Ang Pagbisita sa mga Batan-on sa Aberdeen ngadto sa Templo
Alang sa mga kabatan-onan sa Aberdeen Scotland Stake, ang tinuig nga pagbisita ngadto sa templo usa ka makapausab sa kinabuhi nga kasinatian.
Ako dili gyud mobaylo niini alang sa kalibutanon nga mga butang,” miingon si Bethany Gilmour, 17, sa Bridge sa Don Ward. “Kadtong usa ka semana sa templo nakapalig-on sa akong pagpamatuod labaw pa kaysa bisan unsa nga butang. Ug kini nag-agni kanako nga mobalik kada tuig. Adunay daghan nga mga butang nga akong nakat-unan niining mga temple trip nga magpabilin dinhi kanako sa tibuok nako nga kinabuhi—mga butang nga makatabang kanako nga mohimo sa sakto nga mga pagpili sa akong kinabuhi.”
Kini mao ang klase sa pahayag nga gustong madungog sa Aberdeen Scotland Stake president nga si Christopher Payne nga isulti kon ikaw mangutana sa mga batan-on sa iyang stake kabahin sa ilang tinuig nga pagbisita ngadto sa Templo sa Preston England. Siya wala nagpasulabi.
Sa matag ting-init ang 60 hangtud sa 70 ka batan-on nga mga lalaki ug batan-on nga mga babaye sa Aberdeen stake, uban sa ilang hamtong nga mga lider ug pipila ka mga young single adult sa stake, mohimo sa 6½–nga oras sa pagdrayb ngadto sa Preston, England. Sila mogahin og unom ka mga adlaw didto sa templo. Matag buntag sila anaa sa baptistry alang sa mga pagbunyag ug mga pagkumpirma; matag hapon sila busy sa mga kalihokan ug mga proyekto sa pagpangalagad; matag gabii sila magpundok alang sa mga fireside ug pagtuon sa kasulatan. Ang ilang semana sa templo tapuson pinaagi sa usa ka meeting sa pagpamatuod nga sa kasagaran molungtad og upat ka oras. Apan ang tinud-anay nga talagsaong butang kabahin niining 6 ka adlaw sa templo mao kon sa unsang paagi kini moapekto sa lain nga 359 ka mga adlaw sa tuig.
Takus nga Mosulod sa Templo sa Tibuok Tuig
Ang mga kausaban nga nadala sa templo diha sa mga kinabuhi niining mga batan-on dili lamang sulod sa mubo nga panahon; kini taas nga panahon nga kausaban. Si Melanie Bews, 17, sa Aberdeen Ward misulti sa niini nga paagi: “Ang adlaw nga ikaw mobiya sa templo, ikaw nangandam sa pagbalik sa sunod nga pagbiyahe. Sulod sa tibuok tuig ikaw mahimong takus alang sa usa ka butang. Ikaw maningkamot nga mahimong angayan nga mobalik pag-usab sa templo.” Si Melanie naghisgot kabahin sa usa ka pasundayag gikan sa mga lider sa kabatan-onan sa stake nga naglakip og usa ka poster nga adunay walo ka mga ang-ang aron motabang kanila nga mahimong andam alang sa templo. “Ako migamit niini isip pahinumdom aron sa pagsigurado nga akong pagabuhaton ang tanan alang sa akong pagpangandam. Adunay pipila ka mga butang nga anaa sa listahan nga wala pa nako mabuhat diin akong gisugdan sa pagbuhat, sama sa pagtipig og usa ka linain nga journal alang sa espirituhanong mga kasinatian. Kana mao ang usa ka butang nga akong padayunon sa pagbuhat.”
