Nona Vakasaqara na Tamata na Dina Vakalou
Ni ko vakamuria na ituvatuva ni Turaga ena nomu rogoca ka vakamuria na dina vakalou ena vukei iko mo tara cake na nomu yavu vakayalo ka gumatua mo yacova na kemu ituvaki.
Ena loma ni ivavakoso levu oqo ena bogi nikua eratou tiko kina e tolu na vulagi dokai, eratou itokani makawa vakavuli. Eratou gole vakayawa sara mai Belgium, na noqu vanua, me ratou mai marautaka na ika 50 ni ivakananumi ni tuvaitutu ni neitou koronivuli torocake ka mai vakarorogo ki na koniferedi oqo. Kivei iratou, kivei kemuni na lewe ni matabete, ka vakabibi vei kemuni na cauravou ko ni vakarau kaulotu, sa nomuni na itukutuku oqo. Sa baleta na nona vakasaqara na tamata na dina vakalou. Ni sa kunei, me na qai bulataki ena vuravura veilecayaki vakalotu oqo kei na torosobu ni itovo savasava. Sa yaco me yavu vakayalo yadudua ka na muataki keda me da bulataka na ivakavuvuli ni ivalavala dodonu. Me vaka e kaya na Turaga, “Na ka dodonu ko na vakataudeitaki kina” (3 Nifai 22:14).
Ena kunei beka evei na dina vakalou? O ya na “muria na vunau ni Turaga, se na nodra vosa na nona tamata, se muria na nodra vosa na parofita kei na iapositolo” (V&V 1:14). Ena rogoca kei na vakamuria. Na vakarorogo e rawarawa tu ga. Na kena rogoci ka bulataki sa yaco me dua na bolebole tawamudu.
iMatai, rogoca mada na domo ni Turaga. Na veivosaki kei na Turaga me baleta na dina vakalou se kila ka vakayalo ena kunei ga ena ivolanikalou. E vakatokai me ivakatakila, ka kena ibalebale, me vakatakilaitaki se tavoci (Bible Dictionary, “Revelation,” 762). Sa soli oqo “mo dou kila na ivakarau mo dou qaravi Koya kina, ka kilai Koya dou sa qarava” (V&V 93:19). E kaya o Elder Neal A. Maxwell, “Ena ivakatakila walega ena rawa ni da vakayacora kina na cakacaka ni Turaga me vaka ga na Nona lewa ena Nona sala ena Nona gauna ga” (Revelation,” First Worldwide Leadership Training Meeting, Janu. 2003, 5). “Ni yali na ivakatakila, ena ka walega na cakacaka taucoko, ena butobuto, ka veilecayaki” (Bible Dictionary, 762).
iKarua, rogoca na domodra na Nona italai. Na ivakatakila se dina vakalou e dau soli mai ena lewa ni Turaga vei ira na Nona italai ena sala e duidui kei na gauna ka sa tu talega ena ivolanikalou. “E dina ena sega ni vakayacora e dua na ka na Turaga ko Jiova, ena vakaraitaka mada ga na nona vosa vuni vei ira na nona italatala na parofita” (Emosi 3:7).
iKatolu, muria na nodra vosa na parofita kei na iapositolo. Na kena vakamuri sai koya na vakarorogo vagumatua. Sai koya na vakarorogo vei ira era sa kacivi mai vua na Kalou me ra mai dau ni ivakadinadina bula i Jisu Karisito ena noda gauna. Sa kena ibalebale me da rokovi ira ena ilesilesi oqo ka me da vakaio ki na veisureti me ciqomi na ivakadei vakayalo yadudua ni sa dina sara na nodra ivakavuvuli ka me da na solia na noda bula ena kedra vakamuri.
