Vosa ni Veikidavaki
Na tubu ni Lotu mai na kena itekivu me yacova mai na kena ituvaki ena gauna oqo e sa vakasakiti, ia eda se karia wale sara tikoga yani na delana.
Kemuni na taciqu kei na ganequ, au tomana na noqu kidavaki kemuni ki na koniferedi cecere oqo ni Lotu e vuravura. Na loma ni Vale ni Koniferedi e Salt Lake City e sa sinai vutucoqa tu, ka ra sa sinai tale tu ga vakakina na veivale ni soqoni ena vanua oqo. Keimami vosa tale tikoga yani kivei kemuni ena vuqa na veivanua kei na draki duidui. Keimami kidavaki kemuni tiko yani vakayadudua kece sara. Keimami lomani kemuni me vaka e dua na taci keimami ka ganei keimami.
Au a lako tu ena dua na kaulotu ki na Yatuyanuyanu vaka-Peritania me sivia na 70 na yabaki sa oti. Era se taucoko tu ga na tiki ni Matanitu o Peritania. E sa bau dua na matavuvale vakapolitiki rabailevu duadua na kena tetevi delai vurvura yani na matanitu oqo. E dau kainaki tu ni sega ni dromu rawa na siga ena matanitu o Peritania. Na drotini ni Matanitu o Peritania e cecebuya wavokiti vuravura tu.
E vuqa sara na veika vivinaka era lako mai ena veiyasa ni matanitu o ya. Ia e sa vakadomobula talega na levu ni vakararawataki. Na vakararawataki oqo era yaco mai ni oti na veivaluvaluti, veivakasaurarataki, ivalu, kei na veisaqasaqa. Na vovo ni yagodra na sotia mate ni Peritania era a bulu ena ibulubulu wavokita na veiyasa ivuravura.
Era sa yali kece ena gauna oqo. E a vola o Rudyard Kipling na dauvolaivola ena kena vakadewataki yani mai na nona “Recessional”:
Kaciva vakayawa, noda sotia era yali;
Ena nuku kei na buca e muloni na bukawaqa.
Raica! na isakisaki makawa
Vei rau o Ninive kei Taya.
(“Kalou na Tama, sa Kilai mai Liu,” Serenilotu, naba 80)
Sa tiko tale e dua na matanitu ena gauna oqo. Na matanitu i Karisito na Turaga. Sai koya na matanitu ni kosipeli vakalesui mai. Sai koya na matanitu ni Kalou. E sega ni dau dromu na siga ena matanitu oqo. E a sega ni yaco mai ena kaba vakaivalu, veisaqasaqa, se na veivaluvaluti. E a yaco mai ena veivakayarayarataki malumu, ena ivakadinadina, ena veivakavulici, e dua eke ka dua mai kea.
Me vaka o ni sa kila kece tiko, ena yabaki oqo eda vakananuma tiko kina na ika 200 ni nona siganisucu na Parofita o Josefa Simici, kei na ika 175 ni ivakananumi ni kena tauyavu na Lotu.
Na tubu ni Lotu mai na kena itekivu me yacova mai na kena ituvaki ena gauna oqo e sa vakasakiti, ia eda se karia wale sara tikoga yani na delana.
E dua na ivakaraitaki ni tubu oqo sai koya na tara valetabu. Ena gauna oqo sa 122 e vakayagataki tiko ena vuqa na veiyasai vuravura. Era sa vakalougatataki vakalevu na noda ena vuku ni ka oqo. Na tamata yadua e kilikili me dua na nona ivolatara ni valetabu e sa kilikili talega vakakina me dua na Yalododonu Edaidai yalodina. Me dua o koya ena dau sauma vakadodonu na nona ikatini, me dau rokova na Vosa ni Vuku, me vinaka na nona veimaliwai ena nona matavuvale, ka na yaco me lewenivanua vinaka ena nona itikotiko. Na veiqaravi ena valetabu e sa vua ni noda veituberi kei na itavi qaravi.
Ena yabaki sa oti a qaravi ena noda veivaletabu e 32 na milioni na cakacaka tabu vakalotu. E levu duadua oqo mai na kena e qaravi ena veiyabaki kece sa oti yani. Ena gauna oqo eso na noda veivaletabu sa sinai ka sivia tale. Sa dodonu me na sotavi na nodra gagadre na noda Yalododonu yalodina.