Si Nathan Cumming, 18, sa Elgin Branch miingon, “Ang akong pagpangandam ngadto sa templo sa tinud-anay nagsuporta sa akong pagpangandam ngadto sa misyon.” Siya mipasabut nga ang iyang kada adlaw nga mga pag-ampo ug pagtuon sa kasulatan nahimong mas makahuluganon tungod kay siya nakapokus sa iyang tumong nga mahimong takus. “Sa wala pa kining kinaulahing temple trip, ako nag-ampo sa hilabihan,” siya miingon. “Ako nanlimbasug usahay sa pagsalig ug pagkamaulawanon. Busa aron sa pagpangandam niining temple trip, ako nag-ampo alang sa pagsalig aron nga mas moistorya uban sa mga tawo tungod kay ako dili gayud maayo niini sukad-sukad.” Siya karon adunay pagsalig nga kining mga kasinatian motabang kaniya nga mahimong mas epektibo nga misyonaryo.
Si Mylie Payne, 15, sa Aberdeen Ward mipasabut sa unsang paagi nga kini nga pagpangandam alang sa templo nahimong mas personal alang kaniya sulod sa mga katuigan: “Sa nangaging mga tuig kami nagbuhat og mga puasa sa grupo aron sa pagpangandam alang sa templo.” Karon si Mylie nagbuhat niini sa iyaha na lang kaugalingon. “Niining tuiga ako nag-inusarang nagpuasa aron makapahimulos niini nga pagbiyahe ug motabang nga molig-on sa akong pagpamatuod.” Siya usab naghisgot kabahin sa kausaban sa paagi nga siya nagtuon sa mga kasulatan, ilabi na sa Basahon ni Mormon: “Ako naningkamot nga makasabut sa mga kasulatan nga mas lawom ug mas detalyado. Sa piho, sa dihang ako miabut sa mga parte kabahin sa bunyag, ako gayud naningkamot sa pagtuon ug pagsabut niini.”
Si Bethany Gilmour mihiusa sa ingon niining paagi: “Akong pagagamiton ang akong nakat-unan gikan sa temple trip matag adlaw. Kon ako moabut sa balay, ako maghunahuna kabahin sa sunod nga pagbyahe. Ako naghunahuna kabahin sa unsa ang akong nakat-unan gikan sa nangagi ug unsa ang akong mahimo sa tibuok tuig aron magpabilin kadtong mga pagbati nga akong nabati sa templo sa tibuok tuig hangtud sa sunod.”
Ang Labing Nindot nga mga Panghitabo sa tanang Nindot nga Panghitabo
“Ang templo trip mao ang labing nindot nga panghitabo sa tuig,” miingon si Hope Fraser, 18, sa Bridge sa Don Ward. “Ang tanan naghinam-hinam alang niini.” Apan sulod niana nga labing nindot nga panghitabo sa tuig mao ang mga importante nga panghitabo sa matag batan-on kinsa miapil. Ang labing espesyal nga bahin sa panumduman ni Hope niining tuiga sa pagbisita sa templo mao ang espesyal nga miting sa Laurel. “Kini kahibulongan kaayo,” siya miingon. “Kami unta maghisgut kabahin sa pagpakig-date ug mga sitwasyon nga dili angayan nga sudlan. Kami hinoon naghisgot kabahin sa pagpasalamat nga among gibati ngadto sa usag usa.” Kadto usa ka kasinatian nga bisan ang mga adviser sa Laurel mohinumdom niini nga may kawili.
Si James Bowcutt, 18, sa Elgin Branch miingon nga ang labing nindot nga panghitabo sa iyang pagpangalagad sa templo mao ang adunay kahigayunan sa pagpabunyag alang sa iyang pipila ka mga kaliwat. Sulod sa mubo nga higayon sa wala pa ang pagbiyahe, si James midala sa mga pangalan sa iyang unang mga kaliwatan nga mga miyembro sa pamilya diin iyang pagabunyagan. “Ako makabasa sa mga pangalan ug tinud-nay nga nakaila kanila. Ako sa tinud-anay mibati nga sila gayud akong pamilya, ug ako mapasirgabuhon nga anaa sa akong mga kamot ang mga pangalan sa akong pamilya,” siya miingon. “Ako sigurado nga mibati og mas lig-on nga koneksyon sa mga tawo sa pikas bahin sa tabil.”
