Pagbayaw sa Uban ug sa Akong Kaugalingon

Cathy Whitaker Marshall, Washington, USA

Thanksgiving kadto niadtong 1990. Bag-o lang akong miagi sa malisud nga diborsyo, ug ako estudyante sa unang tuig sa abogasiya sa usa ka dili pamilyar nga siyudad. Ang akong mga anak moadto sa balay sa ilang amahan alang sa holiday, ug sa unang higayon sa akong kinabuhi, ako nag-inusara sa Thanksgiving.

Sa sinugdanan ako buot nga magmagul-anon ug mohilak. Pero nagsugod ako sa pag-ihap sa akong mga panalangin. Ako adunay duha ka matahum nga mga anak, usa ka nindot nga balay, usa ka kahigayunan nga makaangkon og kahibalo, ug sa ebanghelyo ni Jesukristo nga mogiya sa akong kinabuhi. Tinud-anay akong gipanalanginan og daghang mga panalangin.

Sa nagsingabut na ang Thanksgiving, akong nadiskobrehan nga adunay grupo sa mga estudyante sa pagka-abogasiya nagplano sa pag-adto sa usa ka lokal nga kalihokan aron motabang sa pagdalit og sayo nga panihapon sa Thanksgiving ngadto sa walay mga panimalay. Ako nakahukom nga ang pagtabang sa kalihokan mas maayo pa kay sa magmuk-mok sa balay nga mobati og kaguol ug kapait.

Paglabay og pipila ka adlaw akong nakita ang akong kaugalingon nga nagbutang og init nga dinugmok nga mga patatas sa mga plato sa gigutom, mapasalamaton, daghan og problema nga mga tawo. Ang mga luha nga migawas sa akong mga mata dili tungod sa kasubo nga gibati sa akong kaugalingon, hinoon, mga luha kini sa gugma alang sa tanang mga anak sa Dios, dili igsapayan ang ilang mga kahimtang.

Ang Thanksgiving dili Thanksgiving kon walay pabo sa oven. Pero ang 14 libra (6 ka kilo) nga pabo daghan ra kaayo alang kanako, mao nga akong giimbitar ang pipila ka mga estudyante nga gikan sa ubang mga nasud ug sa lagyo nga mga estado sa pag-apil kanako. Ako buot nga makigbahin sa usa ka tradisyonal nga American Thanksgiving nga panihapon, pero giimbitar nako sila sa pag-amot. Akong gihangyo ang matag usa sa pagdala og paborito nga pagkaon gikan sa ilaha. Ang among Thanksgiving nga panihapon nahimong talagsaon ug halandumon nga pagpangaon—sa egg rolls ug sa tanan.

Mipahayag si Haring Benjamin, “Ako mosulti kaninyo niini nga butang nga kamo unta makakat-on og kaalam; nga kamo unta makakat-on nga kon kamo anaa sa pag-alagad sa inyong mga isigkatawo kamo anaa lamang sa pag-alagad sa inyong Dios” (Mosiah 2:17).

Nakakat-on ako og kaalam niana nga Thanksgiving Day. Pinaagi sa paghatag og serbisyo sa dihang mas sayon pa ang pag-inusara ug pagmagul-anon, ako nakakaplag og kalipay. Ang pagserbisyo mao ang yawe ngadto sa kalipay dili lamang panahon sa mga holiday, sa panahon nga sayon ang paghunahuna unsay wala sa atong mga kinabuhi, pero atol usab sa bisan unsa nga panahon. Bisan unsa pay atong sitwasyon, makakita kita kanunay og usa ka tawo nga matabangan. Pinaagi sa pagbayaw sa atong mga kaigsoonan, atong gibayaw usab ang atong mga kaugalingon.

Ako nakahukom nga ang pagtabang sa kalihokan mas maayo pa kay sa magmuk-mok sa balay nga mobati og kaguol ug kapait. Paglabay og pipila ka mga adlaw akong nakita ang akong kaugalingon nga nagbutang og init nga dinugmok nga mga patatas sa mga plato sa gigutom nga mga tawo.