O le Mana Fesoasoani o le Faatuatua i Taimi o le Le Mautonu ma Tofotofoga
O le faatuatua i le Atua ma Lana taitaiga e ala i le Agaga Paia o le a lagolagoina oe i se lalolagi ua faateteleina ona luitau.
O ai se tasi e le manaomia se faamalosiauga i taimi o le le mautonu ma tofotofoga? O ai ua toa ma faapea mai na te le manaomia se fesoasoani i le olaga? O le faamoemoega autu o le olaga faaletino ia tuputupu ae le tagata lava ia ma ia ausia ni mea i le olaga. O le mea lea e tatau ona i ai ni taimi o tofotofoga ma le le mautonu ina ia maua ai ni avanoa mo lena tuputupu ae. O ai le tamaititi e mafai ona ola ae e avea ma se tasi e faalagolago ia te ia lava pe a matua, pe a fai sa faia e matua ia filifiliga taua uma? E faapena foi i lo tatou Tama Faalelagi. O Lana fuafuaga o le fiafia ua foafoaina ina ia i ai ni o tatou luitau, e oo lava foi i puapuaga, lea e faia ai filifiliga e sili ona taua ina ia mafai ona tatou ola, tuputupu ae, ma faamanuiaina i lenei olaga faataitai.1 Faafetai mo Lona alofa atoatoa ua Ia saunia ai se ala mo i tatou e taulimaina ai na luitau ao tatou tuputupu ae i le malosi ma le tomai (e faia ai filifiliga amiotonu). Ou te tautala e uiga i le mana fesoasoani o le faatuatua i taimi o le le mautonu ma tofotofoga.
Ua tuuina mai e le Atua ia i tatou le tulaga gafatia e faaaoga ai le faatuatua ina ia tatou maua ai le filemu, olioli, ma le faamoemoega i le olaga. Ae peitai, ina ia faaaogaina lea mana, e tatau lava ona faavae le faatuatua i luga o se mea. E leai se isi faavae mautu e sili atu nai lo le faatuatua i le alofa o le Tama Faalelagi ia te oe, faatuatua i Lana fuafuaga o le fiafia ma faatuatua i le mafai ma le naunautai o Iesu Keriso e faataunuu Ana folafolaga uma.
O nisi, e le malamalama i le faatuatua o le mea lea e le faaaogaina ai i lona aoga atoa.Ua manatu nisi e faapea, soo se talanoaga i mea tau lotu ma le taitaiga e maua e se tasi e ala i le faatuatua malosi e le faavaeina i luga o ni manatu talafeagai. Ae peitai, o le faatuatua e le o se mea tau faasese pe faamaneta, ae o se mana e faavae i mataupu autu e faavavau. Pe o oe ea o se tasi sa taumafai e faaaoga le faatuatua ae e leai se fesoasoaniga na maua mai ai? Afai o lea, atonu e te lei malamalama ma mulimuli i mataupu autu ua faavae ai le faatuatua. O le faataitaiga lenei e faamalamalama ai le uiga o lau tala.
O ni tausaga ua mavae, sa ou auai ai i se suesuega e suesue ai tulaga eseese o soo se elemene. O le faiga sa faaaoga ai se mea faigaluega faaniukilia sa mamanuina ina ia tafe mai ai vaega po o elemene ninii e pei o eletone ma polotone malolosi. O nei elemene ninii na tuuina atu i totonu o se isi potu suesue ina ia mafai ona matou mataituina ai o latou suiga. O elemene malolosi e le mafai ona vaai atu i ai ae e tatau lava ona faatautaia ma le faaeteete ina ia aloese ai mai le faatamaiaina o nisi. I se tasi aso, na ulufale mai ai se leoleo faitotoa ao matou faia le suesuega. I se uiga inoino sa ia faapea mai ai, “O outou uma o tagata pepelo, ua tou faafoliga o loo outou faia se mea taua, ae e le mafai ona outou faavaleaina au. Ou te iloa afai e le mafai ona e vaai, faalogo, tofo, sogisogi, pe pai foi i ai, e leai se mea o i ai.” O lena uiga na taofia ai lona iloa e tele mea taua e le mafai ona iloa e ala i sane e lima. Ana faapea e naunau lena alii e tatala lona mafaufau ia malamalama pe faapefea ona iloa le i ai o elemene i le totonugalemu, atonu o le a ia faamaonia lo latou i ai. I lea lava foi ala, ia aua lava nei masalosalo i le moni o le faatuatua. O le a outou maua faamanuiaga ona o lou faatuatua pe a e mulimuli i mataupu faavae ua faatulagaina e le Atua mo lona faaaogaina.
