Higala ngadto sa Higala
Ang mga Templo Usa ka Gasa gikan sa Langitnong Amahan
Gikan sa usa ka pakigpulong sa Abril 2000 nga kinatibuk-ang komperensya.
“Ang tanang mga bata kinsa namatay sa wala pa sila moabut sa edad sa pagkamay-tulubagon luwas didto sa celestial nga gingharian sa langit” (D&P 137:10).
Pipila ka tuig na ang milabay, ako adunay buluhaton sa komperensya sa stake didto sa California. Sa pagbiyahe balik sa Utah, usa ka matahum nga babaye nga anaa sa mga tunga-tunga sa 70 anyos milingkod tupad kanako. Ang iyang pangalan mao si Patti, ug siya ganahan nga makigsulti.
Gisultihan ako ni Patti mahitungod sa iyang pamilya—mahitungod sa iyang bana ug sa iyang anak nga lalaki kinsa namatay. Nagpadayon ang among panagsultihanay bisan og hapit na kami motugpa. Ako miingon, “Patti, ikaw ang nagsige og sulti sa panahon sa atong biyahe. Sa dili pa kita motugpa sa Siyudad sa Salt Lake, gusto kong mangutana kanimo og pipila ka mga pangutana.”
Gipangutana nako siya sa kinasingkasing, “Patti, nasayud ba ikaw nga makita nimo pag-usab ang imong namatay nga bana?”
Siya miingon, “O, posible kana?”
Dayon ako nangutana, “Nasayud ba ikaw nga makita nimo pag-usab ang namatay nimong anak nga lalaki, nga si Matt, kinsa namatay nga usa ka batang masuso?”
Ang iyang mga mata nagluha, ug ang iyang tingog nagkurog. Ang Espiritu sa Ginoo mitandog kaniya. Gimingaw kaayo siya kanila.
Dayon ako sa mainampoong paagi nangutana kaniya, “Patti, nasayud ba ikaw nga ikaw adunay mahigugmaon ug mabination nga Langitnong Amahan kinsa nahigugma kanimo pag-ayo?”
Siya miingon, “Aduna ba?”
Ako nangutana, “Patti, nasayud ba ikaw nga ang imong Langitnong Amahan adunay espesyal nga plano alang kanimo ug ang imong pamilya mahimong mahangturon?”
“Mao ba?” siya mitubag.
“Nakadungog na ba ikaw sa plano kaniadto?” Ako nangutana.
Miingon siya, “Wala.”
Sa kinasingkasing ako nangutana kaniya, “Gusto ka bang masayud mahitungod niini?”
“Oo, gusto ko,” mitubag siya.
Ang Espiritu sa Ginoo mitandog kaniya pag-ayo.
Ang mga misyonaryo mitudlo ni Patti. Paglabay sa tulo ka mga semana, samtang siya nagpabilin sa Utah, si Patti mitawag kanako: “Brother Kikuchi, si Patti kini. Bunyagan na ako. Makaadto ka ba sa akong bunyag?”
Ang akong asawa ug ako miadto sa iyang bunyag. Daghang mga miyembro ang buotang nakigdait kaniya. O, dili gayud ako makalimot sa iyang malipayon nga panagway sa iyang pagkawas gikan sa tubig!
Dili gayud ako makalimot sa iyang malipayong mga luha didto sa sagrado nga altar sa Templo sa Salt Lake usa ka tuig ang milabay. Ako nakahinumdom sa iyang malinawon ug celestial nga dan-ag sa dihang siya nabugkos ngadto sa iyang namatay nga bana ug anak ug ngadto sa iyang buhi nga anak nga babaye, kinsa usa na ka miyembro sa Simbahan.
Ang akong higala nga si Patti nakakaplag ni Ginoong Jesukristo. Tungod sa sealing sa templo, siya nasayud na karon nga ang iyang pamilya mahangturon diha sa Ginoo.
Paghulagway pinaagi ni Dilleen Marsh;mga litrato sa maayong kabubut-on sa pamilyang Kikuchi, gawas kon gipahibalo; litrato sa mga carrot © Getty Images; sa luyo: Gilitratohan ni Welden C. Andersen
Si Elder Kikuchi nagsul-ob og kimono niini nga litrato sa iyang ikaduhang adlaw nga natawhan. Makita ba ninyo ang dulaan nga iyang gigunitan?
Si Elder Kikuchi (atubangan dapit sa wala) sa edad nga 13 uban sa junior high nga mga higala ug mga magtutudlo.