O Le Mana Toafilemu o le Tatalo

Elder Russell M. Nelson

O Le Korama a Aposetolo e Toasefululua

E tatau ona tatou tatalo e tusa ai ma le finagalo o lo tatou Tama Faalelagi. E finagalo o Ia e tofotofo i tatou, ia faamalolosia i tatou, ma fesoasoani ina ia tatou ausia tulaga uma tatou te gafatia.

I lenei vaitaimi o komepiuta, telefoni, ma masini tauvalaau, ua lelei atu auala o fesootaiga a tagata nai lo le taimi muamua. Ae, e tele lava ina le lelei fesootaiga. Talu ai nei, a o ou asiasi atu i se nofoaga e tausi esea ai tagata, sa ma talanoa ai ma se tamaitai e uiga i lona aiga. Sa ia faamatala mai, e toatolu lana fanau tama, ma e asiasi soo atu lava lana fanau e toalua ia te ia.

“Ae a lau tama lona tolu?” sa ou fesili ai.

“Ou te le o iloa le mea o i ai,” o lana tali mai lea ma loimata. “Ua tele tausaga ou te le o toe maua se tala ia te ia. Ou te le iloa foi pe toafia ni fanau a la’u fanau.

Aisea Tatou Te Tatalo Ai

Afai e naunau lea tina e faalogo i lana fanau, e faigofie foi la ona iloa le mafuaaga e manao ai se Tama alofa o i le Lagi e faafofoga mai i Lana fanau.¹ O le tatalo e mafai ai ona faaalia lo tatou alolofa i le Atua. Ma ua Ia matua faafaigofieina mo i tatou. E mafai ona tatou tatalo atu ia te Ia i soo se taimi lava. E le tau manaomia se ituaiga masini faapitoa. Tatou te le tau fafagaina foi ni maa pe totogi se tupe i masina taitasi mo le faaaogaga.

E i ai nisi tagata seiloga lava ua fetaiai ma faigata ona faatoa tatalo lea. O isi e le tatalo lava. O loo ta’u mai i se mau lea tulaga: “Tou te le manatua le Alii lo outou Atua i mea ua ia faamanuiaina ai outou, ae peitai, ua outou manatua pea o outou oloa, ae le faafetai atu i le Alii lo outou Atua … mo ia mea.”²

Ua loa ona tau mai e perofeta ia te i tatou ina ia tatalo ma le lotomaulalo ma ia tatalo soo.³

Pe Faapefea Ona Tatalo

Sa aoaoina i tatou e Iesu i le auala [e tatalo ai].⁴ Tatou te tatalo i lo tatou Tama Faalelagi,⁵ i le suafa o Iesu Keriso,⁶ i le mana o le Agaga Paia.⁷ O le “faasologa tonu lea o le tatalo,”⁸ e ese mai tatalo e tautu i upu 9 po o tatalo e faitau pe tauloto “ina ia iloa e tagata.”¹⁰

Sa faaali mai e Iesu tatou te tatalo i se Tama poto, o le na te silafia mea tatou te manaomia, ae tatou te le i ole atu ia te Ia.¹¹

Sa aoao atu e Mamona i lona atalii o Moronae, e tatau ona tatou tatalo atu “ma le malosi uma o le loto.”¹² Na alaga foi Nifae, “Ua ou tatalo e le aunoa i le ao mo [lo’u nuu], ua faasusuina e ou mata lo’u aluga i le po, … ma ua ou tagi atu ma le faatuatua i lo’u Atua, ua ou iloa foi na te faafofoga mai i la’u tagi.” 13

E mafai ona faateleina le mana o le tatalo toafilemu, i le anapogi, i taimi ua talafeagai ai mo se manaoga faapitoa.¹⁴

E mafai ona tuuina atu le leoa ia tatalo. E mafai ona tatalo se tagata i le mafaufau, aemaise pe a faalavelave upu.¹⁵ E masani ona tatou tootutuli e tatalo; e mafai ona tatou tutu pe nonofo foi.¹⁶ O le tulaga faaletino, e le taua tele nai lo le gauai atu faaleagaga i le Atua.