O nisi o na mataupu faavae o le:
-
Ia faalagolago i le Atua ma Lona finagalo e tuuina mai le fesoasoani pe a manaomia e tusa lava pe o le a le faigata o se tulaga e i ai.
-
Usitai i Ana poloaiga ma ola e faaalia ai e mafai ona Ia faatuatuaina oe.
-
Ia mataala i uunaiga filemu a le Agaga.
-
Ia e faatinoina ma le lototele lena uunaiga.
-
Ia e onosai ma ia e malamalama pe a tuua oe e le Atua e te tauivi ina ia e tuputupu ae ai, ma faasolosolo auauai mai tali mo se taimi faaumiumi.
O le faatupuina o le faatuatua ua autu i le faalagolago i le Alii ma Lona finagalo e tali mai i ou manao. Aua “o le Atua … e faamanuiaina ma faauluolaina i latou uma o e faalagolago ia te ia.”2 O le saga faaaogaina pea ma le naunautai o le faatuatua e faateleina ai lou toa ma le mafai e faaaoga ai le mana o le faatuatua.
E mafai ona e aoao ia sili atu le faaaogaina o le faatuatua i le faaaogaina o lenei mataupu faavae na aoao mai e Moronae: “O le faatuatua o le mea lea ua faamoemoe i ai ae e le o vaaia; o lea aua le fefinauai ai ona ua le vaaia e outou, aua e le maua e outou se mau seia uma le tofotofoina o lo outou faatuatua.”3 O le mea lea, soo se taimi lava e te faataitaia ai lou faatuatua, o le galue lena ma le agavaa i se musumusuga, o le a e maua ai se molimau faamaonia a le Agaga. O na lagona o le a faamalosia ai lou faatuatua. Ao e toe faia lena mamanu o le a saga faamalosia lou faatuatua. E silafia e le Alii ou manaoga. Pe a e fesili atu ma le faamaoni ma le loto atoa, o le a Ia musuia oe e faia mea e te saga mafaia ai ona e galue i le faatuatua. Faatasi ai ma le saga faaaogaina pea o le faatuatua o le a avea lea ma malosiaga susulu, mamana, faagaeetia, ma le musuia i lou olaga. Ao e agai atu i talaatu o le mea e gata mai ai lou malamalama, ia faaaoga le faatuatua, o le faatuatua o lea taitaia oe ia maua tali semanu e te le mauaina. Ou te molimau atu ua ou iloa e moni.
E tusa lava foi pe e te faaaogaina lou faatuatua e aupito sili ona malosi, e le o taimi uma e vave tauia mai ai oe e le Atua e tusa ma ou manao. Ae o le a tali mai le Atua i le mea ua i ai i Lana fuafuaga e faavavau e sili ona lelei mo oe. E loloto ma atoatoa lona alofa mo oe, ma e le mafai ona iloa i lou tulaga faaletino. O le mea moni, pe ana mafai ona e iloa Lana fuafuaga atoa, o le a le mafai lava ona e ole atu i se mea e le ogatasi ma Lana fuafuaga, e ui lava ina faaosoosoina oe e ou lagona ia faia. O le faatuatua faamaoni e aumaia ai le malamalama ma le malosi e talia ai le finagalo o lo tatou Tama Faalelagi, pe afai e ese mai Lona finagalo mai o tatou manatu. Tatou te talia Lona finagalo ma le filemu ma le talitonuina ma le iloa o Lona atamai e le gata, e sili atu nai lo le mea e mafai ona tatou malamalama atoa ai i Lana fuafuaga e pei ona faaali auauai mai i lea taimi ma lea taimi.
