Kila Na Loma Ni Turaga Me Baleti Iko
Me vakalougataki kemuni yadudua na Turaga ena nomuni sasaga me baleti kemuni ka mo ni vakamalumalutaki kemuni Vua.
Na nona yaco e dua me iyaya ni cakacaka ena liga ni Kalou sa dua na gauna vinaka ka itavi tabu. E vei ga eda bula kina, se vakacava na kena ituvaki, se da vakawati se sega, se cava ga na noda yabaki ni bula, ena gadrevi keda vakayadua kece sara na Kalou meda na qarava vakadodonu na noda itavi ena tarai cake tiko ni Nona matanitu ena iotioti ni itabagauna oqo. Sa noqu ivakadinadina ni na rawa me da kila na ka ena vinakata vei keda na Turaga—kei na noda ciqoma na “veivakalougatataki ni sa talai kedatou na Kalou me vakayacori kina na cakacaka levu oqo.”1 Sa noqu gagadre nikua meu wasea e dua na iwase ni noqu sasaga meu mai kila se rawa vakacava meu iyaya vaka ko ya.
Au na tekivu ena vanua e mai cava toka kina na noqu ilakolako—ena dina totoka ka a vakavuvulitaka o Elder Neal A. Maxwell: “Na nona sa na rawa ni vakarorogo e dua na tamata, sa ikoya wale sara ga na ka eda vakatoka me noda, ka cabora ena icabocabo ni isoro ni Kalou. Mai na vica vata tale na ka eda na ‘solia,’ … sai ira na veika kece e a sa solia rawa tu mai o Koya se solia vakadinau. Ia, kevaka me daru sa na vakarorogo sara ga, ko iko kei au, me daru laiva na lomadaru me solegi ena loma ni Kalou, eda sa na qai solia tiko Vua e dua na ka! O ya wale sara ga na ka e noda ka rawa ni da na solia!”2
Au vakadinadinataka, kemuni na taciqu, ni kevaka me da na wili vakaiyaya ni cakacaka ena liga ni Kalou, me rawa sara ni da vakalougatataki ena “bula oqo” ni da sa “cakava tiko na noda itavi,”3 sa dodonu, me vaka e tukuna o Elder Maxwell, “me da sa soli keda taucoko vua na Turaga.”4
Na vakasavasavataki ni noqu bula ka vakavuna na noqu vakadinadinataka na ivakavuvuli oqo e a tekivu vakacalaka niu sa yabaki tolusagavulu vakacaca ena gauna au ciqoma kina na noqu veivakalougatataki vaka-peteriaki. Au a lolovaka ka masulaka ena vakavakarau ka vakananuma e yaloqu, “Na cava e vinakata vei au na Turaga meu cakava?” Niu sa sinai tu ena yalomamarau, keitou a lako vata yani ki na itikotiko ni turaga peteriaki koi au kei iratou na luvei keirau e lewe va kei tamadratou. E vakabibitaka ena veivakalougatataki e a solia—ka taleva vakavica vata na veivakalotutaki.
Au sevaka na tukuna vakadodonu, ia au a yaloca sara ga ka leqataka. Ena gauna o ya au se bera sara tu ga ni bau wilika na iVola i Momani mai na kena itekivu ki na kena itinitini. E sega tale ni dua na kena taro, au se bera sara tu ga ni bau vakarau meu kaulotu. Au sa qai mai biuta toka na noqu veivakalougatataki vaka-peteriaki ena dua na drowa. Au sa qai tekivu meu wilika ka vulica na ivolanikalou ena noqu sasaga meu tuberi iratou cake na noqu matavuvale.
Ni toso na veiyabaki, keirau sasaga voli ga kei watiqu me ra vakarautaki na luvei keirau ki na kaulotu. Ena neirau vakauti iratou na luvei keirau tagane ki na veivanua ni kaulotu, au sa vakabauta sara tu ga niu sa vakavatukanataka na noqu itavi vakadaukaulotu.
