Panahon sa Pagpakigbahin

Ang mga Propeta Nagtudlo Kanako Unsaon Paglig-on sa Akong Pamilya

Ni Cheryl Esplin

“Unsa nga Ako ang Ginoo namulong, Ako namulong … ; bisan pinaagi sa akong kaugalingon nga tingog o pinaagi sa tingog sa akong mga sulugoon, kini managsama ra” (D&P 1:38).

Ang mga pamilya gi-orden sa Dios. Sa wala pa kita matawo, kita nagpuyo isip espiritu nga mga anak nga lalaki ug mga anak nga babaye sa Langitnong Amahan. Sa dihang oras na alang kanato nga moanhi sa yuta, ang Langitnong Amahan nagplano alang kanato nga moabut ngadto sa usa ka pamilya. Siya nasayud nga ang mga pamilya mao ang pinakamaayong paagi nga makatabang kanato nga maandam nga makabalik og puyo uban Kaniya.

Ang Langitnong Amahan nagtawag og mga propeta aron mopamatuod kang Jesukristo ug motudlo sa Iyang ebanghelyo. Ang mga propeta motabang sa mga pamilya nga masayud kon unsay ilang kinahanglang buhaton aron magmalipayon ug makabalik og puyo uban Kaniya.

Atong mabasa ang mahitungod sa mga pagtulun-an sa mga propeta diha sa mga kasulatan. Kita makapaminaw sa propeta diha sa kinatibuk-ang komperensya. Kon kita maminaw og maayo, atong masayran kon unsay gusto sa atong Langitnong Amahan nga ipabuhat kanato. Kon kita mosunod sa tambag sa propeta, ang atong hugot nga pagtuo molambo. Makahimo kita sa paglig-on sa atong pamilya.

Kalihokan

Tangtanga ang pahina H8 gikan sa magasin, ug ipapilit kini sa baga nga papel. Sa imong pagpaminaw sa propeta atol sa kinatibuk-ang komperensya sa sunod bulan, paminaw sa unsay iyang itudlo nga makatabang sa paglig-on sa imong pamilya. Diha sa mga butanganan sa hulagway, pagdrowing og hulagway nimo ug sa imong pamilya nga nagbuhat sa unsay gitudlo sa propeta. Ibutang ang inyong mga hulagway sa usa ka dapit diin magpahinumdom kini kanimo ug sa imong pamilya sa unsay gitudlo sa propeta.

Mga Ideya sa Panahon sa Pagpakigbahin

Ang mga propeta sa Basahon ni Mormon nagtudlo kanako unsaon paglig-on sa akong pamilya. Ipasabut ngadto sa mga bata nga ang mga propeta sa Basahon ni Mormon nakakita na sa atong panahon ug sa mga kakuyaw nga giatubang sa atong mga pamilya. Ang mga propeta sa Basahon ni Mormon nagtudlo kanato kon unsay buhaton aron sa pagpanalipod ug paglig-on sa atong mga pamilya. Gamit ang mga name tag o yano nga mga costume, ipadrama sa mga bata ang mga asoy sa mga propeta sa Basahon ni Mormon nga nagtudlo og mga baruganan nga mopalig-on sa atong mga pamilya (tan-awa sa “Dramatisasyon,” Pagtudlo, Walay Labaw ka Mahinungdanon nga Tawag [1999], 166–67). Pananglitan: Ang istorya ni Lehi nga mibiya sa Jerusalem uban sa iyang pamilya, nga nagpasabut og maayo sa pagkamasulundon ni Lehi ngadto sa mga sugo sa Ginoo (tan-awa sa 1 Nephi 2:1–7). Ipabasa sa bata nga maoy nagdala sa papel ni Lehi ang 2 Nephi 1:4, ug dayon hisguti uban sa mga bata ang resulta sa pagkamasulundon ni Lehi. Ipangutana: Kon gipanalipdan ug gipanalanginan sa Ginoo ang pamilya ni Lehi tungod sa pagkamasulundon, unsa man ang buhaton sa Ginoo kon ang inyong pamilya masulundon? (Iyang panalipdan ug panalanginan ang inyong pamilya.) Ipadrama ang asoy ni Alma nga nag-ampo alang sa iyang anak nga lalaki nga si Alma ang Batan-on (tan-awa sa Mosiah 27:8–37). Paghisgut mahitungod kon sa unsang paagi nga ang pag-ampo alang sa mga sakop sa pamilya makatabang sa paglig-on sa atong mga pamilya. Awhaga ang mga bata sa pagtan-aw sa uban nga mga propeta sa Basahon ni Mormon alang sa mga ehemplo nga mahimo nilang sundon.
Ang propeta karon nagtudlo kanako unsaon paglig-on sa akong pamilya. Tabangi ang mga bata sa pagsag-ulo sa “Unsa nga Ako ang Ginoo namulong, Ako namulong … ; bisan pinaagi sa akong kaugalingon nga tingog o pinaagi sa tingog sa akong mga sulugoon, kini managsama ra” (D&P 1:38; tan-awa sa “Pagmemorya,” Pagtudlo, Walay Labaw ka Mahinungdanon nga Tawag, 172–73). Sultihi ang mga bata nga mohulagway ka og usa sa mga sulugoon sa Ginoo. Ipaisa nila ang ilang mga kamot kon makaila sila kon si kinsa kini: nagtrabaho siya sa negosyo sa pagpang-imprinta; ang iyang middle name nagsugod sa S, nga nagpasabut sa Spencer; siya ang ika-16 nga Presidente sa Simbahan; siya mao ang buhing propeta sa yuta karon. Ipakita ang litrato ni Presidente Thomas S. Monson. Hatagi og gibug-aton nga kon siya mamulong, sama ra nga ang Ginoo mao ang namulong. Isulat sa pisara ug ipabalik og sulti sa mga bata ang “Si Presidente Monson nagtudlo kanako unsaon paglig-on sa akong pamilya.” Hatagi ang matag klase og nagkalain-laing mga kinutlo ni Presidente Monson nga nagtudlo kanato unsaon paglig-on sa atong pamilya (tan-awa sa mga isyu sa komperensya sa Liahona). Pahisguti sa mga bata uban sa ilang magtutudlo ang mga butang nga ilang mahimong buhaton aron sa pagsunod nianang piho nga pagtulun-an. Dapita ang usa ka bata diha sa matag klase sa pagpakigbahin sa pagtulun-an. Kantaha ang “Salamat, O Dios sa Propeta” (Mga Himno ug Mga Awit sa mga Bata, nu. 36). Hatag og pagpamatuod nga kon kita mosunod sa buhing propeta, kita nagsunod sa Ginoo.