Si Mylie Payne naghinam-hinam nga mohisgut kabahin sa kahigayunan nga moalagad sa templo, dili lamang pinaagi sa pagbuhat sa mga ordinansa sa sulod apan pinaagi sa pagpanglimpyo ug pagpangibut og sagbot sa gawas. “Ako ganahan kaayo nga nakatabang diha sa natad sa templo. Adunay usa ka butang nga espesyal kabahin sa paghimo sa balay sa Ginoo nga daw mas matahum,” siya miingon. “Kini gayud kahibulongan.”
“Ang akong paborito nga bahin mao ang paggahin og panahon uban sa akong mga higala nga dili mag-shopping,” miingon si Melanie Bews. “Makalingaw gayud kaayo ang paggahin og panahon uban sa akong mga higala sa may palibut sa templo ug mahimong mas makaila pa nila ug maghimo og mga panumduman nga dili kaayo kalibutanon. Ang labing nindot mao ang paggahin og panahon sa usag usa samtang naglig-on sa among mga pagpamatuod.”
Ang labing nindot nga panghitabo nga kanunay nga hisgutan sa mga kabatan-onan mao ang miting sa pagpamatuod. Si Janine Gall, 17, sa Buchan Ward miingon, “Bisan tuod ang miting sa pagpamatuod dugay nga nahuman, kini dili gayud kapoy. Kini ingon og nahuman lang og mga 10 minutos.” Siya midugang nga “kadto nindot paminawon ang mga pagpamatuod sa ubang mga tawo aron malig-on ang imong pagpamatuod ug mahimong mas masuod ang usag usa isip mga batan-on. Tungod kay kami gamay lang nga komunidad sa mga kabatan-onan, kami kinahanglan nga mag-ila-ila sa usag usa, ug sa akong hunahuna nindot kaayo kining among nahimo sa templo.”
Pagkahiusa ug Suporta
Bisan sila mga gamay lamang nga komunidad sa kabatan-onan sa Santos sa Ulahing mga Adlaw, ang batan-on nga mga lalaki ug batan-on nga mga babaye sa Aberdeen stake mga lig-on. Si Simon Robertson, 18, sa Aberdeen Ward miingon nga panahon sa tuig “kaming tanan lagyo sa usag usa, apan kon kami anaa na sa templo, kami mibati nga usa ka pamilya. Kaming tanan malipayon kaayo tungod kay kami anaa sa templo, ug among nabati ang Espiritu halos kanunay. Sa akong kaugalingon lamang, ako mibati nga malinawon kaayo sa templo. Kini naghatag kanako og mas lig-on nga tinguha nga dili lamang pagsunod sa ebanghelyo apan sa pagsunod niini sa mas maayo. Akong nakita unsa ang atong mahimong makab-ot kon kita nagkahiusa. Ako ganahan nga maningkamot nga mobati niini sa tanang higayon.”
Si Janine Gall mipasabut nga “ang labing duol nga nagpuyo nga batan-ong babaye kanako mga 45 minutos ang gilay-on. Hapit imposible nga magkita alang sa mga kalihokan o seminary, ug mao nga lisud kaayo nga magpabilin nga lig-on sa espirituhanon sa tanang panahon. Mao nga ako malingaw gayud kaayo nga moadto sa templo tungod kay kini ingon og katumanan sa espiritwal nga paagi. Ang akong mga higala makapabayaw kanako ug sa samang higayon ako makapabayaw kanila.”