Me ivakaleka, sa nona ivakarau na Turaga me wasea yani na dina vakalou vei ira na parofita me dusimaki ka vakalougatataki keda ena loma ni bolebole kei na butobuto ni bula oqo: rogoca ka vakamuria. Na noda yavu vakayalo yadudua e gadrevi me vaqaqacotaki ena ivakarau oqo kevaka eda vinakata me da marautaka na veivakalougatataki ni Turaga. Sa qai sega kina ni se rauta na vakasaqaqara ena ivolatabu me kilai kina na loma ni Turaga. E dodonu me salavata kei na cakacaka ni vakabauta, vakaio ki na vakayacori na ivakaro ni Turaga ena kena muri na Nona vunau ni bera ni da marautaka na veivakalougatataki ni Turaga. Na veivakadeitaki vakayalo yadudua ni ituvatuva oqo ena kena kerei ka vakabauti ni da na taura vakaidina sa qai yaco kina me noda masu bibi duadua.
Me da sa kila vinaka kina na ituvatuva oqo e sa vakamacalataki ena tolu na vosa: ivakatakila, vunau, veivakalougatataki. Ia, oqo ena yaco me dua na bolebole tawamudu ni kena rogoci taumada ka vakamuri na vosa ni Turaga kei ira na Nona italai. Baleta? “A sa veimecaki na itovo vakayago kei na Kalou … ka na vaka tu kina me tawamudu kevaka eda sa sega ni vakarorogo ki na domo ni Yalo Tabu” (Mosaia 3:19). Na vakavakarau vakayalo ena vakayacori taumada me na qai ciqomi kina e dua na ivakatakilakila vakayalo yadudua. Na vo ni tikina e tukuna me da “tamata yalosavasava ena vuku ni isoro i Karisito na Turaga” ka yaco talega me da “vaka na gone lailai, me da talairawarawa, yalomalua, yalomalumalumu, dauvosota, dauloloma ka talairawarawa kina—sa lewa vua na Turaga, o ya na Nona ivakaro. Sa qai kaya kina na Turaga, “Ia ni da sa muria e dua na ivakaro, ena vakalougatataki keda na Kalou ena ka sa yalataki tu kina” (V&V 130:21).
Me da kila vakavinaka sara na ituvatuva oqo ena dua na ivakaraitaki vou ni kena muri na nodra vosa na parofita kei na iapositolo ni noda gauna oqo. E dua na nodratou veisureti vou na Mataveiliutaki Taumada vei ira kece na lewe ni Lotu me ra wilika na iVola i Momani: E Dua Tale na iVakadinadina kei Jisu Karisito ni bera ni cava na yabaki oqo. Na bolebole oqo e okati kina e dua na yalayala: “Ko na vakalougatataki vakalevu sara ena Yalo ni Turaga, e dua na veivakadeitaki levu me vakayacori na Nona vunau, kei na dua na ivakadinadina qaqaco vinaka ni sa bula dina tiko na Luve ni Kalou” (Nodratou ivola na Mataveiliutaki Taumada, 25 ni Julai, 2005).
Me icavai beka na kena gadrevi me da taukena e dua na ivakadinadina kaukauwa sara ni sa bula dina tiko na Luve ni Kalou me vaka e laurai ena iVola i Momani? Edaidai sa vakaitamera na veilecayaki ena lotu Vakarisito me baleta na ivakavuvuli i Karisito, e sega walega na veika me baleta na kena ituvaki dina o Koya ia me baleta talega na Nona Veisorovaki kei na Tucaketale, na Nona kosipeli, vakabibi na vunau e umanaki kina. Na vuna sai koya na vakabauta ni tamata vakayacani ena Karisito, Karisito kilai levu, kei na Karisito e vakamatei tawa kilai. Na ivakavuvuli cala vakalotu ena veimuataki ki na itovo cala vakalotu.
Na yavu vakayalo yadudua e rawa ka dodonu ga me vakayavutaki ena dua na veivakadeitaki vakayalo yadudua mai vua na Yalo Tabu ni sa bula dina tiko o Jisu Karisito, o ira na parofita kei na ivolanikalou ka umanaki tu kina na ivakatakila ni Turaga. Me matata sara, na nona bula dina tiko na Karisito e veisemati ki na vakalesui mai ni Nona kosipeli kei na kena itukutuku ni “ko Jisu Karisito na iVakabula kei vuravura, o Josefa Simici sa nona dauvakatakila ka parofita ena gauna oqo, ni Lotu i Jisu Karisito ni Yalododonu Edaidai sa matanitu ni Turaga ka sa tauyavutaki tale e vuravura” (Book of Mormon introduction).
