Dali Paminaw sa Tingog sa usa ka Propeta

Gugma sa Usa ka Propeta

Ni Presidente Dieter F. Uchtdorf

Ikaduhang Magtatambag sa Unang Kapangulohan

Gikuha gikan sa Abril 2008 nga pakigpulong sa kinatibuk-ang komperensya.

President Dieter F. Uchtdorf

Pipila ka tuig na ang milabay, si Presidente Thomas S. Monson mitambong sa komperensya sa rehiyon didto sa Hamburg, Germany, dungog nako ang pag-uban kaniya.

Si Presidente Monson nangutana kabahin ni Brother Michael Panitsch, kanhi presidente sa stake kinsa usa sa pinakalig-on nga mga pioneer sa Simbahan sa Germany. Gisultihan ko siya nga grabe ang sakit ni Brother Panitsch, nga siya naglubog, ug dili na makatambong sa atong mga miting.

Si Presidente Monson mihangyo kon makabisita ba kami kaniya.

Nasayud ako nga dili pa dugay sa wala pa ang iyang biyahe sa Hamburg, si Presidente Monson gioperahan sa tiil ug dili siya makalakaw nga dili sakitan. Mipasabut ako nga si Brother Panitsch nagpuyo sa ikalimang andana sa building nga walay mga elevator. Mosaka kita sa hagdanan aron sa pagpakigkita kaniya.

Apan namugos si Presidente Monson. Ug busa miadto kami.

Nahinumduman nako kon unsa kalisud kang Presidente Monson ang pagsaka sa mga hagdanan. Makatikang lamang siya og pipila matag higayon sa dili pa mohunong ug mopahulay. Wala gayud siya moreklamo, ug dili gayud siya mobalik. Tungod kay ang building adunay tag-as nga mga kisame ang mga hagdanan ingon og walay kinutuban, apan si Presidente Monson masadyaon nga milahutay hangtud nga miabut kami sa apartment ni Brother Panitsch sa ikalima nga andana.

Sa didto na, maanindot ang among pagbisita. Si Presidente Monson mipasalamat kaniya tungod sa mahalaron nga pagserbisyo ug mipahalipay kaniya uban sa pahiyom. Sa wala pa kami mobiya, iya siyang gitagaan og maanindot nga panalangin sa priesthood.

Si Presidente Monson makahimo ra unta nga mopahulay sa tunga-tunga sa among tag-as nga mga miting. Mahimo ra unta niya ang paghangyo nga motan-aw sa pipila ka maanindot nga mga talan-awon sa Hamburg. Kanunay nakong gihunahuna kon unsa ka talagsaon ang tanang talan-awon niadto nga siyudad, ang lain nga mas gusto niya nga makita kaysa uban mao ang maluyahon ug masakiton nga miyembro sa Simbahan.

Si Presidente Monson miadto sa Hamburg aron sa pagtudlo ug pagpanalangin sa mga tawo sa usa ka nasud. Apan sa samang higayon, mipokus siya sa usa.

Sa dihang si Apostol Pedro namulong mahitungod ni Jesus, gipahayag niya kining yano nga deskripsyon: “[Siya] nangadto ngadto sa paghimog kaayohan” (Mga Buhat 10:38). Ang susama nga pulong mahimo nga isulti sa tawo nga atong gipaluyohan karon isip propeta sa Dios.

Pagsaka sa mga Hagdanan

Si Presidente Monson kinahanglang mosaka og daghang mga hagdanan aron sa pagtabang ni Brother Panitsch. Paghunahuna og tulo ka lain-laing mga butang nga inyong mahimo sa pagtabang og usa ka tawo, ilabi na sa panimalay. Pagdrowing og usa ka litrato o pagsulat diha sa matag ang-ang sa hagdanan sa pagtabang kaninyo nga mahinumdom sa inyong mga ideya.

Er Spricht Deutsch (“Siya Makasulti og German”)

Si Presidente Uchtdorf mao ang unang tawo gikan sa Germany nga nagserbisyo sa Unang Kapangulohan. Sa bata pa siya, German ang iyang sinultihan. Karon kon siya mamulong sa kinatibuk-ang komperensya, siya mosulti og Iningles. Tan-awa ang hugpong sa mga pulong sa ubos gikan sa usa ka pakigpulong nga gihatag ni Presidente Uchtdorf sa kinatibuk-ang komperensya niadtong Abril 2008. Tan-awa kon makahubad ba kamo sa mga pulong nga German ngadto sa inyong kaugalingong pinulongan.

“Ako nalipay sa pribelihiyo sa pagtawag sa akong kaugalingon nga usa ka miyembro sa die Kirche Jesu Christi der Heiligen der Letzten Tage.”

“Ako nag-ampo nga ang Dios mohatag kanako og Kraft ug panabut Herz sa pagpalambo niining sagrado nga calling.”

“Gibati nako ang dakong kahigayunan sa pagtrabaho og maayo uban ni Präsident Monson. Siya ang Prophet Gottes.” …

Wala ug ibabaw sa tuo: mga paghulagway pinaagi ni Beth M. Whittaker; tuo: gihulagway ni Sam Lawlor