Vakalesui mai ni Dina
Na yavu ni veivakabulai kei na marau nei Tamada … ena vukei iko mo valuta rawa kina na bolebole kece ni bula oqo.
Eda sa raica wavoki tu na kena sa gadrevi vakalevu tikoga na veidusimaki vakayalo ena veiyasai vuravura ena vuku ni kena sa toso cake tikoga na leqa ni tavuki ni vanua kei na kena e vakayacora na tamata. Na gadrevi ni veidusimaki vakayalo oqo sa baleta tikoga ni da sa luvena na Tamada Vakalomalagi savasava. Sa kilai vakavinaka tu ni ena gauna eda sotava kina na leqa eda dau gole vua na noda Dauveibuli me da vukei. Sa kila tu na Tamada Vakalomalagi dauloloma ni sa torosobu tikoga na ituvaki kei vuravura, na voravora ni bolebole e sotavi, kei na leqa lelevu sa vakavuna me muataki o ira na luvena me ra vakasaqara na Nona veivakabulai vakayalo. Na bolebole o ya na kunea vakaidina.
Eda a bula vata mai kei na Kalou na Tamada Tabu kei na Luvena Daulomani, o Jisu Karisito ena dua na bula mai liu. Ekea eda a vakavukui ena yavu ni veivakabulai nei Tamada kei na yalataki ni noda vukei ni da sa mai sucu vakatamata ena vuravura oqo. E a vakamacalataki kina na inaki bibi ni bula oqo. A tukuni kina vakaoqo vei keda:
“Me datou … bulia na vuravura me ra tawana ko ira oqo;
“Io me da vakatovolei ira mada kina, era na muria na veika kece sa vakarota vei ira na Turaga na nodra Kalou se sega;
“Raica ko ira sa yalodina ena bula taumada, [o ya na talairawarawa ena bula taumada] era na vakalougatataki vakalevu sara … ia ko ira sa yalodina ena bula oqo [o ya na talairawarawa ena bula oqo] era na rawata na lagilagi sa vakaikuritaki me tawamudu ka tawamudu.”1
Na vosa oqori sa vakaraitaka tiko na inaki dina sara ni nomuni mai tiko kina e vuravura. Oqo ena vakadinadinataki iko kina ena nomu talairawarawa ki na vunau ni Turaga ka yaco mo tubu ena kila, ituvaki, kei na veika kilikili yadua. Sai koya na kena ciqomi na cakacaka tabu yadua ka vakayacora ka maroroya na veiyalayalati yadua e gadrevi. O ya me tauyavutaki ka susugi e dua na matavuvale. Na veika oqo e okati kina na veigauna eso ni veivakatovolei kei na marau ka sa kena inaki na lesu tale ena qaqa ni sa rawai vakavinaka na bolebole kei na madigi ena bula oqo, ka ciqomi na veivakalougatataki lagilagi sa yalataki ki na talairawarawa vakaoqo.
O koya gona na gauna ni vakatovolei kei na tubu ena bula oqo me na vuataka mai na kena vinaka taucoko, o a vakavulici taumada kina ka vakarautaki ki na veika o na mai sotava e vuravura. E a vakamatatataki kina na ituvatuva nei Tamada me dusimaki iko tiko ena bula oqo. Ena dau digitaka o Koya ena kedra maliwa na qaqa, luvena vakayalo talairawarawa, parofita kei ira na italai vakadonui me ra lewena na Nona matabete, me ra vakavulici ena Nona dina ka me ra dusimaki me ra kaburaka na dina ena kedra maliwa na luvena e vuravura. Sa na qai solia na Kalou na galala ni digidigi vakayalo vei ira na gone yadua, na dodonu me digitaka se cakitaka na Nona ivakasala. Ena sega ni dua ena vakasaurarataki me talairawarawa ia era na vakauqeti taucoko sara. Ko ni sa kila vakavinaka tu ni gauna ko na digitaka kina na nomu ilakolako e vuravura oqo ko na sega ni kila rawa na isau ni nomu digidigi. Oqori ena qai vakatulewa kina na lawa tawamudu.
