Na Vakavakarau Vakayalo: Tekivu Kusarawa ka Tudei
Na veivakatovolei cecere ni bula sai koya na laurai ni noda vakarorogo ka muria na ivakaro ni Kalou ena maliwa ni cava ni bula.
E vuqa vei keda eda vakasamataka tiko se me da vakavakarau vakacava ki na cava. Eda sa raica ka vakila na nodra vakaleqai na marama, turaga, kei na gone, kei ira na qase kei na malumalumu, era sotava na cagilaba, na sunami, na ivalu, kei na dausiga. Eda na taroga, “Na sala cava beka meu vakavakarau kina?” Ka yaco na vakusakusa me voli ka maroroi na veika era nanuma na tamata ni ra na gadreva ena gauna era sota kaya kina na leqa.
Ia e koto e dua tale na vakavakarau ka bibi cake me baleta na veivakatovolei ka na yaco dina mai vei keda yadua. Na vakavakarau oqori sa dodonu me tekivutaki vakatotolo, baleta ni dau taura na gauna. Na veika eda na gadreva ena sega ni rawa ni voli. Ena sega ni rawa ni kerei. E sega ni rawa ni dau tu vakavinaka ena vanua e maroroi kina. Ka sa dodonu me a dau vakayagataki e veigauna ka wale tale tikoga oqo.
Na veika eda na gadreva ena noda gauna ni vakatovotovo sai koya na vakavakarau vakayalo. Sai koya me tu vei keda na vakabauta e vakatorocaketaki ka kaukauwa sara kei Jisu Karisito me da rawata kina na veivakatovolei ni bula ka na vakatautaki kina na veika e baleti keda ena tawamudu. Na veivakatovolei oqori e tiki ni Nona inaki na Kalou me baleti keda ena gauna ni Veibuli.
E solia vei keda na Parofita o Josefa Simici na Nona ivakamacala na Turaga me baleta na veivakatovolei eda sotava. E a bulia na Tamada Vakalomalagi kei na Luvena ko Jisu Karisito na vuravura. Sa koto na veivosa oqo me tukuni kina vei keda na inaki ni Veibuli: “Tou lako sobu mada ni sa galala tu na vanua ko ya, ia me da kauta yani na veika kece ka bulia na vuravura me ra tawana ko ira oqo; Io me da vakatovolei ira mada kina, era na muria na veika kece sa vakarota vei ira na Turaga na nodra Kalou se sega.”1
Na veivakatovolei cecere ni bula sai koya na laurai ni noda vakarorogo ka muria na ivakaro ni Kalou ena maliwa ni cava ni bula. E sega ni da vorata na cava, ia me da digia na dodonu ena gauna e tataba tiko kina. Ia na leqa levu duadua ena bula sa ikoya na noda sega ni rawata na veivakatovolei oqori, ka sega kina ni rawa me da lesu yani ena lagilagi ki na noda itikotiko vakalomalagi.
Eda luvena vakayalo e dua na Tamada Vakalomalagi dauloloma. E lomani keda ka a vakavulici keda ni bera ni da qai mai sucu ena vuravura oqo. E tukuna vei keda ni vinakata me solia vei keda na veika kece e tu Vua. Me da rawata na veisolisoli oqori sa dodonu me da mai taukena taumada e dua na yago ka vakatovolei. Ena vuku ni yago oqori, eda na sotava kina na mosi, na tauvimate, kei na mate.
Eda na tu me da temaki ena vuku ni gagadre kei na malumalumu ka salavata mai kei na yagoda. Eda na temaki ena ivadi qaseqase ka kaukauwa nei vunica me da soli keda ki na veitemaki oqori. Ena dau yaco mai na cava ni bula me da na digidigi kina ena noda vakayagataka na noda vakabauta ena veika eda sega ni raica rawa ena matada vakayago.
