Au sa Dautaleitaka na iVolatabu
E sega ni dua tale na ka ka rawa me da cakava me baleti ira na noda matavuvale me bibi cake mai na nodra vakaukauwataki ena ivolatabu.
E a qai kerei keda tikoga na noda parofita lomani me da wilika na iVola i Momani ni bera ni cava na yabaki oqo. Me vaka niu sa mai ciqoma na veisureti oqo, au raica rawa eso tale na veika vovou ka veivakayavalati ena ivola oqo, e dina ga niu a sa wilika oti vakavica vata ena veigauna sa oti. Me kena ivakaraitaki, au a kunea tale na ika 2 Nifai 4:15, ni kaya, “Au sa dautaleitaka na ivolatabu ka vakananuma e lomaqu, kau sa vola me ivakavuvuli me ra vinaka kina na noqu kawa.”
E vakatavulici keda na tiki ni ivolatabu oqo me da wilika na iVola i Momani. E cavuti koto kina e tolu na vakasama bibi.
iMatai, “Au sa dautaleitaka.” Au taleitaka na malanivosa oqo! Au a vakasamataka tu na viakana kei na viagunu me baleta na kilaka ena noqu wilika na ivolatabu, ia na kena taleitaki sa ikoya e dua tale na ka. Au kunea rawa ni veika au kauta laivi mai na ivolatabu ena vakatau kina na veika au kauta mai. Ena veigauna au wiliki ira kina, au dua, ena dua na kena vakasama, kau tiko mai e dua na tamata vou kei na matana vou ki na ka e sotavi tiko. Na vanua au tu kina oqo ena noqu bula, na veika au sotava, kei na noqu ivakarau ena tara taucoko na veika au na rawata. Au taleitaka na ivolatabu. Au vakamareqeta na veidina au kunea kina ena noqu wiliki ira. E vakasinaita na yaloqu na reki ena noqu ciqoma na veivakauqeti, veidusimaki, veivakacegui, kaukauwa, kei na isau ni veika au gadreva. E rarama cake mai na bula, ka sa tadola e mataqu na noqu gaunisala. E sa vakadeitaka vei au na nona loloma kei na veikauwaitaki me baleti au na Tamaqu Vakalomalagi ena veigauna kece sara au wilika kina. Sa ikoya dina sara ga oqo e dua na ka au taleitaka. Me vaka e kaya e dua na gonetagane lailai ena kalasi ni Sunbeam, “Au marautaka na ivolatabu!”
iKarua, “Au vakananuma e lomaqu.” Au dau taleitaka meu kauta vata voli e yaloqu na ivolatabu! Na yalo ni veika au a wilika e sa mai tu e kea me kauta mai vei au na yalomalua kei na vakacegu. Na kila ka au sa mai rawata sa solia vei au na veidusimaki kei na veiliutaki. Sa tu vei au na yalodei ka yaco mai ena talairawarawa.
Ena vuqa na gauna e dau noqu na taucoko ni dromuci ena ivolatabu. Ena vuqa tale na gauna au dau wiliki ira ga vakacaca. Ia, e sega soti ni dua na ka se evei na vanua se ena gauna cava au wilika kina na ivolatabu; e se rawa tikoga meu kauti ira voli e lomaqu. Au sa raica rawa ena noqu dau wilika ena mataka ni sa rawa me tiko vata voli kei au na veivakauqeti ni Yalotabu ena loma ni siga taucoko. Niu dau wiliki ira ena sigalevu tutu, e sa baleta ni dua na gagadre e kauti au kina me rawa niu kunea na isau ni taro kei na ivakaro ena vakauqeta na noqu vakatulewa kei na veika me vakayacori. Niu dau wiliki ira ena bogi, e tudei tu ga ena noqu vakasama na kena kamikamica na itukutuku veivakacegui mai vua na Turaga me yacova na gauna au sa vakacegu kina. E vakavuqa meu dau yadra mai ena bogi ena vakasama se vakanananu ka ra vu mai na veivosa au se qai wilika walega ni bera na noqu laki moce. Ena loma ni siga e rawa me veilakoyaki tu na noqu vakasama ki na vuqa na veivanua, ia na yaloqu e taura matua tu ga na veivosa ni Turaga ka kunei mai na ivolatabu kau “vakananumi ira” tu.
Mai na veika oqo au vulica rawa kina “Ia me vaka na vakanananu ni lomana [e dua na turaga], sa vakakina ko koya” (Vosa Vakaibalebale 23:7). Niu dau vakananuma na ivolatabu, e yacovi au e dua na ka. E dua na gagadre kaukauwa e yaco mai sa ikoya meu bula volekata na Tamada Vakalomalagi. Au gadreva meu qaravi Koya. Au vinakata meu bulataka na veivakavuvuli au vulica mai na ivolatabu, niu sa cakava vakakina, na yaloqu “kau sa vola me ivakavuvuli me ra vinaka kina na noqu kawa.”
Oi au, e sa macala tu ga, au sega ni vola na ivolatabu me vakataki Nifai, ia ena gauna au wilika kina na ivolatabu ka bulataka na kena ivakavuvuli au vulica sa yaco me ra volai tu ena noqu bula na veivolanikalou oqori. Era vakatulewa ena veika au vakayacora ka ra sa volai tu me baleti ira na noqu kawa me ra raica ka vakamuria. Au rawa ni tara cake e dua na itukutukuvolai, e dua na ivakarau tudei ni bula dodonu, ka yavutaki mai na veivakavuvuli au vulica mai na ivolatabu.