O le faatuatua e le na o le oomia o se ki ma maua ai lau tali. Ua tautino mai e le Alii: “Ou te aoai atu ma sasa ia i latou uma ou te alofa i ai: o lenei, ia e vilivilitai, ma ia e salamo.”4 Sa saunoa mai Polika Iaga, “E lei tuuina mai e le Atua i luga o Ona tagata, po o luga o se tagata se toatasi, faamanuiaga sili atu e aunoa ma se tofotofoga sili ona faigata e suesueina ai i latou.”5 O au lava ia, o nisi o filifiliga taua na ou aafia ai i ni tauiviga matuai faigata, matuai tiga, na muamua mai i se tali mautinoa. Ae o na tofotofoga na avea o ni aoaoga. O se faamafanafanaga le iloa o le a le tofotofoina oe e le Atua e sili atu nai lo mea e te mafai ona onosaia faatasi ma Lana fesoasoani.
E faaaoga e le Atua lou faatuatua e fausia ai lou tagata. O ou uiga e faaalia ai le tulaga o le a avea ai oe. O uiga lelei ma malosi o se taunuuga o le tumau i le faia o filifiliga sao i tofotofoga ma faaosoosoga o le olaga. E mafai e lou faatuatua ona taitaiina oe i na filifiliga sao. O le mea moni lava, o au galuega ma ou mafaufauga e iloa ai lou ituaiga tagata ma le tulaga o le a avea ai oe. O le mea lea, o filifiliga e te faia e tatau ona musuia e le Alii. E mafai e isi ona uunaia oe e fai le faaiuga sa’o, peitai e le tatau ona fai mai e i latou na filifiliga. E manaomia ona e mafaufau loloto, tatalo, ma faaaoga le faatuatua e faia ai ma le naunautai filifiliga e ogatasi ma aoaoga a le Matai. O na filifiliga e faia ma le faalagolago i mea ua e faatuatua i ai, ma afai e te usitai i lena faatuatua, o le a faamaonia mai e moni. O ni taitaiga ua lava ma totoe ua tuuina mai e taitaiina tonu ai oe, ae e le mo le faavaivaia o lou tagata tuputupuae. O lena taitaiga o le a faamautuina ai lou faalagolago i le Tama Faalelagi ma le Faaola.
O le faatuatua na te fausia lou malosi lea e mafai ona e maua i taimi e manaomia faafuasei ai. O na uiga e le atiaeina i taimi o luitau maoae po o faaosoosoga. O le taimi lena e faaaoga ai. O uiga o se tagata e fausia i le tele o tausaga o le usiusitai i mataupu faavae ma mataupu autu. I le Iakopo tatou te faitau ai: “O le tofotofoina o lo outou faatuatua e tupu ai le onosai. A ia atoatoa le galuega a e onosai, ina ia atoatoa ai ma ia sao ona lelei ai outou, ia leai se mea e tasi e mativa ai.”6 O le faavae o uiga o se tagata o le faamaoni. O uiga agavaa o le a faamalosia ai lou malosi e tali atu ma le usitai i le taitaiga a le Agaga. O uiga amiotonu o le mea lena e avea ai oe. E sili atu lona taua nai lo mea ua e umia, i mea ua e aoaoina, po o a foi sini ua e ausia. E mafai ona faatuatuaina oe. O uiga amiotonu e maua ai se faavae o le malosi faaleagaga. E te mafai ai i taimi o tofotofoga ma faaosoosoga ona faia filifiliga tonu e faigata ma sili ona taua, e ui ina foliga mai e lofituina. Ou te molimau atu e le mafai e Satani po o se isi lava mana ona faavaivaia pe faaleagaina ou uiga tuputupuae. E na o oe lava e mafai ona faia lena mea, e ala i le le usiusitai.
O le fuafuaga a lo tatou Tama e ofoofogia. O le faaaogaina o lou faatuatua e fausia ai ou uiga. O ou uiga saunia e faateleina ai lou mafai e faaaoga ai le faatuatua. O le mea lea, o lou toa i le faatoilaloina o tofotofoga o le olaga o le a sili atu ona lelei. Ma e faaauau ai pea le taamilosaga o le malosi, e atili faamalosia ai lou faatuatua ao faamalosia lou tagata.