Sa yalataki ni na soli vei keda ko Jiova, ko Jisu Karisito, me noda iVakabula ka Dauveivueti. Ena vakadeitaka o Koya na noda tucake kece tale mai na mate. Ka na vakarawarawataka vei keda ko Koya me da rawata na veivakatovolei ni bula kevaka eda vakabauti Koya ena noda talairawarawa. Eda a kaila ena reki ena itukutuku vinaka o ya.
E dua na malanivosa mai na iVola i Momani, e dua tale na ivakadinadina kei Jisu Karisito, e vakamacalataka na dredre ni veivakatovolei kei na veika ena gadrevi me da rawata kina:
“Ia mo dou reki ka nanuma ni dou sa lewa ga na ka mo dou kitaka—mo dou digitaka na sala ki na mate tawamudu se ki na bula tawamudu.
“Oi kemudou na wekaqu mo dou muria na lewa ni Kalou ka kakua ni muria na lewa ni tevoro kei na gagadre vakayago; ia ni dou sa veivinakati kei na Kalou, mo dou nanuma tiko ni dou sa vakabulai ena vuku duadua ga ni nona loloma.
“Ia me vakaturi kemudou cake mai na mate na Kalou ena kaukauwa ni tucaketale mai na mate, ka vakaturi kemudou cake mai na mate tawamudu ena kaukauwa ni nona isoro, mo dou curu rawa kina ki na matanitu tawamudu ni Kalou, ka mo dou vakacaucautaka na nona loloma tawamudu. Emeni.”2
Ena gadrevi na vakabauta sega ni vakayavalati rawa me baleta na Turaga ko Jisu Karisito me da digia kina na sala ki na bula tawamudu. Eda na kila na loma ni Kalou ena noda vakayagataka na vakabauta oqori. Na noda cakacakataka na vakabauta oqori eda na tara cake kina na kaukauwa me da vakayacora na loma ni Kalou. Ia ena noda cakacakataka talega na vakabauti Jisu Karisito ena rawa kina ni da vorata na veitemaki ka rawata na veivosoti ena vuku ni Veisorovaki.
Eda na gadreva me da sa tara ka susuga cake na vakabauti Jisu Karisito ni se bera sara ni valuti keda ko Setani, me vaka ena vakayacora, ena vakatitiqa, kei na nona vakatovolea na noda gagano vakayago, ka vakakina ena domo ni veicavilaki ena kaya toka ni vinaka na ca ka ni sega ni dua na ivalavala ca. Na cava vakayalo oqori era sa tataba makawa tiko. E rawa ni da namaka me na ca vakalevu cake me yacova ni sa lesu tale mai na iVakabula.
Se vakacava na levu ni vakabauta e tu vei keda ena gauna oqo me da talairawarawa vua na Kalou, eda na gadreva me da vaqaqacotaka ka vakabulabulataka tikoga e veigauna. E rawa ni da vakayacora oqori ena noda lewa ena gauna oqo me da dau totolo cake ena noda talairawarawa ka gadreva vakalevu cake me da dau vosota. Na noda vulica me da tekivu kusarawa e idola ni vakavakarau vakayalo. Na lokuyara kei na veivukiyaki era kena meca vakayago.
Meu vakatura mada vei keda e va na gauna vinaka me da vakatovotovotaka kina na talairawarawa e totolo ka tudei. E dua sai koya na ivakaro me da kana magiti ena vosa ni Kalou. Na kena ikarua me da dau masu tikoga. Na kena ikatolu sai koya na ivakaro mo sauma vakadodonu na nomu ikatini. Kei na kena ikava sai koya me da dro tani mai na ivalavala ca kei na kena revurevu rerevaki. Ena gadrevi na vakabauta ena kedra tekivutaki kei na kedra maroroi tiko. Ia ko ira kece oqo era na vaqaqacotaka na nomu rawa ni kila ka talairawarawa ena ivakaro ni Turaga.
