O le Meaalofa e Le Matalatalaina
Afai [tatou] te tatalaina o [tatou] loto i le aafiaga faamamaina a lenei meaalofa e le matalatalaina a le Agaga Paia, o le a oo mai i le malamalama se vaaiga fou faaleagaga.
O se avanoa le faatasi ai ma outou i lenei aso. Ou te fiafia e faalogo atu i le afioga a le Alii o fofogaina e o tatou taitai a o taialaina i latou e le meaalofa paia a le Agaga Paia. O le aso nei, ou te fia tautala ai i ni nai upu e uiga i lenei meaalofa taua.
Pe ua e mafaufau ea i le aofaiga o le malamalama ma le malosiaga e gaosia e lo tatou la? O le aofaiga e toetoe lava a le mafaitaulia. Ae peitai o le vevela ma le malamalama lea tatou te maua e oo mai o se meaalofa maua fua mai le Atua. O se isi lenei faamaoniga o le agalelei o lo tatou Tama Faalelagi.1
O le malamalama mai le la e ati mai i le vanimonimo, ma lilofia ai lo tatou paneta a o siomia ai le la, ma tuuina mai ai le mafanafana ma le malamalama. A aunoa ma le la, semanu e le mafai ona i ai se ola i lenei paneta; semanu e faavavau ona le fua mai, e malulu, ma pogisa.
A o tuuina mai e le la le ola ma le malamalama i le lalolagi, o loo faapea foi ona tuuina mai e se malamalama faaleagaga le tausiga i o tatou agaga. Tatou te ta’ua lea o le Malamalama o Keriso. O loo aoaoina i tatou i tusitusiga paia e faapea e na te “faamalamalamaina tagata uma e o mai i le lalolagi.”2 O lea, e mafai ai e tagata uma lava ona olioli ai i ona faamanuiaga. O le Malamalama o Keriso o le aafiaga paia lea e faatagaina ai soo se alii, tamaitai, ma soo se tamaitiiti e iloaina le lelei ma le leaga. E uunaiina ai tagata uma e filifili le mea e sao, ia saili i le upumoni e faavavau, ma toe aoaoina ia upumoni lea sa tatou iloaina i lo tatou muai olaga ae ua galo i le olaga faaletino.
O le Malamalama o Keriso e le tatau ona fenumiaia ma le peresona o le Agaga Paia, aua o le Malamalama o Keriso e le o se peresona. O lona aafiaga e muamua ona oo mai a o lei mauaina e se tasi le Agaga Paia ma saunia ai se tasi e maua le Agaga Paia. O le Malamalama o Keriso o le a taitaiina atu ai le agaga faamaoni ina ia “gauai i le leo o le Agaga”3 ina ia sailia ai le talalelei moni ma le Ekalesia moni ma o le auala lena e maua ai le Agaga Paia.
O le Agaga Paia o se peresona o le Agaga, o se sui e tulaga ese ma mavaevae o le Aigaatua.4 O ia o se molimau po o se na te tautino mai le mana o le Atua, o le paia o Keriso, ma le moni o le talalelei ua toefuatai mai. O le toatele o tagata i le talafaasolopito i atunuu uma ua latou saili ma le maelega ina ia fesootai ma le lagi ma maua le malamalama o le upumoni o le talalelei. Ua latou lagonaina le aafiaga o le Agaga Paia o loo faamautuina mai le moni o le talalelei.
Na faamatalaina e le Perofeta o Iosefa Samita: “E i ai se eseesega o le Agaga Paia ma le meaalofa o le Agaga Paia. Na mauaina e Konelio le Agaga Paia a o lei papatisoina o ia, o le mana lea o le Atua na faailoa atu ia te ia le moni o le talalelei, ae sa lei mafai ona ia mauaina le meaalofa o le Agaga Paia seia uma ona papatiso o ia. Ana ia le aveina i ona luga lenei faailoga po o lenei sauniga, semanu o le a alu ese le Agaga Paia lea na faailoa atu ia te ia le upumoni a le Atua.”5
O le meaalofa o le Agaga Paia, le aia tatau lea e maua ai le Agaga Paia e avea ma se soa tumau, e mauaina lea i le na o tulaga lava o le faatuatua ia Keriso, salamo, papatiso i le faatofuina, ma le faaee atu o lima o auauna faauuina ma tuuina atu le Perisitua Mekisateko. O le meaalofa sili lea ona taua lea e na o tagata tauaogaina lava o le Ekalesia a le Alii o loo mauaina.
