Magsugod pinaagi sa Pag-ampo
Nagpangita og mga tubag? Kining mga batan-on sa Ottawa, Canada, miingon nga ang pag-ampo mao ang dapit sa pagsugod.
Sa dihang ang 15 anyos nga si Jenni naghisgot kabahin sa usa ka pag-ampo nga natubag, siya nagsugod sa pagpangayo og pasaylo. Siya masub-anong midawat nga siya wala na mag-ampo kanunay hapit na mag-usa ka tuig. Ang mga panghitabo sa iyang kinabuhi dili kaayo maayo—dili sa eskwelahan, dili uban sa iyang mga higala, dili pud gani sa simbahan.
Usa ka gabii, si Jenni mipasabut, nga siya gusto nga motan-aw og salida sa sine. Siya mili-li ngadto sa labing ubos sa estante sa mga libro sa dihang iyang nakita ang usa ka litrato sa iyang tiyo kinsa subo kaayo nga namatay dili pa lamang kaayo dugay. Sa kalit lang, ang gibug-aton sa tanan niyang gikabalak-an nakapahimo kaniya nga gustong mohilak. “Ako nasayud diha-diha dayon nga ako kinahanglan nga mag-ampo,” miingon si Jenni. Siya miluhod kon asa siya ug nag-ampo.
Si Jenni mihulagway sa iyang pagdawat sa tubag: “Sa higayon nga ako nahuman, ako nakadawat og mga tubag sa akong mga pangutana. Ako mibati nga ang tanan mamaayo ra pag-usab. Ang tanang butang mahimong OK ra. Ang tanang butang kabahin sa akong tiyo kay OK ra. Ako nakaamgo nga ako ganahan nga moeskwela ug sa akong mga higala. Sa dihang ako nahuman na sa pag-ampo, ako nasayud nga ako kinahanglan nga moadto sa simbahan tungod kay kini mao ang akong gikinahanglan. Kini gayud midulot kanako, ug mibati og hilabihan nga kahupayan ug kainit. Ako nasayud nga ang akong Langitnong Amahan nahigugma kanako ug Iya akong tabangan sa pagsulbad sa tanang butang.”
Alang kang Jenni, kini nga pag-ampo mao ang usa ka butang nga iyang gustong isulti apan dili makahimo. Karon, bisan gani sa paghunahuna niini, siya makaangkon og sama nga pagbati sa paghupay kadaghan ug sama nga kasiguroan nga ang tubag kaniya naggikan sa Ginoo.
Si Jenni Holt gikan sa Ottawa, ang maanindot nga kapital nga siyudad sa Canada nga natukod diha sa mga kakahoyan nga anaa sa kilid sa Ottawa River. Siya ug ang iyang mga higala gikan sa Ottawa Ontario Stake nag-istoryahanay gamit ang mga magasin sa Simbahan kon sa unsang paagi nga ang pag-ampo nakaapekto sa ilang mga kinabuhi.
Asa man Gikan ang mga Tubag?
Usa sa labing makapainteres nga butang nga gihisgutan sa mga batan-on sa Ottawa mao ang ang paagi kon giunsa sa pagtubag ang ilang mga pag-ampo. Una, si Susan Brook miingon, “Kon gusto nimo og tubag, kinahanglan nga imo kining paminawon.”
Si Susan miingon nga ang iyang mga pag-ampo usahay moabut pinaagi sa pagbasa sa mga kasulatan. Siya adunay usa ka maayo nga ehemplo: “Usa ka adlaw, ako gayud gikapoy, ug ako wala manumbaling ngadto sa tanan. Ako dili gusto nga makig-istorya. Ako nakahinumdom nga nagbasa diha sa mga kasulatan, wala ako makahinumdom kon asa, apan kini miingon, ‘Pagmapainubsanon.’ Kini gayud miigo kanako. Kana mao ang tubag alang kanako.” (Tan-awa sa D&P112:10.)
Si Ariana Keith maminaw og tarong sa simbahan. “Sa akong hunahuna daghan sa atong mga pag-ampo matubag pinaagi sa mga mamumulong sa simbahan,” siya miingon. “Adunay usa ka higayon sa dihang gusto na nakong maangkon ang patriyarkal nga panalangin. Dayon sa semana sa wala pa ang iskedyul nga ako kining kuhaon, ang among patriyarka sa stake miadto gayud sa among ward ug namulong. Ako nag-ampo na gayud pag-ayo kabahin niini, ug talagsaon kaayo nga nagpaminaw kaniya.”
