Na Veiyalayalati ni Kosipeli e Kauta mai na Veivakalougatataki Yalataki
Ni maroroi na veiyalayalati ni kosipeli, ena rawa me valuti taucoko kina na veivakatovolei ni bula oqo.
Au gadreva meu vakaraitaka edaidai na titobu ni noqu rokova ka lomana na Tamada Vakalomalagi, vua na Luvena, na Turaga o Jisu Karisito kei Koya na Yalo Tabu. Au via vakaraitaka talega ni sa vakalou na veikacivi nei Peresitedi Gordon B. Hinckley me sa Parofita, Daurairai, ka Dauvakatakila ni Turaga. Au tokoni koya ena yaloqu kei na noqu kaukauwa taucoko.
Au vakavinavinakataka na veiyalayalati ni vakamau ena valetabu vua e dua na itokani dauloloma tawamudu o koya kau lomana ka karona. E tomana tikoga o koya e dua na ivakaraitaki ni cakacaka ni veikauwaitaki vei ira era vakaleqai tu. Sa vakalougatataki na neirau vakamau mai vei ira na luvei keirau kei na makubui keirau bulabula vinaka, ka ra sa vakavulici keirau vakalevu, ka sa tomani tikoga.
Au sa vakavinavinaka vakatabakidua ni o keitou na veiganeni a sucu mai vei rau e dua na itubutubu bula savasava ka rau a yalodina tikoga ki na nodrau veiyalayalati ni valetabu ka rau a lomasoli tiko ena solibula, me rawa ni keitou karoni talega ena yavu ni bula marau nei Tamada Vakalomalagi. Ki vua na tinaqu agilosi, au rawa ni kaya, vinaka vakalevu ena nomuni semata tikoga na maroroi ni cakacaka tabu ni loloma kei na kosipeli me qaqaco tiko ena neitou bula.
Au mai vakamacalataka tiko na veimaliwai tabu oqo me baleta na marau niu kila ni tiko e dua na veiyalayalati vauci vei ira yadua era sa vauci ena valetabu. Au sa vakavinavinaka vakalevu sara niu kila ni se cava ga na bolebole sa waraki keda tu se eda sa sotava oti, sa tiko na inuinui kei na vakabauta ni noda kila ni maroroi na veiyalayalati ni kosipeli, ena rawa me valuti taucoko kina na veivakatovolei ni bula oqo. Eda vulica ena kosipeli ni na vinaka na veika kece ke da yalodina ki na noda veiyalayalati.
“Ena vuku ni veiyalayalati dou sa vakayacora dou sa vakatokai kina mo dou luvei Karisito… .
“O koya gona, mo dou taura matua ga na yaca i Karisito koi kemudou kece sa veiyalayalati mo dou talairawarawa vua na Kalou me yacova na mate.
“Ia ko koya yadua sa vakayacora vakaoqo, ena taqomaki koya na Kalou” (Mosaia 5:7–9).
Na kena kauwaitaki na veiyalayalati sa ka bibi dina sara ki na noda vakabulai tawamudu. Na veiyalayalati sai koya na veidinadinati eda vakayacora kei Koya na Tamada Vakalomalagi ena noda solia na yaloda, na vakasama kei na itovo ni kena maroroi na ivakaro e tuvanaka na Turaga. Na gauna eda dina tiko kina ena noda maroroya na yalayala ena veidinadinati oqo, sa yalataka kina o Koya me vakalougatataki keda, ena taucoko ni Nona iyau.
Ena Veiyalayalati Makawa eda vulica kina na ivakarau ni nona veiyalayalati na Turaga ena veika a sotava o Noa ena dua na vuravura butobuto kei na ituvatuva ni Turaga me vakasavasavataka kina na vuravura. Me baleta ga na yalodina kei na gugumatua tudei i Noa, a kaya kina na Turaga vei Noa:
“Ia kau na vakataudeitaka vei iko na noqu veiyalayalati: ko na vodo ki na waqa; ko iko, kei na luvemu tagane, kei na watimu, kei na watidratou na luvemu… .
“A sa kitaka ko Noa me vaka na ka kecega sa vakarota vua ko Jiova” (iVakatekivu 6:18; 7:5).
“Ni sa mai lutu sobu sara na walu- vu e ratou sa lako tani sara mai na waqa.
“A sa cakava ko Noa e dua na icabocabo ni soro vei Jiova… .
“A sa vosa vei Noa na Kalou, vei iratou talega na luvena, a sa kaya,
“Raica, koi au, kau na vakataudeitaka na noqu veiyalayalati vei kemudou, kei ira na nomudou kawa e muri” (iVakatekivu 8:20; 9:8–9).
Eda sa curuma talega kina e dua na gauna ni veiyalayalati tabu kei Koya na Turaga me rawa ni da taqomaki kina mai vua na meca. Me vaka ga na gauna nei Noa eda sa bula tu oqo ena gauna yalataki mai vakaparofita ka sa yaco dina. Ena loma ni walu na yabaki sa sivi era sa vakatabui oti kina e 71 na valetabu vou—e dua na isausau cecere ena ruku ni nona veidusimaki na parofita ni Turaga, ka sa rawa me okati ena kena vakasama me vaka na kena ta na waqa ena gauna nei Noa.
Na noda parofita edaidai, o Peresitedi Gordon B. Hinckley, sa sureti keda tu me da curuma yani na katuba ni valetabu me rawa ni da laki vakayacora e dua na veiyalayalati kei na Turaga.
