O Le Tumau Faamaoni i a Tatou Feagaiga
O le tumau faamaoni ia Keriso e aofia ai le tausia o feagaiga… . Pe a tatou faia nei mea, … o le a faagaeetia o tatou loto ma faatumulia i le alofa.
Talu ona tofia au i le ono masina talu ai, ua ou matua lagonaina lava se alofa loloto mai le Atua mo outou, o’u uso pele. O lo’u faanaunauga sili mo tamaitai talavou i soo se atunuu, ia outou iloa e alofagia outou—e le gata ia te au, ae faapea foi o outou matua ma taitai, aemaise lava o lo outou Tama Faalelagi.
E i ai nisi taimi e faigata ai ona lagona lenei alofa. E i ai se tamaitai talavou sa foliga mai e atoatoa lelei lona olaga. E lei leva ona manumalo o ia i se palota a le aoga, sa faataitai lona leo mo se aufaipese toalaiti faapitoa ma sa pasi ai foi, ma sa filifilia foi o ia e fai ma tausala faapaleina o le latou aoga maualuga. Sa alu o ia i le fale i se tasi aso mai le aoga ma faapalasi i lona moega ma tagi ai. Sa fesili atu lona tina po o le a le mea ua tupu ae tagi ma fai mai, “Ua ou lagona ua pei au o se tagata toilalo; e leai se isi e fiafia ia te au; e leai ni au taleni; ua le mafai ona fai au meaaoga; e le gata foi i lena, ae ou te auleaga.” E leai lava se tasi na masalosalo e i ai ni ona lagona e le mautonu, e faaesea, ma le agavaa; ae o le toatele lava o le tupulaga e faapena o latou lagona i nisi taimi.
O nisi foi talavou e sili atu foi faigata o loo latou pagatia ai. Mo se faataitaiga, e i ai se teineitiiti o tamaitai talavou ou te iloa, o lona tina o loo tigaina i le kanesa. O se tasi [teineitiiti] ua tetea ona matua. O le isi teineitiiti e na o ia lava e nofo i le fale i faaiuga o vaiaso, ae o uma lava ana uo e inu. O le tasi tamaitai talavou na aafia i se faalavelave na pipili ai. O le tama o le isi teineitiiti ua auina atu e tautua i le militeli. O le isi uso lelei o loo popole e uiga i si ona tuagane faalogogata.
O le a se mea e mafai ona fesoasoani i tupulaga talavou i nei faafitauli eseese ma le ogaoga? O le autu a le Mutuale i lenei tausaga, lea tatou te tulimataia i lenei po, e maua ai le tali. O loo faapea mai, “E tatau ona outou fetaomi atu i luma ma le faamaoni ia Keriso, ina ua i ai le faamoemoe atoatoa lelei, i le ma le alofa atu i le Atua atoa ma tagata uma” (2 Nifae 31:20). E ese lo’u fiafia i lenei mau. O loo faamatala mai ai le auala tatou te taulimaina ai luitau o lenei olaga. Afai ou te fetaomi atu i luma ma le faamoemoe ma le alofa, ou te lagonaina foi le faamoemoe ma le alofa.
O le tumau faamaoni ia Keriso e aofia ai le tausia o feagaiga. O vaiaso taitasi tatou te faafouina ai a tatou feagaiga o le papatisoga ina ia ave i o tatou luga Lona suafa, ia manatua pea o ia, ma ia tausi ana poloaiga (tagai MFF 20:77). Tatou te tumau faamaoni ia Keriso pe a tatou faia nei mea ma faagaeetia ai o tatou loto ma faatumulia i le alofa. I se faaupuga faigofie, a ou tausia au feagaiga, ou te lagonaina le faamoemoe ma ou te lagonaina foi le alofa.