Si Mackenzie Loftus miingon nga ang iyang pag-ampo sa kanunay matubag pinaagi sa iyang pamilya. Siya nag-ampo kabahin sa usa ka desisyon sa pamilya, ug “Ako mibati diha-diha dayon sa Espiritu, nasayud nga ang desisyon nga among pagahimoon mao ang sakto nga butang.”
Usahay ang tubag literal lang nga moduol diha kanimo. Sa dihang si Thomas Francis ug ang iyang pamilya mibalhin ngadto sa Ottawa, siya kinahanglan nga makighigala ngadto sa bag-ong mga tawo diha sa usa ka bag-ong eskwelahan. Siya nag-ampo nga makakita og bag-ong mga higala. “Usa ka adlaw,” miingon si Thomas, “kining akong klasmeyt miduol kanako ug miingon, ‘Gusto nimong mouban ug makig-ila-ila sa akong mga higala?’ Sukad niadto, kami nahimong higala. Kini nakatabang og dako gayud kanako.”
Si Dawson Lybbert adunay usa ka butang nga importante nga iyang isulti kabahin sa mga tubag sa pag-ampo. Siya miingon, “Usahay dili nimo makuha ang imong gilauman nga tubag, apan imong makuha ang tubag nga imong gikinahanglan.” Siya miingon nga usahay dili ni nimo makita diha-diha dayon, apan imo ning makita kon ikaw molantaw pagbalik.
Usa ka Tawo nga Mahimong Kasultihan
Ang pipila sa mga batan-on miingon kon unsa ka nindot nga makaangkon og usa ka pamilya nga magdungan og ampo. Si Kyffin de Souza ganahan kaayong masayud nga ang iyang pamilya magdungan og ampo matag gabii. “Kami aduna nay mora og iskedyul nga magpuli-puli. Ako nakabati sa Espiritu, ug ako nasayud nga kon ako mobiyahe layo sa panimalay, sila nag-ampo kanako nga ako mahimong luwas ra.”
Si Bénédicte Bélizaire ganahan nga mag-ampo uban sa iyang mga ginikanan matag buntag. “Ako moadto sa ilang kwarto, ug kami mag-ampo,” siya miingon. “Ako adunay pagpamatuod nga ang Espiritu Santo anaa kanako, ug kon pananglitan ako nagkinahanglan sa Iyang tabang, Ako mangayo lamang niini sa Langitnong Amahan.”
Ang iyang higala nga si Ruth Decady miingon, “Importante gayud nga kon kita mosulti sa atong mga pag-ampo, kita nasayud nga ang Langitnong Amahan naminaw kanato. Adunay usa ka tawo nga andam motabang kanimo.”
Si Katie Cameron ganahan kaayo kon sa unsang paagi nga ang pag-ampo mihatag kaniya og pagbati. “Kon ako makig-istorya ngadto sa Ginoo, kini mopabatyag nga adunay usa ka tawo nga tinuoray gustong makig-istorya ngari kanako. Ako nasayud nga ako makahimo sa pag-istorya Kaniya og bisan unsa nga butang.”
Mga Pag-ampo nga Ihalad alang sa Uban
Ang mga batan-ong lalaki—ilabi na sa mga nag-edad sa pagka priest sama nila ni Ronan Filamont, Fred King, ug Dawson ug Davin Lybbert—naghisgut kabahin sa kaimportante ug kasagrado sa buluhaton sa pagsulti sa mga pag-ampo sa sakrament alang sa mga miyembro sa ilang mga ward ug mga branch.
Si Dawson miingon, “Ang pag-ampo diha sa sakrament makapahunahuna nimo og mas klaro kabahin sa kaimportante niini. Ako anaa niining katungod sa priesthood, ug ako mibati nga dili ni nako angayan nga abusaran.”
Si Fred nakahinumdom sa iyang pagsulti sa pag-ampo sa sakrament sa una niyang pagkaorden sa pagka-priest: “Kini lisud sa sinugdanan, ug ako kanunay masayop. Kon ako masayop ako mobalik gikan sa sinugdanan pag-usab. Apan ang Espiritu mihung-hong kanako nga dili igsapayan kon kapila ako mosulay; ako sa kaulahian makakuha ra gyud sa eksakto. Kadto usa ka nindot nga pagbati.”
