Sa Katapusan Akong Gidawat ang Hagit
Ni Jennifer Garrett, California, USA
Kumusta na ang inyong pagbasa sa Basahon ni Mormon?” ang bishop nangutana sa among pamilya atol sa tithing settlement niadtong 2005.
Mao pa lang gayud ang pagkahuman namo og istorya mahitungod sa akong daghang mga responsibilidad sa simbahan ug sa balay uban sa duha ka gagmayng anak nga mga lalaki. Nagkanga-kanga ko og istorya mahitungod kon unsa ka lisud nga mobasa og usa ka kapitulo matag adlaw, apan diha sa akong kasingkasing ako nasayud nga naghimo lang ko og mga pasumangil. Ang yano nga kamatuoran mao nga bisan og nakahimo ko og daghang maayo nga mga butang sa miaging pipila ka mga bulan, wala ko misulay sa pagbasa sa Basahon ni Mormon gikan sa sinugdanan hangtud sa katapusan sama sa gihagit ni Presidente Gordon B. Hinckley.1
Samtang nagsugod ang bag-ong tuig, ang Espiritu mihasol sa akong kalag. Akong gibati nga sama sa sanlahon nga si Naaman, kinsa sa sinugdanan mibalibad sa paghimo sa yano nga buluhaton nga ituslob ang iyang kaugalingon sa katubigan sa Jordan, ingon sa gimando ni propeta Eliseo (tan-awa sa 2 Mga Hari 5:1–14). Ang pagbasa sa Basahon ni Mormon usa usab ka yano nga buluhaton.
Pagkasunod Dominggo sa puasa, pipila ka mga kaigsoonan mihatag og pagpamatuod kon sa unsang paagi nga ang mga saad sa propeta natuman diha sa ilang mga kinabuhi. Ako nasayud nga wala nako madawat kadto nga mga panalangin tungod kay wala ko maminaw sa iyang tingog. Ako nakahukom sa pagbasa sa Basahon ni Mormon gikan sa sinugdanan hangtud sa katapusan pagka 2006—ug sa sunod tuig ug sa sunod na usab nga tuig—aron, sama ni Presidente Hinckley, makabaton ako og paghigugma niini.
Samtang nagkaduol na ang katapusan sa tuig, ako naghunahuna sa akong tumong, nasayud nga akong mahuman og basa ang basahon inig tapos sa tuig. Akong naamgohan nga ako nakabaton og mga panabut nga dili nako mabatonan gikan sa ubang tinubdan. Ako mas nagkaduol sa akong Langitnong Amahan ug sa akong Manluluwas. Nakakita ako og daghang mga oportunidad sa pagpaambit sa ebanghelyo sa tibuok tuig tungod kay nakabasa ako sa Basahon ni Mormon ug makapamatuod sa kamatuoran niini.
Unta akong gidawat ang hagit ni Presidente Hinckley niadtong 2005. Sama ni Naaman, kinsa sa katapusan mituslob sa iyang kaugalingon sa katubigan sa Jordan, natagamtaman na unta nako ang mga panalangin sa Basahon ni Mormon nga mas sayo kay sa akong gibuhat.
Ako mapasalamaton nga akong nakat-unan ang kaimportante sa pagdawat bisan sa yano nga mga hagit gikan sa propeta. Ako nagpaabut sa usa ka bag-ong tuig nga puno sa mga panalangin gikan sa pagbasa sa Basahon ni Mormon—og usab.