Mga Katawhan nga Ganahan Magsige og Adto sa Templo
Ang family history, pag-fellowship, ug mga bunyag sa mga patay nagdasig sa hamtong nga mga miyembro sa pagdawat sa ilang mga endowment sa templo.
Sila si Gary ug Jennifer Tucker adunay usa ka damgo. Silang duha gusto og mahangturong pamilya. Apan si Jennifer hapit mawad-i og paglaum. Ang dalan paingon sa pagkab-ot niana nga damgo nagpaingon sa templo, usa ka butang diin si Gary dili pa andam.
Dayon ang ilang bishop nadasig sa usa ka ideya nga makatabang sa mga Tucker—ingon man usab sa daghan pang mga miyembro sa Three Forks Ward, Bozeman Montana Stake—pagkab-ot sa damgo sa usa ka mahangturon nga pamilya. Mga pipila na ka tuig ang milabay si Bishop Aaron Baczuk anaa sa usa ka miting sa mga bishop ug sa bag-ong mga kinabig sa stake. Ang Area Seventy nga nagdumala nangutana sa usa ka bag-o nga miyembro, “Ikaw ba nakaadto na sa templo aron sa pagbuhat og mga bunyag alang sa patay? Siya nakabuhat na.
Si Bishop Baczuk wala pa gayud nakahunahuna sa pagdala og mga hamtong nga wala pa ma-endowed ngadto sa templo. Pagkasunod semana nakigsabut siya sa mga kawani sa Templo sa Billings Montana para sa mga hamtong sa iyang ward aron sa paghimo og mga bunyag alang sa patay. Ang pagbisita ngadto sa templo nagmalampuson, ug sa mga bulan nga misunod, ang mga elder ug mga high priest sa ward nagdala og mas daghan nga wala pa ma-endowed nga mga hamtong ngadto sa templo. “Kini nagpamatuod nga usa ka hilabihan ka espiritwal nga kasinatian para kanila, naghiusa sa ilang tinguha ug pasalig sa pagdawat sa ilang mga endowment,” miingon si Bishop Baczuk.
Pagpangandam
Alang sa pag-andam, ang hamtong nga mga miyembro motrabaho uban sa bishop nga mahimong takus nga mosulod sa templo. Dayon sila motambong sa klase alang sa pagpangandam sa templo [temple preparation class]. Ang ilang interes sa klase misaka gayud human sa ilang pagbuhat og mga bunyag alang sa patay. Ilang nakita nga ang paghisgut kabahin sa templo diha sa klase usa ka lahi nga butang, apan sa tinuoray ang pagbati sa Espiritu sa Ginoo sulod sa templo lain usab nga butang.
“Ang pagdesisyon sa pagdala og usa ka tawo ngadto sa templo kinsa dili pa kaayo andam alang sa dugang nga mga pakigsaad apan gihapon nakasinati sa pagbuhat sa mga ordinansa usa ka nindot kaayo nga butang,” miingon si Bishop Baczuk. “Sa akong hunahuna kini mihaum sa sentimento nga gipaningkamutan sa Simbahan nga ikapahayag diha sa booklet nga pagpangandam sa pagsulod sa templo: ‘Adto sa templo!’”1
Ang presidente sa elders quorum sa Three Forks Ward nga si David Boyd miingon nga ang pag-adto sa templo aron sa pagbuhat sa mga bunyag makahimo sa tumong nga makab-ot: “Sila nakasugod sa pagkakita sa posibilidad nga sila mahimong makadawat sa ilang kaugalingong endowment. Daghan kanila ang wala pa gyud makasulay sa pagtamak sa mga natad sa templo sukad-sukad, busa kining mga pagbiyahe sa mga hamtong aron makahimo sa pagbunyag naghatag sa mga miyembro niana nga oportunidad.