I le Mataupu Faavae ma Feagaiga, na ta’ua ai e le Alii le meaalofa a le Agaga Paia “o le meaalofa e le matalatalaina.”6 O le punavai o le molimau ma meaalofa faaleagaga. E faamalamalamaina ai le mafaufau, e faatumuina ai o tatou loto i le olioli,7 e aoaoina ai i tatou i mea uma, ma aumaia mea ua galo ia i tatou ina ia manatuaina.8 O le Agaga Paia na te “faaali ia i [tatou] mea uma e tatau ona [tatou] faia.”9
Na faaopoopo mai ia Peresitene James E. Faust e faapea o le “meaalofa a le Agaga Paia o le lagolago sili lea i le filemu i totonu i lo tatou lalolagi femoumouai.”10
Na aoao mai ia Peresitene Gordon B. Hinckley, “E maeu se faamanuiaga o le auai mai pea o se aafiaga a se sui o le Aigaatua.”11 Mafaufau i le uiga o lenei mea, le mafaia ma le aia e maua ai le mafutaga ma se sui o le Aigaatua, o le fesootai atu lea ma le atamai tumau, le malamalama tumau, ma le mana tumau!
E pei lava o meaalofa uma, o lenei meaalofa e tatau ona mauaina ma taliaina ina ia olioli i ai. Ina ua faaee atu lima o e o loo i ai le perisitua i luga o lou ulu ma faamauina oe o se tagata o le Ekalesia, na e faalogo i upu, “Talia le Agaga Paia.” O le uiga o lenei mea e le faapea o le a matuai avea lava le Agaga Paia ma au soa tumau. Ua lapatai mai tusitusiga paia ia i tatou e faapea “e le faavavau ona finau le Agaga o le Atua ma tagata.”12 Ina ua faamauina i tatou, ua tuuina mai ia i tatou le aia i le mafutaga a le Agaga Paia, ae o se aia e tatau ona tatou faaauau pea ona mauaina e ala lea i le usiusitai ma le tauaogaina. E le mafai ona tatou aveina lenei meaalofa ma le le mautinoa.
O le a lapataia i tatou e le Agaga Paia i mea matautia ma o le a musuia i tatou ina ia fesoasoani atu i isi o loo moomia le fesoasoani. Ua fautua mai Peresitene Thomas S. Monson ia i tatou: “Tatou te vaavaai. Tatou te faatali. Tatou te faalogo mo lena leo itiiti. A tautala mai, o alii ma tamaitai popoto, e usitai i ai. E le tatau ona tolopoina uunaiga a le Agaga.”13
Sa ou maua i se tasi taimi se avanoa e asiasi atu ai i se tasi o ana tele lava. A o i ai iina, sa tape e le taiala ia moli mo sina taimi e faataitai ai le tulaga e i ai pe a matuai pogisa atoa. O se aafiaga e maofa ai. Sa ou tuu lo’u lima pe na o se inisi mai o’u mata ma e lei mafai ona ou iloaina. Sa tau faafefe foi i se isi tulaga. Sa ou toe to’a ina ua toe ki ia moli.
Ina ua oo mai le malamalama i le pouliuli ma mafai ona iloa atu mea uma, e faapea foi le oo mai o le Agaga Paia i le pogisa faaleagaga lea o loo siomia ai i tatou ma faigofie ona iloa atu ai mea faaleagaga sa natia i se taimi. Na aoao mai e le Aposetolo o Paulo e faapea “a e le talia e le tagata faaletino o mea a le Agaga o le Atua: aua o mea valea ia ia te ia: na te le mafai foi ona iloa, aua e faamasinoina faaleagaga.”14
Ou te popole ona e i ai nisi tagata o le Ekalesia a le Alii o loo “ola i se auala e taofia ai i tatou” mai le mauaina o mea e tatau ona maua e tusa ai ma le meaalofa o le Agaga Paia.15 O nisi o loo faalavelaveina i mea o le lalolagi lea e taofia ai le aafiaga a le Agaga Paia, e taofia ai i latou mai le iloaina o musumusuga faaleagaga. O se lalolagi pisa ma le pisi lenei o loo tatou ola ai. Ia manatua o lou pisi tele e le faapea ua e maua ai le faaleagaga. Afai tatou te le faaeteete, e mafai e mea o lenei lalolagi ona suitulaga i mea a le Agaga.
O nisi ua matuai gase lava i le faaleagaga ma ua le mafai ona lagonaina le Agaga ona o a latou filifiliga e fai le agasala. O isi ua na o le faamalieina lava i le tulaga faaleagaga o loo i ai e aunoa ma se manao ina ia tulai i luga ina ia sili a’e ma fesootai ma le Atua.