Bisan nagtapad nga naglingkod nga nagputi samtang nagpaabut nga mabunyagan ug makumpirmahan, nagbasa og dungan sa mga kasulatan diha sa ilawom sa estatuwa ni anghel Moroni nga anaa sa ibabaw sa spire sa templo, o dungan nga nag-ibut og mga sagbot sa mga nataran sa templo, kini nga mga batan-ong nag-ibut nagkahiusa. Si Paige Payne, 13, sa Aberdeen Ward nakahinumdom sa usa ka kalihokan nga wala lamang nakapahimo nilang suod apan usab nakapabasa kini nilang tanan: “Kami nangibut og mga sagbot. Kini nagtubo palibot sa usa ka klase sa tanom, ug among gihawanan ang tanang mga sagbot—ug kini daghan gyud kaayo. Kadto nag-ulan pa gyud pag-ayo, busa kaming tanan nagkalapok. Ug kami anaa sa usa ka bakilid, busa matag higayon nga kami molakaw, kami madakin-as. Makalingaw gyud kadto pag-ayo. Ang mga nagtrabaho sa templo wala makatuo nga kami nagpadayon sa pagbuhat. Tungod kay dungan kadto namong gibuhat, kadto mora og milig-on kanamong tanan.”
Si Ethan Fraser, 18, sa Bridge sa Don Ward midugang nga ang pagbaton og mga higala kinsa mga lig-on sa ebanghelyo makahimo og kalainan sa iyang kinabuhi matag adlaw. “Ako ganahan nga ako adunay mga talagsaong mga higala sa Simbahan,” siya miingon. “Ako nasayud nga kon ako moagi og mga pagsulay, adunay usa ka tawo nga andam nga mosuporta kanako.”
Ang Kalainan
Si Presidente Payne misulay sa pagpasabut kon unsa gayud ang nakapahimong hilabihan ka espesyal sa kabatan-onan sa Aberdeen stake. Sila moadto sa simbahan ug sa mga kalihokan; sila motambong sa seminary; sila naningkamot nga mosunod sa ebanghelyo. Mao usab kini ang gibuhat sa mga kabatan-onan sa matag stake nga iyang napuy-an.
“Dayon ako mibalhin sa Aberdeen stake, ug ako miadto sa akong una nga temple trip,” siya miingon. “Kini karon mao ang usa ka butang nga akong giplano sa akong tibuok tuig. Ug ang rason nga gihimo nako kini tungod kay akong nakita unsa ang mga nahitabo sa among kabatan-onan. Ako nagtuo nga kining temple trip mao ang nakapabilin sa Espiritu diha sa mga kinabuhi niining kabatan-onan. Sila kanunay nga naghisgot kabahin sa temple trip sa tibuok tuig. Kami nangutana kanila, ‘Kamo ba maouban sa temple trip?’ Ug sila miingom, ‘Dili gyud ko kini ibaylo alang sa kalibutanon nga mga butang.’
“Ang pag-adto sa templo—pagbarug niadtong balaan nga dapit—nakapausab kanila. Dili lamang alang niadto nga adlaw o alang niadto nga higayon, dili lamang alang niadto nga oras o niadto nga semana. Kini nakapausab kanila hangtud sa kahangturan.”
Gilitratohan pinaagi ni Paul VanDenBerghe ug sa maayong kabubut-on sa Aberdeen Scotland Stake, gawas kon gipahibalo; litrato sa Templo sa Preston England ni John Luke
Kon kini nga mga kabatan-onan nagpundok alang sa paghisgut sa ilang tinuig nga pagbisita ngadto sa templo, ang matag usa kanila miuyon nga ang panghitabo sa kinabuhi mora og mas miuyon para kanila kon ilang buhaton ang ilang labing maayo sa pagsunod sa mga sugo sa Ginoo. Adunay usa ka butang nga espesyal kabahin niining mga batan-on, ug imong makita kini sa ilang mga panagway.
Ang mga adlaw nga gigahin sa Templo sa Preston England daghan og nahimo ug nagmalampuson. Matag buntag ang mga kabatan-onan anaa sa dapit sa bunyagan [baptistry]; dayon sila mahimong busy uban sa mga proyekto sa pagpangalagad ug mga fireside. Ug aduna gihapoy panahon alang sa makalingaw nga mga kalihokan sama sa football.
Litrato sa dapit sa bunyagan [baptistry] sa Templo sa Preston England ni John Luke