Daghan sa mga bag-ong naaktibo nga mga miyembro sa ward nagbuhat sa mga bunyag alang sa patay sa wala pa nila madawat ang ilang kaugalingong endowment. “Dili gyud kini usa ka pangutana mahitungod sa katakus,” miingon si Bishop Baczuk. “Kini usa ka pangutana mahitungod sa pagkaandam. Ang pipila kanila takus ug andam na nga mobuhat sa mga bunyag alang sa mga patay apan dili andam sa mental ug espiritwal nga paagi sa pagbuhat sa mga pakigsaad sa endowment.” Alang sa mga lalaki, kini usab panahon alang sa pagpangandam sa pagdawat sa Melchizedek Priesthood.
Ang family history usab makapakusog sa buluhaton sa templo. Ang mga miyembro sa ward, sama nila ni Larry ug Carolyn Isom, nagtrabaho sa sentro sa family history sa ward aron sa paghatag og gatusan ka mga pangalan sa pamilya. Kining tulo ka mga paningkamot—ang klase sa pagpangandam sa templo, family history, ug pagsimba sa templo—epektibo kaayo. Kadtong nagbuhat sa family history naghinam-hinam sa paghatag og mga ngalan niadtong kinsa moadto sa templo. Ang mga miyembro naghinam-hinam sa pag-adto sa templo alang sa ilang kaugalingong mga kaliwat ug sa ilang mga kaubang miyembro sa ward. Ug ang pagtambong sa templo makapaaghat sa mga miyembro sa pag-andam nga mobalik ngadto sa templo.
Sa miaging pipila ka tuig, 22 ka mga miyembro sa Three Forks Ward mitambong og klase sa pagpangandam sa templo, ug 14 kanila nagsugod sa pag-adto sa templo kanunay aron sa pgbuhat ug mga bunyag alang sa patay. Dayon, pagkatapos sa klase, 13 niadtong 14 nakadawat sa ilang kaugalingong endowment. Ang uban kanila mga single o balo, apan ang uban, sama ni Gary ug Jennifer Tucker, gibugkos isip usa ka pamilya.
Pag-fellowship
Si Gary nagpamiyembro sa Simbahan niadtong 1992, mga pipila ka bulan sa wala pa siya ug si Jennifer nagminyo. Si Jennifer usa na ka miyembro. Apan ang taas nga mga oras sa pagtrabaho ug pagpakig-uban sa laing mga higala nakapalisud kang Gary nga magpabiling aktibo sa Simbahan, bisan pa sa suporta sa iyang asawa. Siya miingon nga siya adunay daghang mga tuig nga “manabako pa’ ug mamalikas.’ ”
Sa dihang ang ilang anak nga babaye, nga si Cody, natawo, si Sister Tucker naningkamot sa pagpadako kaniya sa ebanghelyo pinaagi sa pagdala kaniya ngadto sa simbahan, bisan si Brother Tucker dili gusto nga adunay mga materyal sa Simbahan sa ilang panimalay. Bisan tuod nga iyang giawhag ang iyang pamilya sa pagtambong sa simbahan, siya dili gyud motambong. Sa dihang si Cody nag-edad na og otso, siya nabunyagan pinaagi sa usa ka misyonaryo, dili sa iyang papa. Si Brother Tucker miingon, “Ako malipayon kaayo nga ako anaa didto, apan kadto dako kaayo nga pagmahay—nagtan-aw lamang imbis nga mobuhat niini.”
Sa sunod nga mga tuig, ang pag-fellowship nakatabang kang Gary nga mobalik ngadto sa pagkaaktibo sa Simbahan. Si Jennifer modapit sa mga miyembro sa ward ug sa mga misyonaryo para sa panihapon, nasayud nga kini maghatag kanila og kahigayunan sa pagpakigsulti kang Gary. Siya mapasalamaton niadtong mga miyembro ug mga misyonaryo alang sa ilang maayong pag-impluwensya ni Gary.