Kevaka e dua me na bula me rawata na veivakalougatataki cecere sa yalataki ia ena vuku beka ni dua na vuna e taudaku ni nona kaukauwa ka sega ni rawata e vuravura oqo, ena tiko e dua na idole madigi ena bula e tarava. Ena tabogo mai na nomu vakasama na nomu bula taumada me vakadeitaki kina e dua na vakatovolei dina ia ena vakarautaki tu na veidusimaki me rawa kina mo vakatulewataka na nomu bula. Na yavu ni veivakabulai nei Tamada ena bula oqo kei na madigi ni lesu Vua sa vakatokai na kosipeli i Jisu Karisito.
Ni se bera na kena mai Buli na vuravura oqo e a saqati na ituvatuva nei Tamada mai vua e dua na yalo vuku ia e butobuto, o koya eda kila ni ko Lusefa se Setani. E a vakatura me dua tale na ituvatuva ni veika e gadrevi ka yaco kina e dua na ikatolu ni luvena vakayalo na Tamada me ra muri Setani ka vakatalai tani. Era sa vakayalia kina na madigi uasivi me ra tubu kei na iyau levu o ya me ra vakayago.
O Koya na Tamada Tabu, ka kilai ira vakavinaka tu na luvena yadua, e sa raica rawa ni yaco na gauna era na temaki e lewe levu, era na vakavuravura, ka cakitaka na nodra ivakadinadina kei na ivakavuvuli ni Nona parofita. Na butobuto vakayalo ena sosomitaka na rarama ni dina ena iwalewale ka vakatokai na vukitani. Na gauna mai na kena soli na dina ki na kena yali raraba ena loma ni ivalavala ca e vakatokai me itabagauna. Era na digitaki vakaveitarataravi na parofita ena kena itabagauna me ra taqomaka na dina e vuravura me baleti ira na yalodina veitalia ga na nodra veisautaka se cakitaka e vuqa na tamata.
Ko ni a vulica ni Rarama i Karisito ena vakarautaka na veidusimaki o ya. Ena solia na rarama ki na veika kecega. Ena vakauqeti ira na tamata yadua ena veiyasai vuravura me ra kila na dina mai na ka lasu, dodonu mai na ka cala. Na Rarama i Karisito e sega ni tamata. Oqo e dua na kaukauwa kei na veivakauqeti e lako mai vua na Kalou na Tamada vua na Luvena o Jisu Karisito, ni vakamuri ena rawa ni muataka e dua na tamata me rawata vakalevu cake na veidusimaki matata kei na veivakauqeti ni Yalo Tabu. E a tukuni talega vei kemuni ni ivalavala ca ena vakamalumalumutaka na veivakauqeti ni Yalo Tabu ia sa rawa me vakatikori lesu mai ena veivutuni dina. Ko ni a marautaka ni ko ni sa kila ni ko ira na talairawarawa era na ciqoma na cakacaka tabu e gadrevi kei na veiyalayalati tabu era na yalodina tikoga ka taukena na matanitu vakasilesitieli ka bula vata kei na Tamada kei na Luvena ena veigauna ni bula tawamudu.
Eda na kila vakacava na dina oqo? Ko na vakadeitaka rawa vakacava ni sa dina na veika oqo? Ko ni raica ni voliti kemuni tu na veilecayaki vakaitamera me baleta na ituvaki ni Kalou, na Nona ivakavuvuli kei na inaki ni bula. Sa qai vakayacora vakacava na Kalou, na Tamada Vakalomalagi, me dusimaki ira na luvena e vuravura oqo? Ena vakaraitaka vakacava o Koya na dina kei na Nona inaki me rawa kina vei ira na luvena dau vakabauta yalodina me ra digidigi donu ka ciqoma na veivakalougatataki e vinakata na Tamada Vakalomalagi me ra taukena? Au na vakamacalataka.
Mai na kena buli na vuravura oqo sa dau vakataudeitaka tikoga na Kalou na Tamada na Nona ituvatuva au se qai vakamacalataka oti. E a oga sara o Atama ena wasei ni ituvatuva nei Tamada vata kei ira na luvena kei ira na kawa. E vuqa sara era a vakabauta ka vakalougatataki. Ia a levu sara era digitaka me ra taurivaka na nodra isolisoli vakalou ni digidigi ni yalo ka ra cakitaka kina na Nona ivakavuvuli kei na Nona kosipeli. Era a besetaka na dina o ira na talaidredre, vakatanitaka na ivakavuvuli kei na cakacaka tabu, ka vakayawaki ira mai vua na Kalou. Ena kena gauna, sa vakaisosomitaki na rarama ni dina ki na dua na butobuto vakayalo ka yali mai na kena maliwa na tamata na matabete kei na Lotu dina.
