Walay Paglubad nga mga Istorya sa Ebanghelyo
Ang Bunyag Maoy Mag-una
Unsaon man ang minilyon nga mga anak sa atong Langitnong Amahan kinsa, kon sila mabunyagan, sila ba makadawat sa mga panalangin nga mahimong modala ngadto sa pamilyang mahangturon?
Ang manwal sa family home evening … adunay usa sa labing una nga makapadasig nga leksyon. Ang tema mao ang “Pamilya nga Magmahangturon.” Ang mga pamilya gi-instruksyonan nga mobutang og daghang mga butang sa lamesa, ang pipila niini mao ang sertipiko sa kaminyoon, usa ka rekomen sa templo, usa ka litrato sa templo, ug usa ka sertipiko sa bunyag. …
Ang mga miyembro sa Simbahan nasayud nga kining tanan nga mga butang nga anaa sa lamesa adunay relasyon ngadto sa kaminyoon sa templo ug sa posibilidad sa “mahangturon nga pamilya.” … Ako ganahan nga mohatag og gibug-aton niadtong usa sa mga butang nga anaa sa lamesa—ang sertipiko sa bunyag.
Ang “mahangturong pamilya” nagkinahanglan nga ang mga magtiayon adunay mga sertipiko sa bunyag, mahimong takus nga mga miyembro sa Simbahan aron mahimong makasarang alang sa mga rekomen sa templo, ug makaangkon og sertipiko sa kaminyoon nga nagpakita sa celestial nga kaminyoon. Karon unsaon man ang minilyon nga mga anak sa atong Langitnong Amahan kinsa, kon sila mabunyagan, sila ba makadawat sa mga panalangin nga mahimong modala ngadto sa pamilyang mahangturon?
Ang atong full-time nga mga misyonaryo adunay nagtubo nga kalampusan sa tanang bahin sa kalibutan sa pagdala og mga kalag ngadto sa mga tubig sa pagpabunyag. Apan ang ilang kalampusan mahimong mas mapilo pa gyud og kadaghan kon sila adunay madasigon nga kooperasyon sa mga miyembro sa Simbahan. Mora og ang kadaghanan sa mga miyembro sa Simbahan adunay pag-ukon-ukon sa pagpakigbahin sa ebanghelyo ngadto sa ilang mga higala ug mga silangan. Daghan kanato ang mapasigarbuhon sa pagduso kabahin sa kalamboan sa Simbahan o ang kalampusan sa kinatibuk-ang paningkamot sa misyonaryo apan wala pa gayud naka-fellowship og kaila o usa ka silingan. Kon ang hapit na mopauli nga mga mission president pangutan-on, “Unsaon pa unta ninyo pagpadaghan ang mga nakabig sa inyong misyon? kami makadungog kanila og sama nga tubag: “Kon unta atong mapalihok ang atong mga miyembro sa pagtabang sa mga misyonaryo pinaagi sa pag-andam sa ilang mga higala ug mga silingan sa pagdawat sa mga elder.”
Ato na bang nakalimtan ang atong obligasyon? Ato na bang nakalimtan unsa ang gisulti sa Ginoo?
“Tan-awa, Ako mipadala kaninyo sa pagpamatuod ug pagpasidaan sa mga katawhan, ug matag tawo kinsa napasidan-an magpasidaan sa iyang silingan. Busa, sila walay ikapangatarungan” (D&P 88:81–82). …
Ang [atong mga misyonaryo] gibansay aron sa pagtudlo sa ebanghelyo, sa pagtudlo sa han-ay nga paagi, sa dinasig nga paagi, nga gilauman nga modala ngadto sa pagbunyag. Ngadto sa usa ka misyonaryo, ang matag oras importante kaayo ug kinahanglan nga mahimong mabungahon. Kamo ba nakahunahuna nga ang mga misyonaryo mobunyag og usa ka tawo sa matag 1,000 ka mga panimalay nga ilang gi-tracting? Kining sama nga mga misyonaryo makabunyag og 600 ka mga tawo sa matag 1,000 kinsa gipangtudloan sa panimalay sa mga miyembro—600 pa ka mas daghan sa mga kinabig kon ang mga miyembro moapil nga may konbiksyon.