Si Dale Price, pananglitan, nagtudlo sa panimalay sa mama ni Jennifer ug nakaila ni Gary ug Jennifer niana nga paagi. Sa dihang si Brother Price mibisita ni Brother Tucker, sa sinugdanan wala una sila maghisgot kabahin sa ebanghelyo. Sila naghisgot kabahin sa butang nga pareho nilang ganahan: ang pagpangayam. Ang mga Price milingkud usab tapad sa mga Tucker sa mga kalihokan sa ward, midala kanila og mga pagkaon gikan sa ilang gitipigan nga mga pagkaon sa dihang si Brother Tucker nawad-an og trabaho, ug mihatag kanila og dugos nga gihimo gikan sa ilang kaugalingong mga putyukan. Ang dugos mao ang paboritong ibutang sa mga Tucker sa ilang pinagahi nga pan [toast]. Kadto nga gamay nga gasa, sama sa paghulagway ni Brother Price, mao ang “pangpatam-is sa relasyon.”
Pagbuhat sa Gagmay ug Yano nga mga Butang
Ang tambag gikan sa ilang stake president nakatabang usab sa mga Tucker. Si Presidente David Heap mihangyo sa mga miyembro sa stake sa pagbuhat niining “pito ka gagmay ug yano nga mga butang”: (1) Personal nga magbasa sa mga kasulatan kada adlaw; (2) magbasa sa kasulatan sa labing minus lima ka adlaw sa usa ka semana isip usa ka pamilya; (3) personal nga mag-ampo kada buntag ug kada gabii; (4) mag-ampo isip pamilya matag buntag ug gabii; (5) motambong sa simbahan matag Dominggo isip usa ka pamilya; (6) paghimo og family home evening matag gabii sa Lunes; ug (7) moadto sa templo matag bulan.
Si Gary nakakita nga kining mga butanga makatabang sa iyang pamilya nga mas magkasuod—usa ka butang nga iyang hilabihan nga gitinguha—mao nga ang mga Tucker nagsugod sa pagbuhat og pag-ampo sa pamilya, pagtuon sa kasulatan, ug home evening. Kini nga mga paningkamot nakatabang kang Gary nga daling modawat sa pagdapit sa iyang bishop sa pagpangandam sa pag-adto sa templo.
Niadtong Enero 2006 ang mga Tucker nanambong og usa ka fire-side sa panimalay sa bishop. Si Bishop Baczuk mibira ni Gary ug mihisgot kaniya kabahin sa templo. Diha-diha dayon, si Gary mihatag kang bishop sa iyang usa ka lata ka tabakong usapon aron kini dili magpadayon nga tintasyon ngadto kaniya. Siya adunay daghang mga pangutana para kang bishop ug sa iyang sunod nga mga interbyu. Ang bishop mipasabut sa pagsunod sa mga pakigsaad nga gihimo ni Gary panahon sa bunyag aron siya mahimong takus sa Espiritu.
Ang mga Tucker misugod sa pagtambong og klase sa pagpangandam sa templo, ug si Jennifer misugod sa pag-adto sa templo uban sa mga miyembro sa iyang ward aron sa pagbuhat og mga bunyag alang sa patay. Si Gary nagtrabaho aron mahimong takus sa pag-adto sa templo. Ang ilang anak nga babaye, nga si Cody, kinsa 11 anyos pa lang adtong higayona, naghinam-hinam sa pag-adto sa templo sa dili madugay aron sa pagbuhat og mga bunyag. Sa dihang mi-12 anyos na siya, si Gary nakaadto sa templo uban kaniya. Mao kadto ang unang higayon nga silang duha nakaadto sa templo.
Si Cody miingon, “Nindot kaayo kini. Malinawon kaayo didto. Ang akong amahan miadto, busa mas maanindot pa kaayo kini.” Si Gary miingon nga siya mibati og “talagsaon kaayo nga kalinaw ug hingpit nga kalipay nianang una nga higayon.”
