Na Kabasi ni Turaga
O ira na parofita kei na iapositolo ena veitabagauna era sa noda kabasi soli mai vua na Turaga. Na Nona veidusimaki vei ira e matata.
Kemuni na taciqu kei na ganequ, ena noqu a mai dabe toka au a gadreva vakalevu meu na vakaraitaka yani na noqu lomani kemuni ka vakadeitaka vei ira era na rogoci au tiko mai ni sa lomani ira na Tamada Vakalomalagi. Ena vukudra na Veitacini Vakalotu, au vakavinavinakataka na nomuni lomasoli mo ni lako mai nikua mo ni mai vakani ena vosa bula ni Kalou.
Au dau taleitaka na lakova na veiulunivanua, ena noqu dau curuma yani na loma ni veikau au dau vakayagataka na kabasi, mape kei na ivakatakilakila me dusimaki au ki na vanua meu lako kina. O iratou na iyaya oqo e ka ni veivuke sara vakalevu, ka yaga bibi sara, niu dau sotava na gaunisala kei na salatu e veimedreyaki.
Na bula oqo e bini tu kina na gaunisala kei na salatu e veilatai. Sa vuqa sara ga na sala me da lakova, ka sa levu sara na domo e voqataka mai “raica eke” se “raica ki kea.”1 Era tu eso na mataqali itukutuku kei na kena levu ka ra luvuca yani na noda bula yadua, e vuqa vei ira e nakiti me liutaki keda ki na salatu e rabailevu era dau muria e vuqa na tamata.
Ni da vakasamataka tiko se o cei vei ira na domo oqo me rogoci se na salatu cava vei ira oqo e dodonu, ko sa bau tarogi iko mada kina, me vaka a vakayacora o Josefa Simici: “A cava meu cakava… . Na (domo kei na salatu) cava vei ira oqo e dina, se era lasu taucoko li … ke dua vei ira e dodonu tiko, ia ko cei, kau na kila beka vakaevei?”2 Sa noqu ivakadinadina vei kemuni ni ko Jisu Karisito sa tomana tikoga na nona vakatakilakilataka na sala, liutaka na igolegole, ka vakamatatataka na mua yadua ni noda ilakolako. Na Nona salatu e dodonu ka rabailailai e mua yani ki na “rarama kei na bula kei na veisiga tawamudu.”3 Meu wasea mada vei kemuni e dua na kena ivakaraitaki mai na ivolanikalou.
Ena ivakaro ni Turaga, e a biuti Jesuralemi kina o Liai kei iratou na luvena ka tekivuna e dua na ilakolako vakairogorogo ki na dua na vanua yalataki. Ni oti e dua na gauna ni tiko voli ena dua na buca ena bati ni uciwai, a qai kaya na Turaga vei Liai ena dua na bogi ni sa kena gauna me tomani na nodratou ilakolako ki na lekutu. E a levu sara na ka a vakasamataka tu ka mani curu yani ki tautuba ni nona valelaca ena mataka ka tarava ka a kurabui sara vakalevu ni a raica ena qele e dua na ka ka na rawa beka ga me a biu tu ekea mai na liga ni Kalou. O ya e dua na kabasi, era vakatoka na Liaona, kei na kena idusidusi a caka me dusimaka na nodra ilakolako, ka vakavuna me ratou muria e dua na salatu me ratou laki sautu ka taqomaki tikoga ki na veitiki vinaka sara ni nodratou ilakolako. Ia a sega ni koya taucoko o ya. Na veika e a volai tu ena kabasi oqo e kilai vakavinaka ka rawarawa na kena wiliki ka dau veisau talega ena vuqa na gauna, ka rawa kina vua na matavuvale me ratou kila vakavinaka na veika e baleta na salatu ni Turaga.4
Ena gauna ni nodratou ilakolako, na Liaona oqo, se kabasi, e vakadeitaka ni sa ka yaga sara ena kena vukei na matavuvale nei Liai me sautu ka yaco rawa ki na vanua namaki. Ia e ka bibi dina na kena kilai eke na nona rai o Nifai ni nodratou vakabauta, gugumatua kei na vakararavi ki na kabasi e a vakayaco ka kina. Mai na dauveivukei totoka oqo ka a dusimaki iratou ena loma ni lekutu e a kaya vakaoqo o Nifai: “Ia eda sa raica ni sa rawa vua na Turaga me qisia na veika lalai me yaco kina na veika lelevu.”5
Na veivakadeitaki nei Nifai e a sega ni yali mai vei Alama ni oti e 500 na yabaki mai na gauna o ya ena nona a vakavotuya vua na luvena tagane na bibi ni Liaona. E a vakamacalataki kina vei Ilamani ni sa vakarautaka na Turaga na kabasi oqo me vakatakila vei tamadratou na salatu me ra lakova ena loma ni lekutu, ia me baleta ga na iyaya veivakurabuitaki o ya e cakacaka ena veika lalai ni ratou tamata vucesa na tamadratou ka ra guilecava me ra cakacakataka na nodra vakabauta kei na gugumatua. Sa yaco kina me sega kina ni cakacaka na kabasi totoka oqo ka yaco me sega kina ni toso na nodratou ilakolako se muria e dua na gaunisala dodonu, ia sa dede na nodratou tiko voli ena lekutu: eratou sa sota kaya na ka rarawa ena vuku ni nodratou talaidredre.6
