Ia E Tu i le Tulaga na Tofi Oe I Ai
Ia tatou aapa atu ma laveai mai i latou o e ua pauuese mai le ala, ina ia leai se agaga faapelepele e tasi e leiloa.
Ua tatou potopoto i lenei afiafi o se faapotopotoga tele o le perisitua, e le gata iinei i le Nofoaga Autu o Konafesi ae faapea i le tele o nofoaga i le lalolagi atoa. O nisi o loo umia le Perisitua Arona, ae o isi o loo umia le Perisitua Mekisateko.
Na faailoa mai e Peresitene Stephen L Richards, o le sa auauna atu o se fesoasoani ia Peresitene Tavita O. Makei: “E masani ona faamatalaina le perisitua i ni upu faigofie e faapea o le ‘mana o le Atua ua tuuina mai i tagata.’” Na faaauau lana saunoaga: ‘Ou te manatu ua sa’o lenei faamatalaga. A e ou te fia faamatalaina le Perisitua i le faaaogaina i le auauna atu, ma e masani ona ou ta’ua ‘o le fuafuaga silisili ona atoatoa o le auauna atu.’ … O se auupega o le auauna atu … ma o le tagata na te le faaaogaina, o le a aveesea mai ia te ia, aua ua manino ona ta’u mai ia i tatou i faaaliga, o le e faatalale i ai, e le ta’uaogaina e tumau.’”1
I le Siteki a Paionia, o loo tu i le Aai o Sate Leki lea na ou mauaina uma ai le Perisitua Arona ma le Mekisateko, sa aoaoina ai i matou ina ia faamasani i tusitusiga paia, e aofia ai ia vaega e 20, 84, ma le 107 o le Mataupu Faavae ma Feagaiga. O vaega na sa matou aoao ai e uiga i le perisitua ma le puleaina o le Ekalesia.
O le afiafi nei ou te manao ai e faamamafa atu le fuaiupu e tasi mai le Vaega e 107: “O lea, ia taitoatasi ai le tagata ma aoaoina lana tiute, ma galue i le tofi ua tofia ai o ia, i le maelega atoatoa.”2
Na aoao soo mai e Peresitene Harold B. Lee: “A avea se tagata ma se tasi e umia le perisitua, ona avea lea o ia ma sui o le Alii. E ao ona ia mafaufau i lona valaauga e faapei ua i ai i le feau a le Alii.”3
Tatou te aoaoina foi mai nei vaega ia tiute o au peresitene o korama ma o le mea moni lava, e gafa i tatou ma isi e ese mai ia i tatou.
Ou te talitonu maumaututu ua sili atu le malosi o le Ekalesia i le taimi nei nai lo se isi lava taimi muamua. O tulaga o le malolosi o a tatou talavou e molimau mai ai o le augatupulaga lenei o le faatuatua ma le gauai i le upu moni. Ae peitai, e i ai lava nisi o loo pauu ese, o e ua mauaina le fiafia i isi mea lea e faatosina ai i latou ina ia le amanaiaina o latou tiute i le Ekalesia. E le tatau ia i tatou ona leiloloa na agaga faapelepele.
O loo faateleina pea le faitau aofai o toeaiina faamoemoeina o e e le o mauaina i sauniga a le Ekalesia pe le o faia foi ni tofiga i le Ekalesia. O lenei tulaga e tatau ma e mafai ona fofoina. O le galuega e pau ia i tatou. E tatau ona tuuina atu le tiutetauave ma ia faia loa lava le galuega e aunoa ma le faatuai.
O au peresitene o korama a le Perisitua Arona, i lalo o le taitaiga a le au epikopo ma fautua o korama, e mafai ona faatagaina e faaaumea ma laveai mai.