Pagka-sunod Dominggo sa klase sa pagpangandam sa templo, si Gary usa na kalahi nga tawo. “Siya mibati sa impluwensya sa Espiritu,” miingon si Sister Elna Scoffield, kinsa nagtudlo sa klase mga pipila na ka tuig. Si Gary nagpabilin human sa klase aron sa pagpangutana. Siya mibati sa Espiritu diha sa templo ug gusto nga mobalik— dili lamang sa paghimo og mga bunyag apan sa pagdawat sa iyang endowment ug aron sa pagbugkos sa iyang pamilya ngadto kaniya.
Pagkasunod bulan ang mga Tucker miadto pag-usab sa templo uban sa bishop ug sa ubang mga miyembro sa ward.
Pagbuntog sa mga Pagsulay
Sa mga semana sa wala pa si Brother ug Sister Tucker nakadawat sa ilang endowment ug nabugkos, sila nakasinati og pagpugong sa kaaway. Si Gary milambo, apan siya aduna pa gihapoy mga pagduha-duha kabahin sa iyang katakus nga makasulod sa templo. Ang ilang damgo nga mahimong usa ka mahangturong pamilya duol na kaayo, apan sila mibati nga kini dili makab-ot. Ang mga Tucker nasayud nga sila kinahanglan nga mas mag-ampo og dungan sa kanunay, mangayo og kalig-on. “Kami kanunay nga makadawat niini pinaagi sa mahupayon nga kalinaw ug pagsalig nga ang tanang mga butang anaa sa mga kamot sa Ginoo,” miingon si Sister Tucker. “Gani bisan ngadto sa higayon nga kami naglakaw pasulod sa templo, ang Iyang makapahupay nga Espiritu anaa kanamong tibuok pamilya.”
Human nga si Gary ug Jennifer midawat sa ilang mga endowment, sila nangluhod sa sealing room uban sa ilang mga anak, nga sila si Cody ug Garrett, nga nagsul-ob og puti. Sa dihang ang sayis anyos nga si Garrett nakakita sa iyang mama nga naghilak, siya miduol aron sa pagpahid sa mga luha diha sa aping sa iyang mama. Sila si Gary ug Cody naghilak usab tungod sa hingpit nga kalipay. Bisan ang tigbugkos emosyonal usab.
Ang mga Tucker miingon nga ang ilang pamilya karon nagtagamtam og mas lig-on nga relasyon ug mas maayo nga komunikasyon. Si Gary miingon, “Kami mas malipayon. Ang akong asawa ug ako mas nagkasuod, ug ang among mga anak nakakita niana.” Si Gary mibati nga siya nahimong usa ka mas maayo nga ehemplo ngadto sa mga sakop sa iyang pamilya kinsa dili mga miyembro sa Simbahan, ug siya naglaum nga ang ubang mga pamilya sa iyang ward unta makagusto sa sama nga mga panalangin nga gihatag sa Ginoo sa mga Tucker pinaagi sa templo.
Sa wala: litrato sa Templo sa Billings Montana pinaagi ni Steve Bunderson; litrato sa bunyaganan [baptistry] sa Templo sa Billings Montana pinaagi ni Norman Childs; sa tuo: gilitratohan ni Drake Busath, © Busath Photography
Sila si Gary, Jennifer, Cody, ug Garret Tucker malipayon nga anaa sa Templo sa Billings Montana sa adlaw sa ilang pagbugkos.
Mga miyembro sa Three Forks Ward kanunay nga mo-drayb og duha og tunga sa oras aron sa pangpangalad sa Templo sa Billings Montana. Ang mga pipila nga mitambong mao ang mga hamtong kinsa naghimo og mga bunyag alang sa patay samtang sila ug ang ilang mga asawa nangandam sa pagdawat sa ilang mga endowment ug mabugkos.
Litrato sa maayong kabubut-on sa mga Tucker