Kinsa ang Andam Na?
Nagtuo ko nga ang akong higala andam na sa pagpaminaw sa ebanghelyo, apan nganong nakuha ko kini nga pag-aghat?
Panahon sa akong senior nga tuig sa high school, ako miampo para ang Espiritu modala kanako ngadto sa usa ka tawo kinsa andam nga maminaw sa ebanghelyo. Aduna ko’y higala nga anaa sa akong hunahuna samtang ako nag-ampo. Kining akong higala, mao si Ashley (ang pangalan giusab), nagpakita og gamay nga interes sa akong tinuohan, ug siya usab nagsunod sa sama nga mga sumbanan isip batan-on nga Santos sa Ulahing mga Adlaw. Ako nakombinser nga kini mao ang higayon nga siya kinahanglan nga makadungog sa ebanghelyo.
Ako nangalagad sa akong Laurel class presidency niining higayona, ug panahon sa usa ka bishopric youth commitee meeting, ako nakadawat og hilabihan ka kusog nga impresyon nga mosugyot ngadto sa bishop nga kami maghimo og usa ka kalihokan kabahin sa misyonaryo panahon sa Mutual. Ako mibati og kahimuot nga ang mga kabatan-onan sa among ward kinahanglan nga modapit og mga dili miyembro nga mga higala niining kalihokan alang sa usa ka sesyon sa pangutana ug tubag uban sa mga misyonaryo nga nag-alagad sa among ward. Ang akong bishop madasigon nga nangandam sa kalihokan uban sa mga elder, ug ako sigurado nga mao kini ang tubag alang sa akong pag-ampo. Karon si Ashley mahimong motambong ug makakat-on og mas daghan kabahin sa ebanghelyo sa usa ka palibot diin dili siya mobati og bisan unsa nga pagpamugos. Ako masaligon nga human og tambong ni Ashley sa kalihokan nga may pangutana ug tubag, siya mahimo nga matandog sa Espiritu, modawat sa mga leksyon sa mga misyonaryo, ug human sa mga usa ka buwan mahimo nga mabunyagan ug makumpirmahan isip usa ka miyembro sa Simbahan.
Karon ang akong mga pag-ampo nadirekta kon unsaon nako pagdapit si Ashley ngadto sa kalihokan. Ako nag-ampo nga ako magsilbi nga usa ka instrumento sa mga kamot sa Ginoo aron sa pagpa-ila-ila sa Iyang plano ug ebanghelyo ngadto sa usa ka tawo nga andam nga modawat niini. Sa eskwelahan ako midapit kang Ashley ngadto sa kalihokan, ug siya miingon nga siya mananghid sa iyang mga ginikanan kon sila motugot ba kaniya.
Pagkahapon, ako nakadawat og tawag gikan kang Ashley. Siya miingon kanako nga ang iyang mga ginikanan sigurado nga OK kabahin niini. Sa pagkatinuod, siya mipasabut nga sa wala pa magminyo ang iyang mga ginikanan, ang iyang papa nakapuyo uban sa usa ka kwarto og duha ka mga LDS ug nakadayeg pag-ayo sa paagi nga sila mipuyo. Ako nasobrahan sa kalipay tungod kay ang babag lamang sa akong handuraw nga ang mga ginikanan ni Ashley mahimo bang OK uban sa iyang pagtinguha og laing tinuohan.
Samtang ako nagpadayon sa pag-ampo kabahin sa umaabot nga kalihokan sa misyonaryo, ako mibati og kalma nga ang kasiguroan nga ako tinuod gyud nahimong usa ka instrumento sa mga kamot sa Ginoo ug nga Siya nalipay nga ako misunod sa pag-aghat atol sa bishopric youth commitee meeting. Ako naglantaw sa kalihokan uban sa hilabihan nga kahinam. Si Ashley ug ako managhigala na sulod sa daghang mga tuig, ug ako naghinam-hinam nga adunay bahin sa pagpa-ila-ila kaniya sa ebanghelyo ug, siyempre, ang iyang pagkakabig.
Sa buntag sa kalihokan, ako nakadawat og tawag sa telepono gikan kang Ashley. Nausab ang iyang hunahuna ug wala nay plano nga motambong sa kalihokan. Ako nagguol pag-ayo ug naglibog. Ako nag-ampo na para kang Ashley, ako sigurado nga siya andam, ug siya mao ang tibuok rason nga ako madasigon nga nagtrabaho sa misyonaryo nga buhat. Ako usab mibati og kaulaw. Panahon sa pagplano sa pagpangandam sa kalihokan, gihimo nakong klaro sa tanan nga ang akong higala nga si Ashley andam nga mokat-on ug modawat sa ebanghelyo.
