Na Savasava ni Yago
E vinakata na Turaga me da vakavoui—ia me vaka na kena ivatuka, ka sega ni vaka na ivatuka kei vuravura, ena noda taura na kena ivatuka me da vakakina.
Au se qai lesu ga mai ena dua na veisiko kau laki kidavaka mai kina ki vuravura na makubui keirau vou duadua, o Elizabeth Claire Sandberg. E se taucoko sara o koya! Au a kurabui sara vakalevu, sa dau kena ivakarau tu vei au oqo ena veigauna e sucu vou kina e dua na gone, na iqaqalo ni ligana, na iqaqalo ni yavana, na drau ni uluna, na utona ni tuki tiko, kei na veika e ucuya kina na nona matavuvale me vaka e laurai tu—na ucuna, na kumina, kei na kikilo ni baluna. Eratou a marautaka ka vakasakita talega na tacidratou lailai na tuakana kei na ganena qase cake. E vaka ni ratou vakila e dua na ka savasava ena loma ni nodratou vale ena kena tiko e dua na yalo vakasilesitieli ka se rau qai veitata vou kei na dua na yago.
Ena vuravura taumada eda vulica kina ni yago e tiki ni nona ituvatuva cecere ni marau na Kalou me baleti keda. Me vaka e tukuni ena ivakaro ni matavuvale: “Era kila ka dau qarava na Kalou me vaka ni Tamadra Tawamudu, na luvena tagane kei na yalewa vakayalo ka ra duavata kei na Nona inaki ka nakiti kina me ra na mai vakayago ka vuli e vuravura me rawa ni ra tubu yani ki na bula e uasivi sara ka me qai kena ilutua na nodra kila na vanua me ra na yacova ena tawamudu sai koya na nodra tikina ena bula tawamudu” (“Na Matavuvale: Ai Vakaro ki Vuravura Raraba,” Liaona Okot. 2004, 49). Na ka dina, ni da “a kaila ena marau” (Jope 38:7) ni da tiki ni ituvatuva oqo.
Na cava eda a marau kina vakalevu? Eda kila na dina tawamudu eso me baleta na yagoda. Eda kila ni ucuya na Kalou na yagoda. Eda kila ni vale ni yaloda na yagoda. Eda kila talega ni na vakila na mosi, na tauvimate, na malumalumu, kei na veitemaki na yagoda. Ia eda sa lomasoli tu, ka nanamaki sara talega, me da sotava na bolebole oqo baleta ni da kila ni na qai rawa walega ni da tubu ka yaco me vaka na Tamada Vakalomalagi ni rau sa cokoti vata ka sega tale ni veitawasei rawa na yalo kei na veika e bulia na Kalou (raica V&V 130:22) ka rawata na reki e taucoko (raica V&V 93:33).
Ni sa tu e vuravura na taucoko ni kosipeli, eda sa galala tale kina me da kila na dina eso oqo me baleta na yago. E vakavulica kina o Josefa Simici: “Eda lako mai ki vuravura oqo me da mai rawata e dua na yago ka kauta lesu yani ena savasava ki vua na Kalou ena Matanitu Vakasilesitieli. E okati ki na ituvatuva cecere ni marau na noda mai taukena e dua na yago. Na Tevoro e sega ni dua na yagona, ka sai koya oqori na kena itotogi” (The Words of Joseph Smith, tabaka ko Andrew F. Ehart kei Lyndon W. Cook [1980], 60).
E a vulica talega o Setani na veidina tawamudu oqo me baleta na yago, ia na nona itotogi me kakua ni dua na nona. O koya sa tovolea tiko kina na veika kece e rawata me rawa ni da vakayagataka kina vakailoa se vakatani na isolisoli talei oqo. Sa vakasinaita tu o koya na vuravura ena lasu kei na ilawaki me baleta na yago. Sa dau temaki ira e lewevuqa me ra vakacacana na isolisoli cecere oqo ni yago ena nodra voroka na lawa ni bula savasava, na sega ni rakorako, na dokadokai koya, kei na ivalavala ni bula ca e sega ni biu tani rawa. E cavilaki ira eso me ra vakacacana na yagodra, eso tale e temaki ira me ra sokalou ki na yagodra. Ena sala ruarua oqori e kaya tiko kina ki vuravura me ra raica na yagodra ni dua walega na iyaya. Ena loma ni veika lasu e vuqa vakasetani me baleta na yago, au vinakata meu laveta cake na domoqu nikua ena noqu tokona na savasava ni yago. Au vakadinadinataka ni isolisoli na yago, me vakayagataki ena vakavinavinaka kei na vakarokoroko.