Na Vunau kei na Veiyalayalati 93:39–40 e vakavulica: “A sa lako mai na tevoro ka kovea tani na rarama kei na dina mai vei ira na luve ni tamata, ena vuku ni nodra talaidredre kei na nodra ivakavuvuli na nodra qase.
“Ia au sa vakaroti kemudou mo dou vakavulici ira na luvemudou me ra kila na rarama kei na dina.”
Mai na kena wiliki na ivolatabu, e rawa meu vakadeitaka niu na kila na “rarama kei na dina” ni na vakalougatataki au kei na noqu matavuvale. Me vaka niu kila na ka me caka, e rawa niu cakacakataka ka kauta mai na noqu cakacaka—noqu “ivakarau”—me rau salavata kei na ka au kila. Na noqu ivakaraitaki ena sega ni kauti ira vakatani na luvequ ia ena liutaki ira ga ki na ivolatabu kei na dina e kunei kina.
Au taleitaka na sere ni Lalai ni vakavulica:
Vakasaqara, vakananuma, ka masulaka
Na veika e dodonu meu cakava.
Ena veidusimaki na Yalotabu, ka titobu, e loma,
Au na kila ni dina na ivolatabu.1
Au raica kevaka au masu e sega ni baleta walega me dua kina na ivakadinadina ni dina na ivolatabu ia me tiko talega vata kei au na Yalotabu ena noqu wilika, e vakaceceretaka na noqu qaqarauni ka sa qai matata vakalevu cake sara na veika au raica. Sa rawa meu raica na vanua au tiko kina ena noqu bula kei na vanua e vinakata na Tamaqu Vakalomalagi meu tiko kina. Sa rawa meu kila na ivakavuvuli ni dina, kei na kena rawa meu cakava vakacava na veisau e gadrevi ena noqu bula. Au rawa ni vakadeitaka na noqu vakila ni Turaga ena vukei au me veivuke ka vakaukauwataki au meu rawata na itavi. Ekeri e sa na yaco kina me volai ena noqu bula na ivolatabu.
Ni da wilika na ivolatabu eda sa rogoca tiko na domo ni iVakabula. E sega ni yali mai na noda bula o Koya. E sa vakatikori bulabula ena veitiki ni veivola tabu oqo. E sa kerei keda na noda parofita me da toro voleka kivua na iVakabula mai na noda wilika na iVola i Momani.
Era sa na qai vakacava na luveda? Era vakalougatataki vakacava na gone era yavutaka na nodra bula na itubutubu ena ivakavuvuli ni ivolatabu! E sega ni dua tale na ka ka rawa me da cakava me baleti ira na noda matavuvale me bibi cake mai na nodra vakaukauwataki ena ivolatabu. Kemuni na itubutubu, ni kacivi ira vata mai na nomuni matavuvale mo ni wilika vata na ivolatabu, ka cakacakataki me rawa ni vakayacori ena dua na gauna ena kena sa rui dau osooso na nomuni matavuvale. Kemuni ra gone, ni lako mai vakatotolo ka marautaka na nomuni kacivi mo ni mai vakaitavi ena vuli ivolatabu.
E sureti keda o Peresitedi Gordon B. Hinckley, ia e solia talega vei keda na yalayala kevaka eda digitaka me da ciqoma. E yalataka “e dua na kena ikuri ni vakarau ni Yalo ni Turaga, e dua na kena iwali e veivakaukauwataki na lako ena talairawarawa, kei na dua na ivakadinadina kaukauwa ni bula dina tiko na Luve ni Kalou.”2
E dua vei iratou na luvequ goneyalewa, ka sa tiko oqo ena dua na vanua veivakurabuitaki ena nona bula ena veivakalougatataki cecere duadua sa ikoya na nona bolebole cecere duadua (e tolu tiko na luvena lalai), e kaya vei au: “Nau, au sa cakava tiko. Au sa wilika tiko na iVola i Momani. Kau sa taura matua tiko na yalayala veivakurabuitaki o ya. Sa ikoya dina sara ga na ka au gadreva ena noqu bula ena gauna oqo.”
Na veivakalougatataki oqo sa ikoya na ka o gadreva ena nomu bula? Era noda ni da taura. Me vakataki keda yadua, me da yalataka me da muria na parofita. Me vaka na matavuvale, me da ciqoma na noda veivakalougatataki. Keimami lomani kemuni Peresitedi Hinckley, keimami sa rogoca na domomuni, ka keimami na muri kemuni.
E rawa meu wasea na noqu ivakadinadina niu kila ni bula tiko na Tamada Vakalomalagi ka lomani keda. Au kila ni o Jisu Karisito na noda iVakabula. Au kila ni ra dina na veivolanikalou. Era vosa ni Kalou. Au kila ni noda parofita nikua o Gordon B. Hinckley. Au kila ni kevaka eda muri koya, eda na ciqoma na veivakalougatataki cecere mai vua na Tamada mai Lomalagi. Au vakavinavinakataka na ivakadinadina oqo. Ena yaca i Jisu Karisito, emeni.