Faamanuiaga
Ou te aioi atu ina ia taitasi i tatou ma saili e ola latalata atili i le Alii, ma ia fesootai soo atu ma le faatuatua ua faateleina ia te Ia.
Ou uso e ma tuafafine pele e, ua maea nei, ae vagana ai le galuega.Ua onomea ona tatou taufai maua le lagona faafetai ona o lenei konafesi matagofie. Sa tatou aofaga potopoto i le filemu e aunoa ma se faalavelavea. Sa tele ina tatou mafaufau ma talanoa i faamanuiaga ofoofogia a le Alii. Tatou te talisapaia faamanuiaga maoae ua tatou maua mai i le talalelei, ua matua faamalolosia foi i tatou. E pei ona tatou faalogologo i molimau a le au failauga, ua toe faamumu ai foi a tatou lava molimau i le upumoni e avea o se afi ua musaesae. Ou te faamoemoe o i latou uma lava sa auai mai i lenei konafesi maoae, ua ootia o latou loto mo le lelei, ua avea i tatou taitoatasi ma se alii po o se tamaitai ua lelei atu nai lo le mea sa i ai, ona o mea na tatou oo i ai i nei aso e lua ua tuanai atu. Ou te tautala lava au ia mo au, a ou tautala atu i na mea, ou te lagonaina lo’u latalata atili atu i le Alii. Ou te faamoemoe o lou foi lena aafiaga. Ua ia te au se naunautaiga ua faamalosia, ou te usitai i Ana poloaiga, ou te ola i Ana aoaoga, ma fesootai atu ia te Ia i le tatalo, ona tausisia ai lea o se ma sootaga ma Ia o lo’u Tama ma lo’u Atua.
Ma o lea, pe a faataape lenei mafutaga maoae a le Au Paia o Aso e Gata Ai, ou te aioi atu ina taitasi i tatou ma saili e ola latalata atili i le Alii, ma ia fesootai soo atu ma le faatuatua ua faateleina ia te Ia
Tama ma tina, tatalo mo a outou fanau. Tatalo ina ia malutia i latou mai le leaga o le lalolagi. Tatalo ina ia latou ola i le faatuatua ma le malamalama. Tatalo ina ia taitaia i olaga e aoga mo i latou lava ma isi. Tane, tatalo mo a outou ava. Faaali atu i le Alii lou faafetai mo i latou ma ole atu ia te Ia mo i latou. Faletua ma tausi, tatalo mo a outou tane. O le toatele o i latou e faigata olaga o loo ola ai ma le anoanoai o faafitauli ma toatuga. Ole atu i le Silisiliese ina ia taitaiina i latou, ia faamanuia, puipuia, ma musuia i a latou faatinoga amiotonu.
Tatalo mo le filemu i le lalolagi, ma ia alofa le Silisiliese o le e pulea le lagi ma le lalolagi, ia faaloaloa atu Lona aao ina ia pa’i atu Lona Agaga i loto o tagata, ina ia aua nei fevataua’i malo. Tatalo mo le tau. E lologa isi itu ae lamala isi. Ou te talitonu afai e lava tatalo e o a’e i le lagi ina ia faasusuina le laueleele, o le a tali mai le Alii i na tatalo mo e amiotonu.
I le 1969, sa ou i ai i Amerika i Saute. Sa ou lele mai Atenitina i Santiago, i Chile. Sa mamago atumauga o Andes. Sa leai se kiona. Sa mu le vao. Sa i ai i Chile se lamala matautia.
Sa talosagaina e tagata le fesoasoani e faasusuina le laueleele.
Sa matou faapaiaina ni fale fou se lua i le malaga lena. O sauniga taitasi o na faapaiaga sa matou ole atu ai i le Alii mo se timu i le laueleele. E toatele i latou na i ai i na sauniga na oo mai a latou molimau, na tatala mai le lagi ma matua maligi mai ai timuga, o lea na toe aioi atu ai foi tagata i le Alii e toe tapuni [le lagi].
Tatalo mo le poto ma le malamalama ao outou feagai ma faigata o le olaga. Afai tou te naunau e faia ni mea valea ma le le faautauta, ou te manatu o le a le puipuia outou e le Alii. Ae afai tou te saili i Lona atamai ma mulimuli i fautuaga e uunaia ai outou, ou te talitonu o le a faamanuiaina outou.
Ia avea i tatou ma tagata e loto tatalo. Ia tausia a tatou fanau “i aoaiga ma apoapoaiga a le Alii” (Enosa 1:1). Ia outou maua faamanuiaga o le lagi ua tatau ona outou maua. I upu a Teuteronome, “O lenei Isaraelu e, se a se mea e finagalo i ai Ieova lou Atua ia te oe, na ona e mata’u ia Ieova lou Atua, ina ia e savali i ona ala uma lava, ma ia e alofa atu ia te ia, ma ia e auauna ia Ieova lou Atua ma lou loto atoa ma lou agaga atoa” (Teuteronome 10:12).
Ia mautinoa, ou uso e ma tuafafine pele, o “Le e leoleo ia Isaraelu, e le tulemoe, pe moe lava” (Felix Mendelssohn, Elijah).
Ou te tatalo ma le lotomaualalo mo faamanuiaga o le lagi ina ia i ai i o outou luga ma ou te alofa ia te outou taitoatasi. Faafetai atu i lo outou agalelei tele ia te au ma lo outou faamaoni ma le malolosi e tulei ai i luma le galuega a le Silisiliese, i le suafa o Iesu Keriso, amene.