Lugar sa Kalinaw
Para niining duha ka batan-ong mga babaye sa Dominican Republic, ang templo mas labaw pa kay sa usa ka nindot nga building. Kini usa ka klaro nga pahinumdom sa ilang gikahinaman kaayong mga pangandoy ug damgo.
Dilcia Soto, 16, nakahinumdom pa gihapon sa adlaw nga ang templo gipahinungod sa iyang natawhan nga lungsod sa Santo Domingo sa Dominican Republic: “Ako nwebe lamang niadtong panahon, apan ako nakasulti og, ‘Wow! Usa ka templo dinhi!’ Ako naanad nga makakita sa mga tawo nga moadto og laing mga nasud aron mabugkos ug maghimo sa mga pakigsaad. Ako naghunahuna, ‘Karon ang akong pamilya ug ako dili na kinahanglan nga moadto pa og laing nasud tungod kay kami aduna nay among kaugalingon nga templo sa duol.’”
Karon ang templo nagbarug nga talagsaon ug taas kaayo naa sa kapital nga siyudad, nga mabantayan gayud nga adunay mga spire ug limpyo kaayong mga nataran diin ang daghan sa mga tawo moagi nga magtuo nga kini siguro usa ka cathedral. Si Dilcia malipayon nga mopasabut nga kini mas labaw pa ka sagrado kaysa niana. Diha sa mga nataran sa templo adunay pagkabalaan nga sukwahi kaayo sa saba nga mga kadalanan ug mga merkado sa downtown.
Kini mao ang lugar sa kalinaw diin si Dilcia ug ang iyang higala nga si Kelsia St. Gardien, 14, miadto dili pa lang dugay. Silang duha mga miyembro sa Mirador Ward sa Santo Domingo Dominican Republic Independencia Stake. Silang duha nakaadto nang daan sa templo aron sa pagbuhat og mga bunyag alang sa patay. Apan karong adlawa sila miadto aron yano lang nga maglakaw-lakaw sa mga hardin, aron sa pag-istoryahanay, ug aron mobati gikan sa gawas sa building sa Espiritu nga gidala gikan sa sulod sa templo.
Ang mga Tinguha ni Dilcia
“Ako adunay dako kaayo nga gugma sa Ginoo, ug ako mapasalamaton kaayo alang sa mga butang nga Iyang nabuhat para sa akong kinabuhi,” miingon si Dilcia. “Ang akong pamilya gayud mga miyembro sa Simbahan, apan ang akong mga tiya, mga tiyo, ug mga ig-agaw dili. Kon sila moadto sa among balay, ako kanunay nag-andam og Basahon ni Mormon basin og adunay oportunidad sa pagpakigbahin sa ebanghelyo uban kanila.” Siya usab mipakigbahin sa ebanghelyo uban sa iyang mga higala ug “si bisan kinsa nga tawo nga akong mahimamat kinsa tinud-anay nga interesado.” Ug sa matag higayon nga iya kining buhaton, siya moingon, “Ako mibati sa Espiritu nga kusog kaayo. Matag higayon nga ako mopakigbahin sa akong pagpamatuod, ako mobati pag-usab sa katinuod sa Simbahan.
Siya nakahinumdom sa usa ka leksyon sa seminary kabahin sa plano sa kaluwasan. “Sa wala pa kining kalibutan, kita anaa sa dakong Konseho sa Langit, ug kita mipili sa pagsunod sa atong Langitnong Amahan ug midawat sa sakripisyo nga pagabuhaton ni Jesukristo alang kanato,” siya miingon. “Ang among magtutudlo mipasabut nga kita makaingon nga kita misunod sa Langitnong Amahan kaniadto tungod kay kita anaa dinhi sa kalibutankaron nga may mga lawas ug bukog. Sa dihang siya miingon niana, ako nasayud nga kadto tinuod. Niadtong gabhiona sa akong mga pag-ampo, ako mihilak ug mihatag og pasalamat ngadto sa Dios alang niana nga kahibalo.”
Si Dilcia mikutlo sa 1 Mga Taga-Corinto 3:16: “Wala ba kamo masayud nga kamo templo sa Dios, ug ang Espiritu sa Dios nagapuyo diha sa sulod ninyo?” “Kon ako usab usa ka templo,” siya miingon, “Kinahanglan nga ako limpyo ug maanindot sama sa templo. Unsa ka talagsaon nga panalangin nga mahimong miyembro niini nga Simbahan ug mahimong usa ka mahiyason nga batan-ong babaye!”
Siya miingon nga ang iyang kinadak-ang tinguha mao ang makapuyo uban sa iyang Langitnong Amahan pag-usab sa moabut nga adlaw. “Ako mapasalamaton nga Siya mihatag kanato og templo aron atong mabuhat ang tanan natong kinahanglan nga buhaton aron makabalik ngadto Kaniya,” siya miingon. “Ang labing maayong paagi sa pagpasalamat Kaniya mao ang pagpuyo sa paagi nga Iyang gisugo kanato sa pagpuyo.”