Sa manaomia e la’u uo talavou lea o le a ou faaigoaina ia Linisei, le faamoemoe. Sa nofo o ia i se aiga e le maua ai se Agaga ma e leai foi se alofa. O ana uo e amio le pulea, ma e oo lava foi i le toatele o ona taitai o Tamaitai Talavou, latou te vaavaai atu ia te ia ua na o se “galuega fuafuaina.” Ae i le taele o lona loto, na te lagonaina lava e alofa le Alii ia te ia, e ui lava ina faigata lona tulaga o i ai. Sa tulimatai atu i lona manatuaina pea lava pea o Ia. Sa ia filifili e le auai faatasi ma ana uo pe a latou faia mea leaga. Sa taumafai o ia e tapuai i le Tama Faalelagi i lona lava potumoe, aua sa manao na te lagonaina Lona Agaga i lona olaga. Sa i ai se mea i totonu o ia na manao ina ia lelei o ia, ina ia tausia Ana poloaiga. E tusa lava foi pe utiuti sona malamalama ma leai se lagolago mai ana uo ma lona aiga, ae sa taumafai lava o ia e tausia ana feagaiga o le papatisoga. Sa ia lagona le faamoemoe e taumafai pea, ma sa ia lagonaina le alofa mai le Tama Faalelagi.
Ua folafola mai e le Alii ia i tatou o le a Ia le faagaloina lava i tatou, aua ua Ia “taia [o tatou] faatusa i [Ona] alofilima” (Isaia 49:16). Ua tatou folafola atu foi ia te Ia, o le a tatou le faagaloina lava o Ia aua ua tatou tusilolomi o Ia i o tatou loto.
Sa aoaoina le uluai Au Paia i lenei mea i o latou puapuaga i Misuri. Sa apoapoaiina i latou e le Alii ina ia faatalitali “ma le onosai i le Alii, aua o a outou tatalo ua oo mai i taliga o le Alii… .
“O lea, ua ia tuuina atu ai lenei folafolaga ia te outou, ma le feagaiga le maliliuina o le a faataunuuina; o mea uma foi na puapuagatia ai outou o le a galulue faatasi mo lo outou lelei” (MFF 98:2–3). O lenei folafolaga e lei taofia ai o latou puapuaga, ae na faamafanafanaina ai i latou, ma latou maua ai le faamoemoe mo le lumanai.
Sa faapena foi ona fetaomi atu i luma ma le faamaoni ia Aperaamo, ma piimau i folafolaga na tuuina atu e le Atua ia te ia. O taimi taitasi ou te faitau ai e uiga ia Aperaamo a o malaga atu i le Mauga o Moria e ofoina atu lona atalii o Isaako e osi ai le taulaga, ou te malamalama lelei i ona lagona. Na te lei iloaina le taunuuga o lena tofotofoga, e pei ona tatou iloaina mai le talafaasolopito. Sa savali atu o ia i se mea na te lei iloa le mea e tupu ai. Ae sa ia tumau pea ma le faamaoni. Sa ola o ia i folafolaga e faapea o le a faamanuia o ia e le Alii. Po o le a lava se tulaga popole atonu sa oo i ai o ia, ae lei solomuli ai o ia mai lona fetaomi atu i luma ma le faamaoni ia Keriso.
E pei foi o le Au Paia i Misuri, sa iloa lelei e Linisei e ui lava i ona tulaga faigata, ae lei tuulafoaiina lava o ia e le Tama Faalelagi. Sa faamaoni Lona alofa. Sa faamafanafanaina o ia i le “feagaiga e le maliliuina” o Lona alofa—e faapea “o mea uma foi na puapuagatia ai outou o le a galulue faatasi mo lo outou lelei” (MFF 98:3). E faapei foi o Aperaamo, e lei faigofie foi le tulaga na i ai [Linisei], ae na fetaomi atu pea o ia i luma. A o faia e ia lena mea, sa ia maua se fesoasoani. Sa i ai se taitai faapitoa o le Ekalesia sa alofa ia te ia ma taialaina o ia. Sa latalata atili atu o ia i le Tama Faalelagi, ma sa iu ai lava ina maua e ia se alii talavou e alofa ia te ia, ma aoao atili ia te ia i le talalelei, ma faaipoipo atu ia te ia.