E tukuna na ivolanikalou ni valetabu na yago. O Jisu sara ga vakataki Koya a vakatautauvatataka e liu na yagona ki na dua na valetabu (raica Joni 2:21). E muri a qai vakasalataki ira na kai Korinica ko Paula, oqo e dua na koro sa sinai tu ena veika kecega e vakasisila ka tawa kilikili: “Dou sa sega beka ni kila ni dou sa vale ni Kalou, ka sa tiko vei kemudou na yalo ni Kalou? Kevaka e dua na tamata sa vakarusa na vale ni Kalou, ena vakarusai koya na Kalou; ni sa savasava na vale ni Kalou, ia sai kemudou oqo” (1 Korinica 3:16–17).
Na cava beka ena yaco kevaka eda raica na yagoda me valetabu? Ena yaco me tubu vakalevu sara na kena rokovi na ivakarau ni bula savasava, na bula rakorako, na vakarokorokotaki ni Vosa ni Vuku, ka vakatalega kina na kena lailai sobu na veileqa eso me vaka na iyaloyalo vakasisila kei na veivakalolomataki, ni da na dau raica na yago, me vaka na valetabu, me itikotiko tabu ni Yalo. Me vaka ga ni na sega ni curuma na valetabu e dua na ka tawasavasava, eda na yadrava me kakua ni curuma na valetabu ni yagoda e dua na ivalavala tawasavasava.
Sa vakakina, na noda na raica me savasava ka totoka tu na taudaku ni noda valetabu ni yagoda me vakaraitayaloyalotaki kina na veika tabu ka savasava e tu e loma, me vaka e dau vakayacora na Lotu ki na kena veivaletabu. Sa dodonu me da dau vakaisulu ka ivalavala ena veisala me vakaraitayaloyalotaki kina na yalo tabu ka tiko vei keda.
Ena dua na gauna lekaleka sa oti ena noqu sikova e dua na koro levu ka vakasinaiti tu mai vei ira na saravanua e vuravura, au vakila na rarawa ni yaloqu ni sa rui lewe levu na tamata e vuravura era sa coko ki na ivadi nei Setani ni yagoda era iyaya ga me vakawa- leni ka vakaraitaki tu e matanalevu. Raitayaloyalotaka mada na kena veibasai kei na noqu reki niu curuma yani e dua na valenivuli ni goneyalewa isulusulu rakorako ka veiganiti ka serau na kedra irairai ena nodra vinaka. Au vakasamataka, “Oqo e walu na goneyalewa eratou kila na sala me ratou vakaraitaka kina na nodratou rokova na yagodratou ka ratou kila talega na vuna eratou vakayacora tiko kina.” Ena Me iSakisaki ni iTabagone e kaya: “E ibulibuli tabu ni Kalou na yagomu. Rokova ni isolisoli mai vua na Kalou, kakua sara ni vakacacana. Ena nomu isulusulu kei na kemu irairai, e rawa ni o vakaraitaka vua na Turaga ni o kila na kena vakamareqeti na yagomu… . Na nomu isulusulu e tukuna na veika e tu e lomamu” ([2001], 14–15).
Na rakorako e uasivi cake sara mai na kena levei walega na isulusulu e dau vakavotui kina na ibulibuli ni yago. E sega walega ni vakamacalataki kina na vanua e yaco kina na isulu e yavada se na vanua e yaco kina e domoda ia na ivakarau ni yalo. Na vosa rakorako e kena ibalebale “vakarautaki.” E veiwekani kei na vakarauta. E kena ibalebale na “rakorako, ka dodonu … ena vakanananu, isulusulu, kei na itovo ” (ena Daniel H. Ludlow, taba ena Encyclopedia of Mormonism, 5 na ivola [1992], 2:932).