Ang Pag-ampo Nagkinahanglan og Pagpangandam
Ang pipila sa mga batan-on maghisgut kabahin sa importante nga mga butang nga ilang kinahanglang buhaton alang sa pagpangandam sa pag-ampo. Si Matt Larson adunay usa ka pakisayaran sa kasulatan nga gilansang sa bong-bong sa iyang kwarto, Doktrina ug mga Pakigsaad 78:19: “Siya kinsa nakadawat sa tanan nga mga butang uban sa pagpasalamat mahimo nga mahimayaon; ug ang mga butang dinhi sa yuta madugang ngadto kaniya, gani sa gatusan ka pilo-pilo, oo, labaw pa.” Kini nagpahinumdom kaniya nga magpasalamat sa mga butang nga gihatag sa Ginoo ngadto kaniya. Siya nasayud nga ang pagpasalamat kinahanglan nga mahimong usa ka bahin sa iyang mga pag-ampo.
Si Nick Moolenbeck miingon, “Ang pag-ampo dili epektibo kon ako mangayo lamang nga dili magseryoso sa paghunahuna ug paghatag sa akong kasingkasing ug kalag ngadto niini.”
Ang Milagrosong Gahum sa Pag-ampo
Si Sierra Lybbert adunay usa ka talagsaong istorya kabahin sa pag-ampo. Sa dihang siya dos anyos pa, usa ka kabayo ang mitamak sa iyang kamot. Ang iyang kumagko maoy nagrabehan, ug ang pipila sa iyang mga tudlo natangtang. Ang iyang mga ginikanan nagdali-dali sa pagdala niya gikan sa usa ka ospital ngadto sa lain aron sa pagpangita og tig-opera, nga andam nga mobuhat sa mora og imposible kaayong himoon nga pagkaayo. Siya miingon, “Ang usa ka doktor miingon sa akong mga ginikanan nga ang tig-opera walay pag-ampo nga kini magmalampuson. Ang akong mama miingon kaniya nga ang tig-opera walay usa ka pag-ampo uban kaniya—siya adunay daghan. Ang akong mama mitawag sa templo aron sa pagdugang sa akong ngalan ngadto sa prayer roll.”
Karon, sa edad nga 13, si Sierra adunay magamit nga kamot. Ang iyang kumagko maayo na, ug iya kining ipataas ngadto a pipila ka mga babaye sa iyang ward aron ilang makita. Sila wala gayud makadungog sa istorya. Ang ilang makita mao lamang ang nipis nga kamot ni Sierra, lisud gayud mamatikdan nga uwat nga nagtuyok sa ubos sa iyang kumagko. Ang resulta hilabihan gayud ka talagsaon.
Si Sierra miingon, “Kini nakapalipay kanako nga nasay-ran unsa ang mahimo sa pag-ampo para kanako. Kini usa ka talagsaon nga butang sa akong kinabuhi.”
Ang tanan mora og miuyon kang Kale Loftus sa dihang siya miingon, “Ang pag-ampo usa ka talagsaong kinaiya nga angayang mabatunan.”
Ibabaw: Sila si Bridgitte Leger, Jenni Holt, Dawson Lybbert, Dayna Conway, Rebekah Wagoner, ug Alexander Richer-Brule, uban sa laing mga batan-on sa Ottawa Ontario Stake (sa wala), sayri nga ang tabang gikan sa Langitnong Amahan usa lamang ka pag-ampo ang gilay-on.
Sa ibabaw, gikan sa taas: Sila si Fred King ug Ronan Filamont miuyon nga ang pag-ampo sa sakrament sagrado ug kinahanglang isulti nga may balaan nga pagtahud. Si Kyffin de Souza mapasalamaton sa mga pag-ampo sa pamilya.
Mga kabatan-onan sa Ottawa nag-ampo alang sa paghupay panahon sa lisud nga mga panahon, alang sa tabang sa buluhaton sa eskwelahan ug mga higala, ug mga panalangin nga ilang gitinguha. Sila nasayud nga ang Langitnong Amahan motubag sa ilang mga pag-ampo. “Usahay dili nimo makuha ang imong gilauman nga tubag,” miingon si Dawson Lybbert, “apan imong makuha ang tubag nga imong gikinahanglan.”
Ibabaw: Si Matt Larson nagbasa sa kasulatan nga gilansang sa iyang bong-bong sa dili pa siya mag-ampo, ug si Nick Moolenbeck miingon nga ang pag-ampo nagkinahanglan og paningkamot.
Sa ibabaw, gikan sa taas: Sila si Ruth Decady, Katya Gallant, ug Bénédicte Bélizaire miuyon nga kini usa ka nindot nga ideya sa pagpangutana sa Langitnong Amahan sa pagpadala sa Espiritu Santo. Ubos: Katie Cameron, Carolyn Albers, ug Sierra Lybbert ganahan sa ilang pagbati nga ilang bation kon sila mag-ampo.
Pagpaminaw, pinaagi ni Michael Jarvis Nelson
Mga litrato pinaagi ni Janet Thomas