O Le Tulaga o le Ekalesia
O le talalelei a Iesu Keriso o le ala o le filemu. O le tele o lo tatou mulimuli i ai ma faaaoga i o tatou olaga … o le tele foi lena o lo tatou faamanuiaina ma le uluola.
Ou uso e ma tuafafine pele, o se matua vavega lava le mafai ona matou lauga atu ia te outou i le salafa o le lalolagi. O loo matou talanoa atu iinei i le Nofoaga Autu mo Konafesi i le Aai i Sate Leki. O loo matou tautala atu foi i la matou lava gagana. Ae faitau fia afe o outou o loo potopoto i fale o le Ekalesia i le tele o atunuu, ma outou faafofoga mai ai i gagana e 56.
Ua tatou toe potopoto mai foi i se konafesi maoae a le Ekalesia mo le lalolagi e tusa ai ma le finagalo ma faatonuga a le Alii.
A o tatou i ai la [i lenei konafesi], o loo fenumiai le lalolagi. O loo i ai se taua ma fevaevaeaiga. Ua matua tele naua le fememeai. O tagata auai o le aiga o le Ekalesia, o ni tagatanuu o le mau atunuu. O nisi o i tatou o loo tutu i le tasi itu, a o isi o loo i le isi itu o se felafolafoaiga tele. O loo ou faamoemoe ou te tautala atu e uiga i lenei mataupu i le taeao a taeao.
Peitai e ui lava i nei faalavelave o tatou fetaiai, ae ou te fiafia e lipoti atu o loo agai pea i luma le galuega a le Ekalesia. O loo tumau pea lo tatou faatupulaia i le lalolagi atoa. O loo alu pea le galuega faafaifeautalai e aunoa ma se faalavelavea. O loo faaauau pea lava ona o mai tagata liliu mai i le Ekalesia, ma o loo faateleina pea lava lo tatou faitau aofai. Faatasi ai ma lenei galuega faafaifeautalai e tatau ona tatou tuu faatasia ia mausali i latou uma na papatisoina o ni tagata liliu mai. Matou te valaau atu i tagata uma o le Ekalesia ina ia aapa atu i tagata faatoa liliu mai, ia faauouo mai ia te i latou ina ia latou maua le lagona mafanafana. Ia faamanuia atu ia te i latou i lo outou faauo atu i ai. Ia faamalosiau atu ia te i latou i lo outou faatuatua. Vaai ia leai nisi o i latou e le amanaiaina. O tagata uma, tamaitai po o se tamaitiiti ua agavaa mo le papatisoga, e agavaa foi mo se tulaga malupuipuia ma faaleuo, ina ia tuputupu ae ai i le Ekalesia ma le anoano o ana gaoioiga.
Ua faasolo ina maualuga le auai i a tatou sauniga faamanatuga. O lo o i ai lava le avanoa e tatau ai ona faaleleia atili, ma ou te uunaia outou ina ia saga galulue pea i ai e le aunoa. E ui lava i lea, ou te le iloa lava se isi ekalesia e maualuga sona pasene o le auai i aso sa taitasi i ona sauniga.
Ou te matua faafetai lava ona o le malosi o le autalavou a le Ekalesia. O le mea e faanoanoa ai ona ua i ai nisi ua pauu ifo i vaimaa [pe ua le amanaia foi]. Peitai, o se vavega lava le molimauina o le malolosi o o tatou tupulaga talavou i le lotolotoi o faaosoosoga inosia o loo siomia ai i latou e le aunoa. O le eleelea ma le inosia o tusi ma ata mataga, o faaosoosoga e inu ia fualaau faasaina, o le faatauanau e faaosofia ai lagona feusuai ina ia tatala tulafono o loo saisaitia ai amioga feusuai, o nisi nei o faatosinaga taufaaosooso o loo latou feagai pea lava pea. E ui lava i faatosinaga a le lalolagi o loo latou nonofo ai, ae o loo tumau pea lo latou faamaoni i lo latou faatuatuaga a o latou tama ma le talalelei ua latou alolofa i ai. E le lava au upu e faamatala atu ai mea lelei e faatatau i o tatou tupulaga talavou matagofie.
Ua faateleina le faatuatua e totogi ai sefuluai ma taulaga e ui lava i le utiuti o tulaga tau i le tamaoaiga ua tatou i ai nei. O loo mafai ona tatou agai atu pea i luma e fausia falelotu ma malumalu, faatasi ai ma le tatou polokalama tele mo aoaoga, ma le anoanoai o gaoioiga o loo faalagolago i tupe maua o sefuluai a le Ekalesia. Ou te folafola atu ia te outou, o le a le nofo aitalafu lava le Ekalesia. O le a tatou fuafuaina lava le polokalama i tupe maua o le sefuluai, ma faaaoga tupe paia mo faamoemoega e filifilia e le Alii.
O le a ou tautala i se mea ua tele i ai tusitusiga a nusipepa o le lotoifale. O le tatou faaiuga lea e faatau le fanua ma le faletele o faatauga o loo feagai tonu i le itu i saute o le Lotoa o le Malumalu.
