Na iVola i Momani, na iYaya ni Kena Vakasoqoni Vata ko Isireli sa Veiseyaki Tu
Sa solia vei keda na iVola i Momani ko Jisu Karisito me iyaya ni kena vakasoqoni vata ko Isireli.
Ena tolusagavulu kaono na yabaki sa oti au a veiqaravi kina vakadaukaulotu ena Ceva-i-cake kei Mexico. Ena gauna o ya e se bera kina ni dua na iteki, ena koro levu duadua ena tabana ni kaulotu o ya e rua walega na tabana e tiko kina. E lailai sara na gauna vinaka eda rawa ni vuli kina ka levu cake sara na dravudravua. Era lako kece mai Amerika na daukaulotu, ka vakavo beka ga e dua se rua.
Au nanumi ira na lewe ni Tabana o Nealtican. Na veivale kece ena koro oqo era caka mai na vatuqele, vakavo ga na valenilotu ni Katolika kei na YDE (LDS). Au nanuma lesu na noqu tucake tu ena nona vale vatuqele na peresitedi ni tabana. E kena buturara na qele, e sega ni vakailoilo na katubaleka, ka lili tu me isogo ni katuba e dua na isulu. E sega ni dua na iyaya ni lomanivale. Eratou sega ni vakaivava na nona matavuvale.
Ia eratou tamata mamarau. E tukuna vei au o koya ni ratou volitaka kece na veika eratou taukena me voli kina na tikite ni basi ki na valetabu e Mesa, na vanua eratou a vauci kina me baleta na gauna oqo kei na veigauna tawamudu. E vuqa na lewe ni tabana era a vakayacora talega vakakina.
Ena dua na vula sa oti au a lesu tale ki Mexico meu laki veiqaravi ena Mataveiliutaki ni iWasewase ena Vualiku kei Mexico. Na Mexico ni gauna oqo sa duatani sara vakalevu mai na kena ena 36 na yabaki sa oti. Sa itikotiko liu ni dua na iteki kaukauwa ko Nealtican. Sa 200 na iteki e Mexico ka dua na milioni na lewe ni Lotu. E vuqa na veiliutaki ni tabanalevu kei na iteki era sa vuli vinaka ka ra tu vinaka tu ena bula vakailavo. E udolu na cauravou kei na goneyalewa ni Mexico era sa daukaulotu tudei.
E dina sara sa vakataucokotaki tiko na raivotu e a raica ko Liai ka vakadewataka ko Nifai. “Ia era na qai kila ena siga ko ya na vo ni nodatou kawa, ni ra sa mataqali i Isireli, ka ra sa tamata ni veiyalayalati ni Turaga; ia era na qai kila na kedra itukutuku na nodra qase, kei na itukutuku vinaka ni nodra iVakabula ka a vakatavulica vei ira na nodra qase ko koya; ia era na kila na nodra iVakabula.”1
E dina sara o ira na kai Mexico kei na veivanua e Amerika Vaka-Latina era vu mai vei ira na parofita. Na iVola i Momani e nodra ivotavota. A vunau vei ira na tubudra ko Jisu Karisito.
Ni sa Tucaketale mai na mate, a siro sobu mai lomalagi ko Jisu Karisito, ka vakaisulu ena icurucuru balavu vulavula ka mai tucake ena kedra maliwa na tubudra ena vanua oqo ko Amerika. E a dodoka yani na Ligana ka kaya, “Raica koi au ko Jisu Karisito ka ra a tukuna na parofita ni na lako mai ki vuravura.
… Ia koi au na rarama kei na vu ni bula kei vuravura”2
“Ia mo dou dulaka cake na nomudou rarama me cilavi vuravura. Raica sai au ga na rarama mo dou dulaka cake.”3
Ki na Lotu ena gauna oqo, e a taleva tale na iVakabula na ivakasala oqori ena Nona kaya, “Au sa kaya vakaidina vei kemudou kecega: Dou tucake ka rarama mai; ia me cila yani na nomudou rarama me ivakaraitaki vei ira na veimatanitu.”4 Ko Jisu Karisito sai koya na rarama eda na dulaka cake me ivakaraitaki ki na veimatanitu kecega. Eda sa dulaka talega na ikuri ni rarama ka vakatakilai ena iVola i Momani: E Dua Tale na iVakadinadina kei Jisu Karisito.
Sa bolei keda o Peresitedi Hinckley me da wilika ka wilika tale na iVola i Momani ni bera ni cava na yabaki, me ivakananumi ni ika 200 ni yabaki ni nona sucu o Josefa Simici na parofita. Ni da vakayacora vakakina, eda sa na rokovi Josefa Simici kina, o koya ka a vakadewataka na iVola i Momani “ena isolisoli kei na kaukauwa ni Kalou.”5
Ena nona rairai vei Josefa o Moronai na parofita ni gauna makawa, e kaya kina vua “ni sa digitaki au na Kalou meu qarava e dua na cakacaka; a kaya ni na rogo na yacaqu vei ira na veimatanitu, veimataqali kei na duivosavosa; eso era na taleitaka, ka so era na vosacataka.”6
Sa vakayacori oti na parofisai oqori. E kilai ka rokovi tu e vuravura raraba na yaca i Josefa Simici, ena koro yawa sara mada ga ko Nealtican, Mexico.
