Ngano nga Kita Mohimo sa Misyonaryo nga Buhat?
Gikan sa usa ka pakigpulong nga gihatag sa usa ka seminar alang sa bag-ong mga mission president niadtong Hunyo 23, 1992.
Ang katuyoan sa atong misyonaryo nga buhat mao ang pagtabang sa mga anak sa Dios nga makatuman sa usa ka kondisyon nga gisugo sa atong Manluluwas ug Manunubos.
Ang basihan nga doktrina sa misyonaryo nga buhat makita sa pulong sa Manluluwas ngadto kang Nicodemus: “Sa pagkatinuod, sa pagkatinuod, magaingon ako kanimo, gawas kon ang tawo igaanak sa tubig ug sa Espiritu, dili siya makasulod sa gingharian sa Dios” (Juan 3:5).
Ang “gingharian sa Dios” nga gipasabut dinhi mao ang celestial nga gingharian.
Kita wala magsangyaw ug magtudlo aron sa “pagdala og mga katawhan ngadto sa Simbahan” o sa pagpadaghan sa mga miyembro sa Simbahan. Kita wala magsangyaw ug magtudlo aron lamang sa pagdani sa mga tawo nga mopuyo og mas maayo nga mga kinabuhi. Kita motahod ug mopasalamat sa daghang mga magtutudlo ug sa uban pa kinsa adunay kalabutan sa klase sa pagpangalagad nga ang dautang mga tawo mahimong maayo ug ang maayo nga mga tawo mahimong mas maayo. Kana importante, apan kita nagtanyag og mas labaw pa. Ang usa ka tawo makasarang alang sa terrestrial nga gingharian kaysa telestial nga gingharian nga walay tabang niini nga Simbahan. Kita mas naghunahuna uban sa mas taas nga padulngan.
Ang katuyoan sa atong misyonaryo nga buhat mao ang pagtabang sa mga anak sa Dios nga makatuman sa usa ka kondisyon nga gisugo sa atong Manluluwas ug Manunubos. Kita nagsangyaw ug nagtudlo aron mabunyagan ang mga anak sa Dios aron sila mahimong maluwas sa celestial nga gingharian kaysa kutob ra sa mas ubos nga gingharian. Kita naghimo sa misyonaryo nga buhat aron sa pagbunyag ug pagkumpirma. Kana mao ang basihan nga doktrina sa misyonaryo nga buhat.
Ang gipahiuli nga ebanghelyo naghatag kanato og dugang nga kaalam kabahin ni Jesukristo ug sa Iyang doktrina. Apan ang pagkatalagsaon sa atong mensahe dili lamang dugang nga kahibalo. Ang kinahanglanon sa bunyag nagpahinumdom kanato nga ang mga kamatuoran nga atong gitudlo dili lamang teyoriya. Ang gipahiuli nga ebanghelyo naglangkub og mga doktrina ug mga ordinansa. Kita mosangyaw nga ang bunyag gikinahanglan alang sa pagtubos kanato gikan sa mga sala sumala sa mga kondisyon nga gisugo sa Manunubos ug ang mga naghupot sa priesthood lamang niini nga Simbahan adunay katungod nga hinatag sa Dios nga mousab sa pagpaunlod sa tubig ngadto sa usa ka ordinansa sa walay katapusan nga ebanghelyo. Ang atong pagsangyaw ug pagtudlo mosangpot ngadto sa bunyag.
Ang bunyag usa ka kinahanglanon, apan ngano? Ngano man nga kinahanglang mabunyagan sa ingon niini nga paagi ug sa usa ka tawo nga naghupot sa piho nga katungod? Wala ko kahibalo. Apan ang akong nahibaloan mao nga ang kapasayloan sa mga sala nahimong posible lamang pinaagi sa maulaong sakripisyo sa atong Manluluwas, nga si Jesukristo, ug Iya na kanang gisugo nga kondisyon, sa makadaghan na. Ang iyang sakripisyo mibayad sa presyo sa akong mga sala, ug Siya mihan-ay sa mga kondisyon diin ako mahimong maluwas pinaagi sa Iyang pagbayad. Kana nga rason paigo na alang kanako.
Sama sa giingon sa mga propeta niini nga dispensasyon ngari kanato, ang katuyoan sa mga misyonaryo nga anaa sa natad sa misyon mao ang pagluwas sa mga kalag, pagbunyag sa mga nakabig, pag-abli sa mga pultahan sa celestial nga gingharian ngadto sa anak nga mga lalaki ug anak nga mga babaye sa Dios.
Wala nay lain pa nga makabuhat niini.
Ang ubang mga simbahan dili makabuhat niini.
Ang maayo nga Kristiyano nga pagpuyo dili makabuhat niini.
Ang maayong pagtuo, maayong mga tinguha, ug maayo nga pagpang-rason dili makabuhat niini.
Ang priesthood sa Dios mao lamang ang makahimo sa bunyag nga motagbaw sa balaanong kasugoan mao nga “gawas kon ang tawo igaanak sa tubig ug sa Espiritu, dili siya makasulod sa gingharian sa Dios” (Juan 3:5).
Ang basihan nga doktrina sa misyonaryo nga buhat mao ang pulong sa Dios, gipadayag sa matag panahon, nga ang tawo dili maluwas ngadto sa celestial nga gingharian kon wala ang maulaong sakripisyo ni Jesukristo ug ang bugtong paagi nga makaangkon sa kaayohan sa Pag-ula mao ang pagsunod sa sugo sa tigpasiugda niini: “Paghinulsol kamo, ug pabautismo kamo ang matag usa kaninyo” (Mga Buhat 2:38). Kita gitawag aron sa pagtabang niining dako nga paningkamot.
Si Nicodemus Gitudloan ni Kristo, ni Robert T. Barrett; paghulagway sa litrato ug sa luyo pinaagi ni Cary Henrie