Matou te lagona ua ia te i tatou se tiutetauave taua tele e puipuia siosiomaga o le Malumalu o Sate Leki. O le Ekalesia e ona ia le tele o le fanua o loo tu ai le faletele lea o faatauga. Ua faaalia mai foi e pule o ia fale lo latou naunau e faatau atu. E matua manaomia lava se faafouga tele ma le taugata, o le fale. Ua matou lagona e tatau ona faia se mea ina ia faaleleia atili ai lenei vaega. Ae ou te manao e faamanino atu i le Ekalesia atoa, e lei faaaogaina ma o le a le faaaogaina lava tupe o sefuluai e faatau mai ai nei meatotino. O le a le faaaogaina foi lava e fai ai se atiinae faapisinisi.
O tupe mo lenei faamoemoe na aumai ma o le a aumaia foi lava i pisinisi e umia e le Ekalesia. O nei punaoa, atoa ai ma isi teugatupe faaagaga, o le a faataunuu ai lenei polokalama.
Ou te fiafia lava e lipoti atu, o loo mafai ona tatou agai pea i luma i le fausiaina o falelotu. O loo tatou fausiaina nei ni falelotu fou se 400 i tausaga taitasi e taulimaina ai le tuputupu ae o le faitau aofai o le Ekalesia. O se mea matautia ma le ofoofogia lenei matou te matua faafetai ai lava mai le taele o o matou loto. O loo faaauau pea foi ona tatou fausia malumalu i le salafa o le lalolagi, ma ou te fiafia foi e lipoti atu le faateleina o galuega o loo faatino i malumalu. O lenei galuega taua tele, mo e o ola ma e ua oti, o se vaega taua tele o le talalelei a Iesu Keriso.
Matou te fiafia foi e maitauina se faatelega o le saunia o aiga o o tatou lava tagata. O lenei polokalama, lea ua silia ma le 60 tausaga talu ona aoao mai, ua aumaia ai se faaopoopoga tele i le saogalemu ma le soifua sologa lelei o tagata o le Au Paia o Aso e Gata Ai. E tofu le aiga ma se matafaioi i le tele e mafai ai, e saunia ai mea latou te manaomia. Matou te toe uunaia foi tagata ina ia aloese mai le faia o aitalafu e le tatau ai, ina ia faautauta lelei i a latou matafaioi tau tupe o loo latou taulimaina, ia faaputuputu sina tupe e tua i ai i faalavelave faafuasei. Matou te lapatai atu i o tatou tagata ia aloese mai faiga ia e folafola mai ai le “mauoa i se taimi vave” ma isi fuafuaga lavelave ia e toetoe lava e maileia ai i taimi uma i latou e faavalea gofie.
Ou te maofa e le aunoa i le aofaiga tele o le tautua e galulue fua o loo tuuina atu e o tatou tagata. Ua faatalitonuina lava au, o le ofo atu e galue fua, o le auala lea a le Alii e faataunuu ai Lana galuega. O le faagaoioia o uarota ma siteki ma korama, ma faalapotopotoga a ausilali, ua taufai agai i luma i lalo o le taitaiga a tagata e ofo mai e galulue fua. O le polokalama tele faafaifeautalai, e faalagolago i le tautua po o le auaunaga e leai se totogi.
E le gata i lea, e tele se aofaiga o tagata matutua o le ekalesia o loo galulue auauna atu faamisiona i le Ekalesia. E silia ma le 18,000 ua latou tuuina atu o latou taimi uma po o se vaega tele o o latou taimi i lenei galuega. Matou te faafetai atu ia te i latou mo la latou tautua matavela.
O lenei konafesi ua atoa i ai le lua tausaga talu ona faavae le Tupe Faaagaga mo Aoga. Ou te fiafia e lipoti atu ua agai atu nei i luma lenei polokalama i se tulaga mautu. Ua 8,000 ni alii ma tamaitai talavou ua aoaoina ina ia faaleleia atili o latou tomai ma avanoa e faigaluega ai. A fuafua i le averesi, i lenei lua tausaga talu ona aooga, ua oo atu i le faafa ma le afa se faatelega o a latou tupe maua. O se vavega lava!
Ma o le a faaauau pea. Ua lava le faapea atu, o loo tulaga lelei le Ekalesia. Ou te talitonu o loo taulimaina ma le faautauta ona mataupu. O loo tuputupu ae o tatou tagata i le faatuatua, i le alofa, mo le Alii ma le gauai atu i Ana aoaoga.
O taimi faigata nei. Ua maluelue le tamaoaiga. Ua i ai feteenaiga i le lalolagi. Peitai, o loo tausia lava e le Silisiliese Lana folafolaga, o le a Ia faamanuiaina i latou e savavali ma le faatuatua ma le amiotonu i Ona luma.
O le talalelei a Iesu Keriso o le ala o le filemu. O le tele o lo tatou mulimuli i ai ma faaaoga i o tatou olaga, o le tele foi lena o lo tatou faamanuiaina ma le uluola. Se mea ina a matagofie o le aofia ai i lenei galuega mamalu. Ia tatou fiafia ma olioli i lo tatou avanoa sili. Ia tatou auauna atu ma le fiafia.
Ia i ai faamanuiaga aupito silisili i o outou luga, a’u uo pele e. Ia olaola le faatuatua i o outou loto. Ia i ai le alofa ma le filemu i o outou aiga. Ia i ai meaai i luga o a outou laulau, ma ofu i o outou papatua. Ia faamafanafanaina o outou loto i faamanuiaga mai le lagi, ma ia outou maua le faamafanafanaga i nei taimi o faigata. O la’u tatalo lea i lenei taeao a o tatou amataina lenei konafesi maoae, i le suafa paia o Iesu Keriso, amene.