Na fetalai le Alii, “Ia manatua e taua tele le aoga o agaga i le silafaga a le Atua; … ma faauta i le silisili o lona olioli i le agaga ua salamo!”4
O nisi taimi e foliga mai ai ua maoae tele le galuega. E mafai ona tatou maua se lototele faafouina mai le mea na oo i ai ia Kitiona anamua o le, na o atu ma nai ana autau toalaiti e tau ma Mitiana ma sa Amaleki. O le a outou manatuaina le auala na fetaiai ai ia Kitiona ma le malosi maoae o autau e silisili i auupega ma le faitau aofai. O loo tusia i le tusi a Faamasino i le Feagaiga Tuai e faapea o lenei autau lotogatasi, o Mitiana ma sa Amaleki, “sa faasalalauina atu i le vanu ua pei o ni se le toatele; ma o a latou kamela ua le mafaitaulia e pei o ni oneone o le matafaga ona tele.”5 Na alu atu ia Kitiona i le Atua Silisiliese mo lona malosi.
O le mea na ia ofo ai, sa fautuaina ia Kitiona e le Alii e faapea ua toatele naua lana autau i le faitau a le Alii ina ia tuuina atu ai le fili i o latou lima, o lea na latou fai mai ai, “O lo’u lava lima ua ola ai a’u.”6 Na faatonuina ia Kitiona ina ia folafola atu i ona tagata: “Ai se mata’u ma gatete, ina liliu atu ia, ma foi atu … nai le mauga o Kiliata. Ona foi atu ai lea o le nuu e luafulu o afe ma afe e lua, a ua totoe le sefulu o afe.”7
Ona fetalai mai lea o le Alii, “E toatele pea le nuu.”8 Na Ia poloaiina ia Kitiona ina ia aveina ifo le nuu i le vai ina ia maitauina ai le tulaga e tatau ona latou feinu ai i le vai. O i latou o e inu etoeto sa tuuina i le isi vaega, ae o i latou sa tootutuli ma feinu sa tuuina i le isi vaega. Na fetalai atu le Alii ia Kitiona, “O le tolu selau o tagata e na etoeto i le vai, ou te faaola ai ia te outou, ma tuuina atu Mitiana i lou lima: a o le nuu uma ua totoe, ia taitasi ma alu i lona nuu.”9
Ina ua uma foi ona tatalo, sa faapea atu Kitiona, “Tutu mai ia, aua ua tuuina mai i o outou lima e Ieova o le itu taua a Mitiana.”10 Ma sa ia vaevaeina ia tagata e toluselau i ni vaega se tolu, ua ia avatu foi pu i lima o i latou uma, ma kate e gaogao ma sulu i totonu o kate. Ona ia fai atu lea ia i latou:
“Ia outou vaavaai mai ia te au, ma ia faaa’oa’o mai ai lava; faauta foi, a a’u oo i le toagalauapi e pito mai, ona outou faia lava lea e pei ona ou faia.
“A matou ilia pu, o a’u ma i latou uma o ia te au, o outou foi tou te ilia pu ia soo lava le togalauapi uma … ma outou fai ane, O le pelu a Ieova ma Kitiona.” Ona ia fai atu lea, “Faataitai mai ia te au.” O ana upu tonu lava, “Ia outou faia e pei ona ou faia.” 11
O le faailo a le taitai, na iliina ai e au a Kitiona ia pu ma faapea ona taei ai ia kate ma alalaga, “O le pelu a Ieova ma Kitiona.” O loo tusia e le mau le taunuuga o lenei taua: “Ua latou tutu e taitasi i le mea sa i ai e sio ai le togalauapi.12
O faiaoga o aiga o se vaega lea o le fuafuaga laveai i aso nei. Ina ua faalauiloa atu e Peresitene Tavita O. Makei i le Au Pulega Aoao atoa, sa ia fautua atu, “O aoaoga i aiga o se tasi lea o o tatou avanoa sili ona moomia vave ma tauia ina ia tausia ma musuia, e fautua ma taitai ai fanau a lo tatou Tama… . [O se] auaunaga paia, o se valaauga paia. O lo tatou tiute i le avea ai ma Faiaoga o Aiga o le momoli atu lea o le agaga faalelagi i totonu o fale ma loto uma.”13
I nisi o eria o loo patino ai le le lava o le malosi o le Perisitua Mekisateko, e mafai ai e peresitene o siteki ma epikopo, i le galulue faatasi ai ma le peresitene o le misiona, ona faaaogaina ia faifeautalai faamisiona e asiasi atu i tagata le toaaga ma tagata e na o ia e auai o lo latou aiga i le Ekalesia. E le gata o le a toe faaolaolaina ai le agaga faatalai i totonu o le fale, ae o le a maua ai foi se avanoa taua mo ni tagata lelei e faailoa atu i faifeautalai.
