Popole mo le Ola o le Agaga
O soo ua liua moni, e ui lava ina e le atoatoa, ae o le a tulimatai atu pea i “le ola o le agaga” i soo se aso, i soo se tausaga, i le lotolotoi o le amioleaga ma le faatafunaga
I le lotolotoi o le gaogaosa o mea o tutupu nei i le lalolagi—o mea tatou te aafia ai—o loo i ai tauiviga moni faifai pea o le olaga: pe aofia ai i popolega o le lalolagi pe leai foi, e tatau lava ona tatou filifili i afioga a le Alii e “popole … mo le ola o le agaga” (MFF 101:37). Pe o le a lava lo tatou matuai aofia ai i mataupu i fafo atu o i tatou lava, ae e faagasolo pea lava lenei tauiviga i totonu i taimi e taugalemu ai ma taimi foi e fesouaiina ai. Pe malamalama pe ua iloa foi, o le mataupu lenei e le masuia lava o le olaga nei mai lea augatupulaga i lea augatupulaga.
Pe a tatou taumafai e tausia poloaiga a le Atua, “e faafouina le tagata i totonu i lea aso ma lea aso” (2 Korinito 4:16). E oo lava i aso leaga, e tatau lava ona tatou “tausia o tatou lava agaga” tusa lava po o a tulaga o i ai i fafo atu (tagai Faataoto 19:16). Ou te ioe e tulai mai ni nai faaiuga mai le loto e “popole … mo” ma “tausia” o tatou agaga i taimi faamalumalu e pei o le atalii faamaumau oa. Sa ia fafagaina puaa “i lea aso ma lea aso,” ma mulimuli ane ai ua ia iloaina se aso faapitoa ina ua “faafuasei ona atamai o ia” (Luka 15:17). Pe o le a lava se isi mea na tupu mai i lena aso patino i lena “nuu mamao,” (Luka 15:13), sa “manatunatu [le atalii faamaumau oa] i [ona] ala” (Salamo 119:59) ma fai ai lana faaiuga mausali “O le a ou tulai ma alu i lo’u tama” (Luka 15:18). Na sosoo le auiliiliina o manatu, ma le liua. E ui a o lea, e faigata ona iloa e tagata latou te fetaiai i le ala ia se tausi meaituaolo ua toe taliu atu i le fale, e ui foi ina o loo i ai mea taua o le faavavau ua tutupu mai ia te ia.
Peitai, e i ai isi taimi, e iloagofie ai fegalegaleaiga o mea i fafo ma totonu. Sa feagai Pilato ma se vavao le fiafia o tagata e faasaga i se tagata e igoa ia Iesu le Nasareta. O le faaleleiga a Pilato ma Herota ua i ai nei—lea sa “la feitagai” (Luka 23:12)—e aunoa ma se masalosalo, o se tala fiafia taua faaupufai ia i latou sa fia iloa mea o tutupu. E ui lava ina feteenai lagona [o Pilato], ae sa ia gauai atu i se faapotopotoga ua tamau o latou manatu, ma tatala atu ai Parapa ae le o Iesu. Sa toe taliu atu Pilato i Kaisareia, ma ona lima e ui ina ua fafano ae sa tausalaina pea lava. Peitai, sa faaauau atu pea Keriso i Ketesemane ma Kalevario, e faataunuuina le Togiola matautia e faasaoloto ai tagata uma, lea o le a mafai ai e le faitau piliona ma piliona e toetutu mai ai.
O le taimi nei, e faamalumalu mai taua i i ma o ma o le a toulu mai e pei o le timu i luga o e amiotonu ma e foi e amioletonu, peitai o lena meaalofa mamalu a Keriso o le Toetu maoae, o le a tuuina mai ia i tatou uma lava! E pei lava ona le mafai e galu fafati ona faailoa mai suiga la e i ai le taele o le sami, e faapena foi le Togiola, o mea e aafia ai tagata uma i le lalolagi ma le faavavau i lo latou taua, sa tutupu i se togalaau laitiiti ma se maupuepue e le amanaia.
O le tatalaina mai o le galuega a le Atua e masani ona faagasolo filemu. Mo se faataitaiga, po o a lava mafuaaga patino faaletamaoaiga, na mafua ai ona malaga ese mai Iosefa Samita, le Matua ma lona aiga mai Niu Egelani i le setete o Niu Ioka, sa taitai mai i latou—e aunoa ma so latou iloaina—i papatusi paia, sa tanumia i le Mauga o Kumora, e faatalitali ai e avea ma “se tasi molimau ia Keriso,” mo “le umi e tu ai le lalolagi” (2 Nifae 25:22).