Mas daghan pa niining naghinam-hinam nga batan-ong mga sulugoon sa Ginoo anaa na sa inyong mga ward o mga branch kaysa una pa. Ang mga misyonaryo mogawas nga mas gibansay, mas andam, inubanan sa taas nga mga paglaum ug mga pangandoy. Ang matag pamilya nga midawat sa ebanghelyo obligado sa pagpakigbahin niini ngadto sa iyang silingan. Kita mahimong makadani sa mga tawo kabahin sa ebanghelyo pinaagi lamang sa natural ug kinasingkasing nga pagpakita sa atong gugma alang kanila. …
Dihang nagkasakay kami sa usa ka eroplano, ang usa nako ka higala nakig-istorya ngadto sa usa ka babaye. Siya miingon kaniya kabahin sa iyang pagbyahe ngadto sa Anderson, South Carolina, aron sa pagbisita sa ig-agaw nga tagup-at tungod siya nangita og impormasyon kabahin sa pipila sa iyang mga kaliwat. Siya nangutana niining babaye nga naglingkud tapad kaniya, “Ganahan ka bang masayud ngano nga ako interesado sa akong mga kaliwat nga dugay na kaayong namatay?”
“Oo, ako ganahan,” siya mitubag.
“Ako naningkamot sa pagpangita og impormasyon kabahin sa akong mga kaliwat aron ako makahimo og piho nga buluhaton alang kanila sulod sa templo. Kahibalo ka ba asa ang Manluluwas sa tulo ka mga adlaw sa dihang ang Iyang lawas naghigda sa lubnganan human sa Paglansang sa Krus?”
“Wala. Asa?”
Siya mipadayon, “Si Pedro, ang Apostol, miingon nga si Kristo nagsangyaw ngadto sa mga espiritu nga anaa sa prisohan kinsa nagmasinupakon sa mga adlaw ni Noe.” Ug dayon siya miingon, “Karon, ikaw ba naghunahuna nga ang Manluluwas sa kalibutan mogahin og tulo ka adlaw sa pagsangyaw sa ingon ining mga tawo kon sila wala nay mabuhat nga bisan unsang butang kabahin niini?”
“Wala, wala ako naghunahuna.” Ako wala gayud naghunahuna kabahin niana,” siya miingon.
Siya mipadayon sa pagpasabut sa bunyag alang sa mga patay ug sa Pagkabanhaw. Siya mikutlo kang Pablo: “Kon dili pa, unsa man lamay ipasabut sa mga tawo sa ilang pagpabautismo alang sa mga patay, kon ang mga patay dili man ugaling banhawon? nganong bautismohan pa man ang mga tawo alang sa mga patay?” (1 Mga Taga-Corinto 15:29).
“Ikaw ba nakahinumdum sa hugpong sa mga pulong ‘kutob sa kamatayon kita mag-unong’ nga gamiton sa dihang ikaw gikasal? Ang kontrata sa imong kaminyoon matapus kon si bisan kinsa kaninyo ang mamatay.”
Siya mitubag, “Siguro sakto kana, apan ako wala na naghunahuna kabahin niana.”
Siya mipadayon, “Ang akong asawa namatay niadtong sinugdanan sa miaging bulan, apan siya ang akong asawa hangtud sa kahangturan. Kami naminyo pinaagi sa usa ka tawo nga adunay katungod sa priesthood nga mobugkos didto sa langit sa kaminyoon nga gihimo dinhi sa yuta. Kami gayud nahisakup sa usag usa hangtud sa kahangturan; ug dugang pa, makauban namo ang among mga anak hangtud sa kahangturan.
Sa wala pa motugpa ang eroplano siya miingon ngadto kaniya, “Kahibalo ka ngano nga kita nagkita? Kini nahitabo aron ikaw usab makakat-on kabahin sa ebanghelyo ug mabugkos sa imong bana, imong mga anak, ug sa imong mga kaliwat hangtud sa kahangturan—aron mahimong usa ka mahangturon nga pamilya.”