I le tele o tausaga a o o’u asiasi atu i le tele o siteki i le lalolagi atoa, e i ai lava siteki na o loo i ai taitai o uarota ma siteki, pe a manaomia ai po o le tali atu foi i le tiute, latou te taofi le mea o loo fai, ae saunia i latou, faatasi ai ma le fesoasoani a le Alii, ma latou o atu e galulue ma aumaia alii lelei ina ia agavaa mo le Perisitua Mekisateko, faapea ma o latou taitoalua ma fanau, ina ia ulufale atu i le malumalu paia mo o latou faaeega paia ma faamauga.
O le a ou otootoina atu faapuupuu nisi o faataitaiga:
I se asiasiga i le Siteki a Millcreek i le Aai o Sate Leki i nai tausaga ua tuanai, sa ou iloaina ai e sili laitiiti lava ma le 100 alii o e sa avea ma ni toeaiina faamoemoeina sa faauuina o ni toeaiina i le gasologa o le tausaga ua tuanai. Sa ou fesiligia ia Peresitene James Clegg mo le mafuaaga o lona faamanuiaina. E ui lava e matamuli o ia na te taliaina le faamalo, ae sa faailoa mai e se tasi o ona fesoasoani e faapea, sa iloa e Peresitene Clegg le luitau, sa ia taliaina le valaauga ma fuafuaina ai se faatalanoaga na o ia lava ma toeaiina faamoemoeina uma taitoatasi. I le taimi o le faatalanoaga, e ta’ua ai e Peresitene Clegg le malumalu o le Alii, o sauniga faaola ma feagaiga o loo faamamafaina iina, ma e faaiuina i le fesili lenei: “Pe e te le manao ea e ave lou toalua pele ma lau fanau faapelepele i le maota o le Alii, ina ia mafai ai ona faavavau lo outou aiga i le faavavau?” E tali atu le toeaina faamoemoeina ioe, ona amataina lea o le galuega o le toe faatoagaina, ma sa ausia le sini.
I le 1952 o le toatele lava o aiga i le Uarota Tolu a Rose Park o ni tagata sa umia e o latou tama po o tane na o le Perisitua Arona, nai lo le Perisitua Mekisateko. Sa valaauina ia le Uso ia L. Brent Goates e avea ma epikopo. Na ia valaaulia se uso e le toaga i totonu o le uarota, o Ernest Skinner, e lagolago i le toe faatoagaina mai o uso matutua i totonu o le uarota e 29 o e sa umiaina le tofi o le aoao i le Perisitua Arona ma ia fesoasoani i nei alii ma o latou aiga ia o atu i le malumalu. I le avea ai ma se tagata le toaga foi ia, sa musu ai ia le Uso ia Skinner i le taimi muamua ae na iu lava ina ua ia faailoa atu faapea o le a ia faia le mea na te mafaia. Na ia amata i lona lava asiasi atu i aoao matutua e le o toaaga, ma taumafai e fesoasoani ia i latou ia iloa lo latou matafaioi o ni taitai perisitua i totonu o o latou aiga ma le avea ai ma ni tane ma ni tama i o latou aiga. E lei pine ae ona ia tofiaina nisi o uso le toaaga ina ia lagolago atu ia te ia i lona tofiga. Sa auauai taitoatasi mai ona toe faatoagaina i latou ma ave o latou aiga i le malumalu.