Mulimuli ane o le tele lava o faamanuiaga sa ia moomoo i ai i le amataga o lona olaga, sa liligi atu i ona luga. Sa ia iloa ai e mafai lava ona maua le Agaga i lona lava aiga ma tausia ni fanau amiotonu. I le popofou o lona olaga sa tuulafoaiina ai o ia ma faaesea, a o lea ua siomia nei o ia i le alofa. Na oo mai lea tulaga ona o le fetaomi atu i luma a o ia faatalitali atu ma le onosai i le Alii. O le tumau faamaoni ia Keriso na maua ai e Linisei le faamoemoe, ma e faapena foi ia i tatou a o tatou tauivi ma luitau o le olaga. O le a faamalosiauina i tatou i upu o le viiga e lagiina e le aufaipese i le po nei, ina ia tatou o mai ia te Ia:
“E le afaina po o le a le mea e oo mai,
Po o le a le lima e faamata’u mai;
O ia lo’u puipuiga i mea uma,
O lo’u maluapapa mai o’u fili.
O mai ia te ia i latou uma e mafatia,
O e ua sese ma ua tauaso,
O e ua vaivai ma ua mananao i se malologa.
O mai ia te ia! O mai ia te ia!”
(“Come Unto Him,” Hymns, nu. 114).
E le gata ina tatou maua le faamoemoe e tumau ai i le tausiga o feagaiga, ae e suia ai foi le loto. Na aoaoina ia Ieremia e le Alii, “O lenei le feagaiga ou te osia; … Ou te tuuina la’u tulafono i totonu ia te i latou, ma ou tusi ai i o latou loto” (Ieremia 31:33). E faalauteleina e feagaiga o tatou loto ma mafai ai ona tatou lagona “le alofa o le Atua i tagata uma” (2 Nifae 31:20). Ia manatua, afai tatou te tausia a tatou feagaiga, o le a tatou lagonaina le faamoemoe, ma tatou lagonaina foi le alofa.
Sa aoao mai e Iesu i le Lauga i luga o le Mauga ia uiga paia o le loto e pei o le alofa, loto faamagalo, ma le agalelei. Sa Ia aoaoina i tatou o Ona lava soo, ina ia tatou tauaveina i o tatou luga Lona suafa ma Ona uiga. O lenei mea e suia ai o tatou loto ma faamanuiaina ai a tatou fegalegaleaiga ma isi. Na saunoa mai Elder Marvin J. Ashton, “A tatou liua moni ia Iesu Keriso, ma tautino atu ia te Ia, ona tulai mai ai lea o se mea manaia: e liliu atu o tatou loto i le soifua solo lelei o o tatou uso a tagata, ma o lo tatou taulimaina foi o isi tagata o le a matua faatumulia i le onosai, agalelei, [ma] taliaina ma le agamalu” (“E Mafai Ona Avea le Laulaufaiva ma se Pelu Maai,” Liahona, Iulai 1992, i. 20).
Pe mafai ea ona faateleina lo outou tumau faamaoni ia Keriso i totonu o outou aiga, ma tagata o outou lava aiga? Ina ua e folafola atu e te tauaveina Lona suafa ma ona uiga i ou luga, o lona uiga e tatau ona tuutuu teisi ifo i lalo lou leo, ia e agalelei teisi atu, ia faaopoopo lou loto fesoasoani i ou uso ma tuagane, ma ia saga talisapaia foi ma fesoasoani i ou matua.
Sa fai e le ma tama tama le mea lenei i aso ua leva, i se matou malaga faaleaiga. E tele maila sa matou malaga ai e matamata i se maota o se tupu. Ina ua oo i le taimi ua matou taunuu ai, sa vaivai se tasi o le ma fanau teine ma ua le fiafia. Sa musu o ia e oso i fafo ma le taavale e savali i le mea na matou o mai mamao e matamata i ai. O le toatele o i matou na lagona le le lava o le onosai ia te ia. Ae na sii faalelei a’e o ia e le ma tama tama e 14 tausaga le matua ma fafa o ia i lona tua e agai atu i le maota o le tupu. Sa te’a lemu atu le matamataita lea sa i ai ona o le faaalia e le alii lea o le alofa e aunoa ma se leo. O lena uiga alofa o loo olaola pea i o matou manatu taitoatasi e sili atu nai lo le maimoaina o le maota o le tupu.
