Diha-diha nga mga Mensahe
Ako Nasayud nga Kini Tinuod
Sukad sa akong pagkabata ako nakadungog sa mga miyembro sa Simbahan nga nagpamatuod kabahin sa Basahon ni Mormon. Ako nagtuo nga ang mga pulong “Ako nasayud nga kini tinuod” mga tradisyonal lamang nga mga pulong nga ang matag miyembro mosulti. Kini mao hangtud nga ako misulod sa natad sa misyon aron moalagad sa Nigeria nga ako nakakat-on sa kamatuoran sa likod niini nga mga pulong.
Usa ka gabii ang akong kauban ug ako namauli padulong sa balay. Kami nagsakay sa among mga bisekleta sa usa ka ngitngit, libaungon nga kalsada nga hilabihan ka lapuk tungod sa ulan. Tungod sa ulan ug ang kondisyon sa kalsada, ang akong kauban nabangga ug natagak sa iyang bisikleta. Ang iyang sinina, ang iyang bag sa kasulatan—ang tanan nga anaa niya—nagkalapok ug nabasa.
Sa dihang kami naabot na sa among apartment, among gilimpyohan pag-ayo ug gipauga sa tanan nga nadaut sa aksidente—gawas lamang sa duha ka kopya sa Basahon ni Mormon nga nagpabilin diha sa iyang bag human sa among pag-proselyte niana nga adlaw. Ako nagtuo nga dili lamang mabalaka kabahin niadtong mga kopya tungod kay kami adunay mas daghan nga kopya sa among apartment.
Pipila ka mga bulan human sa aksidente, ako nangita og paagi sa pag-ayo sa nagisi nga hapin sa akong hymnbook. Ako nakakita sa nalapukan nga mga kopya sa Basahon ni Mormon nga amo nang gipasagdahan sa usa ka estante ug nakita nga ang mga hapin mahimong magamit aron maayo ang akong hymnbook. Apan sa diha nga ako na untang guntingon ang mga hapin sa mga basahon, ang akong kasingkasing gitulisok: “Dili ba kini mao ang basahon nga imong isangyaw? Mao ba kini ang paagi sa pagtratar niini? Unsa kaha ang hunahunaon sa imong mga investigator?” Ako milingkod ug mihinuktok sa taas nga higayon. Dayon, imbis nga guntingon ang mga hapin, ako kining gilimpyohan gamit ang sabonon nga tubig, gipauga kini, ug giayo kini pagbalik sa among bookshelf.
Gikan niini nga kasinatian ako nakaamgo nga sa dugay na nga panahon ako nagpuyo sa usa ka hinulaman nga pagpamatuod sa Basahon ni Mormon, bisan tuod ako mitambong sa seminary ug institute. Sukad niadto ako aduna nay mas lig-on nga relasyon niini nga basahon, ug ako kining gihatagan og mas bug-at nga bili. Ako nakaamgo nga ang atong mga konbiksyon sa kasagrado sa Basahon ni Mormon moabut samtang kita makaila niini pinaagi sa kinasingkasing nga mga kasinatian. Pinaagi sa pagbasa, pagpamalandong, ug pagsunod sa mga pagtulun-an sa Basahon ni Mormon, ako nasayud nga kini tinuod.
Paghulagway pinaagi ni Gregg Thorkelson