E dodonu me na lewai vinaka ka me vakarauta ka veiganiti na noda veigagadre kece sara vakayago. Sa solia vei keda na Tamada Vakalomalagi dauloloma na irairai totoka kei na marau vakayago “me reki kina na mata ka marau kina na yalo” (V&V 59:18), ia ena ivakasala ni qaqarauni oqo: ni ra “sa buli me vakayagataki vakavuku, me kakua ni vakasabusabutaki se tauri vakatawadodonu” (V&V 59:20). A vakayagataka na watiqu na ivolanikalou oqo me vakavulici ira kina na luvei keirau ena lawa ni bula savasava. E kaya ni “vosa na vakatawadodonu … e kena ibalebale dina ‘me vorata [se saqata].’ Na noda vakayagataka … na yagoda me kakua ni vorata [saqata] na inaki vakalou e soli mai kina. Na marau vakayago e vinaka ena kena gauna kei na vanua dodonu, ia me kakua ga ni yaco me noda kalou” (John S. Tanner, “The Body as a Blessing,” Ensign, Julai 1993, 10).
Na veika a dau taleitaka na yago ena rawa ni yaco me ra lomaocaoca kina eso; sa vakatalega kina na noda dau kauwaitaka vakasivia na keda irairai e taudaku. Ena so na gauna eda sa dau kocokoco tale ena noda vakayagataka vakasivia na gauna ena vakaukauwa yago, na noda qarauna na ka eda kania, na sasauni, kei na noda vakayagataka na ilavo ena veika ni gauna oqo (raica Alama 1:27).
Au leqataka tiko vakalevu na cakacaka ni kena veisautaki na irairai (extreme makeovers). Ena yaco mai na marau ena noda ciqoma na yago e soli vei keda ka vakavinakataka cake na ituvaki eda sucu vata mai, e sega ni noda vakavouya na yagoda me vaka na iyaloyalo vakavuravura oqo. E vinakata na Turaga me da vakavoui, ia me vaka na kena ivatuka, ka sega ni vaka na ivatuka ni vuravura, ena noda taura na kena ivatuka me da vakakina (raica Alama 5:14, 19).
Au nanuma vinaka tiko na noqu dau vakila niu sega soti ni tuvaki vakavinaka ena noqu a se dua na itabagone ni dau tauvi au sara tu vakaca na laburabura. Au dau tovolea meu qarauna vakavinaka na kuli ni yagoqu. Erau vukei au na noqu itubutubu meu qaravi vakavuniwai. Ena vuqa na yabaki sa laki yaco sara meu sega ni kania na jokeliti kei na kakana vakawaiwai kece sara era dau vakarautaki vakatotolo ka ra dau taleitaka ka vakayagataka vata na itabagone, ia e vaka me sega ni kune e dua na kena yaga. A dredre vei au ena gauna ko ya meu marautaka na yago sa dau vakararawataki au vakalevu oqo. Ia e a vakavulica vei au na tinaqu ni veisusu e dua na lawa cecere cake. E dau kaya vakaoqo vei au ena veigauna, “Mo cakava na veika kece o rawata mo rairai taleitaki kina, ia ena gauna ga o curuma yani kina na katuba o ya, guilecavi iko ka vagoleya na nomu vakasama ve ira na tani.”
Sai koya oqori, E a vakavulica vei au na ivakavuvuli va-Karisito ni guilecavi iko. Na loloma uasivi se na loloma savasava i Karisito, “sa sega ni vuvu, sa sega ni viavialevu, sa sega ni qara na ka me nona ga” (Moronai 7:45). Ena gauna sa yaco kina me da kauwaitaki ira ga na tani se guilecavi keda, eda sa na tara cake e dua na irairai totoka ni yalo ka na caudre mai ena keda irairai e taudaku. Oqori na sala eda veisautaka kina na keda irairai me vaka na Turaga ka sega ni vaka na vuravura ka taura me noda na kena ivatuka. E vosa o Peresitedi Hinckley me baleta na irairai totoka oqo ka na yaco mai ni da sa vulica me da dau doka na yagoda, na noda vakanananu, kei na yaloda. E kaya kina:
“Ena veika kece e bulia o Koya sa Cecere Sara, e sega ni dua na ka e uasivi cake na kena totoka, e sega ni dua na ka e veivakauqeti vakalevu cake mai vua e dua na luvena goneyalewa totoka na Kalou ka lako voli ena savasava vata kei na nona kila na vuna me vakayacora kina, o koya e dau rokova ka doka na yagona me vaka ni ka tabu ka vakalou, o koya sa dau cokonaka na nona vakanananu ka vakarabailevutaka na nona kila ka, sa dau vakasinaita na yalona ena veika dina tawamudu” (“Understanding Our Divine Nature,” Liahona, Fepe. 2002, 24: Our Responsibility to Our Young Women,” Ensign, Sepi. 1988, 11).