O le mea lea, e ui lava o lo tatou vaitaimi o se taimi o feteenaiga, e popole filemu aua o le “ola o le agaga” o le mea lava lea e aupito sili ona taua. E ui lava o mea e tutupu e iloa ai taimi e taua ma tulaga ese, e afua ai ona amiotonu tagata, e le mafai e le vevesi o le lalolagi ona avea ma ‘alofaga o le le faia e tagata o a latou tautinoga, tusa lava pe foliga mai e faigofie ona toilalo isi. Afai e tulai mai fetauaiga i i ma o, e le tatau lava ona solia a tatou feagaiga! Mo se faataitaiga, o le mulilua e le mafai ona faatagaina ona e faapea leaga o la e tau le taua, ma ua nonofo valavala nisi ava ma a latou tane. E leai se tuusaunoaga o le poloaiga e fitu o faitauina faapea, “Aua e te mulilua sei vagana ai taimi o taua” (tagai Esoto 20:15–16).
I se tasi taimi o le taua foi, sa apoapoai mai ai Peresitene Tavita O. Makei i tagata o le militeli, ina ia “tausisia lo outou ola mama” i le lotolotoi “o le taua faatufanua.” (i le Conference Report, Apr. 1969, 153).
E ui lava ina sii taua mai le tasi malo i le isi malo, o ia fevesiaiga e le faatagaina ai ona fevatauai paaga faipisinisi pe faasagatau ai foi i le au faisea i a latou pisinisi e ala i lo latou ave faagaoi pe faia foi ni molimau pepelo e solia ai poloaiga e valu ma le iva—aua e leai foi ni tuusaunoaga (Esoto 20:15–16).
O le le mautonu i le lalolagi e le faatagaina ai le le mautonu i le amioatua, o le gaogaosa foi o le olaga o loo faalavelaveina ai i tatou, o le a le ufiufia ai a tatou agasala pe taofia le Atua, o le na te silafia mea uma. E le gata i lea, o manumalo faamiliteli o le a le avea lena ma mea tatou te manumalo ai i a tatou lava taua taitoatasi mo le amio pulea. E le avea foi le matamataita o le feitagai faaletagata soifua e fai ma mea e faaitiitia ai le alofa atoatoa ma le alofa laveai o le Atua i Ana fanau. E faapena foi, e le mafai e mea o loo tutupu po o tulaga e faatauaso ai i tatou mai upumoni e faavavau, ona suia le mea moni o Keriso o le Malamalama o le Lalolagi!
O lea, ia tatou faapei o le taulealea sa i ai ma Elisaia i luga o le mauga. O le taimi muamua sa atuatuvale o ia i kariota a le fili sa siomia ai, ona pupula ai lea o mata o le taulealea, ma sa ia vaaia “solofanua ma kariota afi,” ma faamaonia ai “e toatele ua ia te i tatou i e ua ia te i latou” (2 Tupu 6:16, 17). Uso e ma tuafafine, e lei suia lava le numera faaleagaga!
O o tatou lava vaivaiga faaleatamai ma o tatou faaletonu, e le suia ai le mea moni o le muai silafia ofoofogia o le Atua, lea e faitauina ai a tatou filifiliga lea e nafa ma i tatou. I le lotolotoi o fesootaiga e le atoatoa i la le tino ma lipoti o mea tutupu i lena lava taimi e faatatau i o tatou feteenaiga faaletagata, o loo soifua le Atua e faavavau i le taimi nei a o mea ua tuanai, o le taimi nei, ma le lumanai o loo i ai pea i Ona luma e le aunoa (tagai MFF 130:7). O Ana fuafuaga paia e mautinoa lava e tutupu, talu ai po o le a lava le mea Na te fuafuaina e fai, e Na te faia lava (tagai Aperaamo 3:17). Na te silafia le iuga ma le amataga! (tagai Aperaamo 2:8). E mafai atoatoa e le Atua “ona fai [Lana] … galuega” ma faataunuu Ona faamoemoega uma, o se mea e le sa’o i fuafuaga sili e faataatitia e le tagata, aua e tele ina faaaoga sese o tatou saolotoga e filifili ai! (tagai 2 Nifae 27:20).
Ua faamautinoa mai e le Atua ia te i tatou:
“O le a ou taitaiina outou” (MFF 78:18).
“Ou te faatasi atu ia te outou“ (MFF 49:27).
O le a “faatasi [o Ia] ma i [tatou], uso e ma tuafafine, “i [o tatou] taimi faigata” (MFF 3:8), e aofia ai ma le auala mai i le taitaiga Lana perofeta soifua, o Peresitene Gordon B. Hinckley.
O le taimi lenei, o mea ua tutupu e iloa ai le taua ma le tulaga ese o le “ola o le agaga” o le a tumau pea ona faalagolago pe tatou te tali atu ma le manatu ifo ia te oe lava po o le loto pulea, ia tatou faaiuga faaletagata i aso taitasi, mo se faataitaiga i le va o le agalelei ma le lototiga, alofa mutimutivale ma le faaituau, matamau ma le limamau.
