Lipoti a le Matagaluega Suetusi a le Ekalesia
I Le Au Peresitene Sili O Le Ekalesia a Iesu Keriso o le Au Paia o Aso e Gata Ai
Uso Pele: O lo o i ai i le Ekalesia a Iesu Keriso o le Au Paia o Aso e Gata Ai se matagaluega suetusi, e tumaoti le faatinoga o ana galuega mai isi matagaluega uma ma galuega a le Ekalesia. O le pule faatonusili o le Matagaluega Suetusi a le Ekalesia, e lipoti sa’o atu e le aunoa i le Au Peresitene Sili. O le aufaigaluega a le Matagaluega Suetusi a le Ekalesia, e aofia ai tausitusi faamaonia mai fafo, o suetusi faamaonia mai totonu, o suetusi faamaonia o mea tau faamatalaga, ma isi polofesa agavaa ua faamaonia.
O o se tofiga mai le Au Peresitene Sili, o lea ua i ai i le Matagaluega Suetusi a le Ekalesia le pule e sue ai tusi a matagaluega uma ma galuega a le Ekalesia i le lalolagi atoa. Ua i ai i le Matagaluega Suetusi a le Ekalesia le aia tatau e taulimaina ai faamaumauga uma, o tagata faigaluega, o meatotino, ma polokalama e manaomia e sue ai tusi o saofaga a le Ekalesia, o tupe faaalu, ma punaoa. O tulaga faapolofesa o le faiga o suegatusi, o loo faafoe ai le galuega faasuetusi.O le tulaga lamatia o le faavae autu lea e taialaina ai le sailia o suetusi.
O le Aufono e Pulefaasoasoaina ia Sefuluai o loo i ai le matafaioi, ma o le 2002, sa faamaonia mai ai foi ia tupe faaalu a le Ekalesia. O lenei aufono e aofia ai le Au Peresitene Sili, o le Korama a Aposetolo e Toasefulua, ma le Au Epikopo Pulefaamalumalu, e pei ona faamaonia ai i le faaaliga. Sa pule faasoasoaina saofaga ma tupe faaalu e ala atu i Matagaluega o Paketi ma le Matagaluega o Tupe a le Ekalesia, i lalo o le taitaiga a lenei aufono. O le pulega o saofaga sa maua mai ma le paketiina o tupe faaalu, sa sueina tusi ma lipoti mai.
E faavae i luga o a tatou suegatusi, ua manatu ai le Matagaluega Suetusi a le Ekalesia, o tulaga o galuega faaletino uma, o saofaga sa maua mai ma tupe sa faaalu i le tausaga e faagata mai i le aso 31 o Tesema, 2002, na puleaina e tusa ma taiala faamaonia o paketi, ma aiaiga ma faagasologa o mea e fai a le Ekalesia.
O gaoioiga o mea tau tupe a faalapotopotoga a le Ekalesia, ia e ese lona faagaoioia mai le Ekalesia, e le i sueina tusi e le Matagaluega Suetusi a le Ekalesia i le 2002. O nei faalapotopotoga e aofia ai le Deseret Management Corporation ma ona kamupani, ma isi faalapotopotoga o aoga maualuluga, e aofia ai ma le Iunivesite a Polika Iaga. Sa sueina tusi ma isi gaoioga o le pulega e ni kamupani suetusi tumaoti mai fafo. Ae ui o lea, sa faamaonia e le Matagaluega Suetusi a le Ekalesia, sa tauaaoina mai lipoti e tatau ai o suegatusi a nei faalapotopotoga i komiti suetusi taitasi.
E tuuina atu ma le faaaloalo lava,
MATAGALUEGA SUETUSI
Wesley L. Jones
Pule Faatonusili