O le tasi aso na alu ese mai ai le failautusi a le uarota mai le laina o tagata e totogi a latou faatau ina ia faafeiloai atu i le tagata mulimuli o le vaega lea e o atu i le malumalu. I le faamalo atu i ai i le avea ma tagata mulimuli o le 29 lea, sa faapea atu lenei alii, “Sa ou tutu ma vaavaai a o toe malolosi uma lava lena vaega i totonu o la matou uarota ma o atu i le malumalu. Ana fai e na o lo’u manatunatu lava i le matagofie o totonu o le malumalu, ma le auala e ono suia ai lo’u olaga e faavavau, semanu o le a le avea lava au ma toe tagata o le 29 lea e faamauina i totonu o le malumalu.”
I nei tala uma, e fa lava ni elemene na taitaiina atu ai i latou i le faamanuiaina:
-
O le avanoa e toe faatoaga mai ai sa faatinoina i le uarota.
-
Sa aofia ai le epikopo o le uarota.
-
Sa saunia ni faiaoga agavaa ma le musuia.
-
Sa manatulia tagata uma taitoatasi.
Uso e, ia tatou manatua le fautuaga a le Tupu o Peniamina: “Pe a i ai outou i le galuega a o outou uso ua na ona i ai outou i le galuega a le Atua.”14
Ia tatou aapa atu e laveai i latou o e o loo matuai moomia la tatou fesoasoani ma sii i luga i latou i le auala sili ona amiotonu o le olaga. Ia taulai atu o tatou manatu i manaoga o i latou e umia le perisitua faapea a latou ava ma fanau o e ua see ese mai le ala o le toaaga. Ia tatou faalogo atu i savali e le o tautalagia mai o latou loto:
Tago mai, savali mai i o’u tafatafa,
Ina ne’i o’u sese.
Aoao mai mea e ao ona ou fai
Ia ou toe foi atu ai.15
O le galuega o le toe faatoagaina e le o se galuega mo tagata paie po o tagata tulemomoe. E tutupu fanau, e matutua matua, ma e le faatali le taimi i se tagata. Aua le tolopoina se musumusuga; ae ia gaoioi i ai, ma o le a tatalaina e le Alii le ala.
E masani lava ona moomia ai le uiga faalelagi o le onosai. A o avea au ma se epikopo sa ou lagonaina ai le musuia o au e valaau atu i se tasi alii, o lona faletua e tau le toaga, e faapea foi i le fanau. Ae peitai, e lei tali mai lava lenei alii. O se aso vevela lava o le taumafanafana ae ou tuitui atu loa i le faitotoa valavala o le fale o Harold G. Gallacher. Sa mafai ona ou iloaina atu le Uso ia Gallacher o loo nofo mai i lona nofoa o loo faitau le nusipepa. “O ai?” sa ia fesili ai, e aunoa ma le vaai mai.
“O lou epikopo,” sa ou tali atu ai. “Ua ou sau e faamasani atu ma talosagaina lou auai atu ma lou aiga i a tatou sauniga.”
“Leai, o lea ou te pisi,” o le tali le migao lena na sau. E aunoa lava ma se ea a’e i luga. Sa ou faafetai ia te ia ona o lona faalogo mai ma ou savali ese loa ma le faitotoa.
E lei leva ae siitia atu le aiga o Gallacher i Kalefonia. Sa alu tausaga. Ae, ina ua avea au ma se sui o le Korama a le Toasefululua, sa ou faigaluega ai i lo’u ofisa i se tasi aso ae valaau mai la’u failautusi, ma faapea mai, “O se Tuagane e igoa ia Gallacher lea sa nofo muamua i lau uarota lea e fia talanoa ia te oe. O loo iinei i lo’u ofisa.”
Sa ou tali atu, “Fesili i ai pe o lona igoa o Harold G. Gallacher, lea sa nonofo ma lona aiga i Vissing Place i le Itu i Sisifo o le Malumalu i le Lima i Saute.”
Sa tali mai o ia, “O ia tonu lava lea.”