Sa wala madugay human niini nga panghitabo, siya mipadala og kopya sa libro ni Elder LeGrand Richards nga, A Marvelous Work and a Wonder, ngadto niini nga babaye ug sa iyang pamilya ug mibutang og kard nga may pangalan niya sa sulod. Ang ngalan niining babaye sa kaulahian miabot ngadto sa pipila ka full-time nga babaye nga mga misyonaryo nga nangalagad sa iyang siyudad sa Pennsylvania. Human nga ang mga misyonaryo unang nakakontak kaniya, sila misulat, “Ang babaye nga among gitawagan hilabihan gayud kamapasalamaton. Inyo gyud untang nakita ang kahayag sa iyang mga mata sa dihang iya kaming nahimamat. [Ang buotan nga tawo nga iyang nahimamat sa eroplano] nagtanom og usa ka labing mabungahon nga liso uban sa iyang pagpamatuod ug pagsalig nga siya ug ang iyang hinigugma mahimong mag-uban human niini nga kinabuhi. Isip mga misyonaryo kami mibati og kalinaw. Kami nalipay nga ang Ginoo motabang sa among mga paningkamot tungod kay kini nga pamilya andam na.”
Karon diha kaninyo ako moingon, kamo ba nakahinumdom sa mga kinahanglanon sa usa ka “mahangturong pamilya”: mga sertipiko sa bunyag, mga rekomen sa templo, sertipiko sa kaminyoon? Apan una ang inyong mga higala ug mga silangan kinahanglan adunay usa ka sertipiko sa bunyag. …
Ang Ginoo mipahayag:
“Kay ang tanan nga mga tawo kinahanglan gayud maghinulsol ug magpabunyag. …
“Ug pinaagi sa inyong mga kamot Ako magbuhat og kahibulongan nga buhat diha sa mga katawhan, ngadto sa pagkakabig sa daghan mahitungod sa ilang mga sala, nga sila moabut ngadto sa paghinulsol, ug … moadto sa gingharian sa akong Amahan” (D&P 18:42, 44).
Kon inyong paapilon ang inyong tibuok pamilya—mag-ampo isip usa ka pamilya alang sa kalampusan; mopili og usa ka pamilya nga i-fellowship; maghimo og mga tumong ug mga petsa nga kini matuman; pasalig sa inyong kaugalingon nga mobuhat kon unsa ang angayan; dayon magpuasa ug mag-ampo, ug dayon mag-ampo ug magpuasa—ako mosaad kaninyo nga ang inyong tingog sa pagpasidaan madungog. Kini mao ang adlaw nga ang anihonon hinog na, ang pug-anan puno na. Ang Ginoo mopanalangin sa inyong mga paningkamot. Kamo makasaksi sa inyong mga higala nga mosulod sa tubig sa pagpabunyag.
Ang mga tawo nga inyong natandog mahimong makalimot unsa ang inyong gisulti, apan sila dili makalimut giunsa nimo sila sa pagbati. Ang mga pamilya mahangturon, ako mopamatuod uban sa tibuok nakong pagkamapainubsanon, sa pangalan sa atong Ginoo ug Manluluwas, nga si Jesukristo amen.
Gikan sa usa ka pamulong sa Oktubre 1976 nga kinatibuk-ang komperensya; mga kinutlo, panulbok, pagparagrap, ug pagkapital gipahimutang sa saktong sukod.
Paghulagway pinaagi ni James L. Johnson
Usa nako ka higala nangutana sa usa ka kauban nga pasahero, “Ganahan ka bang masayud ngano nga ako interesado sa akong mga kaliwat nga dugay na kaayong namatay?”
Ang inyong tingog sa pagpasidaan madungog. Ang Ginoo mopanalangin sa inyong mga paningkamot. Kamo makasaksi sa inyong mga higala nga mosulod sa tubig sa pagpabunyag.