“Raica na luvequ,” e a tomana o Alama “sa rawarawa sara na sala sa dusimaki tu me da muria; ia me da kakua ni vucesa kina me vakataki ira na noda qase; a sa dusimaki tu vei ira na ka me ra kitaka; ia kevaka era na muria, era na bula; sa vakatalega kina vei keda. A sa dusimaki tu vei keda na sala; ia kevaka eda sa muria, eda na rawata na bula tawamudu. I na luvequ; mo karona vinaka sara na iyau maroroi oqo, ia mo vakararavi vua na Kalou mo bula kina.”7
Na Turaga sa vakarautaka na veidusimaki kei na veivakasalataki ki na tamata yadua kei na veimatavuvale ena gauna oqo, me vaka ga a vakayacora vei Liai. Na koniferedi raraba sara mada ga sa dua na Liaona vou, oqo e dua na gauna kei na vanua me ciqomi kina na veidusimaki kei na veivakasalataki vakayalo ena vakasaututaki keda ka vukea me da muria na salatu ni Kalou ena veiyasana vuavuai vinaka ni bula oqo. Me da kila tiko ni da sa vakasoqoni vata me da vakarogoca na nodra ivakasala na parofita kei na iapositolo era sa dau masu vagumatua ka vakarautaki ira vakavinaka me ra kila na veika e vinakata na Turaga me ra tukuna. Eda sa dau masulaki ira ka vakakina o keda me vakavulica vei keda na Dauveivakacegui na inaki kei na lewa ni Kalou. Sa dina sara ni sa sega ni dua tale na gauna se vanua e vinaka cake vua na Turaga me dusimaki ira na Nona tamata me vakataka na koniferedi oqo.
Na ivakavuvuli ni koniferedi oqo era sa kabasi ni Turaga. Ena veisiga sa tu e matada ko na vakataki Liai, curu e tautuba ni nomu katuba ka kunea e dua na Liaona, Ensign se so tale na ivola ni Lotu, ena nomu kato ni meli ka na vakacurumi toka kina na veika ni koniferedi oqo. Me vakataka na Liaona ni gauna makawa, na ivolatukutuku vou oqo e matata ka rawarawa ni wiliki ka na solia vei iko kei na nomu matavuvale na kilai vakavinaka ni gaunisala kei na salatu ni Turaga.
Me vaka ga erau a vakavotuya vei keda o Nifai kei Alama, ni sa dau vakarautaka na Turaga na idusidusi ni noda ilakolako ki na vakabauta, gugumatua kei na vakarorogo ki na veidusimaki o ya. Ena sega ni na vakatakila na sala vou eso kevaka eda a sega ni vakamuri Koya ena yalodina ena salatu taumada a vakatakila vei keda. Na salatu vakalou ena ilakolako oqo ena yaco mai vei ira era vakamuria ena yalodina na ivakasala vakalou, ka vakayacora me ra “matanataka” me yacova ni sa vakatakilai mai e dua na ivolatukutuku vou me vukea na nodra gugumatua ena nodra ilakolako ki na vanua yalataki.
Kemuni na taciqu kei na ganequ, o ira na parofita kei na iapositolo ena veitabagauna era sa noda kabasi soli mai vua na Turaga. Na Nona veidusimaki vei ira e matata; na nodra idusidusi dodonu vakarautaki e ka dei. Na Nona salatu, sa vakataka na rawarawa ni Nona ivua. Ia mo kakua ni vakacalai ena rawarawa ni Nona sala, ka nanumi ni sa dua ga na ka lailai se me vakawaleni tu ga, ia mo ni karona na veika tabu oqo ka raimatua Vua ka mo rawa kina ni vakataki Koya ka bula vata kei Koya—me tawamudu.
Au sa tu nikua meu vakadinadinataka ni na yaco kece sara na yalayala ni Tamada; ni a tala mai na Luvena e Duabau ga ki vuravura me mai tuvanaka na salatu ka liutaka na ilakolako; ni rau a rairai na Tamana kei na Luvena vei Josefa Simici ena mataka ni dua na siga totoka ka vinaka ena itekivu ni vulaitubutubu ni 1820, ka yaco me vakalesui mai na veika taucoko e sa gadrevi me vakacavari vakavinaka taucoko kina na ilakolako ni tamata e vuravura oqo; o koya gona na parofita edaidai, o Peresitedi Gordon B. Hinckley, e dusimaka tiko na sala vei ira era na vakasaqara ka bula tawamudu. Eda na cakacakataka na noda vakabauta ka gumatuataka na noda vakaio ki na idusidusi kei na ivakatakilakila ni Liaona ena gauna oqo, sa noqu masu ena yaca i Jisu Karisito, emeni.