E faauma a tatou tatalo “i le suafa o Iesu Keriso, amene.”¹⁷ A tatou faalogo i le tatalo a se tasi tagata, tatou te leotetele foi e faaopoopo atu la tatou “amene,” o lona uiga “O la’u tatalo foi lena.”¹⁸

O Le A Le Taimi e Tatalo Ai

Pe o le a le taimi e tatau ai ona tatou tatalo? Ua fetalai mai le Alii, “Ina sailiili ia ma le filiga, ma tatalo e le aunoa, ia talitonu lava foi, ona galulue faatasi ai lea o mea uma mo lo outou lelei.” 19

Fai mai Alema, “Ia oulua filifili ma le Atua i mea uma e te faia, na te faatonu foi ia te oe i mea lelei; ioe, pe a e taoto i le po, ia taoto ona o le Atua, ina ia leoleo o ia ia te oe i lou moe; pe a e ala i le taeao, ia tumu lou loto i le faafetai i le Atua.”²⁰

Tatou te tatalo taitoatasi, [tatou te tatalo foi] ma o tatou aiga e le aunoa, i le taimi o meaai, ma gaoioiga i aso taitasi. A aotele i se faaupuga faigofie, o i tatou o ni tagata e tatalo.

Aafiaga Patino i le Tatalo

E toatele i tatou ua iloa le mana toafilemu o le tatalo. E i ai se tasi o o’u aafiaga sa ou faamatalaina i le peteriaka o se siteki mai Iuta i saute. Sa ma faatoa feiloai i lo’u ofisa faafomai i le silia ma le 40 tausaga talu ai, i le popofou o le amatalia o taotoga o le fatu. Sa matua mafatia lava lenei uso lelei ona ua faaletonu lona fatu. Sa aioi mai o ia mo se fesoasoani, ma le manatu e afua lona tulaga ua i ai nei ona o se manu’a o se alatoto i le fatu e ono mafai ona toe togafitia.

Na faaalia i ni iloiloga auiliili, e lua ni alatoto ua faaletonu. O le isi e mafai ona fesoasoani i ai le taotoga, a o le isi e le mafai. O le mea lea, na fautuaina ai o ia, e le tatau ona faia se taotoga. Sa matua faanoanoa o ia ina ua ta’u atu i ai lenei tala.

Na faaiu isi asiasiga na sosoo ai i le fautuaga lava lea e tasi. Ona o le naunau tele, na iu ai lava ina ia fai mai ma le matua o’oo’o o ona lagona: “Dr. Nelson, sa ou tatalo mo se fesoasoani ma sa taitai mai au i lau susuga. E le faailoa maia e le Alii ia te au pe faapefea ona togafitia le alatoto lona lua, ae e mafai ona Ia faaali atu ia te oe. O lena ua saunia lou mafaufau. Afai e te faia lo’u taotoga, o le a faailoa atu e le Alii ia te oe le mea e fai. Faamolemole fai le taotoga lena ou te manaomia, ma ia e tatalo mo le fesoasoani o loo e manaomia.”²¹

O le tele o lona faatuatua na i ai se aafiaga maoae ia te au. E mafai faapefea la ona ou toe fai ia te ia e alu? Ina ua maea se ma tatalo faatauanau faatasi, sa ou malie loa o le a ou taumafai. A o sauniuni atu mo lena aso matautia, sa ou tatalo ma saga tatalo, ae ou te le i iloaina lava pe o le a le mea e fai i le alatoto lea. E oo lava ina ua amata le taotoga,²² sa fesili mai le sa fesoasoani ia te au, “O le a lau mea o le a fai i lena mea?”

Sa ou fai atu, “Ou te le iloa.”

Sa ma amataina le taotoga. Ina ua uma ona faaitiitia le poloka o le alatoto muamua,²³ sa ma vaaia loa le alatoto lona lua. Sa ma iloa ai o la e atoa, ae ua matua lautele naua ma ua le toe mafai ai ona gaoioi e pei ona sa tatau ai. A o ma iloiloina le alatoto lenei, sa matua manino le tuusao mai o le savali i lo’u mafaufau: Faalaitiiti le li’o o le mama. Sa ou faamatala atu lena savali i lo’u fesoasoani. “O le a lelei lena alatoto pe a fai e mafai ona ta faaitiitia le mama i lona tele masani.”