Ni oti sa qai kacivi o watiqu me laki peresitedi ni kaulotu ki na dua na vanua ka se bera ni vakatorocaketaki ka vanua tu leqaleqa, ena maliwa ni veivanua era vakatorocaketaki tiko, ka rauta ni 10,000 na maile mai na neitou itikotiko, ka vica vata na yabaki mai na itovo kei na ivakarau kau sa matau kina. Ia na gauna ga e yaco mai kina na noqu kaci ni laki kaulotu tudei, au vakila sara ga niu sa vakataki Alama tu kei iratou na luvei Mosaia—niu sa kacivi meu sa, “wili [vakaiyaya ni cakacaka] ena liga ni Kalou meu qarava kina na cakacaka levu oqo”5 Au vakila talega eso na ka kau sega ni vakadeitaka rawa na kena yacovi ira talega—na taqaya vakaitamera.
E vica vata na siga na noqu kauta tale tiko mai na noqu veivakalougatataki vaka-peteriaki, ka mai vakawilika toka yani, kau saga meu kila vakavinaka sara. E sega ga ni veisautaka na ivakarau ni noqu kauwai ena noqu mai kila niu na sotava na ka e a tukuna e dua na peteriaki ena vicasagavulu na yabaki sa oti. Sa na rawa li meu biuti ira tu mai na luvequ vakawati kei ira era se bera ni vakawati vakakina oi rau na noqu itubutubu? Au na kila beka li na ka e dodonu meu na cakava ka tukuna? Na cava keirau na laki kania kei watiqu? Au na taqomaki rawa li ena vanua sega ni tudei na kena bula vakapolitiki ka vakarerevaki? Au vakila sara ga niu sa na sega dina ga ni rawata.
Ena noqu sasagataka na vakacegu, au vakaruataka na noqu dau lako ki na valetabu. Au vakasamataka vakatitobu sara ena so na sala kau se bera vakadua ni cakava na ibalebale ni noqu veiyalayalati. Vei au, niu sa mai tu ena sala-veilatai ni noqu bula oqo, sa yaco me itakele ka yavu sara ga ni noqu itosotoso na noqu veiyalayalati kei na ivua yadua ka vakalou oqo. Ni sa tukuni ka qaravi oti na veika kece, e sega ni a nona itavi e dua tani tale oqo. E a noqu veikacivi ni kaulotu, kau a tu vakarau meu veiqaravi.
E a solia na veivakalougatataki oqo o tamai Josefa Simici ni a tabaka tiko na ului luvena: “E a kacivi iko ena yacamu na Kalou mai lomalagi. Ko sa kacivi … ki na cakacaka cecere ni Turaga, mo qarava e dua na itavi ena itabatamata oqo ka se bera ni dua tale … me cakava me vakataki iko, na veika kece me vaka na loma ni Turaga.”6 Na Parofita o Josefa e a kacivi ki na iwase duatani ni cakacaka bibi oqo, “na cakacaka cecere ni Turaga,” mai na yalo luvuci kei na tawa vakarau tu vakaidina me vaka niu vakila ni koi au talega, au sa kacivi talega vakakina ki na noqu iwasewase ni cakacaka. E a vakayaloqaqataki au ka vukei au na rai titobu oqo.
Ena noqu dau masu vakawasoma au dau kerea tu ga, “I Tamaqu, meu na qarava vakacava na veika ko ni sa kacivi au kina meu qarava?” Ena dua na mataka ni vakarau me keirau gole ki na kaulotu, erau kauta mai e dua na iloloma e rua na itokani—e dua na ivola ni sere lailai meu kauta tiko. E muri, ena siga vata ga o ya, sa qai saumi mai ena ivola ni sere o ya e dua na ka au a dau masulaka tu mai ena vica na vula sa oti. Niu a dabe ka vakadigagalu toka ena dua na vanua vakadirorogo, e caudre voli ena noqu vakanananu na qaqa ni sere oqo:
Dou kua ni rere; se dou taqaya:
Na noda Kalou me vukei kedatou.