Samtang ako naghilak tungod sa akong pagkapakyas diha sa akong kwarto, ako misugod og pagbati og pagduha-duha sa akong kaugalingon. Kon ako nasayop kabahin kang Ashley, dayon tingali ako nasayop sa pagtuo nga ang kalihokan sa pangutana ug tubag ngadto sa mga misyonaryo sa tinuoray usa ka espiritwal nga pag-aghat. Napuno sa pagbati sa usa ka batan-on nga walay kasiguradoan, kasuko, kalooy sa kaugalingon, ug kadismaya, ako mihukom nga ako mismo dili motambong sa kalihokan.
Mga pipila ka semana ang milabay, samtang ako naglakaw padulong sa librarya sa eskwelahan, ang akong higala nga si Brian midapit kanako kon ako gusto nga motambong sa iyang bunyag. Si Brian ug ako walay klase nga magkauban kami niadtong tuiga, mao nga taud-taud na nga ako wala nakakita o nakaistorya uban kaniya. Sa miaging tuig kami nagtapad sa klase sa history ug nagkauban sa usa ka proyekto sa klase. Ang hilisgutan sa among proyekto, wala tuyoa nga gi-assign sa among magtutudlo, mao si “Joseph Smith ug ang mga Mormon.” Ako nakahinumdom kang Brian nga medyo interesado sa hilisgutan samtang kami nagbuhat sa among mga pagsiksik. Hinoon, siya usab ganahan nga magbinuang, nagsulti sama niining butanga, “Pahinumdumi ko kon kapila nga asawa ang imong mama” ug “Adunay makalingaw nga party karong tapus sa semana, apan o, taym sa—ikaw usa ka Mormon, mao nga dili ka makalingaw nga igkauban.” Busa, sa sinugdanan pa lang wala na nako dawata ang iyang pagdapit sa bunyag kay naghunahuna ko nga lain na pud nga binuang kabahin sa akong tinuohan. Siya mora og dili ang klase sa tawo nga andam nga mopasakop sa usa ka simbahan nga adunay “mapugnganon nga mga sumbanan.”
Apan ang sunod nga mga pulong nga nanggawas sa iyang baba nakapakugang kanako samtang iyang gihulagway ang nakapausab sa iyang kinabuhi sa miaging mga semana. Siya mipasabut nga siya nakadungog og usa ka klasmeyt ug miyembro sa among ward nga midapit og usa ka tawo ngadto sa usa ka kalihokan sa pangutana ug tubag sa simbahan sa Mormon. Sa dihang ang tawo nga gidapit wala mosugot, si Brian mihangyo sa maong klasmeyt kon mahimo ba siyang motambong. Pagkahuman sa kalihokan, siya diha-diha dayon misugod sa pagdawat og mga leksyon sa misyonaryo. Siya nagbasa sa Basahon ni Mormon. Siya nag-ampo kabahin niini. Siya nasayud nga kini tinuod. Siya gayud pagabunyagan, ug kon gusto nako, ako gidapit sa pagtambong. Total, siya miingon, ako mao ang nagpaila-ila kaniya kabahin kang Joseph Smith ug sa mga Mormon.
Sa hilum nga pagkatingala ako nakaamgo nga ang Ginoo nakadungog sa akong mga pag-ampo. Siya naggamit kanako isip usa ka instrumento sa Iyang mga kamot sa pagpangita og usa ka tawo nga Iyang giandam sa pagpaminaw ug pagdawat sa ebanghelyo. Wala gayud nako nahunahuna sa pagdapit kang Brian nga maila-ila ang mga misyonaryo tungod kay mora og siya dili pa, sa akong opinyon, andam. Dili sama kang Ashley.
Nianang mapainubsanon nga higayon ako nakaamgo kon unsa ka importante nga ako mosunod sa tanang mga pag-aghat nga akong madawat gikan sa Espiritu. Bisan ako nagpadayon sa pag-ampo nga si Ashley mahimong andam sa pagdawat sa ebanghelyo, ako nakakat-on og usa ka mahinungdanon nga leksyon gikan sa usa ka wala damha nga resulta sa akong pagsulay sa pagpaambit sa ebanghelyo ngadto kaniya. Ang Ginoo kanunay gayud adunay usa ka katuyoan alang sa mga pag-aghat nga Iyang gihatag kanato, ug ako dili na kinahanglan nga makahibalo o motag-an kon unsa kini. Hinoon, kini mao ang akong responsibilidad sa pagsunod sa pag-aghat nga masaligon ug maisugon. Samtang ako nag-ampo alang sa mga oportunidad sa mga misyonaryo, mosunod sa mga pag-aghat, ug modawat sa kabubut-on sa Ginoo, kay sa mosulay sa pagtuman sa akong gusto, ako mas makaalagad isip usa ka instrumento sa mga kamot sa Dios ug makatabang sa pagtukod sa Iyang gingharian.
Mga paghulagway pinaagi ni Sal Velluto ug Travis Walton
Kinahanglan nga si Ashley gyud! Sa tanan nga mga tawo nga akong nakaila, siya ang mora og labing andam nga modawat sa ebanghelyo.