Higala ngadto sa Higala
Unsaon Pagtratar sa Uban
Gikan sa usa ka interbyu uban ni Elder Francisco J. Viñas sa Seventy, nga kasamtangang nagserbisyo karon isip Presidente sa Caribbean Area Presidency; ni Sarah Cutler
“Pinaagi sa gugma mag-inalagaray kamo ang usa sa usa” (Mga Taga-Galacia 5:13).
Unsaon man nimo pagtukod og mahangturong pamilya? Ang unang lakang mao ang pagkat-on gikan sa imong mga ginikanan. Ang akong mga ginikanan nabunyagan niadtong 1951, sa dihang kwatro anyos pa ako. Uban kami sa unang mga miyembro sa Simbahan didto sa Uruguay.
Gikan sa akong mga ginikanan ako nakakat-on kon unsaon sa pagtratar ang ubang mga tawo. Gitudloan ko nila sa pagtabang sa tanan, bisan ngadto niadtong kinsa dili gikan sa among kaugalingong nasud o kultura. Usa ka adlaw niana ang usa ka Norwegian nga kapitan sa barko miadto sa Uruguay. Nag-inusara lamang siya, wala ang iyang pamilya. Ang akong pamilya midapit kaniya nga mopuyo sa among balay. Daghan na kaayong mga tawo ang namuyo sa among gamayng balay, apan nagpapuyo pa gyud kami og usa.
Ang pagkakita sa akong mga ginikanan nga nag-atiman sa uban nagtudlo kanako og yanong baruganan sa ebanghelyo ni Jesukristo: magmahigalaon ngadto sa uban, tarungon sila og tratar, ug ayaw paghukom kanila. Magmabination, ug tabangi ang mga tawo kon sila adunay panginahanglan.
Nakita usab nako kon giunsa sa akong mga ginikanan sa pagserbisyo diha sa Simbahan ug giunsa nila sa pagtabang ang mga misyonaryo. Sa wala pa ako natawag isip usa ka lider sa priesthood, nakadawat na ako og hilabihan nga pagbansay diha sa akong panimalay gikan sa akong mga ginikanan.
Kon sa inyong kinabuhi mas sayo kamong magsugod sa pagsunod sa ebanghelyo, mas monindot ang inyong kinabuhi. Sa umaabut kamo mahimong mopasa sa samang mensahe sa ebanghelyo ug panulundon ngadto sa inyong mga anak ug dayon ngadto sa ilang mga anak. Makasugod kamo og usa ka bag-o nga henerasyon sa usa ka mahangturon nga pamilya kon kamo magkat-on sa nag-unang mga baruganan sa ebanghelyo.
Ang ehemplo sa akong mga ginikanan usa ka mahinungdanong panulundon alang kanako ug sa akong pamilya. Manghinaut ako nga magpadayon kini alang sa tanang mga henerasyon nga moabut. Ang akong asawa ug ako adunay maayo kaayo nga relasyon uban sa among mga anak. Kami naningkamot sa pagtabang kanila nga masabtan kon unsay gitudlo sa akong mga ginikanan kanako, nga kon kamo nahigugma sa uban ug nagtabang kanila, bulahan kamo. Ang among mga anak adunay daghan kaayo nga mga hagit, apan silang tanan nabugkos didto sa templo. Sila aktibo sa Simbahan, ug nanghinaut kami nga sila mopasa niini nga panulundon ngadto sa sunod nga henerasyon.
Ang akong mga apo mao ang ikaupat nga henerasyon sa among pamilya diha sa Simbahan. Naglaum kami nga among mapakigbahin kanila ang susamang abilidad sa pagdawat sa uban, sa pagtabang kanila, ug sa pagbayaw kanila. Naningkamot kami sa pag-establisar og usa ka pamilya nga gibase sa hugot nga pagtuo diha ni Jesukristo ug sa lig-on nga pagpamatuod sa Iyang ebanghelyo.
Mga paghulagway pinaagi ni Dileen Marsh