Afai latou te tatalaina o latou loto i le aafiaga faamamaina a lenei meaalofa e le matalatalaina a le Agaga Paia, o le a e oo mai i le malamalama se vaaiga fou faaleagaga. O le a pulatoa atu o latou mata i se vaaiga e faigata ona mafaufau i ai. E mafai ona latou iloa mo i latou lava ia mea a le Agaga lea e silisili atu, matagofie, ma mafai ona faateleina ai le loto, faalauteleina ai le mafaufau, ma faatumuina ai le agaga i le olioli e le mafaamatalaina.
Na saunoa ia Peresitene Polika Iaga i se aafiaga paia ina ua faaali mai le Perofeta na maturoina o Iosefa Samita i se faaaliga vaaia ia Peresitene Iaga, ma autasi ai le Au Paia i se manatu e tasi. O se savali ua sili atu ona moomia e le Au Paia i le taimi nei nai lo se isi taimi muamua: “[Ia mautinoa] ia ta’u atu i le nuu ina … ia taofi le agaga o le Alii,” na saunoa ai Iosefa, “ma o le a ia taitai i latou i le mea tonu. Ia faaeteete ma ‘aua le liliueseina le leo lemu itiiti; o le a ia aoaoina i latou i mea e tatau ona latou faia ma mea e tatau ona o i ai; o le a tuuina mai ai fua o le malo. Fai atu i le au uso ia tatala o latou loto i le molimau, ina ia oo mai le Agaga Paia ia i latou ua saunia o latou loto e taliaina.”16
Uso e ma tuafafine, pe o tatou liliueseina ea le leo itiiti, ma le malu? Pe o tatou faia ea ni mea e faatiga ai i le Agaga Paia? Pe o tatou faatagaina ea i totonu o o tatou fale ia aafiaga ia e tulieseina ai le Agaga mai o tatou fale? O le ituaiga faafiafiaga tatou te faatagaina i totonu o o tatou fale o le a mautinoa lava le i ai o se aafiaga i le mana o le Agaga Paia. O le tele o faafiafiaga i le lalolagi e faatiga i le Agaga Paia. E mautinoa lava, e le tatau ona tatou matamata i tifaga po o ata o le televise e faatumulia i amioga mataga, gagana eleelea, ma le ola le mama.
Ou te valaaulia outou ina ia mafaufau loloto i ai le tagata lava ia i se tulaga faamaualalo ma le agaga tatalo ma fesili ifo ia te oe lava, “Pe o i ai ea le Agaga i lo’u olaga? Pe o o’u fiafia ea? Pe o i ai ea se mea i lo’u olaga o o’u faia o loo faatiga ai i le Agaga ma taofia ai le Agaga Paia mai le avea ma a’u soa tumau?” Ia maua le lototele e salamo ai, pe afai e manaomia, ma ia toe olioli i le mafutaga a le Agaga Paia.
Pe o tatou olioli ea i le aafiaga o le Agaga Paia i totonu o tatou fale? Pe o faia ea e lo tatou aiga soo se mea e faatiga ai i le Agaga? Pe mafai ea ona sili atu ona lelei lo tatou valaauliaina o le Agaga Paia i totonu o lo tatou fale?
O o tatou fale e moomia ona faateleina le faaautuina ia Keriso. E tatau ona tatou faaaluina le tele o le taimi i le malumalu ae laitiiti le taimi e alu i le sailiga o mea e fiafia i ai. E tatau ona tatou tuutuu i lalo le pisapisao i totonu o o tatou fale ina ia le mafai e le pisapisao o le lalolagi ona lofituina le leo itiiti ma le malu o le Agaga Paia. O se tasi o a tatou sini aupito taua lava i le avea ai ma matua o le tatau lea ona olioli i le mana ma le aafiaga a le Agaga Paia i totonu o o tatou fale. E tatau ona tatou tatalo ma suesueina ia tusitusiga paia. E mafai ona tatou usuina ia viiga o le Toefuataiga ina ia valaaulia ai le Agaga Paia i totonu o o tatou fale. O le a fesoasoani foi le faia soo o afiafi faaleaiga.