Tou sa na tuberi ka tokoni tu,
E ligai matau, e ligai imatau.
Ni noda Kalou.7
Niu sa vakila mai ena noqu saga vakagumatua vakataki au, ni se qai kena itekitekivu ga oqo, ni na tikoga kei au ka vukei au Turaga. Se levu sara na ka meu na vulica me baleta na noqu rawa ni wili vakaiyaya ni cakacaka ena liga ni Kalou.
Yawa sara mai vale ena dua na vanua duatani, keirau veiqaravi voli kina kei watiqu, ena vakabauta ena veikalawa kecega me vakataki ira na ivuvu (painia). Levu ga na gauna keirau tu ga vakai keirau—ka sasagataki yani na bula ena maliwa ni dua na ivakarau ni bula e sega ni matata vei keirau— vakamacalataki ena vica vata na mataqali vosa ka keirau sega sara ga ni kila. E vakamacalataka na veika keirau vakila na vosa nei Sarah Cleveland, e dua vei ira na iliuliu ni iSoqosoqo ni Veivukei mai Nauvoo e liu. “Keirau a curu mai ena cakacaka oqo ena yaca ni Turaga. Me da sa toso yani ki liu ena yalodoudou.”8
Na matai ni noqu lesoni ni vulica na ka me caka me da na wili kina vakaiyaya ni cakacaka ena liga ni Kalou, sa ikoya na wilika na ivolanikalou, lolo, masumasu, lako ki na valetabu ka talairawarawa ki na veiyalayalati au a sa vakayacora mai Valetabu. Na ikarua ni lesoni sa ikoya ni gadrevi me da, “toso ki liu ena yalodoudou,” sa dodonu meu vakararavi sara ga vakatabakidua vua na Turaga ka vakasaqara na veivakatakila me baleti au ga. Meu ciqoma na ivakatakila o ya, sa dodonu meu bula dodonu me rawa kina ni tikoga kei au na Yalo Tabu.
Na iotioti ni noqu lesoni sa ikoya sara ga na ka e vakamacalataka o Elder Maxwell. Ena veika lalai sara mada ga ni veisiga yadua, sa vakararavitaka sara ga vua Turaga na lomaqu, ka niu gadreva vakaidina na Nona veivuke kei na veituberi. E veisautaka sara ga—ki na veika cecere na ivakarau ni neirau veiwekani kei na Tamada Vakalomalagi na noqu vakayacora o ya—ka tomana tikoga na noqu vakalougatataki ka vakakina na noqu matavuvale.
Na noqu ilakolako e duidui sara mai na nomuni. O kemuni yadua e rawa ni ko ni vakavulica vei au e levu sara na ka mai na ka o ni a sotava ena nomuni vakarorogo vakayadua vua na Turaga kei na nomuni sasaga mo ni kila na loma ni Turaga baleti kemuni. E rawa ni da marautaka vata na kosipeli vakalesui mai nei Jisu Karisito ka vakavinavinakataka tiko na veivakalougatataki ni kena sa rawa na ivakadinadina me baleta na iVakabula kei na Nona Veisorovaki me baleti keda yadua. Oqo na ka au kila, … na noda sasaga yadudua me da wili, vakaiyaya ni cakacaka ena liga ni Kalou e sega ni ka rawarawa ka sa bau vakaogai keda sara ga vakayalo—vakavutuniyautaka yadudua na noda ilakolako vakatamata e vuravura ena lagilagi.
Kemuni na taciqu, me vakalougatataki kemuni yadudua na Turaga ena nomuni sasaga mo ni kila na Lomana me baleti kemuni ka mo ni vakamalumalumutaki kemuni Vua. Au vakadinadinataka ni noda dui vakatulewa yadua e lomada, “sa ikoya sara ga, na ka eda taukena, ka sa noda vakatabakidua talega na kena soli.”9 Ena yaca i Jisu Karisito, emeni.