Isa, au sa masuta me na dau vakasaqara na tagane kei na yalewa na totoka ni yago, na vakanananu, kei na yalo—e dau vakasakita na parofita!
Na kosipeli vakalesui mai e vakavuvulitaka ni tiko na kedratou isema taleitaki na yago, vakasama, kei na yalo. Me kena ivakaraitaki ena Vosa ni Vuku, era veisemati vakavinaka na veika vakayalo kei na veika vakayago. Ni da muria na nona lawa ni bula na Turaga me baleta na yagoda, sa yalataki talega vei keda na yalomatua ki na yaloda kei na kila ka ki na noda vakasama (raica V&V 89:19–21). Erau sema dina tiko na veika vakayalo kei na veika vakayago.
Au nanuma e dua na ka a yaco ena neitou vale ena noqu tubu cake, ena kena tarai na yalo itinaqu ka dau kidava na ka, ena kena vakamamautaki vakasivia na gagadre vakayago. E a vakatovolea e dua na icakacaka vou ni madrai vivi kamikamica. Era ka lelevu ka kamikamica qai kana vinaka—ka qai vakasinaiti keda vakaidina. O iratou mada ga na ganequ cauravou eratou voleka ni sega ni otiva rawa e dua. Ena bogi o ya ena masu vakamatavuvale a kacivi Na o tamaqu me masu. A cuva na uluna ka sega ni masu. E a tarogi koya vakamalua o Ta, “E dua beka na leqa?” E qai kaya cake mai, “Au vakila niu sega ni vakayalo nikua. Au se qai kania oti ga e tolu na ibuli madrai vivi o ya.” Au vakabauta ni vuqa vei keda e dau vakacudruya na yalona ena veigauna eso, ena kena vakamamautaki vakasivia na gagadre vakayago. Vakabibi na veika eso ka vakatabui ena Vosa ni Vuku, e veivakacacani na kena revurevu ki yagoda ka veivakamoceri ki yaloda. E sega ni dua vei keda e rawa ni cakitaka na isema oqo ni yagoda kei na yaloda.
Na yago tabu oqo, ka da sa vakavinavinakataka vakalevu, e tu na ivakatagedegede ni ka era rawa ni yacova. Eso na tamata era sucu vata mai kei na lokiloki ka so era dau vakila na mosi ni mate ena nodra bula taucoko. E vuqa vei keda eda vakila ni sa tekivu me malumalumu mai na yagoda ni da qase tiko mai. Ni yaco na veika oqori, eda sa nanamaki ki na siga me na vakabulai kina na yagoda ka vakataucokotaki. Eda sa vakanamata ki na Tucaketale mai na mate ka sa mai rawata ko Jisu Karisito, ni na “cokoti vata tale na yalo kei na yago, kei na yago ki na yalo; io ena semati vata na veitiki ni yago me vaka e liu, ka na sega ni yali kina e dua na drauniulu: io ena vakalesui tale na veika kece ki na kena itutu e liu” (Alama 40:23). Au kila ena vuku i Karisito eda na rawata kina na marau e taucoko ka na rawa walega ni rau sa cokovata na yalo kei na vu ni ka (raica V&V 93:33).
Sa noda valetabu na yagoda. E sega ni da lailai sobu ia eda levu cake me vakataki Tamada Vakalomalagi ni da sa mai vakayago. Au vakadinadinataka ni da luvena ka buli me da ucui Koya, ka tu vei keda na kaukauwa me da yaco rawa kina me vakataki Koya. Me da qarava sara vakavinaka na isolisoli vakalou oqo na yagoda. Ena dua na siga kevaka eda sa kilikili, eda na rawata na yago—sa vakataucokotaki ka savasava me vaka na makubuqu yalewa vou, ka se vauci vakaukauwa tu kei na yalo. Eda na kaila ena reki (raica Jope 38:7) ni da sa ciqoma tale na isolisoli eda dau gadreva tu (raica V&V 138:50). Me da rokova na savasava ni yago ena bula oqo me rawa ni qai vakasavasavataka ka vakacerecerea na Turaga ki na tawamudu. Ena yaca i Jisu Karisito, emeni.