Me vaka ga na siga nei Noa, na noda sasaga me da bulataka na veiyalayalati oqo ena salavata tiko na solibula. Na solibula oqo, se cava ga na kena levu se lailai, ena dau vakaraitaka na tudei ni lomada kei na vakasama me da talairawarawa ki na lawa ni Tamada Vakalomalagi. Na ivakarau ni solibula ena okati kina e dua na gauna ni sasaga ena kena raici ka vakarautaki kina na isau ni noda vakatulewa. Na noda digidigi ena sega ni dau matata se rawarawa, sa qai toso tikoga na veimuayaki. Na gauna e da lako tani kina mai na veimuayaki oqo ka solibulataka na noda lewa vua na Turaga, eda sa qai laveti cake ki na dua na ivakatagedegede ni kila ka titobu. Na ivakarau tudei oqo sa dau laurai vakalevu ena noda bula ena gauna eda sotava kina e dua na vakacalaka se bolebole.
Ena vica na macawa sa oti e a lutuki ena yaseyase ka mate sara, e dua na cauravou ka a laki keba vakasikauti ena ulunivanua ena tokalau kei Salt Lake City. Erau a rarawa bibi ka luvuci sara vakalevu oi rau na nona itubutubu ni sa mai yali yani vakasauri na luvedrau tagane oqo, ka rau veimuayaki tikoga vakataki rau ka rau taroga na vuna e yaco kina. Me baleta ga ni rau yalo rawarawa ka qaqaco na nodrau vakabauta, sa sovaraki mai kina na loloma mai vua na Turaga. Ena nodrau sa ciqoma rawa sa qai yaco mai kina e dua na raiyawa ni inaki ni bula kei na kena nanumi rawa na veiyalayalati sa vakayacori oti. E dina ga ni rau se sotava tiko na rarawa mai na mate oqo erau raica rawa ni rau tu ena veivanua cecere ka kukube matua ki na nodrau veiyalayalati ka me rau bula voli ena dua na ivakarau me vakadeitaki kina na duavata tale ena marau kei na nodrau cauravou.
Ena itabagauna oqo na vakayacori ni veiyalayalati sa muataki ki na dua na rai vou, ka duidui mai na gauna i Noa. Eda sega walega ni vakaitavi ena kena vakayacori na veiyalayalati baleti keda, ia me kena ikuri, e sa soli vei keda na ilesilesi me da vakasaqara na kedra ivolatukutuku na wekada era sa mate ka me rawa kina vei ira era sa gadreva me ra vakayacora na veiyalayalati ka kilikili me ra ciqoma na cakacaka tabu ni kosipeli.
Na cakacaka me baleti ira era a bula taumada e sa toso tiko ena kena kaukauwa ka ra sa veivuke tiko kina na kaukauwa vakalomalagi ka lewai tiko mai vua na Turaga. Mai na nona raivotu o Peresitedi Joseph F. Smith me baleti ira na mate, a vola kina vakaoqo:
“Raica a vakarautaka na nona cakacaka ena kedra maliwa na yalododonu; a digitaka ka lesi ira na nona italai ka solia vei ira na kaukauwa kei na lewa; a sa vakaroti ira me ra lako yani… .
“Ia au a raici ira talega na qase ni lotu yalododonu ena itabagauna oqo; ia ni ra sa mate sa ia tikoga na nodra cakacaka; io era sa vunautaka yani na itukutuku vinaka ni veivutuni kei na veivakabulai” (V&V 138:30, 57).
E kaya tale vei keda na ivolanikalou ni ko ira na italai era okati talega kina “o ira na parofita yalododonu era a dau tukuni koya voli [na Dauveivueti], ni ra sa bula tiko” (V&V 138:36). Eso vei ira na italai o ya e rawa talega ni okati kina o: Pita, Paula, Alama, Joni, Josefa kei Nifai.
Ena kena wiliki na raivotu oqo nei Peresitedi Smith ka kilai ira na daukaulotu oqo ka ra sa lesi me ra vakayacora na cakacaka oqo, ena rawa me dua e vakasamataka ni raivotu oqo ena rawa me vakauqeti keda vakalevu sara na tamata yadua me da maroroya na noda veiyalayalati ni noda vakasaqara na yacadra na wekada era sa mate ka vakayagataka na gauna soli ena valetabu yadua. Au vakabauta ni sa rawa meu kaya ni se vo levu tu na gauna soli ena vuqa na valetabu, me ciqomi kina na nodratou ivakasala na Mataveiliutaki Taumada, ka biu vakatikitiki na noda gauna marau eso ka taurivaka e vuqa na gauna me vakayacori kina na cakacaka tabu ni valetabu. Sa noqu masu ni da talairawarawa ki na veisureti oqo ni da curuma yani na katuba ni valetabu.
Au yalo vakacegu ena madigi oqo meu mai veiqaravi ena veikacivi nuitaki oqo ka sa noqu masu meu na cakacaka voli ga ena noqu veiyalayalati kei na Turaga ka talairawarawa ki na veidusimaki ni Yalotabu. Sa noqu ivakadinadina tabu oqo me baleta na Turaga o Jisu Karisito kei na Vakalesui mai ni Nona kosipeli vua na Parofita o Josefa Simici. Au vakaraitaka eke na noqu lomana na veiyalayalati kei na cakacaka tabu ni valetabu ka vakaraitaka na noqu na dinata meu vakaruataka cake na noqu sasaga meu vakaitavi ena veivaletabu ni Kalou. Au kila ni gauna eda na vakayacora ka maroroya na veiyalayalati tabu oqo, ena qai kauti keda na Turaga ki na Nona itikotiko tabu. Au sa vakadinadinataka na veika oqo ena yaca i Jisu Karisito, emeni.