O nisi taimi e aupito sili ona faigata i totonu o o tatou lava aiga ona tatou faia le mea e aupito silisili. E manaomia ai lena taumafaiga maelega o le “fetaomi atu i luma.” Ae peitai afai e te tausia lau feagaiga, o le a e iloa ai e tatau ona e saga alofa atu ma le atoatoa ia i latou ua faamauina i ai oe e faavavau. Ona mafai ai foi lea ona e faalautele atu lou alofa i fafo atu o lena li’o faaleaiga i isi.
I ni nai tausaga ua mavae, sa nonofo ai le matou aiga i Pasila mo sina taimi puupuu. E lua vaiaso a o lumanai lo matou toe taliu mai i lo matou aiga, sa matou fetaiai ai ma se faalavelave tau taavale. A o matou tietie atu i le fale i le tetele o timuga, mai se sauniga faamanatuga, sa matou taunuu atu ai i se magafa. Sa faafuasei ona oso ane se taavale sa tu i autafa o le auala ma sosoa autafa o le matou taavale. O le mea e laki ai e leai se tasi na i taavale uma e lua na manua, ae na matua maomoomo leaga taavale uma e lua. Ina ua oso i fafo lo’u toalua o Ioane e talanoaina ma le isi avetaavale le faalavelave, sa ou faamanatu atu pea ia te ia e le o matou na sese. E lei leva ae toe foi mai ma ave lemu atu le matou taavale i se tamai fale o le faatoaga sa matou nonofo ai, a o faapea ona oloia uamea i pa’u pe a taavavale. Sa mulimuli atu i o matou tua le isi taavale. Na pau lava le tala a Ioane, “O le a ou faamatalaina atu mulimuli.”
Ina ua matou taunuu i le fale, sa sue e Ioane le tamai teutusi e teu ai le matou tupe faaagaga mo faalavelave faafuasei, ma totogi atu i le aiga le tupe e fai ai le latou taavale. Sa latou foi ese atu ma le fiafia. Sa ou ofo. Ona faapotopoto faatasi mai lea e Ioane lo matou aiga. Sa foliga e tau faatoese mai a o ia faamatalaina mai mea na ia faia. “Ou te iloa e le o tatou e sese i lenei faalavelave, ae ina ua ou talanoa atu i le aiga, na pau lava le manatu sa i lo’u mafaufau, o lea e le’i leva atu se itula na ou osi feagaiga ai ma le Tama Faalelagi ou te faia e le aunoa e faapei ona Ia faia. Ou te iloa ana faapea o Ia lea e tu i lo’u tulaga, e alofa o ia i lenei aiga ma semanu foi Na te faia mea uma Na te mafaia e fesoasoani atu ai ia te i latou.” Oka se tane ma se tama o faataitaiga! Sa ia manatuaina ana feagaiga. Ona o lona faia i le alofa faaKeriso, o lea sa ia faamaluluina ai loto.
Ou te molimau atu ia te outou, afai ou te manatuaina au feagaiga i aso taitasi, ou te lagonaina le faamoemoe ma ou te lagonaina foi le alofa. Ou te iloa o le tumau faamaoni ia Keriso e aumaia ai se faamoemoega atoatoa lelei ma se alofa i le Atua ma tagata uma i lo’u loto.
“O le a le mea ua talosaga mai ai le Tama ia i tatou uma? O le a le tala a tusitusiga paia? Ia faatuatua, ia faamoemoe, ia ola e faapei o lona Alo, fesoasoani i isi i o latou ala” (“Na Ia Auina Mai Lona Alo,” Tusipese a Tamaiti, 20–21; Liahona, Ape. 1992, U11). Ou te tatalo ina ia taitasi i tatou ma o mai ia te Ia mo se faamoemoega ma mulimuli i Ana faataitaiga o le alofa, i le suafa o Iesu Keriso, amene.