Ena dua na gauna walega oqo, e talanotaka kina vei au e dua na lewenilotu e Monterrey, Mexico na sala a veisautaka kina na nona bula na iVola i Momani. Ni se cauravou, sa dau taleitaki ira voli na daukaulotu ni YDE o Jesús Santos ni ra dau taubaletaka sobu mai na gaunisala kuvu. E dau vinakata me veitalanoa vata kei ira me baleta na nodra lotu, ia a qai tukuna vua e dua na nona itokani me wawa ni ra na qai lako yani vua.
Ena vuqa na gauna ena dau lako yani kina ki valenilotu ka laki vakairoiro voli ga ena matamata ni ra qito tiko na daukaulotu kei ira na itabagone ena Muavata. E taucoko na kena irairai ka sa dau vinakata voli me okati kina. E dau vakataqara na kumina ena bai, ka vakanuinui ni ra na kauwaitaki koya mai ka sureti koya me laki qito yani vata kei ira. Ia e a sega ni bau yaco.
Ni talanoataka tiko vei au na nona italanoa ko Jesús, e qai kaya, “Sa ka ni rarawa dina. Au se cauravou ena gauna ko ya, ke a rawa beka niu daukaulotu tudei.”
E a toki yani ki Monterrey, Mexico. Ena Ciwa na yabaki ki muri e a gade tiko vua e dua na nona itokani ena mua ni koro kadua ena gauna erau tukituki yani kina na daukaulotu. E a vinakata na nona itokani me vakatalai rau tani. E a vakamasuti nona itokani o Jesús me vakatarai rau na daukaulotu me ratou veitalanoa ena rua walega na miniti. E a vakadonuya na nona itokani.
Erau a tukuna na daukaulotu na iVola i Momani, na nodratou lako mai Jerusalemi ki Amerika na matavuvale nei Liai, kei na nona sikovi ira na kawa i Liai e Amerika ko Jisu Karisito ka sa vakaturi cake tale mai na mate.
E a vinakata ko Jesús me kila eso tale na ka. E a vakauqeti koya vakalevu na iyaloyalo ka vakatakarakarataki kina na nona rairai na Karisito e Amerika. E a solia vei ira na daukaulotu na nona itikotiko. E a wawa me vica vata na vula, era sega sara ga ni bau tarai koya yani.
E a sivi tale e tolu na yabaki. Era a sureta na nona matavuvale eso na nona itokani ki na dua na lotu vakamatavuvale. Era a solia vua e dua na ilavelave ni iVola i Momani.”
Ni tekivu wilika ga, sa kila sara ni dina na iVola i Momani. Ni sa oti e tinikarua na yabaki mai na imatai ni gauna a kila kina na Lotu, erau sa qai papitaiso kei na watina. Sa vakamaumautaki tu e vuqa na yabaki. Kevaka walega me ra a vosa vua na daukaulotu, kevaka walega me ra a kauwaitaka na itabagone ena Muavata e dua na cauravou galili ni iro tu yani mai matamata, kevaka walega me rau a laki sikovi koya ena nona vale na daukaulotu mai Monterrey, ke a duatani beka na nona bula ena 12 na yabaki oqori. Ena vakavinavinaka, era a sureti koya na wekana era tiko veitikivi ki na dua na lotu vakamatavuvale ka wasea vata kei koya na ivola ka koto kina na kaukauwa levu ni veisau, na iVola i Momani.
Nikua sa veiqaravi tiko vaka-Peresitedi ni Valetabu e Monterrey Mexico ko Jesús Santos.
Sa solia vei keda na iVola i Momani ko Jisu Karisito me iyaya ni kena vakasoqoni vata ko Isireli. Ena gauna a rairai kina e Amerika, e qai kaya vei ira na tamata, “Ia ena gauna era sa vakabauta kina na itukutuku oqo ko ira na nomudou kawa, sa kena ivakatakilakila ni sa vakayacora tiko ko Tamaqu na veiyalayalati a vakayacora vei ira na nona tamata, ko ira na Isireli.7
Na iVola i Momani sa kena ivakadinadina vei ira na tamata e Amerika vaka-Latina kei na veimatanitu kecega. Na kena basika mai ena gauna oqo sa ivakadinadina ni sa tekivutaka tale na Kalou na kena vakasoqoni vata ko Isireli.
Ena mata ni noqu vakanananu, au se rawa tikoga ni raici Jesús Santos me vaka e dua na cauravou yabaki 18 sakuca ka iro tu yani ena matamata ni valenilotu. E rawa beka ni o raici koya? E rawa beka ni da sureti koya kei ira na tani vakataki koya me ra mai duavata kei keda? O cei o kila ni na rawa ni vakayacora na nomu veisureti me wilika na iVola i Momani? E rawa beka ni o sureti koya? Kua ni wawa.
Au vakadinadinataka ni sa paro- fita ni Vakalesui mai o Josefa Simici. Na iVola i Momani: E Dua Tale na iVakadinadina kei Jisu Karisito, sa sala era na vakasoqoni vata kina na tamata mai na veimatanitu kecega ki na Lotu i Jisu Karisito ni Yalododonu Edaidai. Na Lotu e yavutaki vei ira na iapositolo kei na parofita, me vaka ena veigauna makawa. O Peresitedi Gordon B. Hinckley sai koya na ilumuti ni Turaga e vuravura ena gauna oqo. O Jisu Karisito na noda iVakabula ka noda Dauveivueti. Sai koya oqo na Nona Lotu kei na Nona Matanitu. Sai Koya na noda Tui ko Imanueli Au vakadinadinataka vakakina, ena yaca i Jisu Karisito, emeni.