Ae faapefea la? E le mafai ona tuu i ai se fusi, e pei ona faaaoga e se tagata e faafufusi ai se ofuvae e tele tele. E le mafai ona oomi i se fusi e pei ona faia i se avega a se solofanua [tulou]. Ona oo mai ai lea o se ata ma le manino i lo’u mafaufau, e faaali mai ai le auala e mafai ona su’i ai—le faiga o le gauga i i ma afe i o—ina ia ausia ai le faamoemoega o loo manaomia. Ou te manatua pea lena ata faalemafaufau—e faauma i laina motumotu o le mea e tatau ona su’i ai. Sa maea le togafitiga e pei ona tusia ai le ata i lo’u mafaufau. Sa ma tuu atu i le alatoto e faataitai ona faia lana galuega, ma maua ai ua matua faaitiitia lava le mama. Sa faapea mai lo’u fesoasoani, “O se vavega.”

Sa ou tali atu i ai, “O se tali i talosaga.”

Sa vave ona malosi le gasegase, ma sa tulaga manuia foi. E le gata ina maua e ia le fesoasoani i se auala ofoofogia, ae sa maua ai foi le fesoasoani mo taotoga o isi tagata e faapena foi o latou faafitauli. Ou te le taliaina lava se viiga. E ave le viiga i lenei tama faatuatua faapea foi le Atua, o le e tali mai i a tatou tatalo. E tele tausaga na mafai ona ola ai lenei alii faatuatua, ona faatoa alu ai lea i lona oliolisaga tumau.

Fesili i le Alii

A tatou tatalo, e le tatau ona tatou ta’u atu i le Alii le mea e fai, ae e tatau ona tatou fesili atu i le Alii,²⁴ ma gauai atu i Lana apoapoaiga.²⁵ O le uluai tatalo a Iosefa Samita na amata mai ai le Toefuataiiga o le talalelei.²⁶ I le 1833, na ia taulimaina ai le Upu o le Poto ina ua uma ona ia fesili atu i le Alii mo se fautuaga.²⁷ O le faaaliga e uiga i le perisitua na tuuina mai i le 1978 ia Peresitene Spencer W. Kimball, ina ua mavae le anoanoai o talosaga.²⁸ Na oo mai foi musumusuga e faatatau i le fausiaina o malumalu laiti ina ua mavae ona tuutuu i le loloto le tofa a Peresitene Gordon B. Hinckley.²⁹

O Tali i Tatalo

O le a le taliina uma tatalo e pei ona tatou mananao ai. E i ai taimi o le tali o le leai. E le tatau la ona tatou ofo ai. O matua alolofa o le olaga nei, latou te le ioe atu i mea uma e ole mai ai a latou fanau.³⁰

I se afiafi faaleaiga lautele talu ai nei, sa matua fiafia ai fanau a le ma fanau. Sa matua ita lava se tama e ono tausaga a lo’u afafine, ina ua fai atu lona tama o le a o i le fale. O le a la le mea na fai e lenei tamaitiiti pele? Na sau o ia ma faapea mai, “Tamamatua, pe mafai lava ona e faataga maia a’u ou te le usitai i lo’u tama?”

Sa ou fai atu, “E leai, la’u pele. O se tasi o lesona sili o le olaga, o le iloa lea e maua le fiafia i le usitai.³¹ Alu e o ma le tou aiga, ona e fiafia lea.” E ui lava ina le fiafia, ae sa alu lava ma le usiusitai.

E tatau ona tatou tatalo e tusa ai ma le finagalo o lo tatou Tama Faalelagi.³² E finagalo o Ia e tofotofo i tatou, ia faamalolosia i tatou, ma fesoasoani ina ia tatou ausia tulaga uma tatou te gafatia. Ina ua taofia le Perofeta o Iosefa Samita i le Falepuipui o Liperate, sa ole atu o ia mo se fesoasoani. Sa maua mai le tali o ana talosaga faatasi ai ma se faamalamalamaga: “E tuuina atu ia te oe le poto masani ona o ia mea uma, ma avea ai mou lelei.”³³

Pese o le Tatalo

Ua uunaia lava au e faaiu atu lenei savali i se tatalo—o loo tuuina atu i se viiga. Na fetalai mai le Alii, “o le pese a e amiotonu o le tatalo lea ia te au.”³⁴ O le fati o loo sii mai i le tatou tusi o Viiga, 35 ae ua ou tusia ni upu fou. E faafetai atu ia Craig Jessop, o Mack Wilberg ma isi uo pele o le Aufaipese a le Tapeneko, o le a mafai ona outou faafofoga atu ma tatou faalogologo i lena pese o le tatalo. Uso Jessop, faamolemole: [lagiina o le pese “O La Matou Tatalo i Lau Afio” saunia e le Aufaipese a le Tapeneko].

I le suafa o Iesu Keriso, amene.