Mga Mensahe gikan sa Doktrina ug mga Pakigsaad
Kini Mao ang Atong Tinuohan, sa Pagluwas sa mga Kalag
Usa ka paborito nga himno nga kanunay natong kantahon sa mga miting sa priesthood mao ang “Ye Elders of Israel,” nga gisulat ni Cyrus H. Wheelock. Ang ikatulo nga bersikulo mabasa:
Kabus adtoon sama sa kaniadto,
Sa gutom ug luya, kita moadto;
Sila’s nindot nga balita dasigon
Sa Zion may kinabuhi nga dayon.1
Pagka Sabado sa wala pa ang kinatibuk-ang komperensya niadtong Oktubre 1856, sila Elder Franklin D. Richards ug pipila sa mga namauli nga mga misyonaryo miabut sa Walog sa Salt Lake. Sila mireport kang Presidente Brigham Young nga gatusan sa pioneer nga mga lalaki, mga babaye, ug mga bata nagkatag sa taas nga panon padulong sa walog, nag-atubang sa duol na nga pagsugod sa tingtugnaw. Daghan ang mga tawo nga gipanggutom, ug daghang mga karomata ug mga karwahe ang nangaguba. Ang mga tawo ug mga hayop hapit na nga mamatay. Silang tanan mahimong mawala gawas kon sila pagaluwason.
Pagka Dominggo sa buntag si Presidente Young mi-assign niadtong tanan kinsa mamulong nianang adlawa ug panahon sa komperensya nga mosunod sa pagsulbad kabahin sa makuyaw nga kahimtang sa mga pioneer. Sa iyang pamulong siya miingon:
“Kana mao ang akong ; kana mao ang giingon sa Espiritu Santo nga anaa kanako. Mao kini ang pagluwas sa mga tawo. …
“Sultihan ko kamo nga ang tanan ninyong pagtuo, tinuohan, ug propesyon sa tinuohan, dili gayud makaluwas og usa ka kalag ninyo sa Celestial nga Gingharian sa atong Dios, gawas kon mobuhat kamo bisag sa ingon nga mga baruganan sama sa gitudlo nako ninyo karon. Adtoa ug dad-a ngari karon kadtong mga tawo sa patag.”2
Si Cyrus H. Wheelock naglingkud niadto nga mga miting. Siya nahimong usa ka miyembro sa unang grupo nga miluwas ug mibiya sa Siyudad niadtong Oktubre 7 aron sa pagpangita sa mga nagkatibulaag nga mga Santos sa mga patag.
Sa kaulahian, si George D. Grant, kinsa mao ang nangulo sa grupo sa pagluwas, mireport ngadto kang Presidente Young: “Dili kaayo magsilbi alang kanako sa pagsulay og paghulagway kanimo sa sitwasyon niining mga tawhana, kay ikaw makahibalo ra niini gikan sa [uban] … ; apan ikaw mahimong maghunahuna mga lima ug unom ka gatus nga mga lalaki, mga babaye ug mga bata, gipangkapoy pinaagi sa pagbira sa mga karomata ngadto sa snow ug lapok; nangakuyapan diha sa daplin sa dalan; nangatumba, gipangtakigan tungod sa katugnaw; mga bata nga naghilak, ang ilang mga kamot ug mga tiil nanggahi tungod sa katugnaw, ang ilang mga tiil nasamaran ug ang pipila kanila nag-antus sa snow ug hilabihang katugnaw. Ang sitwasyon hilabihan gyud kaayo ka lisud bisan pa sa labing lig-on kanato; apan kami magpadayon sa pagbuhat kutob sa among mahimo, dili magduha-duha ni mawad-an sa paglaum.3
Ang teksto sa “Ye Elders of Israel” mahimong anaa gayud sa hunahuna ni Brother Wheelock panahon niadtong malisud nga mga adlaw sa 1856. Ang mga tigluwas mitabang gayud sa mga naluya, gigutom, ug gipangtugnaw. Sila midasig kanila ug mipakita kanila sa dalan sa Zion paingon sa Walog sa Salt Lake.
Pagluwas sa mga Katawhan
Sa atong panahon nga aduna nay mga jet plane, nga dili na moabot og usa ka adlaw sa pagbyahe gikan sa Europe padulong sa Walog sa Salt Lake, ang mga panghitabo ug mga kondisyon hilabihan gayud nga nausab. Apan ang pahayag ni Presidente Young wala gayud mausab—ato gihapong ang pagluwas sa mga tawo. Isip mga miyembro sa Simbahan sa Ginoo, kita kanunay ubos sa obligasyon sa pagluwas niadtong nagkinahanglan sa espiritwal ug pisikal. Sama sa gipadayag sa Ginoo ngadto sa mga elder sa sayong mga adlaw sa gipahiuli nga Simbahan: “Hinumdumi diha sa tanan nga mga butang ang kabus ug ang timawa, ang masakiton ug ang nag-antus, kay siya nga wala magbuhat niini nga mga butang, ang mao dili akong tinun-an” (D&P 52:40).