Sa tu rawa vei iko na veivuke ni Turaga mo tekivu kina. Ena Okosita ko ni sa rogoca kina na yalayala oqo mai vei Peresitedi Gordon B. Hinckley kevaka o ni na wilika na iVola i Momani ka vakacavara ena mua ni yabaki: “Au sega ni vakataratutu ena noqu yalataka vei kemuni ni kevaka ko ni na muria na parokaramu rawarawa oqo, veitalia na levu ni gauna o ni sa wilika kina na iVola i Momani, ena yaco yani ki na nomuni bula kei na nomuni vuvale e dua tale na ikuri ni Yalo ni Turaga, e dua na yalayala kaukauwa cake me da lako ena talairawarawa ki na Nona ivakaro, kei na dua na ivakadinadina qaqaco cake ni bula tiko na Luve ni Kalou.”3
Oqori sara ga na yalayala ni vakabauta e vakalevutaki, eda gadreva me da vakavakarau vakayalo. Ia kevaka eda lokuyarataka na noda tekivu talairawarawa ki na veisureti veivakauqeti ko ya ena levu cake na levu ni draunipepa eda na wilika ena dua na siga. Kevaka eda na qai calata na wiliwili ena vica ga na siga, sa na levu cake na noda rawa ni lutu. Oqori na vuna au digitaka kina meu wiliwili tiko e liu mai na noqu ituvatuva ni veisiga, meu vakadeitaka kina na noqu rawata na veivakalougatataki ni yalo ni yalayala kei na ivakadinadina kei Jisu Karisito. Ni cava na Tiseba, au sa na vulica rawa kina meu tekivu ena gauna ga e yaco mai kina na ivakaro ni Kalou ka tudei tu ena talairawarawa.
Ia e bibi cake mai na kena oqori, niu wilika tiko na iVola i Momani, au na masuta me na vukei au na Yalo Tabu meu kila na ka e vinakata na Kalou meu cakava. E koto ena ivola oqo e dua na yalayala ni na saumi na vakatakekere oqori: “O koya au sa kaya kina vei kemudou mo dou tugana ki lomamudou na vosa i Karisito, raica na vosa i Karisito sa tukuna vei kemudou na veika kece mo dou kitaka.”4
Au na vuki vakatotolo ena veika e tukuna vei au na Yalo Tabu ni dodonu meu cakava niu wilika ka vakasamataka na iVola i Momani. Niu sa vakacavara na cakacaka oqo ena Tiseba, au sa na kila e vuqa na ka me baleta na noqu dodoka vakalailai na noqu vakabauta meu talairawarawa kina. Sa na vaqaqacotaki kina na noqu vakabauta. Au sa na kila ena veika sara ga au sotava na veika ena yaco niu lakova vakamataka e veigauna na ivolanikalou meu kila kina na veika e vinakata na Kalou meu cakava ka cakava sara. Ni da sa vakayacora oqori, eda sa na vakarau kina vakavinaka ki na cava lelevu cake ena gauna era lako mai kina.
Eda na qai digitaka na veika me da cakava ni oti na ika 1 ni Janueri. Eda rawa ni digia me da vakacegu ka kaya vei keda: “Au sa tara e dua na ivurevure ni vakabauta ena noqu tekivu kusarawa ka tudei ena talairawarawa. Au na maroroya tu me baleta na veigauna au na vakatovolei kina ena cava.” E dua na sala vinaka cake ni vakavakarau, baleta ni vakabauta cecere e lailai na gauna e rawa ni bula kina vakataki koya. E rawa ni da digia me da tomana tikoga na noda vulica na vosa i Karisito ena ivolanikalou kei na nodra ivakavuvuli na parofita bula. Oqo na veika au na cakava. Au na lesu tale ki na iVola i Momani ka gunu vakatitobu mai kina e veigauna. Kau na qai vakavinavinakataka na veika sa vakavulica vei au na nona bolebole kei na yalayala na parofita, na sala meu rawata kina na vakabauta e vakaikuritaki ka qai maroroya tikoga.
