Paghupay ni Lucy
“[Ang] Maghuhupay mopuno uban sa paglaum ug hingpit nga gugma” (Moroni 8:26).
Si Lucy nagtikung-kong diha sa suok sa iyang kwarto sa dihang ang iyang mama misulod aron moingon og good night.
“Nag-unsa man ka diha, Lucy?” Si Mama nangutana.
“Gusto lang kong mag-inusara aron makahunahuna,” miingon si Lucy, nga gitabunan ang iyang nawong sa iyang paboritong habol—ang yellow nga habol nga may mga bulak nga gipanag-iya ni Mama niadtong gamay pa siyang bata.
“Gusto ka ba nga mag-istorya mahitungod niini?” Nangutana si Mama, nga naglingkod sa tuya-tuya nga lingkuranan.
Si Lucy mitando ug misabak ni Mama. “Naghunahuna ko ni Lola Eliza,” hinay siya nga misulti, gilugod ang habol sa iyang mga mata.
“O,” si Mama miingon, gituya-tuya siya og hinay. “Kahibalo ka, si Lola Eliza naa na karon sa langit. Sa akong hunahuna malipayon na siguro kaayo siya didto.”
Si Lucy mihingos. “Kahibalo ko,” siya miingon. “Apan gimingaw ko niya, ug wala ko malipay nga wala na siya.”
“Gimingaw sab ko niya,” si Mama miingon samtang iyang gihapyod ang buhok ni Lucy. “Nganong dili man kita mag-ampo mahitungod niini?”
“OK,” si Lucy miuyon. Uban sa tabang ni Mama, si Lucy nag-ampo, “Mahal nga Langitnong Amahan, naguol ko nga si Lola Eliza namatay, ug gimingaw ko niya. Apan kahibalo ko nga anaa siya sa langit ug siya malipayon, ug kahibalo ko nga makita ko ra siya og usab kon siya mabanhaw. Palihug tabangi ko nga dili maguol og maayo. Sa pangalan ni Jesukristo, amen.”
Human siya makasulti og “amen,” si Lucy hilum nga milingkod og kadiyot. Dayon siya adunay ideya. “Kahibalo ko kon unsay buhaton! Si Tiya Emma miingon kanako nga ang pagkanta og mga kanta sa Primary nakatabang kaniya nga mobati og kalipay. Tingali kita kinahanglang mohimo niana!”
“Morag maayo kana nga ideya,” si Mama miingon.
Nagdungan, si Lucy ug si Mama nanganta og “Ako Anak sa Dios,” “Gusto Kong Makita ang Templo,” ug “Maninguha Kong Mahimong Mahisama kang Jesus.” Pagkahuman nila, si Lucy miingon, “Nalipay na ko karon, Mama.”
“Ang Espiritu Santo mitabang kanimo nga mahibalo ka kon unsay angayang buhaton aron mobati ka og mas maayo,” si Mama miingon.
Si Lucy mipahiyom. “Nasayud ako. Ang Langitnong Amahan mitubag sa akong pag-ampo.” Karon kon siya naghunahuna mahitungod ni Lola Eliza, siya mobati nga daw ang paborito niya nga habol miputos sa iyang kasingkasing. Nahupay siya.
“Gihigugma ko ikaw, Mama,” si Lucy mihung-hong dayon niyang katulog. “Ug gihigugma ko usab si Lola Eliza.”
Paghulagway pinaagi ni Sam Lawlor; litrato ni Sister Matsumori pinaagi sa Busath Photography