O ira na parofita vakataki Inoke, Noa, Eparaama kei Mosese era a vakavoutaka na dina ena nodra dui itabagauna ia ni toso na gauna era besetaka e vuqa na tamata na nodra cakacaka. Ena loma ni gauna talei dina a sucu kina e vuravura o Jisu Karisito, na Luvena Daulomani na Kalou. E a vakalesuya mai o Koya na dina ka veiqaravi ena loloma kei na yalololoma. Sa tauyavutaka tale e vuravura na Nona Lotu ena parofita kei na iapositolo. E a vakayacora kece o Koya na ilesilesi vakalou nei Tamana Tabu, ena veivakararawataki levu, me yaco kina me noda iVakabula ka Dauveivueti. E soli Koya me rube ena kauveilatai. E a tucaketale ka qaqa mai na mate vakayago. Na Nona solibula veisorovaki tawamudu sa dua na isolisoli vakalou ka rawa vua e veivutuni me vosoti na nona ivalavala ca ka rawata na bula tawamudu. Ia na Luve ni Kalou oqo era a cakitaki koya e lewe levu ka vakavo ga e lewe vica. O ira na Nona iApositolo kei ira na lewe ni Lotu era a vakararawataki ka vuqa era a vakamatei. Sa qai curuma yani na vuravura e dua na gauna balavu rerevaki ni butobuto vakayalo kaukauwa.
Na ivolanikalou e tukuna ni loma ni veitabagauna taucoko, ena gauna ni veika bibi walega, sa voqa mai kina na domo ni Kalou na Tamada. Ena vuqa na gauna e rairai o Jisu Karisito vei ira yadua era sa digitaki. Ia sa dua walega na ka vakalou, a yaco ka da sa kila tu, ni Kalou na Tamada, a vakaraitaki Koya mai vakatamata. E a yaco na ka oqo vata kei na Luvena Tabu lomani, o Jisu Karisito vua e dua na tamata. O ya na cauravou o Josefa Simici lailai, e dua na yalosavasava, ka sa vakarautaki tu mai ni bera na kena tauyavu o vuravura. Ena yaco o koya me parofita qaqa duadua me lako mai ki vuravura. Ka sa roro mai na vakalesui mai ni lewa ni matabete, na taucoko ni Vakalesui mai ni Lotu ka tauyavutaka na iVakabula, kei na ikuri ni ivolanikalou me baleta na noda gauna ka vakarautaki ena kena yaco tikoga mai na ivakatakila mai vua na iVakabula.
Na Tamada dauloloma a biuta mai na nona ibulibuli vakaitamera ka tadu mai ki vuravura oqo me mai vakadeitaka na dina, me mai vakarusa na o loaloa ni butobuto vakayalo, me mai tauyavutaka na kena ituvaki dina, me mai vakadeitaka e dua na taucoko ni dina, ka vakarautaka na sala duadua ga me rawati kina na veidusimaki kaukauwa vakayalo. Na cakacaka bibi oqo ni vakalesui mai a tekivutaki ena dua na vosa matata: “Oqo na Noqu Gone ni Toko, Mo Rogoci Koya!”2 E a salamuria e dua na vakalesui mai ni dina, matabete, cakacaka tabu vakalou, kei na Lotu dina ena yavu ni veivakabulai kei na marau nei Tamada ni kevaka eda na bulataka ena vukei iko mo valuta rawa kina na bolebole kece ni bula oqo. Ena vukea mo na rawata rawa, ena nomu vakabauta kei na talairawarawa, me na yaco vei iko na veidusimaki vakayalo vakalou ko gadreva. Na veitokoni oqo ena solia vei iko na kaukauwa mo bula tiko ni ko sa kila ni dodonu mo bula, veitalia ga na voravora ni ca kei vuravura.
E vakacava sara beka na bibi dina ni veika me yaco me gadrevi kina na Nona tadu vakaikoya na Kalou na Tamada? E a yaco me vakayacori kina na “itabagauna ni taucoko ni gauna” ka ra a parofisaitaka tu mai na parofita ni veiyalayalati makawa kei na ka vou. Sa yaco mai na Nona gauna na Tamada me vakasokumuna kina na ka kecega vei Karisito,3 vakatikora na idola kecega ni matanitu ka vakalesuya mai na kila ka e cakacakataki ena veitabagauna sa oti4 ena Nona sa tauyavutaka kina na iotioti ni itabagauna ni kosipeli e vuravura oqo.