Na masu yadua e rawa talega ni tara cake na noda vakabauta me da vakayacora na veika e vakarota na Kalou. Eda sa vakaroti me da dau masu tikoga me da kakua ni rawai. Eso na veitaqomaki eda na gadreva sai koya na nona vosa sara ga mai na Kalou. Ia e levu ga ena lako mai ena noda tara cake na noda vakabauta me da talairawarawa. E rawa ni da masu e veisiga me da kila na veika e vinakata na Kalou me da cakava. E rawa ni da yalataka me da tekivu me da cakava vakatotolo ni sa yaco mai na kena isau. Na veika au sa sotava, o ya, ni dau sauma o Koya na mataqali kerekere vaka ko ya. Me da qai digia me da talairawarawa. Ni da vakayacora vakakina, eda na tara cake na vakabauta e veirauti me da kakua kina ni rawai. Ka da na rawata na vakabauta me da lesu tale e veigauna me da dusimaki tiko. Ni sa yaco mai na cava, eda sa na vakarau tu me da lako ka vakayacora na veika e vakarota na Turaga.
Sa vakaraitaka vei keda na iVakabula e dua na ivakaraitaki cecere ni masu ni talairawarawa vaka ko ya. E a masu ena were mai Kecisemani ena Nona a cakacakataka na Veisorovaki me vakayacori kina na lomai Tamana. E kila o Koya ni lomai Tamana sai koya me cakava na veika mosi ka vakadomobula ka da na sega ni rawa ni vakasamataka rawa. E a masuta me sega walega ni ciqoma na lomai Tamana ia me vakayacora. E a vakaraitaka vei keda na ivakarau ni masu ena yalodina ni talairawarawa.
Na ivakavuvuli ni noda vakatovotovotaka vakamataka na vakabauta tudei e vakayagataki talega ena ivakavuvuli ni ikatini. Me da kakua ni waraka sara na gauna ni veivakatarogi vakayabaki ni soli ikatini me da qai vakatulewataka kina na ituvaki ni noda soli ikatini. E rawa ni da sa vakatulewataka ena gauna oqo. E taura na gauna me da vulica me da dau lewa vakamatau na noda vakayagataka na noda iyau ena noda vakabauta ni veika e tu vei keda e solia mai na Kalou. E ka ni vakabauta na noda sauma ena kena gauna na noda ikatini ka sega ni lokuyarataki.
Kevaka eda sa lewa ena gauna oqo me da sauma vakadodonu na noda ikatini ka da tudei ena noda sauma tiko, ena taladrodro tu ena loma ni yabaki taucoko na veivakalougatataki, ka vakakina ena gauna ni veivakatarogi ni soli ikatini. Ena noda lewa ena gauna oqo me da sauma vakadodonu na noda ikatini kei na noda sasaga tudei me da talairawarawa tiko kina, eda na vaqaqacotaki ena noda vakabauta, ka na yaco mai ena kena gauna na yalomalua. Sai koya na veisau oqori e yaloda ena vuku ni Nona Veisorovaki ko Jisu Karisito, ka levu cake mai na noda solia na noda ilavo se na iyau, sa rawa kina vua na Turaga me yalataka vei ira era dau sauma vakadodonu na nodra ikatini na veitaqomaki ena iotioti ni gauna.5 E rawa ni da vakadeitaka ni na ganiti keda na veivakalougatataki ni veitaqomaki kevaka eda yalataka oqo me da sauma vakadodonu na noda ikatini ka tudei kina.
Na kaukauwa vata oqo ni noda digidigi taumada me da vakabauta ka tudei ena talairawarawa e yaga talega ena kena rawati na vakabauta me da vorata kina na veitemaki ka rawata na veivosoti. Na gauna vinaka duadua me da vorata kina na veitemaki sai koya ena kena totolo duadua. Na gauna vinaka duadua ni veivutuni sai koya na gauna oqo. Na meca ni yaloda ena biuta ki na noda vakanananu na vakasama me temaki keda. E rawa ni da lewa taumada me da vakatovotovotaka na vakabauta me da biuta laivi na vakasama ca ni bera ni da cakacakataka. Ka rawa ni da digitaka totolo me da veivutuni ni da ivalavala ca, ni bera ni vakamalumalumutaka ko Setani na noda vakabauta ka vesuki keda. Na vakasaqara na veivosoti ena vinaka tikoga me vakayacori oqo mai na kena qai vakayacori malua.