Si Dilcia miingon, “Ang Ginoo gusto nga kita mosulod sa Iyang panimalay, sa pagkat-on kabahin Kaniya, ug sa pagbuhat sa atong buluhaton padulong ngadto sa kahangturan uban Kaniya.” Siya miingon nga siya nalingaw sa pagbuhat sa mga bunyag alang sa patay tungod kay “kini mao ang usa sa paagi nga makatabang niadtong kinsa nagpaabut sa laing bahin sa tabil, aron sa pagbuhat og usa ka butang para kanila nga dili nila mabuhat alang sa ilang mga kaugalingon.”
Ang Pasalig ni Kelsia
Si Kelsia miuyon. “Ang atong mga katigulangan nagkinahanglan nga kita mohimo sa buhat, ug ako nasayud nga sila magmapasalamaton ngari kanato,” siya miingon. “Sa piho kaayo ako naglantaw sa unahan nga makakita sa akong lola, kinsa wala gayud nako maila-ila niining kinabuhia. Among sigurohon nga ang tanang buluhaton sa templo mahimo para kaniya.”
Ang paghisgut kabahin sa templo makahatag og kusog nga emosyon para kang Kelsia. “Ako mipasalig sa pagbuhat og mga desisyon nga makatabang kanako nga mabugkos ngadto sa akong pamilya,” siya miingon. “Kita kinahanglan nga morespeto sa ebanghelyo ug mosunod sa mga sugo al pie de la letra [sa matag pulong niini nga walay pagkasayop],” siya miingon. “Ato kining buhaton tungod kay kita nahigugma sa atong Langitnong Amahan, ug ang pagkamasulundon mao ang paagi nga atong gipakita ang atong pasalamat ngadto Kaniya.”
Ang iyang pamilya nagpamiyembro sa Simbahan niadtong Disyembre 2006, unom ka tuig human nga ang iyang mga ginikanan mibalhin ngadto sa Dominican Republic gikan sa Haiti. “Ako mapasalamaton kaayo sa mga misyonaryo kinsa mituktok sa among pultahan. Kadto hilabihan kanindot nga mobati sa Espiritu ug makakat-on kabahin sa plano sa Langitnong Amahan para kanato. Sukad nga ang ebanghelyo miabut sa among mga kinabuhi, ang among pamilya nahimong mas suod. Ako mapasalamaton nga Siya mihatag kanako og usa ka pamilya nga nagkahiusa, bisan sa labing lisud nga mga panahon. Ang paghunahuna nga kita adunay kahigayunan nga mahimong mag-uban hangtud sa kahangturan mora og mao ang labing talagsaon nga panalangin sa tanan.”
Ang iyang mga ginikanan nagtambong og klase sa pagpangandam sa templo karon, ug kana nagpahinumdom kaniya sa pagpangandam alang niana nga adlaw kon siya maminyo sa templo. “Kana gyud mao ang akong dakong tumong, nga ang akong bana ug ako sa umaabut mahimong angayan sa usag usa ug angayan nga mahimong mahangturon nga pamilya.”
Pagpakigbahin sa Pagkamalinawon
Ang duha ka higala naglakaw nga milabay sa tubo diin ang bandila sa ilang nasud nagkayab-kayab sa huros sa hangin. “Bisan ang bandila sa templo nagpahinumdom kanato nga magmatinud-anon,” miingon si Dilcia. “Kini labaw pa kaysa mga kolor lamang. Kini adunay motto Dios, patria, libertad [Dios, nasud, kagawasan] ug nagpakita kanato sa krus sa Kristyano ug sa Napulo ka mga Sugo. Kini nagpahinumdom kanamo nga ang among nasud natukod sa mga tawo kinsa mituo sa Dios ug ang Dios importante gihapon dinhi.”
Sila usab naglakaw nga milabay sa agianan paingon sa templo, diin ang mga pulong Santidad al Señor, la Casa del Señor (Pagkabalaan ngadto sa Ginoo, ang Balay sa Ginoo) gikulit ibabaw sa may pultahan, sama nga kini anaa sa matag templo.
“Matag higayon nga ako mobasa niadto nga mga pulong, ako mapuno uban sa gamhanan nga pagpamatuod nga kini tinuod,” miingon si Dilicia. “Ako nakahinumdom sa pag-anhi dinhi uban sa among grupo sa Mutual usa ana ka gabii, aron lamang sa pagbisita sa mga nataran sa templo. Pagkahuman namo, ang bishop nangutana kanamo unsa ang among gibati dinhi. Kami nag-istoryahanay kabahin niini ug nakahukom og usa ka pulong nga tubag: kalinaw.”
Ug sila si Kelsia ug Dilcia nanlakaw palayo naghunahuna kabahin nianang hingpit nga usa ka pulong nga tubag … hingpit tungod kay ang templo mao ang lugar sa kalinaw.
Mga litrato pinaagi ni Richard M. Romney