Kita gusto nga mahimong tinuod nga disipulo sa Ginoong Jesukristo. Kita mipahayag nga kita nahigugma sa Dios ug kita gusto nga mosunod sa Iyang mga sugo. Matag Dominggo atong gibag-o ang atong mga pakigsaad sa bunyag, nagsimba sa Dios sa atong mga miting, ug nagpasalamat Kaniya sa tanang mga panalangin nga Iyang gihatag kanato. Ang pahinumdom ni Haring Benjamin tinuod gihapon: “Kon kamo anaa sa pag-alagad sa inyong isig ka tawo kamo anaa lamang sa pag-alagad sa inyong Dios” (Mosiah 2:17).
Kon ang Ginoo gusto nga mopanalangin sa kinabuhi sa usa ka tawo o motabang og usa ka tawo nga nagkinahanglan, Siya kanunay mopadala og usa ka silingan, higala, o miyembro sa pamilya. Kini mao ang usa sa pamaagi nga Siya modala og suporta ug kaluwasan ngadto sa uban. Pinaagi sa pagbuhat niini, Siya nagtabang kanato sa pagsabut sa dakong sugo, “Higugmaa ang imong silingan sama sa imong kaugalingon” (Mateo 22:39).
Dili ba kini ikatingala nga sa kanunay kita mao ang labing nakabintaha sa atong pagtabang ngadto sa uban? Ang Ginoo misaad, “Siya nga mogalab sa iyang sanggot uban sa iyang kusog, sama ra nga nagtigum og panalangin nga siya dili mahanaw, apan magdala og kaluwasan ngadto sa iyang kalag” (D&P 4:4). Ang pagdala og kaluwasan ngadto sa uban magdala og kaluwasan sa atong kaugalingon nga kalag.
Himoa nga ang Atong mga Mata Bukas Kanunay
Adunay daghang mga paagi nga kita moduol sa uban ug motabang niadtong adunay pisikal ug espiritwal nga mga panginahanglan. Kon kita maglakaw sa kinabuhi uban sa atong mga mata nga bukas kanunay, ang Ginoo mopakita kanato sa mga oportunidad nga mopanalangin sa uban ug sa atong mga kaugalingon.
Bag-ohay lang ako mitambong og usa ka komperensya sa mga misyonaryo sa Church humanitarian sa Jordan. Samtang ako nakighimamat kanila, ako nakakita og duha ka mga sister nga naggansilyo. Sila miingon kanako nga sila naggansilyo og gagmay nga mga kalo alang sa mga bag-ong natawo. Sa amihanang bahin sa ulohang syudad sa Amman adunay usa ka ospital nga anaay 50 ka mga bata nga natawo sa usa ka adlaw. Ang mga tawo didto mga pobre kaayo. Human og pagpanganak, ang mga inahan ug ilang mga anak papaulion na sa ilang mga balay, diin walay pangpainit. Kadaghanan niining bag-ong natawo nga mga bata mag-antus sa mga sakit ug mamatay tungod sa pagkawala sa kainit sa lawas. Ako nangayo og duha ka sampol sa ilang ginansilyo.
Pag-uli nako sa panimalay, ang akong asawa midala sa mga sampol ngadto sa Relief Society. Isip resulta, usa ka milagro ang nagsugod—sama nga kini kanunay nagsugod sa daghang mga miting sa Relief Society sa tibuok kalibutan. Panahon sa Pasko daghang mga igsoong babaye gikan sa among silingang mga ward misugod sa paggansilyo ug pagpanahi og mga kalo alang sa bag-ong natawo nga mga bata. Ila kining gibuhat nga nag-inusara, uban sa mga higala, sa panimalay, o sa mga kalihokan sa Simbahan.
Usa ka adlaw ako nangutana sa usa ka higala kon kumusta na siya. Uban sa iyang nagkipat-kipat nga mata, siya mitubag, “Ako usa ka ‘biktima’ sa mga kalo alang sa bag-ong natawo nga mga bata. Kami nag-istoryahanay kabahin sa mga kalo alang sa bag-ong natawo nga mga bata matag gabii ug adlaw. Kami gipalibutan kanila.” Usa ka sister ang nanawag ug nangutana kanako, “Dili ba init sa Middle East?” Sa dihang akong gisigurado kaniya nga ang mga kalo gikinahanglan, siya mibalik sa pagtrabaho.