Ni sa davo koto ko tamaqu ena nona idavodavo ni sa voleka ko mate, au tarogi koya kevaka e sega beka ni nanuma ni dua na gauna vinaka oqo ni veivutuni ka masuta na veivosoti ena dua na ivalavala ca ka se bera ni wali vua na Kalou. E rairai rogoca beka e dua na ivakatakilakila lailai e domoqu ni rerevaka na mate kei na Veilewai. A katadigi vakamalua, raici au cake ena matadredredre, ka kaya, “O sega, Hal, au a sa veivutuni tiko ena noqu itosotoso.”
Na vakatulewa ena gauna oqo me vakatovotovotaki na vakabauta ka tudei ena talairawarawa, ena vuataka mai ena kena gauna na vakabauta cecere kei na veivakadeitaki. Oqori na vakavakarau vakayalo eda na gadreva kece sara. Ena vakadonui keda ena gauna ni tiko yavavala me da ciqoma na yalayala ni Turaga ni, “kevaka dou sa vakarau vakavinaka tu dou na sega sara ni rere.”6
Ena dina oqori ena noda sotava na cava ni bula kei na gauna ni mate. Erau sa solia vei keda na Tamada Vakalomalagi dauloloma kei na Luvena Daulomani na veivuke kece Erau rawata me da rawata kina na veivakatovolei ni bula sa tu e matada. Ia e dodonu me da lewa me da talairawarawa ka qai cakava. Eda na tara cake na vakabauta me da rawata kina na veivakatovolei ni talairawarawa ena kena gauna kei na noda digidigi e veisiga. E rawa ni da lewa ena gauna oqo me da cakava vakatotolo na veika kecega e kerea vei keda na Kalou. Ka rawa ni da lewa me da tudei ena veivakatovolei lalai ni talairawarawa ka na tara cake na vakabauta me na kauti keda me da lako sivita yani na veivakatovolei levu, ka na yaco dina mai.
Au kila ni o iko kei au e daru luvena e dua na Tamada Vakalomalagi dauloloma. Au kila ni o Koya na Luvena, ko Jisu Karisito, e bula ka ni o Koya na noda iVakabula, ka ni sa sauma o Koya na isau ni noda ivalavala ca kece sara. Sa vakaturi cake tale mai na mate, o Koya vata kei na Tamada Vakalomalagi erau a rairai ki vua na gonetagane, ko Josefa Simici. Au kila ni iVola i Momani e vosa ni Kalou, sa vakadewataki ena isolisoli kei na kaukauwa ni Kalou. Au kila ni oqo na Lotu dina i Jisu Karisito.
Au kila ni rawa ni da kila na veika e vinakata na Kalou me da cakava mai vua na Yalo Tabu. Au vakadinadinataka ni rawa ni solia vei keda ko Koya na kaukauwa me da cakava na veika e kerea vei keda, se na cava ga kei na veivakatovolei cava ga ena yaco mai.
Au masuta ni da na digia me na totolo na noda talairawarawa tikoga vua na Turaga, ena veigauna vinaka kei na veigauna ni cava. Ni da vakayacora vakakina, ena vaqaqacotaki na noda vakabauta, eda na kunea na vakacegu ena bula oqo, ka da na rawata na veivakadeitaki ni na rawa vei keda kei na noda matavuvale me da vakadonui ki na bula tawamudu ena vuravura sa bera mai. Au yalataka vakakina vei kemuni ena yaca i Jisu Karisito, emeni.