Mga Higala Mahimo nga Sama Kanimo
Ang atong mga higala makaimpluwensya kanato. Apan kon kita magsunod sa ebanghelyo, kita usab makaimpluwensya kanila.
Ako kanunay midayeg sa mga kausaban nga nahitabo ngadto sa pipila sa mga klasmeyt sa akong igsoong lalaki tungod sa iyang ehemplo. Tungod sa ilang pagkahinigalaay uban kaniya, sila nahimong mas maayo nga mga tawo. Tungod sa iyang ehemplo, ako nasayud nga ang panultihong “Magmabinantayon kon si kinsa ang imong gipili nga mga higala tungod kay ikaw pwede nga mamahimo nga sama kanila” usahay mahimong sabton nga “Magmabinantayon kon si kinsa ang imong gipili nga mga higala tungod kay sila pwede nga mamahimong sama kanimo.”
Sa tibuok tuig sa pag-eskwela, ako adunay sama nga grupo sa mga higala. Apan usa ka tuig, usa ka bag-o nga estudyante ang misugod og tungha sa among eskwelahan, ug dili sama kanako, siya sikat. Apan hinoon ako nahimo gihapon niyang higala. Sa sunod nga mga bulan, kami nahimong mas suod hangtud nga kami nahimong labing suod kaayo nga managhigala.
Ako nang nabatasan ang pag-adto sa seminary dayon inig human sa klase. Usa ka adlaw siya nangutana kanako asa ko moadto matag adlaw. Ako mihukom sa pagpasabut sa tanan kabahin sa Simbahan, apan basi sa dagway sa iyang nawong, ako nakahunahuna nga kini dili mao ang labing maayong paagi nga makig-istorya ngadto kaniya. Busa ako mihunong sa pag-istorya nga mapinugsanon.
Mga pipila ka mga bulan ang milabay ang mga elder nangadto sa akong balay sa samang higayon nga ang pipila sa mga higala ug ako nagkasabot nga maghimo og homework. Kini nga higala mao ang usa kanila, busa ako mihangyo sa mga elder nga maghisgut og gamay kabahin sa Simbahan. Siya interesado kon unsa ang ilang gisulti. Siya nakaamgo nga adunay pipila ka mga butang sa akong kinabuhi nga lahi kaniya ug sa uban pa niyang mga higala nga gipangbuhat, ug gusto niya nga mahibaloan kon ngano. Siya misugod sa pagtambong ngadto sa simbahan, Mutual, ug seminary, ug iyang nakita nga ang tanan nakong mga higala sa Simbahan sama pud kanako, nga sama og mga baruganan. Sa wala madugay siya mihukom nga magpabunyag.
Sa iyang bunyag, ang bishop mihangyo kaniya sa pagpamatuod. Siya mibarug ug miingon: “Ako ania karon diri tungod sa usa ka higala ug unsa siya kalahi sa uban nga mga tawo. Ako nanghinaut nga ang matag usa makakita sa mga kalainan nga anaa usab kaninyong tanan.”
Ako nanghinaut nga kitang tanan maningkamot nga mahimong mga higala ngadto sa uban, kon sila kapareha man nato o dili. Kita wala gayud masayud kon si kinsa ang pwede nga mamahimong, sama kanato, usa ka miyembro sa tinuod nga simbahan sa Ginoo.
Paghulagway pinaagi ni John Zamudio