Keitou a sa kacivaka mada e liu e dua na valetabu vou ena tokalauceva kei Salt Lake Valley. E tiko tale e rua na vanua totoka ena ra kei na cevaira ni qakilo mai na nodra yalololoma na dauveivakatorocaketaki ni veitikotiko vakaoqo. Na kena me na tara taumada e tiko ena vanua e vakatorocaketaki ka vakatokai na Daybreak, ka sa kacivaki raraba yani ena mataka nikua. O ni na rairai taroga beka se cava na vuna keitou taleitaki Utah kina vakalevu. E baleta ga na itagede ni itavi qaravi e gadrevi kina. Ia, eda sa toso tale tikoga ki liu ena valetabu vovou mai Rexburg kei Twin Falls, Idaho; e Sacramento, California; e Helsinki, Finland; kei Panama City, Panama; e Curitiba, Brazil; kei na dua tale au se tei kua mada ni cavuta ena gauna oqo baleta ni se bera ni kacivaki ia e sa voleka sara ena dua na gauna wale tikoga oqo. Era se tiko tale eso e se qai vakasamataki tiko. Ia vei ira kece au sa cavuta, sa tu na kena qele, ka sa yacova tu na veivakatagedegede eso na tara vale.
Eda sa vakavinavinaka ena vuku ni nodra sorovaki ira na noda ka sa rawa kina na veika kece oqo.
E dua na tikina e veivakaleqai tiko ena noda veiqaravi ni valetabu sai koya ena kena sa levu cake tiko na valetabu era tu ena veiyasai vuravura sa yaco tiko na kena tokaruataki na qaravi ni cakacaka tabu ena vukudra na mate. Ni ra dau cakacaka vata ena dua na matavuvale na tamata mai na veimatanitu ka sa dau yaco kina me ra rawata mai e dua vata ga na yaca. Era sega ni kila ni o ira mai na veivanua tale eso era cakava tiko na ka vata ga o ya. O koya keitou a sa mai qarava tiko kina ena dua na gauna sa oti e dua na cakacaka dredre. Me levei na tokaruataki ni veicakacaka vakaoqo, e koto na kena iwali ena kila ka vakomupiuta vereverea. Sa laurai tiko na ivakatakilakila ni na rawa, kevaka ena vakakina, sa na dua na ka vakasakiti na kena sa na vakayagataki e vuravura raraba.
Ena gauna oqo, me vaka ko ni sa kila tiko e lewe levu, ni da sa vakayacora oti na koniferedi ni iteki eso ena kena vakayagataki na kakaburaki ena setilaiti. Sa tubu me vakaitamera sara na lotu ka sa sega kina ni rawa vei ira na Mataveiliutaki Taumada, na Kuoramu ni Le Tinikarua kei ira na Vakaitutu Raraba tale eso me ra sikova na veiiteki yadua, vakavo ena gauna e tauyavutaki kina se wase e dua. Ena kakaburaki ena setilaiti sa mai rawa kina vei keimami me keimami vosa yani e Salt Lake City ka rogoci ka laurai ena veivalenilotu liu ni iteki kei na veivanua wavokiti vuravura tale eso.
Na sala vata oqori o ni vakaitavi tiko mai kina e vuqa vei kemuni ena koniferedi nikua. Eda sa duavata ni da dua na matavuvale vakaitamera ena sere kei na masu kei na nodra veidusimaki kei na ivakadinadina na noda Veitacini iliuliu.
Vinaka vakalevu ena veika kece o ni sa cakava tiko, kemuni na Yalododonu Edaidai vakasakiti. Vinaka vakalevu ena nodra sasaga uasivi na Vitusagavulu ni iWasewase, na matabisopi kei na mataveiliutaki ni iteki, iliuliu ni veimataisoqosoqo, na mataveiliutaki ni valetabu kei na kaulotu, kei na vuqa, lewe vuqa, ka vakavuqa tale era dau solia ena yalodina na nodra gauna, nodra igu, kei na nodra iyau, me ra tosoya ki liu na matanitu ni Kalou e vuravura.
Sa noqu masu, kemuni na taciqu kei na ganequ, me na nomuni na veivakalougatataki digitaki ni lomalagi, ena yaca tabu i Jisu Karisito, emeni.