O Fitugafulu Fou Ua Tofia; Ua Tulei Saunoa Taitai e Uiga i le Taua ma le Filemu

I le sauniga o le Konafesi Aoao Lona 173 Faaletausaga i le Aso Toonai i le afiafi, sa fofoga mai ai e le Au Peresitene Sili ia suiga faaleautaitai o le Au Peresitene o le Au Fitugafulu ma le au peresitene aoao o le Aoga Sa. Sa i ai foi se Pulega Aoao o loo galue nei, sa tofia i le Korama Muamua a le Au Fitugafulu, ma sa faapea foi ona tofia ma Au Pulega Aoao fou e toalima ma Fitugafulu Pule Eria e 37.

Talu ai ona o le tofiga ua fofogaina talu ai nei e avea ma Peresitene o le Iunivesite a Polika Iaga, o lea ua faamaloloina mai ai Elder Cecil O. Samuelson Jr. mai le avea ai o se tasi o le Au Peresitene o Korama a Fitugafulu. Sa faamaloloina mai foi Elder Samuelson i le avea ai ma peresitene aoao o le Aoga Sa.

Sa tofia Elder Merrill J. Bateman o le Au Fitugafulu e avea ma uso o le Au Peresitene o le Au Fitugafulu ma le peresitene aoao o le Aoga Sa. O le a faaauau pea ona galulue Elder John H. Groberg ma Elder Val R. Christensen e fai ma fesoasoani muamua ma le lua, i le faasologa lava lea, i le au peresitene aoao o le Aoga Sa.

O Elder Bruce D. Porter, o se uso o le Korama Lua a le Au Fitugafulu talu mai le 1995, ua tofia nei o se tasi o le Korama Muamua a Fitugafulu. O le Au Pulega Aoao fou, ua tofia o ni uso i le Korama Lua a Fitugafulu, o Elder Mervyn B. Arnold, Elder Shirley D. Christensen, Elder Clate W. Mask Jr., Elder William W. Parmley, ma Elder W. Douglas Shumway.

Sa lagolagoina ai foi ia Fitugafulu Pule Eria e 37–4 mai Pasila, 2 mai Mekisiko, 2 mai Nigeria, 12 mai le Iunaite Setete, ma le taitoatasi mai Atenitina, Ausetalia, Oseteria, Poliva, Costa Rica, Dominican Republic, Hong Kong, Initonesia, Italia, Panama, Filipaina, Samoa, Sepania, Suitiselani, Taiuani, Toga, ma Venesuela (tagai i se lisi atoa o suafa i le vaega “O Le Lagolagoina o Taitai o le Ekalesia,” i le lomiga lenei, i. 23).

O Elder J. Devn Cornish, o se Fitugafulu Pule Eria i le Eria a Amerika i saute i Matu, sa faamalolo mai ona ua tofia e avea ma se peresitene o le misiona.

I le taimi o le konafesi aoao, sa faaalia ai e Peresitene Gordon B. Hinckley ma isi taitai o le Ekalesia lo latou amanaiaina o tulaga fevaevaeai o i ai le lalolagi, ma sa latou fofogaina mai ai ni upu faamafanafana, o taiala, ma ni aoaoga i tagata o itu uma o le fevaevaeaiga.

O le tali atu i le fesili “O le a se tala a le Ekalesia i nei mea uma?” na faamanatu mai e Peresitene Hinckley i tagata o le Ekalesia, “tatou te le finau ma tagata Musalemi po o i latou foi o i ai i nisi faatuatuaga. Ua tatou iloa, ma aoao atu o tagata uma lava o le lalolagi, o le aiga o le Atua.”

Ua talosagaina e Peresitene Hinckley ia tagata o le Ekalesia ina ia usiusitai i le mataupu faavae lona sefululua, e ala lea i le lagolagoina o tulafono o atunuu ma usitai i o latou faigamalo. Sa ia toe faaopoopo mai ma le lapataiga, “Ia aua lava nei o tatou faia ni upu pe auai foi i le faatinoga o galuega faatiapolo e faatatau i o tatou uso ma tuafafine i atunuu eseese i le tasi itu po o le isi.”

O le mea mulimuli, sa ia apoapoai mai i le Au Paia ina ia latou tatalo mo i latou o loo aafia ai i lenei taua, ma ia vaavaai atu i le Faaola: “Pe a uma ona manatunatu i ona itu uma, o i tatou lava ia o lenei Ekalesia, o tagata o le filemu. O i tatou o ni soo o le Togiola, o le Alii o Iesu Keriso, o le Alii o le Filemu.”

I lana saunoaga i le taeao o le Aso Toonai, sa ia fofogaina mai ai se lipoti e uiga i le tuputupu ae o le Ekalesia. Sa ia taua e tusa ma le 400 falelotu fou e fausia e le Ekalesia i tausaga taitasi ma o loo faaauau pea foi ona “fausia malumalu i le salafa o le lalolagi.” Sa ia fofoga maia foi ua tusa ma le 8,000 ni alii ma tamaitai talavou ua latou faaaogaina le Tupe Faaagaga mo Aoga, ma a fuafua i le averesi, ua matua faateleina a latou tupe maua pe tusa ua faafaina ma le afa, e ala i tomai ua latou maua i aoga.

Sa fofogaina mai ai foi i lea lava taimi e le Ekalesia, o le a le auina atu ni faifeautalai i Hong Kong sei vagana ua faia nisi iloiloga e tusa ai ma le faama’i po o le siama o le SARS. O le saogalemu ma le soifua solo lelei o faifeautalai o loo galulue nei i Hong Kong, e matua maualuga le faamuamua e ave i ai, ma o loo matua silasila totoa i ai ma le faaeteete. O loo fono i aso taitasi le Au Peresitene o le Eria a Asia ma faufautua faafomai i le eria i Hong Kong, ina ia silafia ai faamatalaga fou e tulai mai, ma tuuina atu ai faatonuga e talafeagai ma lea taimi i peresitene o misiona ina ia tauaaoina atu ai i faifeautalai laasaga po o fuafuaga talafeagai mo le puipuiga.