Elder Clate W. Mask Jr.
O Le Au Fitugafulu

Ua silafia e Elder Clate Wheeler Mask Jr. e leai se mea e tupu faafuasei.

A o talavou o ia i El Paso, Texas, sa maitauina e Elder Mask ia lona tama, o Clate Wheeler Mask le Matua, e le i auai o ia i le Ekalesia, a o tautua i le Taua Lona Lua a le Lalolagi. O se taimi matua faigata tele.

O le taimi lena sa aoaoina ai o ia e lona tina o, Marva Gonzalez Mask, ina ia matuai tatalo ma le naunautai. “Sa tatalo lo matou aiga ina ia auai lo’u tama i le Ekalesia, ma ia toe foi mai ma le saogalemu,” o lana saunoaga lea. “A o ou tamaitiiti ma ou tatalo i tafatafa o lo’u tina, sa ou iloaina sa i ai le Atua iina.”

E tele taimi sa faaalu e Elder Mask e faatasi ai ma matua o lona tina. “Ou te sii i vae o le tina o lo’u tina a o ia faitauina mai tala o le Tusi a Mamona. E faamatala mai e le tama o lo’u tina lana misiona i Mekisiko,” sa faamatala ai e Elder Mask. “O iina na faatulagaina ai le ala ou te ola ai.”

Sa auai lona tama i le Ekalesia, ma sa toe taliu manuia mai le taua. Mai lava i lena taimi, sa mausali le molimau a Elder Mask.

Sa iu ina faamisiona o ia i Amerika Tutotonu, ma ina ua latalata le taimi e toe taliu mai ai, sa tofia o ia e tusia se lipoti e uiga i nisi o faifeautalai. “O se tasi o tuafafine, sa maoae i soo se itu, ma sa ou iloaina o le ituaiga tagata lena ou te fia faaipoipo i ai i se aso,” o le tala lea a Elder Mask.

Ina ua maea lana tautua i le militeli, sa ulufale atu Elder Mask i le Iunivesite o Polika Iaga, ma o iina sa la masani ai ma le tuafafine faifeautalai lava lena, o Paula Carol Garns. Sa faaipoipo i laua i le 1965, i le Malumalu o Los Angeles i Kalefonia ma tausia ai sa laua fanau e toaono.

Sa faauu Elder Mask i lona faailoga i le Igilisi ma le Sipaniolo, ma e 30 tausaga o galue ai i le Ofisa o Aoga a le Ekalesia. Sa galue auauna o ia o se peresitene o le misiona, epikopo, fesoasoani i se epikopo, peresitene o le Aoga Sa, fautua maualuga, ma se peresitene o le paranesi.

O Elder Mask, ua 60 tausaga o lona soifua, sa soifua mai i le aso 20 o Aokuso, 1942. Ua ia silafia o lona valaauga fou o se uso o le Korama Lua o le Au Fitugafulu, o le avea foi o se suiga tele o le olaga e pei foi o isi mea e le i tutupu faafuasei i lona soifua. “O mea uma lava sa tutupu, ua saunia ai o ia mo lenei valaauga,” o le saunoaga lea a Sister Mask.