatuod, ug dayon ang lain ug ang lain …