Sa ou fai atu ia te ia e auina mai o ia i totonu. Sa manaia le ma talanoaga e uiga i lona aiga. Sa ia tau mai, “Ua ou sau ou te faatoese atu i lo’u le tu i luga mai lo’u nofoa e faataga atu oe i totonu i le faitotoa i lena aso o le taumafanafana i tausaga ua leva.” Sa ou fesiligia o ia pe o malosi i le Ekalesia. Sa ataata o ia ma tali mai, “O lea ua ou fesoasoani lua i le au epikopo o le matou uarota. O lau valaaulia ina ia ou sau i le lotu, ma la’u tali faalelelei, sa ou popole ai lava ma o lea na ou fuafua ai loa e fai se mea e uiga i lea tulaga.”
E tele nisi taimi na ma feiloai ai ma Harold a o lei maliu o ia. E tele ni valaauga sa faataunuuina e Gallacher ma le la fanau i totonu o le Ekalesia. O se tasi o le fanau laiti a le la fanau o loo auauna atu nei faamisiona talai.
I le toatele o faifeautalai o loo mafai ona faalogologo mai i lenei afiafi, ou te faasoa atu le mea na maitauina e faapea o fatu o le molimau e le faapea e vave ona mauaa ma fua mai. Ina lafo ia lau mea e ‘ai i luga o le vai, aua a mavae aso e tele e te toe maua. Ae toe foi mai lava.
Sa ou talia le tatagi o la’u telefoni i le tasi afiafi ae faalogoina le leo o fesili, “E te aiga i se Elder Monson lea sa auauna i tausaga ua leva i le Misiona a Egelani Fou?”
Sa ou tali atu e leai. Na faailoa mai e le tagata sa telefoni atu faapea o ia o Leonardo Gambardella ona faamatala mai lea e faapea sa malaga atu ia se Elder Monson ma se Elder Bonner i lona fale i aso ua leva ma tuuina atu a la molimau ia te ia ma lona toalua. Sa la faalogo ae leai se mea na faia e faalauteleina ai ina ia faataitaia ai a la aoaoga. Na iu ina ua latou siitia atu i Kalefonia, o le isi 13 tausaga mulimuli ane, sa latou toe mauaina ai le upumoni ma sa liua loa ma papatisoina. Ona fesili lea o Uso Gambardella pe i ai lava se auala e mafai ona ia fesootai atu ai i alii faifeautalai na muamua asiasi atu ia te i latou, ina ia mafai ona ia faailoa atu i ai lana faafetai tele mo a la molimau, lea sa tumau ia i laua ma lona toalua.
Sa ou sueina ia faamaumauga. Sa ou mauaina ia alii faifeautalai. Pe mafai ona outou manatunatu i lo la ofo tele, ona o lenei ua faaipoipo i laua ma ua fai o laua aiga, ae sa ou telefoni i ai ma tau atu ia te i laua le tala fiafia—le taunuuga o a la uluai taumafaiga. Na vave ona la manatuaina le aiga o Gambardella. Sa ou fuafuaina se talanoaga i luga o le telefoni ina ia mafai e i laua ona momoli mai foi le laua faamalo ma faafeiloai i latou i totonu o le Ekalesia. Sa latou o mai. Sa maligi loimata, ae o loimata o le olioli.
O upu nei na tusia e Edwin Markham:
O loo i ai se taunuuga lea e avea ai i tatou ma uso;
E leai se isi e tu faamauga.
O mea uma tatou te auina atu i olaga o isi
E toe foi mai ia i tatou lava.16
O le afiafi nei ou te tatalo ina ia mafai ona malamalama i tatou uma o e ua umiaina le perisitua i o tatou tiutetauave, ina ia tatou faapei o Kitiona i ona po anamua, ia tutu atu tagata taitoatasi uma i lona tofiga ua tofia ai, ma ia mulimuli uma i lo tatou Taitai—le Alii o Iesu Keriso—ma Lana perofeta, o Peresitene Gordon B. Hinckley. Ia tatou aapa atu ma laveai mai i latou o e ua pauu ese mai le ala, ina ia leai se agaga faapelepele e tasi e leiloa.
I le suafa o Iesu Keriso, amene.