Na veivakadeitaki vakayalo oqo ena kaukauwa ni Yalo Tabu e dau soli ena veidusimaki ni Turaga vua e dua e kerekere ena vakabauta, ka kila ni na rawa ni yaco mai na kena isau ena kaukauwa o ya. Ena tekivutaki ena rogoci na domo ni Turaga, na Nona italai, ira Nona parofita kei na iapositolo ka semati yani ki na kena vakamuri na nodra vosa. Na kila ka vakayalo me baleta na Vakalesui mai e ka ga ni vakabauta.
Meu wasea mada na veika ni noqu bula vakayalo niu sa dua na saumaki vou me ivakaraitaki ni ituvatuva vakayalo oqo. Na gauna erau a gole yani kina ki vale na daukaulotu au a gadreva meu rogoca na itukutuku ni kena sa Vakalesui mai na kosipeli. Sa vakauqeti au tiko na noqu lomatarotaro. Na noqu laki lotu, au rawata kina e vuqa na kila ka vakayalo. E ka talei dina kau a vinakata sara, ia e yali vei au na veika yaga dina: o ya na vakamuria. Au a tara cake kina na noqu yavu vakayalo me baleta ni sa bula dina tiko na Karisito kei na veivakadeitaki ni o Josefa Simici a Parofita ni Vakalesui mai. E a qai yaco walega mai na veivakadeitaki o ya niu sa vakatovolea na noqu itekitekivu ni vakabauta ena iVola i Momani, na ivakadinadina bula ni ivakatakila ena gauna oqo.
Ia, na kena rawati na kila ka o ya e sega ni rauta; e gadrevi me salamuria e dua na solibula me moica na noqu vakabauta meu kila ni sa dina na iVola i Momani ka sa vakakina o Josefa Simici ni sa parofita. Na noqu vakabauti Karisito e sega mada ni vakataratututaki. Au vakabauta na Turaga kei na Nona yalayala. Na vakacegu ni noqu vakasama, na vakacegu ni lomaqu sa kena isau; sa sega tale na taro. Sa maucokona na yavu vakayalo ka a salamuria e dua na solibula ni yaloqu meu ciqoma na veiyalayalati ni papitaiso. Oti sa qai yaco mai na isolisoli ni Yalo Tabu me dusimaki au ka vukei au meu vakatulewa vakadodonu ka vosota me yacova na ivakataotioti. Au sa qai kila kina na veika meu cakava me baleta na noqu veisiga ni mataka ena bula vakayago oqo.
Mo tovolea na ivakatakila vakalou. Rogoca na domo ni Turaga. E ka bula, e ka ni tamata yadua, e ka dina. Na iulubale e sega ka sega ni rawa me sosomitaka na ivakatakila. Me tokaruataki na vosa i Peresitedi James E. Faust, “Kakua ni vakatara na nomu lomatarotaro me tawasei iko mai na ivurevure vakalou ni kila ka” (“Lord, I Believe: Help Thou Mine Unbelief,” Liaona, Nov. 2003, 32).
Mo vakila na kaukauwa ni vosa ni Kalou ena nomu vakasama ni ra sa solia mai na italai ni Kalou (Alama 31:5).
Kerea ka ciqoma ena vakabauta, ka vakamuria na nodra vosa na parofita kei na iapositolo, ko na “rawata na isala ni bula tawamudu” (V&V 20:14).
O koya oqo, mo nanuma tiko, me itinitini ni veika oqo, ni ko vakamuria na ituvatuva ni Turaga ena nomu rogoca ka vakamuria na dina vakalou ena vukei iko mo tara cake na nomu yavu vakayalo ka vakatau kina na ka ko na yacova ena bula oqo kei na kena sa roro tiko mai.
Ena yaca i Jisu Karisito, emeni.