O le faaupuga faapea, “O le mea e te totogia o le mea lena e te maua” e tonu foi i taui faaleagaga. E te maua le mea sa e totogia i le usiusitai, i le faatuatua ia Iesu Keriso, i le faaaogaina ma le maelega o upumoni ua e aoaoina. O le mea e te maua o le a taitaiina ai lou tagata, faatasi ai ma le tuputupuae i le malosi, ma le faamaeaina ma le manuia o lou faamoemoega iinei i le lalolagi—ina ia tuputupu ae e ala i le tofotofoina.
E tusa lava pe o le a se mea e tupu, e tusa lava pe o le a le fenumiai e oo i ai le lalolagi, e mafai lava ona e maua le mana fesoasoani o le faatuatua. E le mafai ona suia lena mea. O le alofa atoatoa o lou Tama i le Lagi o le a le mafai lava ona suia. O le fuafuaga o Lana talalelei ua aumaia ai le faamoemoega i le olaga ma e mautinoa ai lou fiafia. O Lana folafolaga e le gata ina faaalia ai e mafai ona tatou faia filifiliga iinei i lenei lalolagi ae faapea foi ona e maua ai le tuputupuae lea e sau mai filifiliga sao e musuia e le faatuatua, ma mafai e ala i lou usiusitai.
Aisea la e popole ai i tofotofoga faigata o le lumanai po o le le mautonu i mea e le oo i ai lou malosi. O ou uiga amiotonu e faateleina ai le avanoa e te le mafatia ai i ia mea. Pe a oo mai luitau ma tofotofoga ia te oe, o le a taitaia oe e lou faatuatua i tali. O le toafilemu o lou mafaufau, o lou mautinoa o tali i faafitauli faigata, o lou fiafia sili e faamoemoe i lou faalagolago atu i le Tama Faalelagi ma Lona Alo o Iesu Keriso. O le a manumalo lava le mea tonu i le iuga. O le a aumaia ai faamanuiaga i le taimi nei ao e usiusitai ma le faatuatua i poloaiga a le Atua. Ia manatua e le faatoilaloina, e faaauau pea, ma e tumau pea le faapogai o le filemu ma le mafanafana e mafai ona e maua. O le mautinoa lea e alofa lou Tama i le Lagi ia te oe, e tusa lava pe o le a lou tulaga, e tusa lava pe o a ituaiga o tofotofoga, faaosoosoga, po o faigata e te oo i ai. O lena talitonuga e le mafai ona suia. O lou mafai e maua ai lena fesoasoani e faalagolago i le malosi o lou faatuatua ia te Ia ma Lona finagalo moni e faamanuia oe.
Ou te molimau atu o le faatuatua i le Atua ma Lana taitaiga e ala i le Agaga Paia o le a lagolagoina oe i se lalolagi ua faateteleina ona luitau. Ou te molimau atu o le faaaogaina o mataupu faavae ua tatou maua o le a fesoasoani ia te oe e maua ai le mana fesoasoani o le faatuatua i taimi o le le mautonu ma tofotofoga.
O le toatele o tagata ua siomia oe, o e ua fenumiai ma o loo sailia ni tali i faafitauli ogaoga o le olaga. Fetufaai atu lau molimau o le upu moni ma le mana o le faatuatua ia i latou? Fesoasoani ia i latou ia malamalama pe na mafai faapefea e le faatuatua i le Atua ma Ana aoaoga, sa toe fuatai mai i le atoatoa i le Ekalesia a Iesu Keriso o le Au Paia o Aso e Gata Ai, ona faamanuia ai olaga i le taimi nei, i nei taimi faigata. Molimau atu i ai e uiga i le mana o le Alii e faamanuia ai o latou olaga. Ia fai nei loa. O le a fesoasoani atu le Alii ia te oe. O le a taitaia ma lagolagoina oe e lou faatuatua. Ou te iloa o le a tupu lena mea. I le suafa o Iesu Keriso, amene.