Sa dihang ako mibalik sa Jordan, ako adunay sobra pa sa 800 ka mga kalo alang sa bag-ong natawo nga mga bata sa akong mga suitcase. Samtang amo na kining gihatag ngadto sa senior consultant sa estasyonan alang sa mga bag-ong natawo sa ospital, siya naghunahuna nga kini mga panalangin nga gipadala sa sakto nga higayon. Ang Jordan nakasinati lang sa labing bugnaw nga tingtugnaw sulod sa 16 ka mga tuig, nga may ubos kaayo nga temperatura nga makapakaging.
Pagtabang sa Uban
Ang pagduol ug pagtabang dili limitado sa edad, panglawas, panahon, mga kahanas, o mga kapanguhaan sa pinansyal. Ang matag usa kinsa adunay tinguha mahimong motabang niadtong nanginahanglan. Kita mahimong moapil sa maayong pagka-organisar nga mga proyekto sa welfare. Kita mahimong mohatag og ubay-ubay nga mga halad sa puasa. Kita mahimong mobisita ug mopahupay og usa ka higala kinsa masakiton. Kita mahimong modapit og usa ka tawo kinsa nag-atubang og mga problema sa atong panimalay. Kita mahimong matinud-anong mobisita sa mga pamilya nga atong gi-home teach ug ang mga sister nga atong gibisitaan. Kita mahimong modapit og usa ka higala kinsa nanlimbasug sa kalisdanan sa atong mga miting sa Dominggo. Kita mahimong mouban sa full-time nga mga misyonaryo. Kita mahimong mohimo sa buluhaton sa family history ug moalagad kanunay sa templo. Kita mahimong maminaw sa atong mga anak ug mga apo, magtudlo kanila, ug moawhag kanila sa paglakaw sa kahayag.
Usahay ang pagduol sa uban sama kasayon sa paghatag og kinasingkasing nga pag-ampo, pagtawag sa telepono, o pagsulat og mubo nga sulat. Kon kita hilabihan ka busy sa pagduol ngadto sa usa ka tawo nga nanginahanglan, dayon kita hilabihan ka busy. Kon kita mohimo og maayo, kita mibuhat sa pagdapit sa Manluluwas:
“Ako mohatag nganha kaninyo aron mahimo nga kahayag niini nga mga katawhan. Usa ka dakbayan nga gitungtong sa usa ka bungtod dili matago.
“Tan-awa, magdagkot ba ang mga tawo og usa ka kandila ug ibutang kini sa ilawom sa tadyaw? Dili, apan sa kandilero, ug kini mohatag og kahayag ngadto sa tanan nga anaa sulod sa balay;
“Busa, himoa nga ang inyong kahayag mohayag sa atubangan niini nga mga katawhan, aron sila makakita sa inyong maayo nga mga buhat ug himayaon ang inyong Amahan kinsa anaa sa langit” (3 Nephi 12:14–16).
Pagtudlo sa Uban sa Zion ug sa Kinabuhing Dayon
Ang pagduol sa uban sa yano nga pagkasulti mao ang pag-atiman sa mga katawhan. Kita wala maghunahuna kabahin sa mga numero o sa gidaghanon apan kabahin sa pagkamaayo sa mga tawo nga nagpalibut kanato. Kon kita mohimo og maayo, moduol, ug mohatag og espiritwal ug pisikal nga tabang sumala sa atong kalig-on ug abilidad, kita diha-diha dayon mitudlo sa uban ngadto sa Zion. Sila madani kon unsa kita ug unsa ang atong gipresentar. Sila mapanalanginan kon unsa ang ilang nakita ug nabati. Ang ilang mga pagpamatuod ma-establisar ug mapalig-on. Dayon ang kasiguradoan sa Ginoo molanog diha sa ilang mga kalag:
“Busa pagmatinud-anon ; barug diha sa buhatan nga Ako mitudlo nganha kanimo; tabang sa maluyahon, ipataas ang mga kamot sa nawad-an og paglaum ug lig-una ang mga tuhod nga mahuyang.
“Ug kon ikaw magmatinud-anon ngadto sa katapusan ikaw makaangkon og korona sa pagka-imortal, ug kinabuhi nga dayon diha sa mansyon nga Ako miandam diha sa balay sa akong Amahan” (D&P 81:5–6).
Sa tinud-anay, ang atong tinuohan mao ang pagtabang ug pagluwas sa mga kalag.
Pagsakripisyo—George Padely, ni Julie Rogers
Mga Paghulagway pinaagi ni Julie Rogers