E le tatalaina e taua le tulafono e lua. E leai ni ona tuaoi. O i latou e tausia lenei tulafono, latou te le faaaogaina se pine po o se faailoga faalotoifale, e leai foi se lanu o pa’u e patino i ai.
Atonu tatou te fiaaai, mo se faataitaiga, ae afai o lea, e mafai lava ona tatou tali atu e pei o le fafine ua oti lana tane sa ia avatu lana toe luutaga o ana meaai e fafaga ai Elia (tagai 1 Tupu 17:8–16). O lena ituaiga fetufaaiga i le totonugalemu o le utiuti o mea ma le mativa, e matua ootia ai lava le loto. I le popofou o le soifua, sa taumafai ma saga taumafai ai pea se epikopo lelei tele i le taimi a o ou talavou, o M. Thirl Marsh, ina ia faigaluega i maina i le taimi o le Pau o le Tamaoaiga. E ui ina laitiiti tele, ae o lona tino laulaua, sa faatauanau ai pea o ia ma sa iu ai ina faigaluega, ae o le toatele lava o ana uo e lei maua ni avanoa. Ae o le mea moni, e tele taimi pe a uma sona aso sa faigaluega mamafa ai, e faasoasoa ai e Thirl o se alii agalelei, ana tupe maua ma ana uo nei seia iu foi ina faafaigaluegaina i latou. E leitioa ona avea o ia o se leoleo mamoe alofa tele i le lafu i se taimi mulimuli ane.
Pe a manatunatu loloto i “le ola o le agaga,” e fesoasoani tatou te taumafai ai mo lo tatou lava liua atoatoa, ae o le mea e uluai pau ai fatu o le talalelei i le “eleele lelei”—lea na faauigaina e Iesu o i latou ia e i ai i “loto le faamaoni ma le lelei” (Luka 8:15). O le faasologa o le tutupu o mea, e pei o le “faalogo [o se tagata] i le upu” ma le “olioli,” “malamalama i ai,” “fua mai ni fua,” ma le “tumau,” ma iu ina iloa le uiga o le “fiaai ma fiainu i le amiotonu” (Mataio 13:20, 23; Faaliliuga a Iosefa Samita Mataio 13:21; Mataio 5:6). O se “suiga maoae” (Mosaea 5:2). O le liua e ta’u mai ai le suia mai le “tagata o le lalolagi” e avea ma se “tagata o Keriso” (Mosaea 3:19; Helamana 3:29; tagai foi 2 Korinito 5:17). O se galuega e le na o se afiafi se tasi e faia ai.
O le taunuuga o lenei faiga faifai pea e aofia ai ma le “le toe manatu e fai le amioleaga, ae fia fai pea lava le amiolelei” (Mosaea 5:2). O le mea lea, e leitioa, o lenei foi auala e mafai ai e i latou ua liua ona “faamalosi” mai o [latou] uso (Luka 22:32) ma siitia ae isi e ala i le “saunia pea lava e tali atu ma le agamalu ma le matau ia i latou uma o e fesili mai ia te outou i le uiga o le faamoemoe o loo ia te outou” (1 Peteru 3:15). O ia tagata amiotonu latou te faia foi se isi auaunaga taua ae le leoa mo tagata: latou te avea ma se vaega tele o tagata e mafai ona faaoo atu ai faamanuiga a le Atua o loo matua moomia, i tagata uma.
O soo ua liua moni, e ui lava ina e le atoatoa, ae o le a tulimatai atu pea i “le ola o le agaga” i soo se aso, i soo se tausaga, i le lotolotoi o le amioleaga ma le faatafunaga. O lenei faiga e aofia ai i le faataunuuina o le “galuega a lo tatou Tama” (Luka 2:49; tagai foi Mose 1:39).
Talu ai ona o lenei liua atoatoa o le tulaga lea ua tatau ona tulai mai, o mea faigata o loo tutupu ma gaogaosa e ono fesoasoani ia i tatou, e faamatua’ia ai ona toe amata la tatou faigamalaga po o le faanatinati foi ona tatou liua [ia Keriso].
Uso e ma tuafafine, i le lotolotoi o popolega le mautonu ma le lutia o le lalolagi, ia tatou popole mo le “ola o le agaga,” e pei ona aoaoina ai i tatou. Faafetai lava i le Togiola mamalu a Iesu, o le ola o lena agaga tino ola pea, e umi atu nai lo soo se fetu e aupito sili ona umi lona ola, ma, o lea foi e mautinoa ai le umi atu nai lo mea e tutupu i le olaga nei, tusa lava pe matuia!
Ou te molimau atu ai, i le suafa Paia o Iesu Keriso, Amene!