Ena kena kilai ni na dredre vei ira e lewe levu me ra vakabauta ni na mai yaco vakaoqo na vakalesui mai ni lagilagi, a vakarautaka kina na iVakabula e dua na ivakadinadina bula me vakadeitaka na kena dina, sai koya na iVola i Momani. Na sala me vakadeitaki kina na dina ni vakalesui mai e toqai tu ena kena draunipepa. Sa vakarautaka talega o Koya na ikuri ni ivolanikalou veivakararamataki ena Vunau kei na Veiyalayalati kei na Mataniciwa Talei ki vei Josefa Simici. Sa rauta me levu kina na cakacaka nei Josefa Simici e vakatabakiduataki kivua na iVakabula, na Nona Veisorovaki kei na ivakavuvuli ni veisereki.
Ena gauna vata e mai kaburaki tiko kina na itukutuku bibi talei oqo ki vuravura taucoko, sa gugumatua tale tikoga o Setani ena nona vakayavalati ira na tamata me ra vakawalena, se me ra vakasaqara ena veivanua veicalati eso. Era lewe levu sara na luvena na Tamada era sega walega ni ra sa guilecavi Tamadra Vakalomalagi kei na inaki ni bula oqo, ia era sa sega mada ga ni vakasamataki Koya se vakananuma mada ga na inaki ni nodra mai tiko eke. Era sa mai muataki oqo me ra mai vakaogaogataki tu ena veika tawamacala ka sa vakamatabokotaki ira mai na veika yaga dina. Mo kakua ni coko ena cala oqo.
Na veika au sa vakamacalataka niu sa italai i Jisu Karisito e ka dina. E se sega ni rauta me kilai tikoga vakatikina na dina se na ituvaki dina kei Tamada kei na Luvena na noda iVakabula. E dodonu me da kilai keda tiko vakayadudua. Mo na vakila tiko ni Rau sa lomani iko. Mo na vakabauta tiko ni gauna ko na bulataka kina na dina ena veigauna ena nomu vinaka taucoko, Erau na vukea mo kila kina na inaki ni nomu bula e vuravura ka vaqaqacotaki iko mo rawata na veivakalougatataki sa yalataki tu. Na talairawarawa ki na vunau ni Kalou e gadrevi kina na kedra kilai vakavinaka. Me ra na vakabauti. Na kilai ni veika oqo e rawati vinaka cake mai na vulica na tamata yadua na ivunau. Oqori e dua kina na vuna eratou a veisureti kina o Peresitedi Hinckley kei rau na nona daunivakasala vei ira na lewe ni Lotu taucoko me ra wilika na iVola i Momani ni cava na yabaki oqo. Eratou a yalataka: “O ira era na wilika na iVola i Momani era na vakalougatataki ena ivakarau e vakaikuritaki ena Yalo ni Turaga, e dua na vakatulewa cecere ni kena vakamuri na Nona ivakaro kei na dua na ivakadinadina kaukauwa ni sa bula dina tiko na Luve ni Kalou.”5 Au sa vakatovolea ka vakadinadinataka na yalayala o ya ki na noqu bula kau sa vakadeitaka na kena dina. Kevaka o sa tudei tiko ena vakamuria na ivakasala o ya, ko na kila na cava au tukuna tiko. Kevaka o se bera ni se tekivu se vo na gauna me vakavinakataki kina na nomu bula ena nomu tugana na ka dina e umanaki tu ena iVola i Momani. Yalovinaka mo vakayacora.
Niu sa dua na iApositolo ni Turaga o Jisu Karisito, au sa vakadinadinataka ni Kalou na Tamada kei Jisu Karisito sa vakayacora na Vakalesui mai vei Josefa Simici kau sa vakamacalataka, ni sa tu tale e vuravura na veivakararamataki ni rarama ni dina kei na Lotu i Jisu Karisito, ka sa vakatakilaitaki tale na kedrau ituvaki dina na Kalou kei na Luvena, kei na sala dodonu me ciqomi kina na veidusimaki vakayalo sa mai vakamatatataki. Au vakadinadinataka ni sa soli tu me nodra o ira era vakasaqara vakaidina na yavu ni veivakabulai ni Kalou. Karona. Bulataka mo kune vakacegu kina ka marau. Ena yaca i Jisu Karisito, emeni.