Faatoilaloina o le Namu Leaga o le Agasala
O lo tatou Tama Faalelagi alofa, … ua silafiaina o le a agasala i tatou uma ma tatou eleelea ai, ua ia saunia ai se faiga e faamama ai i tatou mai agasala … ma e aoga.
O faaiuga uma lava tatou te faia, pe lelei pe leaga, e i ai foi faatasi ma se taunuuga.
Sa ou ola ae i se aai atonu e faaigoa e nisi o outou, o se nuu faifaatoaga e le manaia: o Virden i Niu Mekisiko, ma o lona faitau aofai e 135. I se tasi po i le taumafanafana, a o ou laitiiti, sa matou sailia ai ma nai o’u tei, ma ni a matou uo, ni auala e fai ai ni mea matou te fiafia ai. Sa fautua mai e se tasi matou te faia se mea faaulaula i se tasi o o matou tuaoi, ae o le a le afaina ai. Sa musumusu mai lo’u mafaufau e sese lea mea, ae sa ou le mauaina le lototoa e teena ai le sagisagi fiafia a le matou vaega.
Ina ua uma ona faataunuu la matou faiga le lelei lea, sa matou taufetuli ifo loa i le aualatele pogisa o le a matou sosola, ma talie ma matou faamalo ia i matou lava a o matou taufetuli. Sa faafuasei ona tu le vae o se tasi o le matou vaega i se mea, ma sa ia faataio, “Auoi, ua ou tu i se pusi!” E toetoe lava o le taimi lea na matou faalogoina ai le toulu ifo o ni mataua o se mea na faapasi mai ia i matou. Sa matua namu leaga lava. O le mea lea na manatu la’u uo o se pusi, ae o se manu e pei o le pusi e ta’u o le skunk. Sa ia faapasi maia se sua e puipuia ai o ia lava. E le tele ni manogi e tutusa le namu leaga ma le skunk, ma sa matou matuai namu leaga lava.
Sa matou o atu i le fale ma le le fiafia, ma le faamoemoe o le a alolofa ma faamafanafana mai o matou matua ia i matou. Ina ua matou ulu atu i le faitotoa o le umukuka, sa na o le tasi lava o le sosogi a Mama ma tutuli loa lava matou i fafo. Sa tutuliese i matou mai lo matou fale. Ona ia amataina lea o le faagasologa o le faiga e faamama ai. Sa ia susunuina o matou lavalava. Ona foliga mai lea o mea faamama uma sa mafai ona maua i le fale, po o isi mea eseese na tuufaatasi na fautuaina mai e tagata o le matou nuu e fesoasoani ai ia te i matou. O se tasi o na mea, o lo matou mafatia lea i le faataeeleina o i matou: na muamua lava le sua o tamato, ona sosoo ai lea ma le susu povi, e oo lava i fasimoli malo sa gaosi i le fale. Ae peitai sa tumau pea le namu leaga. E oo lava i le fagu faamanogi e ese le malosi a lo’u tama, na le mafai ona uma ai le namu leaga. E tele aso o matou aai i fafo i lalo o se laau, ma matou momoe i se faleie, ma tietie i tua o le matou loli [pe a matou o i le taavale].
Ina ua mavae ni nai aso, sa matou manatu lava ua uma lea manogi, ma sa matou taumafai e faalatalata atu i nisi o teineiti e ese le manogi manaia. Sa le taitai ona latou faatagaina i matou e taulalata atu, ma sa nutililii ai o matou faamoemoega maualuluga maaleale faatalavou!
Ia, e ao ona ou faapea atu, o le sausauina e se skunk, e le o se taunuuga masani lea o le agasala. O le tele o taunuuga, e le vave oo mai pe malie foi. Ae e tuai lava ae fai mai, aua o agasala uma lava, e tatau ona i ai se taunuuga.
E i ai taimi, e ono foliga mai e le taua i le tagata agasala ia taunuuga o le agasala. E mafai lava foi ona tatou faatalitonuina i tatou lava, e pei ona matou faia ae matou te lei oo atu i teineiti, faapea e leai se tasi e mafai ona iloa a tatou agasala, ma ua matua natia lelei. Ae peitai, e matua manino ma matilatila i taimi uma a tatou agasala i lo tatou Tama Faalelagi ma taitai mataala faaleagaga, o matua, ma uo.
A o ou auai i se faeasaite ma Elder Richard G. Scott, sa ou vaaia ni talavou se toalima sa i ai i le faapotopotoga, o o latou mata po o foliga o a latou gaoioiga, sa toetoe a feei mai o loo i ai se tulaga faaletonu o le faaleagaga i o latou olaga. Ina ua maea le sauniga, ma ina ua ou faamatala atu ia Elder Scott talavou ia e toalima, ae sa vave ona ia tali mai, “E toavalu.”