I nei taimi sili ona matautia, tatou te moomia ai lenei meaalofa e le matalatalaina i o tatou olaga. Na faamanatu mai e Peresitene Boyd K. Packer ia i tatou: “E le tatau ona tatou matatau i le lumanai. Ua ia te i tatou mafuaaga e tele tatou te olioli ai ae itiiti ni mafuaaga e matatau ai. Afai tatou te mulimuli i uunaiga a le Agaga, o le a tatou saogalemu, po o le a lava le mea e tulai mai i le lumanai. O le a faaali mai ia te i tatou le mea e ao ona fai.”17
Na aoao atu e le Perofeta o Iosefa Samita e faapea e mafai e le Au Paia ona iloaina le eseesega o le meaalofa a le Agaga Paia mai isi agaga uma, aua “na te musumusu mai le filemu ma le olioli i o latou agaga; na te aveesea le saua ma le ita, ma le finau, ma mea leaga uma mai o latou loto; ae o o latou manao atoa ia faia mea lelei, aumai le amiotonu, ma ati a’e le malo o le Atua.”18
Na faamatala mai e sa’u uo i se tasi taimi lona aafiaga i le iloa ma le malamalama i le meaalofa o le Agaga Paia. Sa ia tatalo soo ma tatalo umi ina ia iloa le moni o le talalelei. E ui lava sa ia lagonaina le filemu i ona talitonuga, ae na te lei maua lava se malamalama mautinoa lea sa ia sailia. Na iu ina ua ia faamatalaina faapea atonu o ia se tasi o tagata o loo ola i lenei olaga ae faalagolago i le faatuatua o isi.
I se tasi taeao, a o mafaufau loloto i tusitusiga paia, sa ia lagonaina ai se mea o loo totolo ifo i lona tino atoa e amata mai lava i lona ulu e oo i ona vae. “Sa matuai lofia lava au i se lagona malosi o le alofa ma le olioli moni,” sa ia faamatalaina ai. “E le mafai ona ou faamatalaina le lagona na ou oo i ai i lena taimi nai lo lo’u faapea atu sa siomia au i le olioli e matuai tele lava lea sa matuai leai ai lava se avanoa ia te au mo soo se isi lava lagona.”
E ui lava sa ia lagonaina lenei lofiaina i le Agaga Paia, ae sa ia manatunatu pe o se miti ea le mea sa tupu. “O le tele lava ona ou manatunatu,” na ia fai mai ai, “o le malolosi foi lena na oo i ai lagona seia oo lava ina ua na o le pau le mea na ou mafai ona fai o lou tagi ma faapea atu, ‘Ua lava.’”
A o o’u laitiiti, na oo foi lo’u tama i se tulaga faapea i le aso na papatisoina ai. Na ia faamatalaina, “Ina ua tuu lima o le epikopo i luga o lo’u ulu ma … faapea mai, ‘Talia le Agaga Paia,’ … Sa ese so’u lagona na i ai … o se mea ou te lei oo muamua lava i ai … [lea] na oo mai i lo’u agaga [ma] tuuina mai ia te au … se lagona o le fiafia, se lagona na faatumulia ai lo’u agaga.”
Mai lena lava taimi ma lona olaga atoa, sa ia iloaina ai lava o loo soifua Iesu Keriso ma o loo ia taitaia Lana Ekalesia e ala i se perofeta soifua.19
E toatele i latou i aso nei ua latou lagonaina ia musumusuga mai le Agaga Paia a o latou suesueina le Tusi a Mamona po o le faalogo atu foi i molimau a faifeautalai ma uo. O i latou nei ou te faapea atu i ai, i le avea ai ma se Aposetolo a le Alii, o Iesu Keriso: o le talalelei i lona atoatoa ua toefuatai tasi mai i le lalolagi! O Iosefa Samita o se perofeta moni o le na faaliliuina le Tusi a Mamona e ala i le meaalofa ma le mana o le Atua. Ou te aioi atu ia te outou uma ina ia faitau le Tusi a Mamona ma faaaoga lona folafolaga: “Pe a maua e outou nei mea, ou te apoapoai atu ia te outou, ia outou ole atu i le Atua, le Tama Faavavau, i le suafa o Iesu Keriso, pe le moni ea nei mea; afai tou te ole atu ai ma le loto faamaoni, ma le manatu tonu i ai, ma le faatuatua ia Keriso, na te faaalia le tonu i ai ia te outou i le mana o le Agaga Paia.”20
Ia te outou e le o ni tagata o le Ekalesia, ou te aioi atu ia te outou ma le agalelei uma o lo’u loto—aua ne’i outou toe teenaina le upumoni. Ia saunia se avanoa i o outou loto mo lenei malamalama faalelagi. Ia faatuatua, salamo, ma ia papatisoina i le suafa o Iesu Keriso mo le faamagaloina o a outou agasala, ma o le a outou maua foi lenei meaalofa e le matalatalaina o le Agaga Paia.
O loo soifua lo tatou Tama Faalelagi! O Iesu o le Keriso! O le talalelei a Iesu Keriso ua toefuatai mai i lona atoatoa e ala mai i le Perofeta o Iosefa Samita. O Peresitene Gordon B. Hinckley o le perofeta, tagatavaai, ma le tali faaaliga i o tatou aso. Ou te molimau atu ai i le suafa o Iesu Keriso, amene.