iTinitini ni Vosa
E bula tiko na Kalou na Tamada Tawamudu… . Ko Jisu na Karisito, na Dauveivueti ni kawatamata. Erau sa vakalesuya mai na Nodrau cakacaka ena iotioti ni itabagauna oqo ena liga i Josefa na Parofita.
Sa vinaka kemuni na taciqu kei na ganequ, sa dua na koniferedi vakasakiti eda sa qarava mai. Sa dua dina na gauna ni kana magiti veivakauqeti ena teveli ni Turaga. Na ivakatagi, na masu, na vosa era sa vakasakiti. Eda sa vakavulici ka laveti, sa vaqaqacotaki na noda vakabauta.
Sa vakavotukana na tubu ni Lotu ena kena sa mai vakadewataki ena 80 na vosa na veika eda tukuna, ka kaburaki na noda itukutuku ena setilaiti ki vuravura raraba ka ra rogoca na tamata ena vuqa sara na vanua. Ena kena vakavotukanataki ga na veika a tukuna ko Moronai vua na parofita gonetagane ena bogi ni ika 21 ni Sepiteba, 1823.
E se cauravou ena gauna ko ya, e dua na gonetagane dauteitei dravudravua ka sega sara ni vuli vinaka. E sega ni dua na ka e tu vua. E sega talega na ka vei rau na nona itubutubu. E tikoga ena dua na vanua, ka sega mada ga ni kilai ena kena taudaku. Ia a kaya vua na agilosi “ni sa italai mai vua ni Kalou ko koya; ni sa digitaki [Josefa] na Kalou me qarava e dua na cakacaka; ni na rogo na [yacana] ka me na ka ni vinaka se ca vei ira na veimatanitu, veimataqali kei na dui vosavosa, eso era na taleitaka ka so era na vosacataka” (Josefa Simici—Ai Tukutuku 1:33).
E rawa vakacava ni yaco e dua na ka vakaoqo? E a vakataroga lo tu beka ko Josefa. A rairai kurabui dina vakalevu.
Ia sa mai yaco kece. Ia na ka levu cake sara ena qai yaco mai.
Ena ika 23 ni Tiseba ni yabaki oqo, 2005 eda nanuma me da na vakananuma kina na nona siganisucu ena dua na kena soqo ni marau me vakarokorokotaki kina.
Au nanuma, kevaka e rawa, meu na lako ki na vanua a sucu kina meu tokaruataka na veika a vakayacora ko Joseph F. Smith, na ikaono ni Peresitedi ni Lotu, ena ika 23 ni Tiseba, 1905, ena dua na senijiuri sa oti. Ena gauna ko ya a vakatabuya kina na ivakananumi ka vakatakilakilataki tu kina na vanua a sucu kina na Parofita ka sa tara tu kina oqo e dua na vale me kena ivakananumi.
Niu na tiko mai Vermont, Erau na tiko eke ena Vale ni Koniferedi oi rau na Peresitedi o Monson kei Faust kei ira na vo ni Vakaitutu Raraba. Ena sinai tu na vale levu oqo ka na kaburaki tiko vakayawa na parokaramu oqori ena setilaiti. Ena vakatagitaki tu na ivakatagi veiganiti ka cavuti na vosa ni veivakacaucautaki ena vosa vaka: South Royalton kei Salt Lake City, ki vua na parofita cecere ni itabagauna oqo.
Na sere ka sa vakasakiti dina na nodra lagata ena mataka oqo na matasere me vakarokorokotaki kina na Parofita e vakatovotovo walega ki na soqo ena Tiseba. Eda sa nanamaki tu ki na gauna oqo ka nuitaki ni o ni na tiko kece vata kei keimami.
Keimami laiva vei kemuni na neimami ivakadinadina ena vakalou ni cakacaka oqo. Sa dua na cakacaka vakasakiti dina. Ena lala na noda bula kevaka e sega. E bula tiko na Kalou na Tamada Tawamudu. E lomani keda o Koya. Sa dau vakaraici keda tiko. Ko Jisu na Karisito, na Dauveivueti ni kawatamata. Erau sa vakalesuya mai na Nodrau cakacaka ena iotioti ni itabagauna oqo ena liga i Josefa na Parofita. Au vakadinadinataka ena vakarokoroko ka solia kina na noqu iloloma kei na noqu veivakalougatataki vei kemuni, na taciqu kei na ganequ lomani ena lotu cecere oqo. Me vakalougatataki kemuni yadua na Kalou.
Niu sa mai tinia, au gadreva meu vakavinavinaka vei ira kece era sa veiqaravi vakalevu sara me rawa kina na koniferedi cecere oqo, o ira na lewe vuqa era cakacaka tiko ka sega ni laurai, me rawa kina na veika kece oqo. Era cakacaka ena siga kei na bogi me rawa kina na veika cecere sa mai rawa oqo—o ira na dau veikau ki loma ni vale, o ira na dau ni veimataqali iyaya vakamisini, o ira na dau veitaqomaki, o ira na dau soli veivuke gadrevi vakatotolo, o ira na dau raica na motoka, o ira na dauvakadewa vosa, o ira na sekeriteri era dau cakacakataka na neimami vosa ka ra dau taipataka ena veigauna.
Me vakalougatataki keda kece na Kalou, sa noqu masu malumalumu. Me da segata me da lako vakadodonu e Matana, sa noqu kerekere malumalumu, kau sa laiva kina vei kemuni na noqu tinia ena yaca tabu ka savasava ni noda Dauveivueti, io na Turaga ko Jisu Karisito, emeni.