Sa valoia e Isaia, “O le amio a o latou mata ua molia ai i latou, ma ua faaali mai a latou agasala e pei o Sotoma, ua le mafai foi ona latou ufiufi ai” (2 Nifae 13:9; tagai foi Isaia 3:9).
Ua folafola mai e le Atua: “O le agasala a e le salamo e lafoaiina i fafo” (MFF 42:28). E pei lava ona “lafoaiina i fafo” i matou ma nai ou tei mai lo matou aiga faalelalolagi ona o se taunuuga o la matou meaula sa fai, e faapena foi ona lafoaiina i tatou i fafo mai le aiga o lo tatou Tama Faalelagi, pe afai tatou te le salamo.
“Pe a tatou taumafai e faaufiufi a tatou agasala” e pei ona sa ou taumafai ai e faaaoga le fagu faamanogi a lo’u tama, “e punitia lava le lagi, e tiga foi le Agaga o le Alii” (MFF 121:37). Tatou te le toe maua a tatou meaalofa faaleagaga. Na fetalai mai le Alii: “O le e le salamo, o le a aveeseina lava mai ia te ia le malamalama lea na ia maua” (MFF 1:33).
Ua tofu i tatou ma le malamalama o Keriso, po o se lotofuatiaifo. Na te tuualalo mai pea lava pea ia i tatou ina ia filifili le mea lelei. O filifiliga lelei e aumai ai taunuuga lelei. A tuu i se isi itu, o le tuai ona salamo ma le faifai pea o le agasala, e pei lava o la e takiki i taimi uma le skunk. O le a atili malosi ai le namu leaga i agasala taitasi, ma atili ai foi ona vavaeeseina i tatou mai le Atua ma i latou tatou te alolofa i ai. E le pine ona avea lea o i tatou e faapei o Lamana ma Lemuelu, o e ina ua mavae ona faifai pea a la filifiliga leaga, sa oo ina la “le toe lagona” ma sa le toe mafai ai ona lagonaina le leo itiiti ma le filemu (tagai 1 Nifae 17:45).
A na faapea ou te usitai i le lagona sa ou maua ina ua faatoa musumusu mai e sese le matou togafiti lea sa fai i lo matou tuaoi, semanu ou te le aafia i le mafuaaga na matou namu leaga uma ai.
Na aoao mai e le Faaola e ala mai ia Nifae “e le mafai ona nofo se mea eleelea faatasi ma le Atua; o lea e lafoaiina ai outou e faavavau” (1 Nifae 10:21).
Ae peitai, sa muai silafia e le Tama Faalelagi o tatou vaivaiga, ma sa silafia o le a tatou agasala uma foi, ma ua tatou le mama, ma sa Ia saunia ai se faiga e faamama ai i tatou mai agasala lea—e le pei o le sua o le tamato, susu, ma le fasimoli malo—ma e aoga lava.
Sa Ia auina mai se Faaola, o Lona Alo Pele e Toatasi, o Iesu Keriso, e togisalaina ai a tatou agasala (tagai Alema 22:14).
I le Togalaau o Ketesemane, a o faaalia e Keriso le usitai atoatoa, o le o Ona tiga na mafua ai ona “faagateteina [o Ia] o le Atua, le silisili ese i mea uma, ona o le tiga ma na maligi ai le toto mai pu laiti uma lava o le tino, ma na tiga le tino atoa ma le agaga” (MFF 19:18). Ona Ia tuuina atu ai lea o Ia lava ina ia “siitia i luga o le satauro ma fasiotia mo agasala a le lalolagi” (1 Nifae 11:33).
“Na tigaina o ia i le tiga o tagata uma, ina ia salamo tagata uma lava ma o mai ia te ia… . Faauta i le silisili o lona olioli i le agaga ua salamo!” (MFF 18:11, 13).
Sa faaalia mai foi e le Faaola le auala e iloa ai “pe ua salamo [se tagata] i ana agasala—faauta, na te tautau atu ma lafoaia” (MFF 58:43). Ona oo mai ai lea o le folafolaga ofoofogia, “E ui lava ina pei o ofu mumu a outou agasala, e sisina ia e pei o le kiona” (Isaia 1:18).
Afai e tuualalo atu le Agaga ia te oe e faasa’o se mea i lou olaga, e tatau ona e malamalama i lenei mataupu: e taua tele lou agaga.
E finagalo le Tama Faalelagi ia avea oe ma se tasi o Lona aiga e faavavau. Ou te aioi atu ma le alofa “aua tou te faatuai le aso o lo outou salamo” (Alema 34:33). Ia amata nei loa ona faagasolo. Aveese le namu leaga o le agasala i le vailaau o le salamo. Ona mafai ai lea e le Faaola ona fufulu mama oe, e ala i le Togiola. Ou te molimau atu ai i le suafa o Iesu Keriso, amene.